PJJ GBKP Tgl. 5 - 11 Maret 2017

PJJ GBKP TGL. 5 - 11 MARET 2017

Pdt. Larena br. Sinuhadji (Nd. Rey Tarigan)

Tema : KESANGAPEN SEKALAK DIBERU (Hakim-hakim 4:4-10)

Penjelasen Bahan Ogen & Renungen

1. Marenda nari diberu rusur ipandang sebelah mata, irendahken entah ianggap manusia kelas dua. Doa pagi dilaki kalak Jahudi ikatakenna, bujur man Dibata, maka la ia itepa Dibata sebage budak, kalak kafir entah pe diberu. Sada hal si memaluken adi ipetubuh sebagai diberu. Padahal jelas, labo kita banci milihsa jenis kelamin kai sibaba asum kita tubuh ku doni enda. Kerina bekas pengaturen Tuhan. Kalak Jawa pe lit rusur pernyataan si merendahken diberu, maka diberu daerah kerjana hanya sekitar 3-ur : dapur, kasur ras sumur. Enda kerina terjadi erkiteken sistem budaya patriakal si lebih mengutamaken dilaki. Padahal jelas Dibata sendiri nepa manusia, dilaki ras diberu seri i lebe-lebe Dibata, ija lit tempas Dibata (segambar dan rupa Allah) i bas diri dilaki ras diberu. Dilaki ras diberu lit kelebihan ras kekurangenna sada ras si debanna, si arus keduana saling melengkapi.

2. Ogenta ngerana kerna perjuangen sekalak diberu si tergelar Debora. Debora ertina “lebah”. Ia sekalak diberu ibu rumah tangga sekaligus sebage nabiah ras hakim si erdahin i Israel. Konteks paksa si e, Israel itawan bangsa Kanaan enggo 20 tahun dekahna i teruh kepemimpinen raja Jabin ras panglima perangna Sisera si seh kel kejamna. I bas waktu si enggo isepakati, kundul-kundul ia i teruh batang kurma guna ngerunggui ras mutusken persoalen si ipesehken rayatna. Erkiteken situasi rayatna si semakin wari reh menderitana, emaka iperintahkenna Barak guna banci naluken panglima perang bangsa Kanaan, Sisera. Sada hal si menarik maka sebage pemimpin, Debora mereken kesempaten man si deban guna banci terlibat i bas nentuken masa depan bangsana. Ras enda memang perentah Tuhan, “Tuhan Dibata Israel mereken man bandu perentah enda, buatlah 10.000 kalak i bas suku Naptali ras Sebulon je nari babai ia ku deleng Tabor. Aku mabasa Sisera, puanglima tentera Jabin, ngelawan kam i Lau Kison. Ibabana gereta besina ras tenterana, tapi Kubereken man bandu kemenangen ngelawan ia”. Tapi Barak la nggit makeken kesempaten e, aminna pe enggo ipetetap Debora i bas ia ndahiken tugasna. La tetap ukur Barak adi Debora la ikut ras ia. “Aku lawes adi kam pe ikut aras aku, tapi adi kam la ikut, aku pe la nggit lawes”. Emaka nina Debora njawabsa, “Bage-bage! Ikut aku lawes ras kam. Tapi la kam dat kehamaten i bas kemenangen e, erkiteken Tuhan ngendesken Sisera ku bas tan sekalak diberu”. Debora sekalak pemimpin si lit bas ia kerembaken ras Tuhan bage pe sada keoptimisen. Tek kel ia nandangi kai si ikataken Tuhan, maka Tuhan pasti mereken kemenangen. Debora sebage perwakilen diberu paksa si e, maka Tuhan pe banci make sekalak diberu guna nehken sura-suraNa, mereken kemenangen man bangsa Israel.

3. Ula lebe memimpin pasukan perang, memimpin bas sada perusahaan, sada organisasi entah pe pelayanen gereja, melala kalak si meraguken kualitas sekalak diberu. Enda memimpin pasukan perang janah enggo radu ras sieteh kemampuan Raja Jabin ras tenterana si enggo menguasai Israel dua puluh tahun ras lit 900 gereta besina. Emaka Debora pe berekenna lebe kesempaten e man sekalak dilaki, Barak. Tapi Barak tidak punya nyali. Debora sekalak diberu, ibu rumah tangga, nabiah ras hakim bangsa Israel la mengandalken gegehna, tapi gegeh Dibata si enggo ernubuat man bana mpengasup Debora jadi pemimpin perang paksa si e. Ras Tuhan mereken kemenangen man Debora, aminna Jael nge si kedungenna membunuh Sisera (ay. 21).

4. Itepa Dibata diberu jadi penolong (Ibr. : ezer) man dilaki. Ngasup nge iakap Tuhan, maka ijadikenna diberu sebage penolong. Enda sada kesangapen, sabab umumna gegehen si nampati asangken si isampati. Debora ipake Tuhan guna nehken sura-sura Tuhan i bas mereken kemenangen man bangsa Israel guna naluken musuh-musuhna. Arah si enda, iajuk kerina diberu bangga jadi sekalak diberu si jadi penampat man kerina kalak. Sabab lit ka deba menyesal kalak i ja itepa Dibata ia jadi diberu arah erbage-bage hambaten, ras diskriminasi sialami diberu. Dilaki ras diberu arus memiliki pemahaman si seri maka la erdobahen dilaki ras diberu i lebe-lebe Tuhan ras arus saling melengkapi maka kegeluhen enda enggo kuh. Kesangapen e arus ipelihara alu tetap diberu meningkatken kualitas dirina, karakter si mehuli, mengikuti erbage pelatihen, makeken kesempaten alu mehuli asum ibereken guna banci berperan subuk i bas bidang politik, pemerintahen, keagamaan ras bidang-bidang si deban.

5. Tanggal 8 Maret e me Hari Perempuan Internasional, sada peringeten maka mbelin kepeken peran diberu si banci muat bagin pekena-kena kegeluhen jabuna, masyarakat, lingkungen i ja tading, rsd. Lit sada kisah i bas sada jabu i ja, perbapan ras anak-anak enggo menyerah erkiteken buena perbeben, tapi nande tetap berdiri paguh mereken semangat man seisi jabuna. Kebanggaan sebage diberu arus tetap sisyukuri ras ipakeken alu mehuli, ola sisalahgunaken. Sesama diberu arus kita saling menghargai, bage pe diberu ras dilaki sebab kita mitra kerja sama si ipake Dibata guna nehken sura-sura Dibata ku tengah-tengah doni enda.