SUPLEMEN PA MORIA GBKP TGL. 16 - 22 JULI 2023

Pdt. Larena br. Sinuhadji (Nd. ReyRapha Tarigan)

ENTERPRENEURSHIP

Si Man Ogen : Perbahanen Rasul 20:32-35

Tema : MEJINGKAT ERDAHIN

Tujun : Gelah Moria :

- Meteh Rasul Paulus mejingkat erdahin guna ncukupken keperlun geluhna

- Ngusih cara nggeluh Paulus i bas erdahin

Penaruh

Manusia rusur isebut homo faber entah pe makhluk pekerja. Sekalak psikolog Amerika Serikat nari Abraham Maslow ngatakenca bekerja adalah aktualisasi diri manusia. Aktualisasi diri biasanya tercapai ketika seseorang telah melampaui kebutuhan dasar seperti sandang, pangan, dan papan. Aktualisasi diri adalah menerima keadaan di mana individu dapat menggunakan sepenuhnya kemampuannya sendiri sambil terus menggali apa yang kurang pada dirinya.

I bas PA sendah radu ras kita erlajar kerna aktualisasi diri Rasul Paulus i bas erdahin erpalasken kinitekenNa man Dibata i bas Yesus Kristus. 

Mpebagesi Kata Dibata

Ogenta sendah lit i teruh judul perikop “Kata-kata perpisahan i bas Paulus nari man Pertua-pertua i Epesus.” Kenca enggo pembarken Berita Si Meriah kerna Yesus Kristus sebage Tuhan ras Juruselamat i piga-piga ingan i Propinsi Asia (Epesus, Makedoni, Akaya, Troas, Miletus) iterusken Rasul Paulus perdalanenna ku  Jerusalem. Sope berkat ku Jerusalem Miletus nari, idilo Paulus pertua-pertua Epesus guna nehken kata-kata perpisahan.

Lit piga-piga pesan penting si isehken Rasul Paulus man pertua-pertua Epesus. Tapi i bas kesempaten enda hanya fokus ku bas ay. 32-35. I bas ogenta sendah Rasul Paulus mereken teladan man pertua-pertua Epesus i bas hal-hal si sifatna materi i bas pelayanen. I bas dahin-dahin pelayanen si ilakonenna, khususna i bas dahin meritaken Berita Si Meriah, labo idarami Paulus kinibayaken entah pe keuntungen secara materi. Amin pe situhuna i bas kapasitas ras jabatenna sebage rasul, banci nge idatkenna kinibayaken entah pe keuntungen secara materi. Tapi la ilakokenna. Sebalikna justru Paulus mejingkat erdahin guna keperlun geluhna ras teman-temanna bage pe guna nampati kalak musil.

Rikutken Perb. Rasul 18:3 itulisken maka dahin sampingan Paulus e me erbahan tenda. Ikataken dahin sampingan (part time) erkiteken dahin utamana e me meritaken Berita Si Meriah. Ertina banci ikataken enggo lanai lit waktu si terbuang pecuma i bas kegeluhen Paulus sebab i tengah-tengah kesibuken dahinna sebage per-Berita Si Meriah, adi lit sitik waktu luang, i je maka ipakekenna waktu si lit guna erbahan tenda, mungkin guna idayaken entah pe guna media pelayanenna. I jenda nari tentu turah penungkunen, apakah Paulus la ngaloken hakna sebage sekalak rasul? Rikutken 2 Kor. 11:8-9 Paulus ngaloken tunjangen arah perpulungen-perpulungen nari guna keperlun geluhna bage pe guna keperlun pelayanenna. Tapi i bas si e, labo lit paksaan i bas perpulungen-perpulungen mereken dukungen materi, kerinana ibereken perpulungen alu sukarela ras meriah ukur.

Jadi kai maksudna i jenda mejingkat Paulus erdahin? Si pemena maksudna jelas maka Paulus labo jelma perkisat, labo Paulus milih-milih dahin, janah labo Paulus tipe kalak si suka menunda-nunda pekerjaan. Kai pe dahin si lit i lebe-lebena mis idahikenna alu tutus ras mejingkat. I bas waktuna er-Berita Si Meriah, mis idahikenna alu tutus ras mejingkat. I bas waktuna melayani perpulungen, mis idahikenna alu tutus ras mejingkat. I bas waktuna erbahan tenda, mis ibahanna alu tutus ras mejingkat. Labo nggit Paulus jadi beban perpulungen i bas ia ndahiken dahin pelayanenna bage pe guna ncukupken keperlun geluhna. Apai ka memanfaatken jabatenna guna mpepulung kinibayaken.

Si peduaken, rikutken Fil. 4:11-13 & 1 Tim. 6:8 jelas maka beluh Paulus mengelola kiniliten materi alu mehuli seh makana finansial si lit i bas ia banci ipergunaken secara efektif ras efisien guna pelayanen bage pe guna keperlun geluhna. Selain beluh ia mengatur si lit i bas ia, Paulus pe beluh mengatur waktu alu mehuli seh makana la lit waktu si terbuang percuma.

Si peteluken, tek Paulus maka Dibata pasti ncukupken kerina keperlun geluhna (bdk. Fil. 4:19). Akap kami enda si jadi palas kiniteken maka pang Paulus ngatakenca i bas ay. 35 nina, “Malemen kap ate mere asangken ngalo.”

Versi Audio Silahkan Klik : https://youtu.be/aiNlEhx8GYQ

Pengkenaina

PA-ta sendah mulihi ngingetken kita kerna tugas tanggung jawabta erdahin guna kemulian gelar Dibata. Kita erdahin labo terjeng sebage bentuk tanggung jawab atas anugerah si rehna i bas Dibata nari, kita erdahin erkiteken ngusih Dibata. Dibatanta si isembah kita erdahin lalap, labo saja i bas IA nepa doni ras kerina isina, tapi seh ngayak gundari pe ikawali ras isampatiNa kita (bdk. Joh. 5:17).

Rata-rata dahin Moria e me IRT (Ibu Rumah Tangga), amin pe gundari enggo melala Moria si berprofesi sebage guru, dokter, ASN, perawat, bidan, pendeta, rsd. Kai pe profesinta, banci siusih Paulus i ja beluh ia ngaturken waktu ras materi si lit i bas ia guna ncukupken keperlun geluhna bage pe guna pelayanen. Memang labo hal si murah, sebab tanggung jawab i bas rumah tangga saja pe enggo cukup mbue memakan waktu ras tenaga. Tapi i bas si e, iajuk kita gelah ola perkisat, milih-milih dahin, entah pe menunda-nunda pekerjaan. Kai pe dahin si lit i lebe-lebeta, marilah mis sidahiken alu tutus ras mejingkat.

Adi sempat kita erbahan dahin sampingan (part time), puji Tuhan! Adi lang pe, si paling penting leben kita ngataken bujur man Dibata i bas kai pe si enggo ipercayaken Dibata man banta. Pindolah gegeh i bas Dibata nari gelah ipengasupNa kita ndahiken kerina dahin si enggo ipercayaken Dibata man banta termasuk dahin-dahin pelayanen i Gereja. I bas kita mejingkat erdahin teklah kita maka Dibata alu caraNa ncukupken kerina si jadi keperlun geluhta. Dibata si masu-masu kita kerina.