Khotbah GBKP Minggu Tgl. 19 Maret 2017

KHOTBAH GBKP MINGGU TGL. 19 MARET 2017

Nrs. Pdt. L. br. Sinuhadji (Bp. Rey Tarigan)

MINGGU PASSION 4

(Okulti : “Matangku Tetap Nare Ku Kam”)

(Warna Stola : Ungu)

Invocatio : “Bagi belkih mejehe nandangi lau maler si malem, bage me tedehna ateku Kam, o Dibata” (Masmur 42:2)

Ogen : Keluaren 17:1-7 (Tunggal)

Khotbah : Johanes 4:5-26 (Responsoria)

Tema : JESUS ME ULU LAU KEGELUHEN

Kerangka Khotbah

1. Lau e me sada i bas dua zat (si debanna e me oksigen) si penting i bas geluh manusia ras tinepa Dibata si debanna. Adi la lit lau si man inemen, manusia hanya ngasup bertahan nggeluh sekitar 4-5 wari. Ngkai? Erkiteken fungsi lau i bas daging kulanta seh kel pentingna. Lau e me 73% zat pembentuk daging kulanta, adi la minem kita i bas sada wari saja, umpamana, maka terjadi gangguan i bas metabolisme kulanta ras terjadi dehidrasi (kekurangen cairan). Adi metabolisme-nta enggo terganggu maka turah erbage pinakit. Selain si e, melala aktivitas geluhta i bas sada wari si makeken lau : erdakan, ridi, nuci kerina barang-barangta, niram sinuan-sinuan, rsd. I bas cataten World Health Organization (WHO) tahun 2010, rata-rata sada kalak makeken lau 30 liter i bas sada wari, 10 liter guna konsumsi (minem), 20 liter guna sanitasi, lenga ka termasuk kebutuhen-kebutuhen si debanna.

2. Tapi si terjadi genduari, enggo mulai terjadi krisis air bersih. Pulau Jawa, umpamana, pendudukna hampir mencapai 65% populasi negaranta, sementara ketersediaan launa si bersih hanya sekitar 4,5% i bas total ketersediaan lau si bersih i Indonesia. Banci jadi i bas waktu si lanai ndekah Pulau Jawa jadi importir lau terbesar i Indonesia erkiteken enggo lanai lit air bersih si tersedia guna ikonsumsi. Menteri Keuangan Sri Mulyani i bas pidatona i bas salah sada stasiun televisi pernah ngatakenca, adi pemerentah la beluh menata kelola lau, i bas sada paksa waktu banci terjadi konflik horisontal erkiteken mperebutken sumber air bersih. I bas sada artikel ikataken seh asa gundari lenga lit teknologi si ngasup mereproduksi lau jadi lau si 100% bersih tanpa efek samping. Situhuna lit kapasitas bumi guna mendaur ulang lau jadi lau si 100% bersih alu resapan air, tapi membutuhken waktu sekitar 50 tahun. Enda merupaken kinata si ironis si terjadi i bas geluhta, seh kel pentingna lau i bas kegeluhenta, tapi usur la isedari kita maka lit batasna ketersediaan air bersih e i sekelewetta. Mungin erkiteken murah denga siakap ndatken lau emaka usur ihambur-hamburken kita lau bersih e guna hal-hal si la penting.

3. I bas pengogenta si pemena, bangsa Israel rubat ras Musa erkiteken la lit lau man inemen sanga erkemah i Rapidim. Jungut-jungut bangsa e man Musa erkiteken muasna. Labo terjeng jungut-jungut saja, ibenteri alu batu Musa ate bangsa e erkiteken seh kel rawana man Musa. Kenca meseksek Musa ertoto, ibereken Tuhan bangsa e lau si maler i bas batu nari. Igelari Musa ingan e Masa ras Meriba sabap jungut-jungut kalak Israel, janah iujina Tuhan tupung nina, “Tuhu kin Tuhan ras kita entah lang?” La ituriken uga reaksi bangsa Israel kenca enggo ibereken Dibata lau si maler i bas batu nari. Hanya itutup alu kesimpulen ingan e igelari Masa ras Meriba. I bas sada tafsiren ikataken maka bangsa Israel e kurang kinitekenna seh makana icubaina Tuhan. Tapi adi sinen i bas sudut pandang kesehaten nari, kekurangen cairan (dehidrasi) banci mengakibatken : melimber takal, sulit konsentrasi, suhu tubuh meningkat, emosi terganggu, kolesterol meningkat, rsd. Banci ka erkiteken dehidrasi erbahanca bangsa e lanai banci rukur alu jernih ras cenderung emosional seh makana ibenteri alu batu Musa ate kalak enda, bahkan erbahanca bangsa e ncubai Tuhan. Ertina, turi-turin enda banci imaknai i bas dua sudut pandang nari : 1) Dehidrasi i bas daging kula banci mengakibatken erbage gangguan fisik ras psikis si kedungenna mempengaruhi caranta rukur, mengganggu emosinta, rsd. I bas si e tentuna ula sempat kita dehidrasi i bas daging kulanta, melala minem minimal 8 gelas sada wari. Adi merawa ateta, inget minem lau si mbue gelah ngasup kita rukur secara jernih. 2) Dehidrasi i bas daging kulanta banci mengakibatken erbage gangguan fisik ras psikis, apai ka adi sempat terjadi dehidrasi i bas pertendita (dehidrasi rohani), tentuna banci mengakibatken gangguan i bas kinitekenta man Dibata.

4. Dehidrasi pertendin enda jadi topik utama i bas percakapen Yesus ras diberu Samaria. Lau i bas bahan khotbahta ipake Tuhan Yesus jadi anding-andingen “lau si mereken kegeluhen” (ay. 10). Memang lau biasa pe mereken kegeluhen, tapi si nimaksudken Yesus i jenda e me lau si iberekenNa, e me lau si erbahanca lanai muas seh rasa lalap, jadi sumbul si erburak-burak i bas ise pe si minemsa dingen mereken kegeluhen si tuhu-tuhu si la erkeri-kerin (ay. 14). Kai enda maksudna? Maksudna e me : 1) Kiniteken man Mesias (Yesus Kristus) mabai kegeluhen si rasa lalap (keselamaten). 2) Penandai si payo man Dibata i bas Yesus Kristus erbahanca ise pe si tek lanai muas pertendina, lit lalap kedamen, keriahen, ras keselamaten. Penandai si payo man Dibata e me dahin Kesah si Badia i bas pusuh perukuren kalak si nggit megiken KataNa. Emaka nina Yesus, “Tapi reh me paksana, janah si tuhuna enggo seh pe, i ja arah Kesah si Badia manusia ersembah man Dibata alu payo. Dibata Kesah kap, emaka arah Kesah e ngenca maka banci manusia nembah Dibata alu payo” (ay. 23-24). Penandai si payo man Dibata pe termasuk relasinta si la erngadi-ngadi ras Dibata.

5. Kai si ikataken Yesus e tuhu-tuhu maba keriahen man diberu Samaria e. Sebab enggo idatkenna jawaben i bas dehidrasi pertendin si nialamina sedekah enda. Dehidrasi pertendin si nialami diberu Samaria e terjadi erkiteken : 1) La itandaina ise si isembahna (ay. 22), amin pe diberu Samaria enda meteh kerna ajaren-ajaren agamana : itehna maka Jakup e me ninina (ay. 12), itehna maka deleng Gerisim e me ingan pertoton bangsa Samaria janah Yerusalem (deleng Sion) e me ingan ersembah kalak Yahudi (ay. 20), itehna maka reh me pagi sekalak Mesias si igelari Kristus, Si Engkelini bagi si ipadanken Dibata (ay. 25). 2) Erkiteken la itandaina ise si isembahna maka pemetehna kerna agamana e la ngasup meneken dehidrasi rohani si nialamina bagepe mulahi ia i bas dosana nari. Iteh Yesus maka geluh perjabun diberu Samaria enda labo sikap, 5 kali ia erjabu janah dilaki si ras ia labo perbulangenna (ay. 18). Kenca jumpa ras Yesus, tek ia man Yesus, terjadi perobahen si nyata i bas geluh diberu Samaria enda. Tandana, er-Berita ia man anak kutana kerna Yesus si engkelini si ipadanken Dibata (ay. 28-30). I bas ay. 40-42 ituriken maka reh teremna kalak si tek i kuta Samaria. Si menarik e me kai si ikataken anak kuta Samaria nina, “Kami enggo tek genduari, labo erkiteken kai si ikatakenndu, tapi erkiteken kami jine enggo megi pengajarenNa, janah ieteh kami maka tuhu-tuhu me Ia Si Engkelini doni enda”. E me pengakun kiniteken si otentik (nyata, asli, tidak dibuat-buat) erkiteken perjumpana si tuhu-tuhu ras Yesus Kristus.

6. Si banci jadi bahan perenungen man banta arah bahan khotbahta sendah e me, meteh kerna Yesus labo seri ras nandai Yesus. Adi pemeteh kerna Yesus mungkin enggo ndekah nge siteh ise Yesus e. Tapi apakah pemetehta e tuhu-tuhu mabai kita nandai Yesus Kristus i bas kegeluhenta? Adi ue ninta maka seharusna lau kegeluhen e enggo maler i bas geluhta. Nandai Yesus ertina tek kita maka Yesus e tuhu-tuhu mereken kedamen, keriahen, ras keselamaten si rasa lalap si icidahken kita arah pengkebet geluhta. Lit relasi si kontinyu ras harmonis ras Dibata. Kerina si iajarken Yesus tuhu-tuhu ijadiken pedoman si utamana i bas geluhta. Kenca bage secara otomatis er-Berita kita bagi diberu Samaria kerna Yesus Kristus arah caranta rukur, caranta ngerana, bage pe arah perbahanenta. Yesus Kristus tuhu-tuhu enggo jadi ulu lau si mabai kegeluhen. E me tema i bas kebaktinta sendah.

7. I bas tgl. 22 Maret si reh enda, ipersingeti sebage World Water Day (Hari Air Sedunia). Ibenaken 1993 Hari Air Sedunia enda enggo ilaksanaken i belang-belang doni. Mungkin melala kita si lenga teh kerna Hari Air Sedunia enda. Erkiteken ketersediaan air tawar i doni enda hanya sekitar 3% (dua per teluna masih i bas bentuk es ras gletser, janah i bas si 3% e pe melala si terbuang percuma) bagepe erkiteken kinata kerusakan lingkungan si terjadi, maka Perserikatan Bangsa-bangsa (PBB) erbahan perayaan Hari Air Sedunia guna menarik perhatian publik kerna pentingna air bersih ras penyadaren kerna pengelolaan sumber-sumber air bersih si berkelanjutan (konservasi air). Tema Hari Air Sedunia i bas tahun 2017 enda e me “Wastewater” entah pe limbah air, tujunna gelah publik banci mengurangi penggunaan air bersih hanya untuk dikonsumsi ras memanfaatken limbah air si lit i sekelewettna guna keperlun tertentu. Umpamana, lau bekas nuci barang-barangta si la mengandung detergen banci simanfaatken guna niram sinuan-sinuanta, lau bekas nuci baju si mengandung detergen banci simanfaatken guna nuci kendaraanta, rsd. Konservasi air enda seh kel pentingna guna kelangsungen geluhta i doni enda erkiteken lau si bersih merupaken kebutuhen pokok guna kesehaten daging kulanta. Emaka sibenakenlah ngergaken lau bagepe menggunakan air secara efektif ras efisien i bas jabunta sekalak-sekalak. Bagepe kerna “lau si mabai kegeluhen” i bas pertendinta, e pe seh kel pentingna, ula sempat terjadi dehidrasi rohani i bas kegeluhenta, sebab adi e terjadi i bas geluhta maka situhuna enggo nandangi mate geluh kinitekenta. Emaka sikonsumsilah Kata Dibata secara teratur, bahanlah relasi si kontinyu ras harmonis ras Dibata i bas pertotonta.

8. Menarik akap kami hasil penelitian si mbaru denga ilakoken i bas sada Klasis nari. Kenca enggo sisebarken questioner kerna Saat Teduh & Doa Bersama Keluarga, idatken hasil, perpulungenta si enggo ngelakoken Saat Teduh (ngoge Pustaka si Badia) Bersama Keluarga secara rutin e me 9,43%, si kadang-kadang 33,96%, si lenga 56,6%. Perpulungenta si enggo ngelaksanaken Doa Bersama Keluarga secara rutin e me 8,2%, si kadang-kadang 11,5% ras si lenga 80,3%. Paling lang hasil penelitian enda banci jadi cermin i bas kita “mejehe nandangi lau maler si malem” bagi nina invocationta. Adi siterusken ku bas ayat berikutna, nina Pemasmur, “Muas tendingku man baNdu o, Dibata si nggeluh”. Ateta min bagi Pemasmur si mejehe nandangi Kata Dibata. Kata Dibata e tuhu-tuhu enggo jadi konsumsi pokok si la banci lang harus tersedia tep-tep wari guna sikonsumsi. Ateta min bagi Pemasmur si erbahan relasi si kontinyu ras harmonis ras Dibata. Mulihken kita ku tema-nta sendah, “Yesus e me ulu lau kegeluhen”, enda me pengakun kinitekenta si seharusna otentik (nyata, asli, tidak dibuat-buat) i bas geluhta. Ke-otentik-ken kinitekenta teridah arah ijadikenna Yesus Kristus sebage pedoman si utamana i bas geluhta. Uga jadi pendoman si utamana adi mekisat denga kita ngoge Kata Dibata ras la lit waktunta guna ertoto radu ras keluarganta? Tentuna enda menjadi bahan perenungenta i bas Minggu Passion pe-4-ken enda. Dibata si mpengasup ras mpegegehi kita.