Khotbah GBKP Minggu Tgl. 12 Maret 2017

KHOTBAH GBKP MINGGU TGL. 12 MARET 2017

Nrs. Pdt. Larena br. Sinuhadji (Bp. Rey Tarigan)

MINGGU PASSION 3

(Reminiscere : “Inget Min Perkuah AteNdu O Tuhan”)

(Warna Stola : Ungu)

Invocatio : “TUHAN Dibata kami maba kami ras bapa kami i bas perbudaken nari i Mesir, janah idah kami tanda kuasa si ibahanNa. IjagaiNa kami gelah terkelin ku japa pe kami mentas arah tengah-tengah bangsa-bangsa si ibentasi kami” (Josua 24:17)

Ogen : Johanes 3:1-17 (Tunggal)

Khotbah : Masmur 121:1-8 (Anthiponal)

Tema : TUHAN KAP SEKAWALKU

Penjelasen Bahan Pustaka Si Badia

Bahan khotbahta e me ende-enden ziarah. Ziarah secara umum ertina, salah sada praktek keagamaan i bas piga-piga agama ku ingan-ingan si ianggap penting, alu tujun nginget mulihi, mpeteguhi kiniteken, ras mbersihken diri. I bas kiniteken kalak Yahudi pe lit praktek ziarah. Ziarah i bas bahasa Ibrani ertina “nangkih”. Maksudna, ende-enden ziarah enda iendeken kalak Israel sanga erdalan nangkih (mendaki) ku Yerusalem, entah pe deleng Sion, i bas ngerayaken 3 perayaan keagamaan kalak Yahudi (Pondok Daun, Paskah entah pe Hari Raya Roti Tidak Beragi, ras Pentakosta). Ende-enden e iendeken alu tujun nginget-nginget mulihi kuasa Dibata si mbelin i bas kegeluhen kalak Yahudi.

Alu latar belakang enda jelas maka bahan khotbahta isina e me peringet-ingeten kerna kuasa Dibata si mbelin i bas kegeluhen Pemasmur si nuliskenca Masmur bindu 121 enda. I bas ay. 1 teridah gambaren sekalak si sanga erdalan nangkih ku deleng Sion alu natap-natap deleng-deleng si lit isekelewetna. Sanga natap-natap e, nungkun Pemasmur i bas pusuhna, “i ja nari kin reh penampatku?” Ijabab alu pengakun kiniteken Pemasmur i bas ay. 2 nina, “Penampat man bangku reh i bas TUHAN nari, si enggo njadiken langit ras doni”. Ayat-ayat berikutna teridah maka i bas kidekah geluh Pemasmur, Dibata si isembahna e me Dibata si tetap njaga kawali kegeluhenna. Ay. 7 ikataken, “Dibata si njagai geluh”-na. I bas terj. BIMK ikataken, “IA menjaga engkau supaya hidupmu selamat”, rsd. Ertina kesasin geluh erkiniteken Pemasmur tuhu-tuhu igejapkenna maka Dibata si tetap njaga ngkawali, marenda nari, genduari seh rasa lalap. Analsis kerna ayat-ayat si deban i bas bahan khotbahta mungkin banci iorati arah perbandingen terjemahen i teruh enda :

Klik Gambar Gelah Teroge

Invocationta e me sada bagin i bas pidato Yosua si isehkenna i adep-adepen kalak Israel i Sikhem. I bas Alkitab TB-LAI invocationta enda lit i teruh judul “Pembaruan perjanjian di Sikhem”. Josua nehken persinget man bangsa Israel ingetlah maka TUHAN Dibata e me si enggo mulahi bangsaNa i bas perbudaken i Mesir nari, TUHAN Dibata si enggo njagai kegeluhen kalak Israel gelah terkelin. I Sikhem ipelimbarui Yosua perpadanen kalak Israel i lebe-lebe Dibata maka TUHAN Dibata ngenca si isembah bangsa Israel.

Ogenta nuriken kerna percakapen Yesus ras Nikodemus, sekalak Farisi peminpin kalak Yahudi. Kelompok Farisi e me kelompok si la senang nandangi Yesus. Mungkin erkiteken mamang ia maka idahina Yesus i bas berngi gelah la iidah teman-temanna sesama kalak Farisi. I bas percakapen e situhuna enggo iteh Nikodemus maka Yesus e me utusen Dibata (Dibata ras Yesus) alu tanda-tanda sengget si icidahkenNa. Tapi mungkin lenga tuhu-tuhu yakin Nikodemus maka Yesus e me utusen Dibata, entah pe Mesias. Yesus ngaloi alu pengajaren kerna sekalak Mesias si enggo iberitaken nabi-nabi. Rikutken ajaren nabi-nabi Israel, adi sekalak Mesias reh alu tanda-tanda sengget maka arus kalak Isarel tek man baNa. Tentuna sebage sekalak Farisi si enggo ipelajarina Taurat ras Kitab Nabi-nabi enggo iteh Nikodemus kai si imaksudken Yesus. Tandana kalak tek nandangi Yesus sebage Anak Manusia si iutus Dibata guna nelamatken doni enda i bas keleng ateNa, e me arus tubuh peduakaliken. Tubuh peduakaliken maksudna ertobat, tek man Yesus sebage utusen Dibata, janah geluh i bas kegeluhen si mbaru. Penungkunen Nikodemus kerna si e bagi nuduhken maka tetap ia la tek man Yesus. La ituriken uga kelanjuten percakapen enda ras uga tanggapen Nikodemus, tapi injil Yohanes nurikenca secara tersirat maka Nikodemus enda tek man Yesus. Ibelana Yesus i bas Yoh. 7:45-52. Nikodemus reh ndahi mayit Yesus kenca mate i kayu persilang i bas Yoh. 19:39. Ertina perjumpan Nikodemus ras Yesus erbahanca Nikodemus berobah jadi tek man Yesus amin pe teman-temanna si deban kalak Farisi termasuk kelompok si ikut erkonspirasi guna munuh Yesus. Iingetna denga perjumpanna ras Yesus maka idahina Yesus amin pe enggo mate.     

Aplikasi

Tema si seh man banta i bas wari Minggu Passion si pe-3-ken enda e me “Tuhan kap sekawalku”. Mungkin banci ikataken tema-nta sendah e me pengakun kinitekenta maka Dibata si njaga ngkawali kita marenda nari, gundari, seh rasa lalap. Pemasmur i bas ende-enden ziarahna ngajuk kita gelah nginget mulihi kerina perbahanen Dibata sedekah geluhta. Alu bage teridah maka Dibata la pernah nadingken kita, ijagaina kita la erngadi-ngadi suari ras berngi. Dibata erdahin i bas pengalamen geluhta guna mabai kita ku kerina si mehuli. Ay. 7 bahan khotbahta ikataken Pemasmur i bas terjemahen BIMK, “TUHAN akan melindungi engkau dari mara bahaya, Ia menjaga engkau supaya hidupmu selamat”. Dibata mabai kita ku keselamaten. Invocationta pe ngajuk kita gelah nginget perbahanen Dibata si mbelin i bas kegeluhenta. Nginget kerna perkuah ate ras perbahanen Dibata si mbelin i bas geluhta e me si jadi penekanen i bas khotbahta bage pe invocationta.

I bas geluhta pe kerna nginget enda penting kel sebab sada pinakitta manusia, e me murah kita lupa. Usur kita manusia enda geluh erpaksa-paksa, i bas paksa senang, sukses, berhasil, mis kita lupa nandangi Dibata si enggo ngarak-ngarak geluhta seh ku bas kesuksesen, keberhasilen, kesenangen, rsd. I bas paksa biasa-biasa saja, ertina i bas rutinitasta pe usur kita lupa man Dibata erkiteken geluhta ikuasai kesibuken i bas pendahinta, rsd. I bas paksa susah, memang iinget kita Dibata, mis kita ertoto man baNa, mindo man teman-temanta perpulungen gelah ikut notoken kita. Tapi i bas pertotonta e pe secara tanpa isedari, ipaksa kita Dibata gelah ngikutken sura-suranta, jawaben si instan ateta, serba cepat. Adi la cepat ijabab Dibata maka mis kita lawes ku dukun, orang pintar, guru si baso, rsd. Em kita manusia bagi kalak Israel si murah lupa kerna perbahanen Dibata i bas geluhta.

I bas tradisi kita kalak Karo mungkin ziarah ianggap sebage praktek si tabu ras bertentangen ras iman Kristen. Mungkin e alasenna maka i bas Pustakanta si Badia, Masmur 121 la lit je ikataken “ende-enden ziarah”. Padahal i bas terjemahen si deban lit je kata “ziarah”. Mungkin ziarah enda usur ikaitken ras ziarah ku kuburen orang tuanta entah nini bulangta alu ngelakoken hal-hal bagi si biasa ilakoken i bas kiniteken si ndekah. Je kita mindo kebayaken man orang tuanta entah nini bulangta alu namaken sesajen i lebe-lebe nisan kuburen orang tuanta entah nini bulangta si enggo mate. Adi e si ilakoken tentuna bertentangen ras kinitekenta erkiteken enggo isembah kita nini bulangta entah orang tuanta si enggo mate. Tapi gundari enggo melala kita si er-ziarah labo dalam rangka nembah man orang tua entah nini bulang, tapi guna nginget jasa-jasa orang tuanta, nginget uga perjuangen orang tuanta, nginget keleng ate orang tuanta man kita anak-anakna, janah arah ziarah ku kuburen orang tuanta ngajarken man anak-anakta gelah itehna entah iingetna nini bulangna ras ngajarken kerna ngehamati orang tua sewajarna. Adi e si ilakoken tentuna la bertentangen ras kinitekenta kalak Kristen.

I bas Padan si Mbaru situhuna kerna nginget enda merupaken salah sada ajaren Yesus man ajar-ajarNa. I bas Luk. 22:19 (bdk. 1 Kor. 11:24-25) ikataken Yesus nina, “Bahanlah bagenda guna peringet-ingeten man bangKu”. Kata “peringet-ingeten” iterjemahken i bas bahasa Yunani nari “anamnesis” si iterjemahken ku bas bahasa Latin “memoria”, i bas bahasanta gundari “memori” nina, si ertina “mengingat” entah pe “mengenang”. Nginget entah pe mengenang i jenda labo terjeng nginget saja, tapi nginget si erbahanca kita reh gegehna, si memotivasi kita guna reh semangatna ndalani kegeluhen enda. Emaka Pemasmur i bas perziarahen geluhna, Tuhan ngenca si jadi inget-ingetenna, sebab Tuhan ngenca si erbahan Pemasmur reh gegehna, reh semangatna, optimis ndalani kegeluhen enda amin pe melala tantangen si arus ibentasina.

I bas Minggu Passion enda (passio ertina “sengsara”), ogenta mulihi ngingetken kita kerna pengorbanen Yesus Kristus i kayu persilang erpalasken keleng ate Dibata nandangi kita manusia perdosa. Keselamaten i bas Yesus Kristus si enggo ialoken kita erpalasken kinitekenta em tandana maka pengkawali Dibata tetap lit. KesahNa si Badia tetap denga njaga ngkawali kita gelah kita tetap selamat i bas ndalani geluhta si tep-tep wari seh kita mulih ku Dibata. Emaka katakenlah bujur man Dibata ras ingetlah perkuah ateNa si mbelin i bas geluhta. Pindolah i bas pertotonta gelah lalap lit ingeten i bas pusuh perukurenta maka Dibata tetap njaga ras ngkawali kita marenda nari, gundari seh rasa lalap. Bagi Pemasmur, kegeluhenta enda perziarahen ku kegeluhen si rasa lalap ras Dibata. Emaka ingetlah rusur Dibata ras perbahanenNa si mbelin i bas geluhta, gelah tuhu maka Tuhan kap sekawalku.