PA Kategorial GBKP Tgl. 5 - 11 Maret 2017

PA MORIA GBKP TGL. 5 - 11 MARET 2017

Pdt. Larena br. Sinuhadji (Nd. Rey Tarigan)

Ogen : Pilipi 4:4-13

Tema : TERPENALEM I BAS KAI PE

Tujun : Gelah Moria :

1) Nuriken biak rasul Paulus si makeken kuasa Kristus

2) Ncidahken kegeluhen si terpenalem (kiniteken, kiniulin, memahami orang lain, ekonomi ras si debanna)

Metode : Diskusi

Penjelasen Bahan Ogen & Relevansi

Perpulungen Pilipi e me rasul Paulus si majekkenca (Perb. Rasul 16:12-40; Pilipi 4:15-17). Ertina lit hubungan si ndeher antara rasul Paulus ras perpulungen Pilipi. Hubungen si ndeher e teridah arah penampat ras pertoton i bas perpulungen Pilipi nari man rasul Paulus i bas pelayanenna (Pilipi 1:5; 4:15-17). Janah surat Pilipi itulisken man perpulungen Pilipi alu maksud ngataken bujur rasul Paulus i bas kerina si enggo ibereken perpulungen e man bana janah gelah perpulungen e meteh uga keadaan rasul Paulus si sangana lit i bas penjara gelah tetap idukung i bas pertoton. Teridah maka lit hubungen si saling mendukung sada ras si debanna antara rasul Paulus ras perpulungen i Pilipi. La lit persoalen si serius i bas perpulungen Pilipi, maka isi surat Paulus e bersifat memelihara hubungen si mehuli gelah reh ulina sekaligus mpegegehi perpulungen gelah tetap paguh erkiniteken man Yesus Kristus amin pe melala tantangen. Ertina arah hubungen si mehuli si enggo terjalin antara rasul Paulus ras perpulungen Pilipi enggo erlajar kita kerna terpenalem i bas kai pe khususna i bas menjalin relasi si tetap mehuli, saling notoken, saling mpegegehi, saling mperdiateken (ay. 11-12), saling nampati sada ras si debanna.

Secara khusus ogenta sendah, masuk i bas kata-kata pendungi surat si dem alu kata-kata motivasi ras pergegeh man perpulungen i Pilipi. Ogenta sendah termasuk ayat-ayat si terkenal janah usur jadi rujuken guna mpegegehi ras memotivasi diri sendiri bage pe kalak si deban. Mari radu ras mulihi sioge ayat-ayat enda sambil mengevaluasi dirinta apakah sedekah enda enggo nge ayat-ayat enda mpegegehi ras memotivasi kita jadi Moria si terpenalem i bas kai pe?

Ay. 4,7,10, kiniersadanta ras Tuhan mpeturah keriahen ukur ras kemalemen ate si la erngadi-ngadi katawari pe. Ay. 5, perbahanen si mehuli arus icidahken kita erkiteken waktu si tepat guna ncidahken si mehuli e me waktu si sendah. Ay. 6, kearun ateta arus silawan alu mindo rusur i bas pertotonta kai si jadi keperlunta alu dem pengataken bujur. Ay. 8, kerina si mehuli arus ngkuasai perukurenta erkiteken karakterta terbentuk i bas caranta rukur nari, adi si bujur, mulia, benar, bersih, mejile ras kerina si patut ipuji siukurken kita maka karakterta pe jadi bagi siiukurken kita. Ay. 9, kemalemen ate i bas Dibata nari salah sadana rehna i bas kita ndalanken kerina KataNa, bagi si enggo iteladanken rasul Paulus. Ay. 13, rahasia nggeluh dem alu kemalemen ate i bas Dibata nari ras kengasupen guna ngalaken kerina keadaan e me erkiteken kuasa si ibereken Kristus man banta.

Tema-nta ras tujun PA-nta sendah mabai kita Senina Moria guna mengevaluasi diri sekaligus semakin meningkatken kualitas geluhta jadi Moria si terpenalem i bas kai pe (kiniteken, kiniulin, memahami orang lain, ekonomi ras si debanna). Mari radu ras kita saling notoken, saling mendukung, saling mperdiateken, saling nampati sada ras si debanna i bas kita jadi Moria si terpenalem i bas kai pe. Dibata si mpegegehi kita.  

PA MAMRE GBKP TGL. 5 - 11 MARET 2017

Nrs. Pdt. L. br. Sinuhadji (Bp. Rey Tarigan)

Ngoge Ras Ndalanken Kata Dibata

Ogen : Masmur 1:1-3

Tema : MEJEHE NANDANGI KATA DIBATA

Tujun : Gelah Mamre metedeh ngoge, megiken ras ndalanken Kata Dibata

Metode : Diskusi

Penjelasen Bahan Ogen & Relevansi

Bahan ogenta sendah akap kami seri ras ogen PJJ-nta minggu si lepas. I bas kesaksin geluh Pemasmur lit dua karakteristik kalak. Si pemena lebe kalak si lit bas ia kemalemen ate i bas Dibata nari. Kemalemen ate i bas Dibata nari i bas sudut pandang kiniteken Pemasmur nari ertina : 1) Ersada/rembak ras Dibata [lit komunikasi/relasi si la erngadi-ngadi]; 2) Terbuka i bas pengajaren-pengajaren Dibata [nggit erjalar ras iajari]; 3) Nggeluh sue ras peraten Dibata [ngelakoken perentah-perentahNa] (bdk. Mas. 119:1-2, 14, 174). I bas kalimat si deban, adi enggo lit 3 hal enda i bas dirinta maka kita enggo ndatken kemalemen ate i bas Dibata nari.

Kemalemen ate i jenda seri ertina ras pasu-pasu i bas Dibata nari, baik secara materi (erta kebayaken) bagepe si bentukna non-materi (meriah ukur, sehat, kedamen, gegeh, pola rukur si positif - optimis - konstruktif, ketenengen, kinigenggengen, kiniteken, kepentaren rsd.). Duana enggo ialoken Pemasmur i bas Dibata nari. Tapi si lebih utama i bas sudut pandang kiniteken Pemasmur e me si bentukna non-materi, sebab sifatna abadi ras la tertukur alu sen entah pe erta kebayaken doni enda. Emaka i bas ay. 1-2 ikatakenna nina, “Malem me ate kalak si ... keriahenna e me matuhi Undang-undang TUHAN dingen ngukurisa suari ras berngi”. Labo je ikataken, “Malem me ate kalak si melala erta kebayakenna”, maksudna labo berarti erta kebayaken la penting i bas geluhta. Penting, tapi lit si lebih penting, e me “keriahen i bas matuhi ras ngukuri Undang-undang Tuhan”. Keriahen, matuhi, ras ngukuri, e me pasu-pasu si bentukna non-materi.

Kalak si keriahenna matuhi ras ngukuri Undang-undang Tuhan, iperseri Pemasmur ras  “Batang kayu si turah i tepi lau anak erbuah i bas paksana, dingen bulungna pe la melus. Sangap ia i bas kerina pendahinna” (ay. 3). “Batang kayu si turah i tepi lau anak” ertina rembak entah pe ersada ras Dibata, lit komunikasi si intesif, la erngadi-ngadi ras Dibata. Adi enggo rembak ras Dibata maka lit bas ia kininggiten guna erlajar ras iajari Kata Dibata bage pe ngelakoken Kata Dibata i bas geluhna, e me “buahna”, ulihna adi ersada ras Dibata. Ulih si deban e me “bulungna la melus” ertina lit bas ia kinigenggengen, gegeh i bas Dibata nari. “Sangap” (Ind. “berhasil”), ertina adi sidahiken kerina dahin si sue ras peraten Dibata maka ulihna kesangapen. Intina, kalak si keriahenna matuhi ras ngukuri Undang-undang Tuhan, melala perobahen positif si terjadi i bas geluhna sue ras peraten Dibata.

Si peduaken e me kalak si jahat, perdosa, ras megombang man Dibata. Kalak si bage karakteristikna tentuna la lit bas ia kemalemen ate i bas Dibata nari, mungkin kemalemen atena ersumber i bas erta kebayaken doni enda entah pe i bas Iblis nari. Emaka enggo pasti la lit bas ia kerembaken ras Dibata, la ia nggit iajari/erlajar Kata Dibata, ras la ia nggeluh sue ras peraten Dibata. I bas ay. 4 ikataken kalak si jahat la lit bas ia pendirian si tetap entah pe murah terbaba ku hal-hal si la mehuli. Bahkan i bas ay. 5 ikataken kalak si bage iukum Dibata.

PA-nta sendah lit i teruh judul “Ngoge ras ndalanken Kata Dibata”. Janah tema si seh man banta e me “Mejehe nandangi Kata Dibata” alu tujun gelah Mamre metedeh ngoge, megiken ras ndalanken Kata Dibata. Adi soal ngoge ras megi mungkin enggo nge sioge ras sibegiken Kata Dibata, minimal sekali, entah pe 3 kali i bas sada minggu, e pe adi reh kita kubas kebaktin wari Minggu, PJJ, ras PA Mamre. Adi 3 kali denga i bas sada minggu ngoge ras megi Kata Dibata tentuna perlu sitambahi frekuensina alu ngoge secara pribadi 4 kali lah gia gelah dem 7 wari kita ngoge ras megi Kata Dibata. Sebab ngoge ras megi Kata Dibata e melala gunana janah penting rikutken Roma 10:17 ras 2 Tim. 3:16. Kenca sioge ras sibegiken Kata Dibata langkah peduaken e me, ngukurken ras refleksikenca ku bas pengalamen geluhta sebage bahan evaluasi pribadi, gelah tersuan Kata Dibata e i bas pusuh perukurenta (bdk. Heber 4:12). Ertina, lit kuasa i bas Kata Dibata si ioge kita ras Kata Dibata e erdahin i bas pusuh perukurenta. Langkah peteluken e me matuhi Kata Dibata e ras sicubaken ndalankenca i bas kegeluhen si tep-tep wari bagi teladan Pemasmur i bas ogenta sendah.

Mungkin si jadi penungkunen, uga carana gelah mejehe kita nandangi Kata Dibata dingen metedeh kita ngoge, megiken ras ndalanken Kata Dibata? Mungkin bagi Pemasmur, arus lebe lit tekad entah pe niat i bas pusuh perukurenta guna rembak ras Dibata. Sipindo i bas pertotonta man Dibata gelah iberekenNa kejehen nandangi Kata Dibata bagepe ketedehen i bas ngoge, megiken ras ndalanken Kata Dibata i bas kegeluhenta si tep-tep wari. Lingkungen pergaulenta pe mungkin lit ka pengaruhna i bas kita mejehe ras metedeh nandangi Kata Dibata, ertina perlu sikondisiken lingkungen pergaulenta gelah terbaba-baba kita mejehe ras metedeh nandangi Kata Dibata. Dibata si mpegegehi kita.