PJJ GBKP Tgl. 19 - 25 Maret 2017

PJJ GBKP TGL. 19 - 25 MARET 2017

Nrs. Pdt. L. br. Sinuhadji (Bp. Rey Tarigan)

Tema : RUNGGU SI METUNGGUNG (Perb. Rasul 15:6-12)

Penjelasen Bahan Ogen & Renungen

Runggu rasul-rasul guna muat sada keputusen i bas kitab Perb. Rasul enggo piga-piga kali ilaksanaken. I bas Perb. Rasul 1:23-26, idatken sada keputusen maka Matias si gantiken Yudas. I bas Perb. Rasul 6:1-6, ibahan keputusen ipilih 7 kalak si khusus dahinna ngelaken pangan si tep-tep wari. I bas Perb. 13:1-3, idatken sada keputusen maka Barnabas ras Saul (Paulus) itetapken guna ndahiken dahin si enggo itetapken Dibata man bana. Runggu si igelari “sidang” rasul-rasul ras pertua-pertua lit i bas bahan ogenta sendah. I bas runggu entah pe sidang si ilaksanaken i Yerusalem enda ibahan erkiteken lit persoalen i bas perpulungen i Antiokia i ja lit pengajaren si ngatakenca maka kalak si labo kalak Yahudi si tek arus lebe isunatken bagi iaturken Undang-undang Musa maka terkelin ibahan Dibata (ay. 1-2).

I bas ay. 7 teridah maka lit dua pendapat si berbeda kerna persoalen sunat enda. Sada er-pendapat maka sunat enda iwajibken man kalak si tek si labo kalak Yahudi, si debanna er-pendapat maka aturen sunat enda labo wajib. Kalimat “ndekah ngerana, janah percakapen e lalap la erkedungen”, i bas Alkitab TB-LAI iterjemahken “sesudah beberapa waktu lamanya berlangsung pertukaran pikiran”, labo teridah kel maka situhuna lit je perdebatan si cukup sengit antara dua pihak si berbeda pendapatna enda. I bas Alkitab New King James Version iterjemahken “had been much dispute”, i bas Alkitab New Revised Standard Version nina, “had been much debate”, ertina i bas sidang entah pe runggu e lit je perdebaten, saling berargumen mempertahanken pendapatna masing-masing. Adi menurut pendapat kami rikutken alur percakapen i bas bahan ogenta, lit je dua kubu, kubu Jakup (senina Yesus) si mpertahanken kewajiben kerna sunat ras kubu Petrus si labo mewajibken sunat man kalak si tek si labo kalak Yahudi.

Leben Petrus ngerana mewakili kelompok si labo mewajibken sunat man kalak si tek si labo kalak Yahudi (ay. 8-11). Intina, lit i bas ay. 11, nina Petrus, “tek kita, maka erkiteken lias ate Tuhan Yesus kita terkelin bali ras si labo kalak Yahudi”, ertina sunat e labo menentuken keterkelinen kalak si tek tapi erkiteken lias ate Tuhan Yesus. Kenca enggo ngerana Petrus, maka sinik kerina kalak si pulung e. Sinik i jenda maksudna kerina si pulung rukur i bas pusuh perukurenna masing-masing. I bas sada tafsiren ikataken nina, kai si ikataken Petrus e “menjernihkan suasana dan mempersiapkan pikiran dan hati untuk mengambil keputusan bersama”. Ertina i bas proses runggu entah pe sidang enda si niutamaken e me “hati dan pikiran yang jernih” asangken mpertahanken pendapat secara irasional ras emosional janah la nggit ngakuken kebenaren pendapat kalak si deban secara objektif. I bas suasana pusuh perukuren si bersih e maka banci ibegiken pendapat Barnabas ras Paulus. Tek kita maka Kesah si Badia erdahin mereken pusuh perukuren si bersih i bas sidang enda.

Kenca Petrus, Barnabas ras Paulus ngerana, maka seh ku giliren Jakup (Yakobus) ngerana mewakili kelompok si mewajibken sunat man kalak si tek si labo kalak Yahudi bagepe aturen-aturen si deban sue ras Undang-undang Musa (ay. 13-21). Intina i bas ay. 19-21, “Adi kuakap, ola sisusahi si labo kalak Jahudi si enggo erpengendes man Dibata e. Tapi sibahanlah surat man bana gelah ola ipanna pangan si la bersih si enggo ipersembahken man dibata-dibata palsu; gelah ola ia erlagu la mehuli; gelah ola ipanna dareh ntah asuh-asuhen si mate la perbahan igeleh. Sabap nai nari Undang-undang Musa iberitaken i tep-tep kuta, janah seh asa genduari iogeken i bas rumah pertoton tep-tep wari Sabat kalak Jahudi”. Teridah maka ialoken Jakup pendapat kerna sunat si labo wajib hukumna man kalak si tek si labo kalak Yahudi. Tapi lit denga aturen-aturen rikutken Undang-undang Musa si arus ilakoken kalak si tek si labo kalak Yahudi. Adi rikutken 1 Kor. 8:1-13, teridah maka aturen kerna pangan-pangan enda arus ilakoken alu pertimbangen gelah ula jadi batu antuken si mempengaruhi kiniteken kalak si tek si deban.

Kai si ikataken Jakup e ialoken peserta sidang alu bulat ukur, enggo ersada arih rasul-rasul ras pertua-pertua erbahan dua keputusen i bas sidang e : 1) Aturen kerna sunat rikutken Undang-undang Musa labo wajib man kalak si tek si labo kalak Yahudi. 2) Ola pan pangan si enggo ipersembahken man dibata-dibata palsu; ola pan dareh; ola pan asuh-asuhen si mate la igeleh; janah ola erlagu la mehuli. Bagem akhirna keputusen e ipeseh alu surat si ibaba utusen si berkat ku Antiokia, janah ilaksanaken i tengah-tengah perpulungen Antiokia. Ula kita lupa maka lit je kuasa Kesah si Badia i bas sidang rasul-rasul ras pertua-pertua enda. I bas ay. 28 ikataken i bas surat si ipeseh man perpulungen i Antiokia nina, “Enggo itetapken Kesah si Badia”. I bas runggu-runggu si debanna pe (Perb. Rasul 1:23-26; 6:1-6; 13:1-3) teridah je peran Kesah si Badia.

Tema si seh man banta e me “Runggu alu metunggung”. Metunggung i jenda tentuna metunggung sue ras Kata Dibata. Adi rikutken Buku PJJ-nta, runggu si imaksudken i jenda e me runggu i bas gereja, entah pe rapat-rapat bage pe sidang-sidang si ilakoken i bas gerejanta, i bas rangka nikapken perpulungen bengket ku bas Musyarawah Ngawan. Runggu si metunggung rikutken peradaten kalak Karo banci iogenndu i bas Buku PJJ-nta. Runggu si metunggung i bas persidangen, rapat-rapat, musyawarah i bas gerejanta, erlajar kita arah runggu rasul-rasul nari sue ras bahan ogenta sendah :

1) Arus tek kita maka Kesah si Badia erdahin i bas persidangen, rapat-rapat, entah pe musyawarah si nilakoken i bas gerejanta. Kesah si Badia erdahin guna tujun pembangunen kula ni Kristus bagepe kemulian gelar Dibata. Pengakun kerna kuasa Kesah si Badia enda erbahanca pusuh perukurenta bersih i bas kita ngikuti sidang, rapat-rapat, entah pe musyawarah, la lit je tujun guna kepentingen-kepentingen si menguntungken diri sendiri, apai ka agenda-agenda terselubung. Kerinana guna kemajun pembangunen gereja Tuhan ras guna kemulian gelar Dibata.

2) Perlu isedari kita maka i bas persidangen, rapat-rapat, entah pe musyawarah, adi lit je perdebaten, erargumen, bahkan mungkin agak memanas sitik suasana, e me hal si biasa. Hal si la biasa ras si la metunggung e me mpertahanken pendapat secara irasional ras emosional janah la nggit ngakuken kebenaren pendapat kalak si deban secara objektif. Janah megelut kita adi la ialoken pendapatta. Emaka perlu kita erlajar rukur secara objektif, erlajar kita gelah reh beluhna mengendaliken emosi, erlajar kita megiken alu saber pendapat kalak si deban, ras erlajar meteruk ukur ngakuken maka pendapat kalak si deban si lebih payo ras mehuli asangken pendapatta. Pedomanna e me Kata Dibata ras aturen-aturen si lit i bas gerejanta.

3) Keputusen si enggo iputusken i bas sidang-sidang, entah pe rapat-rapat, e me keputusenta ras-ras. Radu ras ertanggung jawab kita kerna keputusen-keputusen e. Sebab maun si terjadi, erkiteken keputusen e labo pendapatta, “cuci tangan” kita ‘di kenca reh penungkunen-penungkunen kerna keputusen e, i bas istilah si deban “buang badan”. Maun si terjadi la beluh kita nempatken posisinta, adi posisi Serayan kita i tengah-tengah perpulungen sedarilah maka posisinta sebage Serayan si enggo sada arih i bas erbahan keputusen-keputusen e, ertina ula ka simentahken mulihken keputusen-keputusen si enggo iputusken. Adi la iteh kita kerna keputusen-keputusen si enggo iputusken erkiteken la kita reh ku bas sidang, langkah si metunggung e me nungkun kita lebe man Serayan si deban gelah sada pengidahta. Amin pe la sue ras pendapatta, kai pe keputusen-keputusen si enggo iputusken i bas sidang entah pe rapat-rapat, sidukunglah lebe, adi umpamana i bas pelaksanaanna ternyata lit je si perlu siperobahi, banci ka ulihi sicakapken i bas sidang entah rapat berikutna.

4) Kerina keputusen si enggo iputusken tentuna arus silaksanaken. Mungkin enggo situnjuk ise-ise saja si ertanggung jawab guna ngelaksanaken keputusen-keputusen sidang entah rapat. Enda tentuna perlu ka sisampati adi umpamana lit kendala-kendala i bas pelaksanaanna. I bas si e tentuna si iperluken e me : saling peduli, kerja sama si mehuli, ras keterbukaan sada ras si debanna. Sebab maun si terjadi, pelaksanaan keputusen sidang entah rapat la erdalan erkiteken lit kendala-kendala, tapi si ertanggung jawab la nggit terbuka kerna si e, kedungenna keputusen-keputusen e terhambat pelaksanaana, la sue ras target si enggo itentuken, rsd. Evaluasi secara rutin pe perlu gelah siteh perkembangen pelaksanaan keputusen-keputusen e.

5) Cermat i bas hal-hal si sifatna teknis si maun kurang iperdiateken. Umpamana, kerina keputusen sidang perlu si-notulensi alu rapi, hasilna sibagiken ku kerina peserta sidang entah rapat gelah ula lupa. Piga-piga keputusen si perlu iteh perpulungen tentuna perlu sisosialisasiken man perpulungen secara periodik gelah tuhu-tuhu idukung perpulungen i bas pertoton bage pe i bas pelaksanaanna. I bas hal enda tentuna perangkat-perangkat administratif gereja perlu sikelola alu mehuli.

Ertoto kita gelah reh beluhna kita erbahan runggu si metunggung sue ras peraten Dibata gelah reh majuna pembangunen kula ni Kristus bagepe reh termuliana gelar Dibata i bas Yesus Kristus. Dibata si mpegegehi kita. Kerna penungkunen i bas diskusi si lit i bas Buku PJJ-nta, akap kami duana sifatna informatif, labo bersifat penggejapen. Jawabenna banci iogenndu i bas Buku PJJ-nta. Penungkunen si pemena lit jawabenna i bas hlm. 46-47, si peduaken lit i bas hlm. 48. Mungkin perlu ka sisikapken usulen-usulen si membangun si banci sibaba ku bas Musyawarah Ngawanta man banta si lenga ilaksanaken Musyawarah Ngawan i bas Runggunta masing-masing. Janah ertoto kita gelah perdalanen Musyawarah Ngawan i bas kerina Runggun banci erdalan alu  mehuli. Melala usulen-usulen si membangun, janah kerina usulen-usulen e banci jadi acuan si meherga guna siputusken i bas Sidang Runggun i bas Runggunta masing-masing.

Man banta Sn./Tr. si la lit Buku PJJ-nta, penungkunen i bas diskusi e me:

1) Orat geluh si kuga nge si lit i bas rasul-rasul ras pertua-pertua tupung ngelakoken sidang i Jerusalem?

2) Orat geluh si kuga saja nge si arus lit i bas kalak si ikut/peserta i bas runggu/sidang maka banci icidahken runggu si metunggung?