PA Kategorial GBKP Tgl. 19 - 25 Maret 2017

PA MORIA GBKP TGL. 19 - 25 MARET 2017

Pdt. Larena br. Sinuhadji (Nd. Rey Tarigan)

Ogen : Amos 5:6-15

Tema : CIGALAH ATENDU SI JAHAT LAKOKENLAH SI MEHULI

Tujun : Gelah Moria :

1) Erlajar arah pedah Tuhan gelah sieteh si mehuli ras si jahat

2) Pang ngelakoken perbahanen si mehuli

Metode : Sharing

Penjelasen Bahan Ogen & Relevansi

1. Adi sioge kerina ayat i bas bindu 5 kitab nabi Amos si jadi bahan ogenta sendah, kerina si ikataken nabi Amos enda itujuken man kalak Israel si : 1) Ngelakoken erbage-bage kejahaten (ay. 7, 10-12). 2) Ngelaksanaken ibadah si palsu (ay. 21-23). 3) Nembah gana-gana ras dibata-dibata si deban (ay. 26). I bas kerina dosa ras kejahaten si enggo ilakoken enda tentuna lit ukumen i bas Dibata nari erkiteken Dibata si isembah Israel e me Dibata si dem alu kekelengen, keadilen, kebenaren, kebujuren, kiniulin, mediate entah pe erpihak man si musil ras si lit i bas kiniseran erkiteken penindasen.

2. I bas ay. 4 ras 6, enggo isingetken nabi Amos man kalak Israel, “Dahilah TUHAN maka kam nggeluh”, i bas Alkitab Bahasa Indonesia Sehari-hari (BIMK - BIS) iterjemahken “Kembalilah kepada TUHAN, maka kamu akan hidup”, maksudna gelah bangsa e jera, bertobat, i bas dosa ras kejahaten si enggo ilakokenna nari. Bangsa e iajuk gelah darami si mehuli, cigalah ate man kejahaten, ngena ate man si benar, arus iperdiateken maka kebujuren menang (ay. 14, 15). Bahanlah maka kebujuren erburak-burak desken lau sumbul, dingen kebujuren desken lau belin si la pernah kerah (ay. 24). Adi e kerina ilakoken bangsa Israel maka “TUHAN Dibata si Mada Kuasa tuhu-tuhu rembak ras kam” (ay. 14)

3. Si menarik i bas ay. 15 ikataken, “Mbera-mbera mekuah ate TUHAN man bangsa enda si lit denga tading nggeluh genduari”, i bas Alkitab BIMK - BIS nina, “Mungkin TUHAN akan mengasihani orang-orang yang tersisa dari bangsa Israel”. “Mungkin TUHAN akan mengasihani”, ertina lit batas waktu geluh i doni enda. Kalimat enda ikataken nabi Amos mungkin erkiteken ndekah kel akapna nima-nimai bangsa e ertobat amin pe enggo rusur isingetken kerna dosa ras ukumen Dibata. Tapi lit kari paksana maka lanai lit waktu guna ertobat, ukumen Dibata e enggo lanai banci itawar-tawar, enggo lanai banci siputar mulihi waktu si lit i doni enda. Emaka jeralah, ertobatlah, ras dahilah Dibata. Sendah e me waktu si tepat guna ertobat, sebab pagi lenga bo tentu lit waktu ras lenga tentu nggeluh denga kita i doni enda.

4. Tema si seh man banta i bas PA-nta sendah e me “Cigalah atendu si jahat lakokenlah si mehuli” alu tujun gelah Moria erlajar arah pedah Tuhan gelah sieteh si mehuli ras si jahat, pang ngelakoken perbahanen si mehuli. Akap kami kerina kita Moria enggo siteh apai si mehuli ras apai si jahat arah pedah-pedah Tuhan si usur ibegiken entah ioge kita. Apaika kita Moria si aktif i bas kegiaten-kegiaten Gereja, tentuna enggo melala erlajar kerna Kata Dibata. I bas kinipangenta pe akap kami Moria GBKP enggo melala si pang ngataken si benar, la kem saja adi iidah kita si la bujur, pang ngelakoken perbahanen si mehuli kai pe resikona. I bas si e tentuna perlu kita ngataken bujur man Dibata erkiteken ipercaya denga kita Moria jadi alat Dibata guna ngelakoken kerina si jadi peratenNa. IberekenNa denga kesempaten, kesehaten ras gegeh man banta guna banci jadi alatNa ngelakoken kerina si mehuli sue ras peraten Dibata.

5. Tugasta genduari tentuna mempengaruhi Moria si deban si lenga tutus erkiniteken. Tugasta ngingetken maka sendah waktu si tepat guna ngelakoken kerina si jadi peraten Dibata. Tugasta ngiah-iahken Moria si deban gelah memanfaatken kegiaten-kegiaten si enggo isikapken Gerejanta guna semakin meningkatken kuantitas ras kualitas kinitekenta. Tugasta bekerja sama ras kategorial si deban i bas radu ras erlajar kerna Kata Dibata, erbahan program kerja sama si membangun kiniteken, erbahan program kerja sama alu bentuk aksi nyata i bas kemediateanta nandangi kinilabujuren si lit i sekelewetta, rsd. Kai si menjadi kritik entah pe persinget nabi Amos man bangsa Israel erkiteken la lit aksi nyata si nuduhkenca maka bangsa e erkiniteken man Dibata, emaka bahanlah kegiaten-kegiaten si berupa aksi nyata si nuduhkenca maka Moria GBKP erkiteken man Dibata i bas Yesus Kristus. Dibata si mpegasup ras mpegehi kita.        

PA MAMRE GBKP TGL. 19 - 25 MARET 2017

Nrs. Pdt. L. br. Sinuhadji (Bp. Rey Tarigan)

Njayo Secara Kiniteken E Me Perayaken

Ogen : Daniel 1:8-17

Tema : NJAYO I BAS KINITEKEN, PERUKUREN RAS PERBAHANEN

Tujun : Gelah Mamre njayo (paguh) i bas kiniteken, perukuren ras perbahanen

Metode : Sharing

Penjelasen Bahan Ogen & Relevansi

Turi-turin kerna Daniel ras teman-temanna, anak perana bangsa Israel i bas statusna sebage tabanen i istana Nebukadnesar akap kami enggo iteh kita janah mungkin enggo rusur sibegi entah sioge kita. Daniel ras teman-temanna termasuk i bas piga-piga anak perana si masuk i bas kriteria guna erdahin i bas istana raja, e me : kesusuren raja (bangsawan), sibayak, mejile rupana, pentar kel, mbages pemetehna, pedas nangkap pelajaren, janah la lit sitik pe man pandangen i bas kulana. Enggo banci terbayangken kita uga penampilen fisik ras intelektualitas Daniel enda. Tapi labo terjeng je saja, Daniel enda sekalak anak perana si tutus nembah man Dibata (bdk. Dan. 6:10, “Bagi semalna, erjimpuh ia i je ertoto man Dibata telu kali sada wari”, i bas Alkitab TB-LAI ay. 11 nina, “tiga kali sehari ia berlutut, berdoa serta memuji Allahnya, seperti yang biasa dilakukannya”). Ketutusenna erkiniteken man Dibata erbahanca Daniel isampati Dibata i bas kerina hal si terjadi i bas geluhna, secara khusus i bas bahan ogenta sendah.

Adi siukurken secara logis ras realistis, ma wajar nge adi ikonsumsi Daniel ras teman-temanna pangan ras inemen si enggo isikapken raja, erkiteken piga-piga keadaan entah pe situasi si nihadapi Daniel ras teman-temanna, e me : 1) Statusna sebage tabanen si arus patuh man perentah raja Nebukadnesar. 2) La lit ise pe si banci nampati ‘di kune idat raja informasi maka ia ras teman-temanna la nggit Daniel man ras minem kai si enggo isikapken raja. 3) Kerina pangan inemen si enggo isikapken raja tentuna pangan ras inemen si ntabeh nanamna, apai ka tujunna gelah mbestang daging Daniel ras teman-temanna erkiteken kedungenna ia ras teman-temanna ndai erdahin i bas istana raja (bdk. ay. 10). Ertina pangan inemen e tentuna si terbaik i bas pengakap raja paksa si e. Tapi kai si ilakoken Daniel? Ikataken i bas ay. 8 nina, “Enggo itetapken Daniel i bas ukurna maka la ia nggit ngelanggar aturen agamana aminna pe man bana isikapken pangan ras inemen lau anggur i bas istana”, i bas Alkitab Bahasa Indonesia Sehari-hari (BIS - BIMK) nina, “Daniel bertekad untuk tidak menajiskan dirinya dengan makanan dan minuman anggur dari istana raja” erpalasken ketentun i bas kitab Imamat 11; 17:10-14; rsd. Enggo tetap ukur (bertekad) Daniel, maka amin kai pe si terjadi tetap ia paguh i bas kinitekenna.

Kai si terjadi berikutna? I bas ayat-ayat selanjutna ituriken maka : 1) Ay. 9, “Bekas jujuren Dibata, melias ras mesayang kal Aspenas man Daniel”. 2) Ay. 14, nggit penjaga suruh-suruhen Aspenas ngaloken pemindon Daniel ras teman-temanna. 3) Ay. 17, man anak perana si empat e, Dibata mereken pemeteh, kebeluhen ras kepentaren si deban. Man Daniel ibereken Dibata kebeluhen lako ngertiken pengenehenen ras nipi. Adi bage ngenca situasi ras resiko si nihadapi Daniel ras teman-temanna, kita pe ngasup ma bage? Tapi adi sioge bindu 3 ituriken maka Sadrah, Mesah, ras Abednego iambekken ku bas api ginuhur si gurlah erkiteken la nggit nembah mungkuk kempak gana-gana emas si enggo ipajekken raja Nebukadnesar. I bas bindu 6 ituriken maka Daniel iambekken ku bas lubang ingan singa erkiteken la ia nggit matuhi perentah raja Darius si la sue ras kinitekenna. Adi bage situasi ras resikona, uga ninta, ngasup denga kita ngadapisa?

Daniel ras teman-temanna pang ngaloken keadaan ras resiko si kugana pe erkiteken enggo tetap ukurna, paguh erkiniteken man Dibata. Sada pengakun kiniteken si tuhu-tuhu arus siusih i bas bindu 3:17-18, “Adi ngasup kin Dibata si isembah kami e mulahi kami i bas api ginuhur si gurlah e nari ras i bas kuasandu nari, tentu ipulahiNa kami. Tapi adi lang pe, ietehndu min o Raja, maka la kami nggit nembah dibatandu, janah la kami nggit nembah mungkuk kempak gana-gana emas si enggo ipajekkenndu e”. Enda hal si prinsip i bas erkiniteken man Dibata, e me kiniteken si la bergantung ku bas situasi entah pe keadaan si terjadi, kiniteken si la bergantung man ise pe. Kiniteken si bergantung ku bas situasi entah pe pihak si deban umpamana, adi la minter ijabab kai si jadi pemindonta i bas pertotonta maka mis kita lanai tek man Dibata, adi melala kiniseran si nialami erkiteken erkiniteken man Dibata si isembah kita mis kita ngadi erkiniteken man baNa, adi la menguntungken secara materi erkiteken erkiniteken man Dibata mis kita pindah agama, adi iidah kita sekalak Serayan Tuhan la bagi si niarapken pengeranana, tingkah lakuna, mis kita la nai nggit reh ku Gereja, rsd. Kiniteken si paguh e me kiniteken si la bergantung ku bas situasi entah pe resiko si man hadapen, bage pe la bergantung i bas pihak si deban si lit i sekelewetta.

PA Mamrenta sendah lit i teruh judul “Njayo secara kiniteken e me perayaken”, tema “Njayo i bas kiniteken, perukuren ras perbahanen”, alu tujun gelah Mamre njayo (paguh) i bas kiniteken, perukuren ras perbahanen. Arah judul, ogenta, tema ras tujun PA-nta sendah, iajuk kita gelah ngusih Daniel ras teman-temanna i bas erkiniteken man Dibata, e me, njayo (paguh) i bas kinitekenta man Dibata, njayo (paguh) i bas perukuren ras perbahanen si sue ras kinitekennta man Dibata, erkiniteken si la bergantung ku bas situasi entah pe resiko si man hadapen, bagepe kiniteken si la bergantung i bas pihak si deban si lit i sekelewetta. Engkai njayo i bas erkiniteken enda penting? Erkiteken memang i bas kegeluhenta si tep-tep wari mpertahanken kinitekenta man Dibata labo hal si murah. Maun kita erkiniteken rikutken situasi i bas pendahinta. Sekalak PNS umpamana, ngatakenca, adi la siikutken kai si jadi sura-sura pimpinen si koruptor, mbiar kari turun jabaten entah pe ipindah-tugasken ku ingan si deban si la bagi ukur. Mbiar kita ngadapi situasi si lenga bo tentu terjadi i bas pendahinta, maka la paguh erkiniteken pe labo dalih, yang penting aman. Maun keaktifenta i bas kegiaten Gereja pe bergantung denga kita ku kalak si deban. Adi la iiahken Moria entah anak-anak, mekisat kita aktif i Gereja. Adi iidah kita sekalak si la bagi ukur i Gereja, mis kita ngadi aktif i bas kegiaten Gerejanta, umpamana, rsd.

Njayo secara kiniteken e me perayaken, memang payo, erkiteken mungkin memang melala denga kita Mamre si i bas proses denga erkiniteken alu njayo. Fluktiatif denga kita, maun paguh, maun lang, rikutken situasina entah pe bergantung denga man kalak si deban. Emaka teruslah kita erlajar, pindolah gegeh i bas Dibata nari, gelah iberekenNa ketutusen i bas kita erlajar erkiniteken alu payo si la erngadi-ngadi. Teklah kita maka Dibata la pernah nadingken kita, bagi Daniel ras teman-temanna, ibereken Dibata serpang pulah i bas perbebenta, kebiarenta, kiniseranta, rsd. Dibata si mpegegehi kita.