Khotbah GBKP Minggu Tgl. 26 Maret 2017

KHOTBAH GBKP MINGGU TGL. 26 MARET 2017

Pdt. Larena br. Sinuhadji (Nd. Rey Tarigan)

MINGGU PASSION 5 (Letare : “Teridahlah”)

(Warna Stola : Mbentar)

Invocatio : “Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna” (1 Samuel 16:7)

Ogen : Epesus 5:8-14 (Responsoria)

Khotbah : 1 Samuel 16:1-13 (Tunggal)

Tema : KAM IPILIH DIBATA, MERIAHLAH!

Penjelasen Bahan Pustaka Si Badia

Bahan khotbahta nuriken kerna proses pilihen Dibata man Daud anak Isai si bakal gantiken Saul jadi raja Israel. Lit 10 anak Isai rikutken 1 Kron. 2:13-16, si dilaki e me Eliap, Abinadap, Sammah, Natanael, Radai, Osem ras Daud. Lit anakna si dilaki sada nari la isebutken gelarna. Si diberu e me Seruya ras Abigail. Sue ras si enggo iperentahken Dibata man bana, berkat Samuel ku Betlehem guna ndahi Isai sebab enggo ipilih Dibata sekalak anak Isai guna jadi raja Israel. Kerehen Samuel i Betlehem ialo-alo peminpin-peminpin kuta alu nggirgir, sebab mbiar kerehen Samuel maba berita si la mehuli i bas Dibata nari erkiteken situasi politik Israel si la stabil paksa si e. Singkat cerita, Isai ras anak-anakna si dilaki (kecuali Daud) itenahken ku bas lakon persembahen. Mungkin tersungkun-sungkun Samuel i bas pusuhna, anak si apai si ipilih Dibata e? Erkiteken melala kepeken anak dilaki Isai. I bas pengakap ras pengidah Samuel anak Isai si ntua si bakal ipilih Dibata. Mungkin erkiteken Eliap (ras dua teruhenna) termasuk i bas anggota pasuken raja Saul (bdk. 1 Sam. 17:13). Janah i bas invocationta nari banci sibayangken uga tampilen fisik Eliap enda, gedang ras mejile rupana. Tapi seh ku anak Isai si pepituken, “Labo ia si Kupilih”, nina Dibata. Emaka nungkun Samuel man Isai, “Lit denga tole anakndu?” Lit denga kepeken anakna si nguda si tergelar Daud sangana ermakan biri-biri. Akhirna Daud si ipilih Dibata janah iminaki Samuel i lebe-lebe Senina-seninana sebage tanda penangkuhenna jadi raja Israel gantiken Saul. Kai si ilakoken Samuel e mungkin lenga iteh Senina-seninana kai tujunna, sebab i bas 1 Sam. 17:28 merawa Eliap man Daud nina, “Kam danak-danak si petua-tuaken! Ngenen-ngenen perang enda saja ngenca atendu ku jenda!”, mungkin em tandana lenga iteh Senina-senina Daud kai maksud Samuel maka iminakina Daud.

Invocationta ncidahkenca kriteria Dibata i bas IA milih kalak si ipilihNa, “Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna”. Jadi si pentingna i bas kriteria pilihen Dibata e me pusuhna. Amin pe Daud labo kalak si sempurna, tapi arah turi-turin kerna kegeluhenna, teridah maka Daud e me sekalak si tuhu-tuhu tek, mbiar ras patuh man Dibata. Melala ende-enden iciptaken Daud i bas kitab Masmur si ncidahkenca kerembakenna ras Dibata.

Bahan ogenta nuriken kerna pedah-pedah rasul Paulus man perpulungen Epesus si nggeluh i tengah-tengah masyarakat si lenga itandaina Yesus Kristus. Lit denga perpulungen Epesus si mayoritas labo kalak Yahudi enda, si kegeluhenna terpengaruh masyarakat i sekelewetna, nggeluh i bas kegeluhen si male. Adi sioge benaken ay. 1 ras 2, tegas je ikataken, “Erkiteken kam anak-anak kekelengen Dibata, usihlah IA. Geluhndu arus erpalasken keleng ate, bagi Kristus enggo engkelengi kita”. Ertina, kalak si tek man Yesus Kristus enggo ipilih Dibata jadi anak-anakNa. Identitas si mbaru enda tentuna arus ncidahken kegeluhen i bas Kristus si sue ras peraten Dibata. Rasul Paulus make istilah “i bas terang” (ay. 8) guna memperjelas geluh si mbaru i bas Kristus : Erbage-bage si mehuli, si bujur ras si tuhu-tuhu (ay. 9). Daramilah kai si ngena ate Tuhan (ay. 10), i bas terj. TB-LAI nina, “dan ujilah apa yang berkenan kepada Tuhan”, ertina bersikap kritis i bas kai pe. “Bukakenlah perbahanen-perbahanen kalak si gelap si sia-sia” (ay. 11-13), ertina perbahanen-perbahanen kalak si gelap ras si sia-sia e arus silawan alu perbahanen-perbahanen si terang si sue ras peraten Dibata. Jadi teridah bedana, kalak si tek si geluh i bas kegeluhen si mbaru i bas Kristus ras kalak si lenga itandaina Yesus Kristus. Ay. 14 e me kutipen i bas syair ende-enden si mungkin biasa iendeken perpulungen paksa si e rikutken Yes. 26:19; 60:1, ertina enda sada pengajuk rasul Paulus man perpulungen Epesus gelah tuhu-tuhu nggeluh i bas terang Kristus.

Pengkenaina

Baru denga kita ngelaksanaken Pemilihan Kepala Daerah. I bas piga-piga daerah mungkin masih denga lit proses Pemilihan Kepala Daerah. I bas kita milih Kepala Daerah i bas inganta masing-masing mungkin melala kita si lenga itandai kita alu mbages calon Kepala Daerah e. Tapi erkiteken enggo paksana kita milih, emaka terpaksa sipilih peminpin si lenga itandai kita rekam jejakna. Tapi mungkin melala ka kita si enggo leben sipelajari kerina rekam jejak calon peminpin e. I bas pengalamen-pengalamen sebelumna, mungkin melala kita si erkadiola erkiteken peminpin si ipilih kita kepeken la sue ras arapenta : la tegas, korupsi, permisif i bas hal-hal si merugiken rayat, kepentingen rayat la ibelana, la sada pe janji-janjina i bas kampanye si itepatina, rsd., upamana. Emaka nina salah sada politisi i bas tayangan salah sada stasiun TV, “Pemilu 2019 sangat menentukan untuk tidak memilih wakil-wakil rakyat di DPR yang saat ini jelas-jelas tidak membela kepentingan rakyat dengan berbagai manuver-manuver politiknya untuk membela kepentingan pribadinya atau partainya”.

I bas 1 Sam. 15:35 ikataken “Ceda kal ate Samuel erkite-kiteken Saul. Erkadiola kal TUHAN enggo ngangkat Saul jadi raja Israel”. Igambarken maka Tuhan erkadiola erkiteken enggo milih Saul sebage raja Israel. Gambaren enda tentuna labo imaksudken maka Tuhan e salah i bas erbahan keputusen, sebab gambaren e ibahan i bas sudut pandang kita sebage manusia si lit i bas kita perasaan erkadiola. Ertina gambaren enda situhuna ncidahkenca maka Saul sebage sekalak si enggo ipilih Dibata la makeken kepercayan i bas Dibata nari alu payo. Erkiteken si e, ipilih Tuhan Daud jadi raja Israel gantiken Saul. Si menarik i bas proses pemilihen Daud, e me kriteria Dibata i bas IA milih sekalak peminpin la seri ras kriteria Samuel. Bagi nina invocationta, inen Samuel kai si teridah sedangken Dibata inenNa si la teridah e me pusuh Daud. Hal si menarik si deban, kenca enggo ipilih Dibata Daud, rempet Daud ikuasai Kesah TUHAN janah mulai i bas wari e nari Kesah e tetap ras ia (1 Sam. 16:13). Ertina, tandana maka Daud enggo ipilih Dibata lit Kesah Tuhan i bas ia. Kenca enggo ipilih Dibata, ipengasup Kesah Tuhan ia, la isia-siaken Daud kepercayan si enggo ialokenna i bas Dibata nari, asa gegeh kengasupenna, patuh ras erpengendes ia man Dibata, ilakokenna kerina si jadi peraten Dibata amin pe labo sempurna kel turi-turin kerna kegeluhen Daud.

Tema si seh man banta i bas Minggu Passion pe-5-ken enda, “Kam ipilih Dibata, meriahlah!” Dibata enggo milih kita erkiteken kinitekenta man Yesus Kristus. La inen Dibata uga rupanta, uga status sosial ekonominta, la inen Dibata uga latar belakang geluhta, rsd., syaratna hanya ngakuken dosa-dosanta i lebe-lebe Dibata janah ngakuken Yesus Kristus sebage Tuhan ras Juruselamatta. Penungkunenna, sedar kita maka kita enda enggo ipilih Dibata jadi anak-anakNa? Adi sedar kita maka enggo iteh kita identitasta sebage pengikut Kristus. Ertina pilihen Dibata man banta labo terjeng ipilih kenca bage enggo dung. Daud tuhu-tuhu ipakekenna kepercayan si enggo ibereken Dibata man bana sebage raja Israel alu ndalanken kerina si jadi peraten Dibata i bas geluhna. Perpulungen i Epesus i bas ogenta pe isingetken rasul Paulus kerna identitasna sebage terang. Tentuna kegeluhenna kenca enggo jadi anak-anak Dibata arus lit bedana ras kegeluhen si male si nggeluh i bas gelap entah pe dosa.

I bas Minggu Passion pe-5-ken enda, “Letare” nina, ertina teridahlah. Kita pe mulihi isingetken kerna statusta, identitasta sebage kalak si enggo ipilih Dibata, emaka teridahlah terangta i tengah-tengah sekelewetta. Meriahlah erkiteken ipercaya Dibata denga kita guna jadi terangNa i tengah-tengah doni enda. Pilihen Dibata man banta tentuna mabai kubas konsekuensi ncidahken kerina si jadi peraten Dibata i bas kerina pengkebet geluhta. Janah ula kita lupa, Kesah si Badia lit i bas kita anak-anak Dibata. Berekenlah ruang i bas pusuh perukurenta bage pe i bas geluhta, gelah Kesah si Badia e tuhu-tuhu erkuasa i bas kita ncidahken identitasta sebage anak-anak Dibata si maba terang Krsitus. Tentuna melala tantangen si man hadapen, tapi tek kita maka Kesah si Badia si mereken serpang pulah i bas kerina perbeben entah pe kiniseran si nialami kita erkiteken ncidahken terang Kristus i tengah-tengah doni enda. Emaka marilah sipakeken waktu si lit bage pe kepercayan si enggo ialoken kita i bas Dibata nari alu nggeluh sue ras pendilonta sebage kalak si enggo iselamatken i bas Yesus Kristus. Pindolah gegeh i bas Dibata nari gelah ipengasupNa kita dalanken kerina si jadi peratenNa i bas geluhta.