PJJ GBKP Tgl. 26 Maret - 1 April 2017

PJJ GBKP TGL. 26 MARET - 1 APRIL 2017

Nrs. Pdt. L. br. Sinuhadji (Bp. Rey Tarigan)

Tema : KINIERSADAAN AJAR-AJAR YESUS (Yohanes 17:21-26)

Penjelasen Bahan Ogen & Renungen

Ogenta sendah lit i teruh judul “Yesus ertoto kerna ajar-ajarNa”, e me pertoton penutup kenca enggo Yesus nehken kata-kata perpisahan ras ajar-ajarNa sope IA itangkap, ngenanami kiniseran ras mate i kayu persilang. Adi sioge benaken ay. 1 nari, Yesus ertoto secara khusus guna ajar-ajarNa si 12 kalak (ay. 1-19), bage pe Yesus ertoto secara khusus guna kerina kalak si tek man baNa erdandanken Berita si ipeseh ajar-ajarNa (ay. 20-26). I bas pertoton Yesus guna ajar-ajarNa, mindo IA man Dibata gelah ajar-ajarNa : 1) Ay. 11-12, tetap ikepkep (bhs. Ind. : “dipelihara”), ikawali (bhs. Ind. : “dijaga”) ras ipersadaken Dibata alu kuasaNa. 2) Ay. 13, ibereken keriahen si tuhu-tuhu (bhs. Ind. : “sukacitaKu”). 3) Ay. 14-16, ikawali (bhs. Ind. : “dilindungi”) i bas si jahat nari. 4) Ay. 17-19, iserapken man guna Dibata arah kebenaren (bhs. Ind. : “dikuduskan dalam kebenaran Firman Tuhan”).

I bas pertoton Yesus guna kerina kalak si tek man baNa i bas paksa si reh erdandanken Berita si ipeseh ajar-ajarNa, mindo IA man Dibata gelah kalak si tek man baNa : 1) Ay. 21-23, ersada ras “Kita” (Dibata ras Kristus), bage pe tuhu-tuhu ersada sada ras si debanna, gelah tek doni enda maka Yesus Kristus e me utusen Dibata si dem alu kekelengen. 2) Ay. 24, i bas sada paksa kari tuhu-tuhu ersada ras Kristus i bas inganNa, gelah banci iidah kerina kalak si tek kemulian Dibata i bas keleng ate Dibata si la erkeri-kerin. 3) Ay. 25-26, keleng ate Dibata i bas Yesus Kristus tetap ras kerina kalak si tek, gelah keleng ate Dibata i bas Yesus Kristus e tetap terus iberitaken i tengah-tengah doni enda.

I bas dua pertoton enda tentuna labo menjadi perbedaan, duana itujuken man banta kerina kalak si tek man baNa, sebab kita nge si nggantiken tugas ajar-ajarNa si 12 kalak e guna er-Berita si Meriah ku belang-belang doni enda. I bas konteks Yesus paksa si e memang pertoton e itujuken secara khusus guna ajar-ajarNa si 12 kalak gelah tuhu-tuhu ersada sada ras si debanna erpalasken kiniersadaan si tuhu-tuhu ras Dibata i bas Yesus Kristus. Sebab i bas berita Injil usur ituriken kerna ajar-ajar Yesus si ersoal ras sapih-sapihna (bdk. Mrk. 9:34; Luk. 9:46); la tetap ukur ras kiam merap nadingken Yesus (bdk. Mrk. 14:27; Mat. 26:31). I bas konteks si bagenda rupana tentuna memang arus nge Yesus ertoto secara khusus guna kiniersadan ajar-ajarNa si 12 kalak gelah tugas utamana er-Berita si Meriah labo terganggu erkiteken la lit kiniersadaan sada ras si debanna.   

I bas pertoton Yesus guna ajar-ajarNa, bage pe guna kerina kalak si tek man baNa, teridah maka si jadi stressing point e me : 1) Kiniersadaan vertikal ras Dibata i bas Yesus Kristus erpalasken keleng ateNa. 2) Kiniersadaan horisontal ras sapih-sapihta kalak si tek man baNa. Si jadi penungkunen, engkai maka kiniersadaan enda jadi penekanen si penting i bas pertoton Yesus? Jawabenna, si pemena, kiniersadaan ras Dibata i bas Yesus Kristus erbahanca kinitekenta reh paguhna, lit pedoman si pasti i bas kegeluhenta si mabai kita ku bas keselamaten holistik ras kegeluhen si rasa lalap. Sebab memang i bas kinata geluh i doni enda mbelin kel kuasa Iblis si berusaha ncedai kalak si tek ras mabai ku bas kematen si rasa lalap. Emaka kiniersadaan ras Dibata seh kel pentingna man kalak si tek man baNa. Si peduaken, kiniersadaan ras sapih-sapihta kalak si tek man Yesus Kristus, si utamana labo kiniersadaan secara organisasi, tapi kiniersadaan si paguh ras otentik (tuhu-tuhu labo palsu) erpalasken kiniersadaan si payo ras Dibata i bas Yesus Kristus sue ras KataNa bage pe sue ras keleng ateNa si la erkeri-kerin. Ertina, adi la lit kiniersadaan si payo ras Dibata maka asa digan pe la lit kiniersadaan si tuhu-tuhu (otentik) ras sapih-sapihta kalak si tek man Yesus Kristus. Kiniersadaan si paguh ras otentik enda seh kel pentingna gelah doni enda tek maka Yesus Kristus e me Tuhan ras Juruselamat.

I bas salah sada tulisenna alu judul “Hati-hati! Gampang pecah!” (Seri Selamat, Selamat Berpadu), Pdt. Dr. Andar Ismail ngatakenca nina, “Gereja yang semula esa telah terpecah-pecah menjadi banyak aliran yang saling berbeda. Namun, pada hakikatnya semua gereja yang berbeda itu adalah esa sebab semua gereja itu adalah sama-sama pengikut Kristus. Agaknya Kristus sudah mengantisipasi bahwa para rasul dan penerusnya dalam abad-abad kemudian akan menghadapi persoalan skisma (perpecahan). Oleh sebab itu, sebelum berpisah, Kristus mendoakan para rasulNya dan generasi-generasi berikutnya (Yoh. 17:20-23)”. Kiniersadaan secara organisasi gereja-gereja i belang-belang doni enda enggo melala siupayaken nai-nai nari seh asa gundari, tapi lalap gagal. Mungkin palasna labo kiniersadaan si tuhu-tuhu erpalasken kiniersadaan si payo ras Dibata. Penyebab perpecahen si usur terjadi i bas gereja-gereja i belang-belang doni enda biasana erkiteken : 1) Pengajaren si papak si la sue ras Kata Dibata. 2) Lit kepentingen-kepentingen si sifatna pribadi entah pe kelompok. Tapi amin bage gia, mari radu ras sidukung kiniersadaanta ras gereja-gereja si deban i teruh organisasi Persekutuan Gereja-gereja di Indonesia (PGI), bagi semboyan si ipake organisasi mahasiswa Gerakan Mahasiswa Kristen Indonesia (GMKI) i bas bahasa Latin nari nina : ut omnes unum sint (supaya mereka semua menjadi satu), amin pe erbeda-beda latar belakang gerejanta, ersada kita i bas Kristus guna pembarken Berita Keselamaten i tengah-tengah doni enda.

Emaka erlajar kita arah perpecahen-perpecahen si enggo terjadi i bas gereja-gereja i belang-belang doni enda nari. Adi ersada ateta ras sapih-sapihta kalak si tek man Yesus Kristus, sievaluasi lebe kiniersadaanta ras Dibata. Adi enggo payo kiniersadaanta secara pribadi ras Dibata maka labo hal si mesera ersada ras sapih-sapihta kalak si tek man Yesus Kristus. Sebab adi enggo tuhu-tuhu kita ersada ras Kristus lit kekelengen Dibata i bas kita si sifatna membangun, memulihkan, membawa damai, saling merendahkan diri di hadapan Tuhan, dan mengutamakan kemuliaan Allah dalam Yesus Kristus. Kiniersadaan i bas pelayanenta i bas Gerejanta seh kel pentingna, erkiteken i bas kiniersadaanta melala hal si banci ilakoken kita guna pembangunen kula ni Kristus. Bicara melala tenaga, pikiren, waktu, entah pe sen si ikeriken kita guna pelayanen si terbaik i tengah-tengah Gerejanta labo hal si sia-sia ras lebih bermanfaat guna kemulian gelar Dibata asangken melala tenaga, pikiren, waktu, ras sen si keri erkiteken rubati sada ras si debanna. Emaka sitotokenlah gelah kiniersadaan si sedekah enda enggo terjalin ras sapih-sapihta anggota GBKP reh paguhna ras tuhu-tuhu otentik erpalasken kiniersadaan si payo secara pribadi ras Dibata i bas Yesus Kristus. Gelah arah kehadirenta i tengah-tengah doni enda melala kalak si tek man Yesus Kristus. Dibata si mpegegehi kita.

Revisi bahan enda i bas buku PJJ arah Moderamen nari banci inen i bas link :
https://drive.google.com/file/d/0B-cyusxaqI_seW1SdDc2T21VVnM/view?usp=sharing