SUPLEMEN PJJ GBKP TGL. 16 - 22 JUNI 2023

Pdt. Larena br. Sinuhadji (Nd. ReyRapha Tarigan)

DIBATA NGINGET KELENG ATENDU

(Heber 6:9-12)

Penaruh

Lit  peribahasa Tiongkok nari nina, “Perjalanan seribu langkah dimulai dari satu langkah.” Peribahasa enda ncidahkenca man banta maka seh kel pentingna langkah si pemena i bas ngelakoken kai pe. Langkah si pemena e maun erbahanca kita mbiar entah pe ragu, tapi adi la lit langkah pemena, la kita seh ku japa pe. Ertina hal-hal si mbelin i bas geluhta ibenaken alu awal si sederhana, e me mulai melangkah.

Perpulungen-perpulungen i ja surat Heber enda itujuken pe sangana i bas proses melangkah lebih jauh i bas kinitekenna. E maka tujun surat enda eme guna mpegegehi ras memotivasi perpulungen gelah semakin dewasa i bas erkiniteken.

Mpebagesi Kata Dibata 
 
Surat Heber itujuken man perpulungen-perpulungen kalak si tek si berlatar belakang Yahudi i bas perantauan. La nari tersinget ise gelar penulis surat enda, lit si ngatakenca Paulus, Apolos, Filipus, tapi si pasti si nuliskenca i bas kalangen per-Berita Si Meriah nari entah pe pemimpin-pemimpin Kristen paksa si e. 

Adi sioge bindu 5 ras 6, sope si jadi ogenta sendah, banci sioge maka penulis surat Heber enda mpersingeti perpulungen alu keras. Engkai maka bage? Sebab pengarapen man Kristus enggo mulai bene janah lit perukuren i bas perpulungen guna nadingken kiniteken man Yesus Kristus (murtad, ay. 6). Kiniteken perpulungen paksa si e banci ikataken jalan di tempat, entah pe la bertumbuh alu mehuli. Situasi si bage rupana terjadi erkiteken penganiayaan si mberat. Tapi amin bagi danak-danak denga kiniteken perpulungen e (bdk. Heb. 5:11-12), penulis surat Heber ngidah lit denga hal si mehuli i bas perpulungen kalak si tek paksa si e. 

I bas ay. 9-10 teridah hal si positif si lit i tengah-tengah perpulungen. Ikataken nina, “Tapi o senina-senina si ikelengi kami, amin bage gia ikataken kami, kerna kam tek nge kami maka lit i bas kam si terulin si lit pertalinna ras keselamatenndu. Dibata bujur nge. Labo pagi ilupakenNa dahin si enggo idahikenndu e. IingetNa nge keleng atendu nandangi IA, si icidahkenndu arah nampati teman-temanndu kalak Kristen, subuk si enggo idalankenndu bage pe si paksana idalankenndu.” 

Jelas teridah maka amin pe melala tantangen si ialaken perpulungen paksa si e, tapi lit denga perpulungen e setia nehken keleng ate alu penampat (dukungan dana) si isehken man perpulungen-perpulungen i bas ingan si deban. Kai si ilakoken perpulungen e tuhu-tuhu ipujiken penulis surat Heber janah isingetken maka la ilupaken Dibata kerina si mehuli si enggo ilakoken perpulungen paksa si e. E maka penulis surat Heber ngajuk gelah si mehuli e tetap ilanjutken. 

Penulis surat Heber makeken si mehuli ndai jadi motivasi man perpulungen gelah ula bene pengarapen ras kinitekenna. Adina dahin pelayanen erpalasken keleng ate man Kristus ngasup denga ilakokenna, enggo pasti i bas erpengarapen man Kristus pe ngasup ilakoken perpulungen. E maka nina i bas ay. 11, “Ngarap kami gelah kerina kam tetap ergiah-giah ukurndu, gelah kai si iarap-arapkenndu e ialokenndu pagi dungna.” I bas terj. TB-LAI nina, “Tetap kami ingin supaya kamu masing-masing menunjukkan kesungguhan yang sama untuk menjadikan pengharapanmu suatu milik yang pasti sampai pada akhirnya.”

Janah gelah banci melangkah ku tahap berikutna i bas erkiniteken, penulis kitab Heber ngajuk perpulungen gelah ngusih kerina kalak si enggo leben erkiniteken, i ja kerina kalak ndai saber i bas nimai janji si enggo ipadanken Dibata. Hal si deban si penting, iajuk perpulungen gelah ula mekisat i bas terus erlajar kerna erkiniteken.

Versi Audio Silahkan Klik : https://www.youtube.com/watch?v=ikUntvmna8g

Pengkenaina

I bas Kristus kai pe si mehuli si sue ras peraten Dibata si ilakoken kita, tek kita pasti iperhitungken Dibata. Akap kami enda jadi gegeh i bas kita tetap erbahan si mehuli amin pe mungkin melala tantangen ras kiniseran si nihadapi kita. Banci jadi, pengalamen mbuena perbeben ras kiniseran erkiteken kiniteken man Yesus Kristus  erbahanca kita ragu untuk melangkah entah pe la nari kita nggit  ngelakoken si mehuli.

I bas PJJ-ta sekali enda, mulihi kita ipersingeti kerna tugas tanggung jawabta erbahan si mehuli i japa pe kita ringan. I tengah-tengah jabu, i tengah-tengah pendahinta, i tengah-tengah Gereja bage pe i tengah-tengah masyarakat. Engkai maka ikataken tanggung jawab? Sebage kalak si tek man Yesus Kristus, kita enggo leben ngaloken si mehuli i bas Dibata nari, e me keselamaten i doni bage pe i surga. E maka kerina si mehuli si ibahan kita e me tandana kita ngataken bujur man Dibata janah kinitekenta pe harus nyata i bas pengerana ras perbahanenta (kerina pengkebet geluhta).

Teruslah berbuat baik. Tuhanta ngidah kai si ilakoken kita ras melipatgandaken kai pe  si ibahan kita. Mother Teresa pernah mengatakan “Orang sering keterlaluan, tidak logis, dan sering mementingkan diri sendiri, bagimanapun maafkanlah mereka. Bila engkau jujur dan terbuka, mungkin saja orang akan menipumu, bagaimanapun jujur dan terbukalah. Kebaikan yang kita lakukan hari ini, mungkin saja besok sudah dilupakan orang bagaimanapun berbuat baiklah.” Banci jadi asum kita erbahan si mehuli, lit si berprasangka negatif,  bagaimanapun tetaplah berbuat baik. Berikan yang terbaik dari diri kita. Tidak mudah jadi orang baik, tapi tetaplah berbuat baik. Sebab arah perbahanen si mehuli silakoken kita, gelar Tuhan terpuji (bdk. Mat. 5:16).

Adi sedekah enda banci jadi lit denga si kita kurang peduli kerna erbahan si mehuli, kita lalap man ilayani, idahi, itotoken, sekali pe la pernah ndahi temanna sada perpulungen, la pernah notoken, la pernah mengunjungi kalak sakit rsd. Adi ipindoken guna melayani pe, entah jadi panitia, la pernah nggit. Adi lit denga kita si bage, e maka gundarilah waktuna kita melangkah lebih jauh i bas erkiniteken. Erlajar kita lebih dewasa i bas erkiniteken. Lit tugas tanggung jawabta i bas kita mewujudnyatakan keleng ate Kristus i japa pe kita. Dibata si mpegegehi kita.