SUPLEMEN PA MORIA GBKP TGL. 6 - 12 AGUSTUS 2023

Pdt. Larena br. Sinuhadji (Nd. ReyRapha Tarigan)

Nilai Spiritualitas

Si Man Ogen : Daniel 3:8-18

Tema : TETAP SETIA

Tujun : Gelah Moria :

- Meteh kesetian Sadrakh, Mesakh, Abednego man Dibata

- Nggelem kiniteken i bas kerina dampar kegeluhen

KATA PENARUH

Nggeluh setia i bas jaman genduari labo gampang. Mekatep luntur kesetianta ‘di kenca la bagi sura-suranta si terjadi. Maka rusur lit sibegi pepatah, “Ada uang abangku sayang, tak ada uang abang melayang”; “Teman tawa enterem tapi teman susah la piga”; rsd. Bagem sulitna ndarami kalak si setia. Termasuk kesetian ernalem man Tuhan. Mekatep kita setia ernalem man Tuhan asum bagi ukurta si jadi, asum teridah kuasa Dibata i bas geluhta bahkan tanda-tanda mujizat. Tapi adi kebalikenna, mekatep sipersoken ras sitadingken Tuhan.

Bahan PA Morianta sekali enda erlajar kita arah Sadrakh, Mesakh ras Abednego, i ja teluna kalak enda tetap setia man Tuhan, amin kai pe si terjadi.

MPEBAGESI PENGANGKAN KERNA OGEN 

Perikop si jadi bahan renungen lit i teruh judul besar “Iperentahken Nebukadnesar maka kerina kalak nembah man gana-gana emas” (terj. TB-LAI, “Perapian yang menyala-nyala”). Perikop enda ibenai alu perentah Raja Nebukadnesar erbahan sada gana-gana emas, gedangna 27m ras bertengna 3m (terj. TB-LAI, “patung emas yang tingginya 27 meter dan lebarnya hampir 3 meter”), si ipajekken i kendit Dura, propinsi Babilon. Bagi si enggo itenahken raja, maka pulunglah kerina kalak tupung acara penangkuhen gana-gana ndai, subuk raja-raja, gubernur-gubernur, wakil gubernur, wakil raja, bendahara, hakim-hakim, kepala daerah ras kerina pegawai-pegawai si deban si lit i bas propinsi-propinsi (para wakil raja, para penguasa, para bupati, para penasehat negara, para bendahara, para hakim, para ahli hukum dan semua kepala daerah). La ndekahsa lit si ermomo (bhs. Ind.: ajudan raja), maka asum terbegi sora terompet rikut sarune, murdap, gitar ras kulcapi, bage pe alat-alat musik si deban, maka kerina manusia i bas kerina bangsa-bangsa, suku ras cakap, arus minter nembah mungkuk kempak gana-gana emas si enggo ipajekken Raja Nebukadnesar. 

Kepeken momo ndai termasuk dalam rangka menjatuhken kalak Jahudi si taat, khususna Sadrakh, Mesakh ras Abednego, teman-teman Daniel (bhs. Ind. Ay. 8, “Beberapa orang Babel memakai kesempatan itu untuk mencelakakan orang Yahudi”). Kenca enggo ibegi Raja Nebukadnesar maka lit si melanggar perentah raja ndai, minter gara pernembeh ate raja dingen minter iperentahkenna kalak ndai teluna ngadap. Raja memastikan alu nungkun langsung man Sadrakh, Mesakh ras Abednego ras adi tetap melanggar maka teluna iukum mate i ja iambekken ku bas api ginuhur si gurlah. Janah lit i je secara tidak langsung kata-kata raja, si melecehkan (merendahkan) termasuk Tuhan si isembah Sadrakh, Mesakh, ras Abednego, “Akapndu kin lit dibata si ngasup engkelini kam?” Padahal i bas pasal sebelumna (Dan. 2:47), kenca enggo cukup puas Raja Nebukadnesar megiken penjelasen Daniel kerna mimpinna, Raja memuji Dibata Daniel. Ertina, i je enggo itandaina Dibata si isembah Daniel bagepe teman-temanna. Tapi genduari secara tidak langsung ia menentang Allah Israel. 

Penungkunen ras ancaman Raja Nebukadnesar labo erbahanca mbiar kalak enda. Bahkan tetap icidahkenna kesetianna. Ay. 17-18, “Adi ngasup kin Dibata si isembah kami e mulahi kami i bas api ginuhur si gurlah e nari ras i bas kuasandu nari, tentu ipulahiNa kami. Tapi adi lang pe, ietehndu min o Raja, maka la kami nggit nembah dibatandu, janah la kami nggit nembah mungkuk kempak gana-gana emas si enggo ipajekkenndu e." Jelas jawaban teluna kalak enda, ncidahken mbiaren kalak enda man Tuhan asangken man manusia. Janah kesetianna, labo hanya erkiteken lit mujizat, kuasa-kuasa si hebat, si icidahken Tuhan, termasuk la pe lit tanda sengget, tetap kalak enda setia ernalem man Tuhan. Walaupe kedungenna kisah enda berakhir alu happy ending, tapi tetap arus iinget, maka teluna kalak enda tetap ernalem man Tuhan walaupe la bagi ukurna mungkin saja terjadi. Sabab melala kisah enda iidah sebagai cerita mujizat si polana : umat Tuhan berada i bas bahaya maut, emaka kalak enda mindo penampat man Tuhan, Tuhan nampati ras umat selamat. Sekali nari, narasi berakhir alu happy ending, teluna teman Daniel selamat, tapi labo rikutken pola cerita mujizat i datas. Sadrakh, Mesakh ras Abednego labo memahami Allah sebage Allah si dahsyat, Allah penolong. Sadrakh, Mesakh ras Abednego tuhu-tuhu ngkelengi Tuhan tanpa lit sura-surana (tidak ada udang di balik bakwan). Meister Eckhart, i bas abad pertengahen, ngatakenca maka kita ngkelengi Tuhan labo erkiteken lit alasenta. Kita mencintai Allah karena kita mencintai. Bagi Tuhan Dibata si ngkelengi kita pe tanpa lit alasen ngkelengi kita. Jadi banci ikatakaken kita membalas cinta Tuhan alu cinta si labo lit alasenna.

Versi Audio Silahkan Klik : https://youtu.be/XHfuVRlktYQ

PENGKENAINA

Labo hal si mudah tetap setiap i bas kerina dampar geluhta. Mekatep kita tetap setia asum lit pertolongen Tuhan, mujizat bas Tuhan nari. Tapi adi kebalikenna, pasti lit rusur pernyataanta, “Ija kin Dibata e? Padahal aku enggo setia, tetap aku melayani, uga makana la sampatiNa aku? Bahkan si mekatep terjadi, erkiteken jabaten, keduduken, perjabun mesunah kita nalihken kinitekenta. Emaka arus terus-menerus siajarken man anak-anak seh ku kempunta untuk tetap setia man Tuhan, aminna pe lit tawaren doni enda, tetap setia nandangi kinitekenna. Bahkan sekali pe bas kegeluhenta, la bagi sura-suranta si terjadi, enggo ndekah kita erjabu la lit pupus, pinakit mekelek si ialami kita la madan, ras melala denga pergumulen si deban tetaplah kinitekenta man Tuhan. La pe teridah kuasa Tuhan bas geluhta, la pe terjadi mujizat Tuhan bas geluhta, kita tetap setia ras ernalem man Tuhan.

La lit jaminen maka pengikut Kristus si setia, sikap perdalanen geluhna asangken kalak si deban. Tapi Tuhan mereken gegeh, pengarapen rikut serpang pulah, asum perbeben reh. Si paling penting man banta, i bas proses ndalani pergumulen bage pe keriahen ukur tetaplah sigelem kinitekenta, seh ngayak iiket kambal-kambalta. Bahkan sekali pe la isampati Tuhan kita i bas perbebenta si mberat nari, tetap ku Tuhan kita ernalem. Bujur tas mejuah-juah kita kerina.