SUPLEMEN PA MORIA GBKP TGL. 23 - 29 JULI 2023

Pdt. Larena br. Sinuhadji (Nd. ReyRapha Tarigan)

Single Parent

Si Man Ogen : 1 Timotius 5:3-16

Tema : NAMPATI DIBERU-DIBERU SI MBALU

Tujun : Gelah Moria :

- Meteh uga kecibal diberu si enggo mbalu.

- Nggit mperdiateken keperlun diberu si mbalu.

Metode PA : Sharing ras aksi

Penaruh

Tuhan Dibatanta keleng ateNa kerina manusia tanpa ibeda-bedaken, termasuk man diberu si enggo mbalu ras anak melumang. Bahkan piga-piga bagin Pustaka Si Badia ncidahken uga Tuhan tuhu-tuhu mperdiateken kegeluhen kalak enda (bdk. Mas. 68:6, “Dibata si ringan i bas inganNa si badia, IA bapa kalak si melumang dingen ngkawali diberu mbalu-mbalu.” Ul. 10:18, “IjagaNa tuhu-tuhu maka kebujuren idalanken nandangi anak-anak melumang ras diberu mbalu-mbalu”).

Tapi adi jujur kita, melala denga perlakuan diskriminatif (sebelah mata - tidak adil) man kalak enda. Melala kasus-kasus si terjadi i ja diberu mbalu-mbalu menjadi korban kesemena-menaan kalak si deban erkiteken statusna (tulisan online Media Indonesia, Benny Bastiandy, kerna kesaksian sekalak janda Tika Kartka, alu judul “Mematahkan Diskriminasi Janda”). Ndalani kegeluhen sebage single parent labo murah. Stigma negatif rusur ilekatken man sekalak diberu si enggo mbalu. “Hati-hati sama janda bisa merusak rumah tangga orang.” Emaka rikutken bahan PA-ta sekali enda, erlajar kita arah nasehat Paulus man Timotius, uga kin arusna sikap kalak si enggo mbalu, ras kai ka tanggung jawabta man diberu si enggo mbalu.

Mpebagesi Pengangkan Kerna Ogen 

Perikopta i teruh judul “Lagu langkah kalak Kristen” (mulai ay. 3 lit judul tersendiri “Mengenai Janda”). Perikop enda merupaken nasehat Paulus man Timotius sebagai pemimpin perpulungen paksa si e gelah banci tetap mperdiateken ras ngelai perpulungen alu la erayo-ayo, khususna man kalak si enggo mbalu (jangan ada yang terabaikan). Walaupe labo hal si mesukah guna ilakoken, tapi enda enggo menjadi sada tanggung jawab si arus idalanken Pemimpin Jemaat. I jenda Paulus membagi kalak si enggo mbalu alu 3 kategori.

Si pemena, ay. 3, si lanai ersima-sima (terj. BIMK, “Janda-janda yang benar-benar hidup seorang diri”). Sikap perpulungen arus mehamat (menghormati), si banci iertiken ngergaken, mperdiateken, ngelitken keperlun geluhna. Sabab ia erpengerapen ngenca man Dibata, ertoto ia man Dibata suari ras berngi. Ertina, kita me perpulungen sebage perpanjangen tan Dibata.

Si peduaken, ay. 4, Diberu si mbalu si lit denga keluargana (anakna, kempuna). Diberu si bage arus ndatken kekelengen (tanggung jawab) arah anak entah kempuna sebage bentuk ungkapan syukur (terj. Bhs. Karo, “ersimulih.” Terj. TB-LAI, “balas budi”), sabab si enda me si ngena ate Dibata (bdk. pedah pe-5-ken i bas 10 Pedah guna mehamat man nande bapa).

Si peteluken, ay.6-7; 9-15, diberu si mbalu si nggeluh guna pesenangken dirina saja (terj. BIMK, “Janda yang suka hidup bersenang-senang”), secara finansial cukup ras banci ikataken nguda denga, lenga dem umurna 60 tahun. Jelas Paulus ngatakenca diberu si mbalu si hanya nggeluh guna pesenangken dirina saja ngenca, ia situhuna enggo mate, aminna pe ia nggeluh denga. Ilumbaken Paulus, kalak enda arus nggeluh alu la erpandangen. Perdalinenna tetap min bagi si ngena ate Dibata. Bahkan secara khusus si lenga dem umurna 60 tahun, usul Paulus ula lebe suratken gelarna i bas gelar-gelar kalak si enggo mbalu. Ay. 9, 11, sabab banci denga tersereh ia mulihi. Adi banci sekali ngenca ia erjabu (Karo: “arus”). Labo memang kerina diberu mbalu si nguda denga la mehuli lagu langkahna bagi si tertulis i bas ay. 13, dahinna kirumah-kirumah alu la lit tujunna, cikurak, kepo - campurina urusen kalak ras icakapkenna si la perlu.

Sabab memang paksa si e i tengah Perp. Efesus, enggo isusupi ajaren sesat si mpengaruhi (memperdaya) diberu (bdk. ay. 15, “sabab lit piga-piga diberu si enggo mbalu papak jenari ikutkenna Iblis.” 2 Tim. 3:6, “Piga-piga kalak pagi i bas si e lawes kirumah-kirumah mpengaruhi diberu-diberu si kote kinitekenna, si mberat baba dosana dingen dem erbage-bage kerincuhen kula”). Ertina, godaan secara materi ras biologis banci erbahanca papak kalak mbalu si nguda denga si erbahanca ia nggeluh guna pesenangken dirina saja ngenca. Walaupe ndai lit saran Paulus sekali ngenca ia erjabu, tapi i bas dampar si deban ikatakenna ka, maka ulin erjabu adi nguda denga ia. Ipupusna anak-anak, ipekena-kenana jabuna, gelah kegeluhenna ola jadi batu antuken.

Versi Audio Silahkan Klik : https://youtu.be/FYkiAUFlBBM

Pengkenaina

Rikutken bahanta sekali enda, lit dua poin penting si jadi penekanan, subuk i bas kalak si mbalu bage kita (keluarga & perpulungen).

Diberu Si Mbalu :

• Teridahlah kualitas kinitekenna alu tetap ernalem man Dibata, ijadikenna Tuhan sebage ulu pengarapenna, alu tutus ertoto suari ras berngi.
• Kegeluhenna arus mereken usihen si mehuli; alu la nggeluh guna pesenangken dirina saja ngenca. Kepkepna jabuna alu mehuli, ras pe tetap ia banci jadi saluren berkat man kalak si deban alu nampati kalak si membutuhken penampat bas ia nari.

Man Banta Keluarga Ras Perpulungen:

• Khususna lebe man keluarga, adi lit orang tuanta si mbalu, kita sebage anak, permain, kela, kempu, arus tetap mperdiateken kegeluhen orang tuanta enda, sebage wujud pengataken bujurta man bana, ras kepatuhenta nandangi firman Tuhan. Bahkan jelas ndai firman Tuhan ngatakenca, adi la siperdiateken (sisia-siaken), enggo sipersoken kinitekenna. Jahaten kita asangken kalak si la tek man Jesus Kristus.
• Terlebih kalak si mbalu si la lit sima-simana, enggo menjadi tanggung jawab perpulungen guna mperdiateken kegeluhenna (bdk. Perb. Rasul 6, i ja erkiteken lit ketiakadilen - sikap rayo-ayo - paksa si e man diberu si mbalu si make cakap Junani, i ja lebih iprioritasken si make cakap Jahudi, maka kedungenna ipilih 7 kalak nari si nampati dahin Rasul khususna mperdiateken keperlun kalak si mbalu). Ertina i jenda, seh kel pentingna i bas kita mperdiateken diberu si enggo mbalu terlebih si la lit sima-simana ras secara ekonomi la megegeh.

Benaken i bas Padan Si Ndekah (PL) maka firman Tuhan mpersingeti kita gelah arus mperdiateken kegeluhen diberu si enggo mbalu (bdk. Ul. 24:19, i bas rani, tadingken deba guna kalak pertandang, anak melumang dingen diberu mbalu-mbalu). Ras tugas tanggung jawab enda terus seh ku Padan Si Mbaru (PB) bahkan seh ngayak gundari. Banci jadi enggo nge kita Moria nampati diberu-diberu si mbalu si secara khusus la lit sima-simana ras la megegeh secara ekonomi. Tapi dahin kekelengen arus terus menerus sitingkatken, ula hanya bas Natal, Paskah, tapi adi banci secara kontinyu, tetap siperdiateken kegeluhenna subuk secara secara materi, mereken semangat (motivasi), ngapulisa, mpegegehi kinitekenna, rsd. Kehadiren gereja arus tetap ernanam man kerina perpulungen bage pe kalak si deban. Ula lit perpulungen si iabaiken (sengaja) entah terabaiken (la sengaja), kerina ngaloken perhatian ras dukungen. Sabab gereja eme kula ni Kristus, arus teridah tetap i je biak sikeleng-kelengen ras sisampat-sampaten, terlebih si megegeh nampati si kurang megegeh.