PA Kategorial GBKP Tgl. 12 - 18 Maret 2017

PA MORIA GBKP TGL. 12 - 18 MARET 2017

Pdt. Larena br. Sinuhadji (Nd. Rey Tarigan)

Ogen : Daniel 3:16-18

Tema : PAGUH I BAS KINITEKEN

Tujun : Gelah Moria :

1) Erlajar arah perjuangen kiniteken Sadrah, Mesah, ras Abednego

2) Ngasamken kinitekenna i bas ngalaken kai-kai pe

Metode : Sharing Kesaksin Iman

Penjelasen Bahan Ogen & Relevansi

1. Perikop enda ibere Judul “Iperentahken Nebukadnesar maka kerina kalak nembah man gana-gana emas” (terj. TB-LAI : “Perapian yang menyala-nyala”), si intina ngerana kerna kesetian Sadrah, Mesah ras Abednego teluna teman-teman Daniel, anak muda Yahudi si iambeken ku Babel ras jadi pegawai i istana raja. Kenca enggo ipajekken raja Nebukadnesar gana-gana emas si gedangna dua puluh pitu meter maka perentahna man kerina pegawai-pegawaina, subuk raja-raja, gubernur, wakil gubernur, wakil raja, bendahara, hakim-hakim, kepala daerah ras kerina pegawai-pegawai si deban si lit bas propinsi Babilon rikut ras kerina jelma i bas kerina bangsa, suku ras cakap, arus nembah mungkuk man gana-gana e. Ise si la nembah mungkuk, minter iambekken ku bas api ginuhur si gurlah.

2. Sadrah, Mesah ras Abednego la sembahna gana-gana ndai, maka enggo pasti lit ukumen bas raja nari. Tapi raja mereken denga kesempaten man teluna kalak enda guna nembah man dibatana ras gana-gana emas buaten raja. Lit langsung laporen man raja. Merawa raja ras iperentahkenna maka teluna kalak enda ngadap man raja. Sekali nari isungkun raja teluna kalak enda, bahkan iberekenna kesempaten guna nembah man dibatana ras gana-gana emas buaten raja. Bahkan raja sepintas melecehken kuasa Dibata si isembah Sadrah, Mesah ras Abednego alu perkataan, “Akapndu kin lit dibata si ngasup ngkelini kam?” Alu tegas ijawab Sadrah, Mesah, ras Abednego maka labo lit sura-surana guna mperdiateken diri sendiri, “Adi kin ngasup Dibata si isembah kami mulahi kami i bas api ginuhur si gurlah ras i bas kuasandu nari, tentu ipulahiNa kami. Tapi adi lang pe, gelah ietehndu min Raja, maka la kami nggit nembah dibatandu, janah la kami nggit nembah mungkuk man gana-gana emas si enggo ipajekkenndu e”.

3. Iman si berkualitas, si tahan uji dingen la tergantung ku bas tanda-tanda sengget (mujizat). Sabab jelas ikataken teluna kalak enda, la pe ipulahi Tuhan, tetap kalak enda setia erkemalangen man Tuhan, la nggit “ilacurkenna” sitik pe kinitekenna. Sabab mbue gundari kesetianta er-Dibata tergantung mujizat, pertolongen bas Dibata nari. ‘Di kenca kurang siakap penampat Dibata e, mulai kendur kinitekenta.

4. Kineteken enggo ibereken Tuhan banta (Sola Fide) arah anugerah keselamaten bas Yesus Kristus nari (Sola Gratia). Kinitekenta arus tetap sijaga ras sipelihara gelah tetap berkualitas entah pe paguh i bas kerina keadaan. Gelah tetap paguh kinitekenta arus tetap siisi alu tetap rembak ras Dibata, subuk arah saat teduh secara pribadi, Kebaktin Minggu, kegiaten si deban si ifasilitasi Gereja. Janah kinitekenta teruji paguh, berkualitas asum reh erbage-bage tantangen, godaan si merupaken pengujian nandangi kinitekenna (bdk. 1 Pet. 1:6-7, “Bergembiralah akan hal itu, sekalipun sekarang ini kamu seketika harus berdukacita oleh berbagai-bagai pencobaan. Maksud semuanya itu ialah untuk membuktikan kemurnian imanmu -- yang jauh lebih tinggi nilainya dari pada emas yang fana, yang diuji kemurniannya dengan api”).

5. Moria GBKP arus berani tampil beda, ertina la banci seri ras doni enda. Hal si biasa gundari ndarami duit alu cara si la mehuli : nipui, korupsi, ndayaken barang-barang si haram, bahkan lit ka deba kalak Kristen “ndayaken” kinitekenna erkiteken persoalen jodoh entah pe pendahin. Moria GBKP arus tetap nggeluh berintegritas i tengah-tengah doni si dem alu kejahaten.

PA MAMRE GBKP TGL. 12 - 18 MARET 2017

Pdt. Larena br. Sinuhadji (Nd. Rey Tarigan)

Pemimpin Keluarga Si Jadi Usihen & Engkelengi

Ogen : Perbahanen Rasul-rasul 10:1-2, 22-25

Tema : TANGGUNG JABAB MAMRE I BAS KELUARGA

Tujun : Gelah Mamre ertanggung jabab mabai keluarga ras sangkep geluhna nandai Dibata

Metode : Sharing/Diskusi

Penjelasen Bahan Ogen & Relevansi

1. Judul bas perikop ogenta sendah e me “Petrus ras Kornelius”, i ja ituriken kerna tokoh Kornelius si tading i Kasarea. Ia sekalak komandan pasukan Romawi si igelari “pasukan Italy” (anggotana pasukanna lit 100 kalak). Enggo pasti ia kalak si terpandang ras terhormat. Ia kalak non-Jahudi tapi kinitekenna ras keluargana itujukenna man Dibata si mada kuasa si isembah kalak Israel. Ia tetap kalak Romawi (la ia isunat bagi persyaraten kalak non-Yahudi si i-Yahudi-ken tapi ketutusenna jauh melebihi kalak Yahudi sendiri). I bas ay. 2 ikataken, maka ia kalak si tutus i bas agama, ia ras isi jabuna nembah man Dibata. Isampatina kalak Yahudi si musil janah la erngadi-ngadi ertoto ia man Dibata. Perbahanen Kornelius erbahanca senang kalak Yahudi (ay. 22, “Kerina kalak Yahudi ngatakenca maka ia mehuli”) bagepe Dibata (ay. 4b, “Enggo idahNa kai si enggo ibahanndu man kalak si musil, janah enggo iingetNa pe kam”).

2. Adi siterusken ogenta enda, maka situhuna Dibata labo menjadiken kesalehan Kornelius sebage dasar pertobatenna. Kesalehan saja labo banci mabai jelma ku bas keselamaten, tapi kesalehan pe la ka banci ilepasken sebage tandana kalak enggo nggeluh i bas erkiniteken man Tuhan. Iman tanpa ketutusen e me kap iman si palsu, ketutusen/kesalehan pe tanpa erkiniteken man Dibata i bas Yesus Kristus labo banci erbahanca kalak iselamatken Dibata. Erkiteken si e me ipake Dibata Simon Petrus guna mpeseh berita kerna Yesus Kristus Juruselamat manusia man Kornelius, jabuna ras kade-kadena bage pe temanna meriah.

3. Asum reh Simon Petrus ku rumah Kornelius i je pe teridah kiniteruken ukur Kornelius sang Komandan Pasukan. I ja ialo-alona Petrus alu erjimpuh ras isembahna Petrus. I rumah Kornelius idah Petrus enggo enterem kalak pulung bekas penenahken Kornelius guna banci megiken Berita si Meriah kerna keselamaten i bas Yesus Kristus. Adi siterusken kisah enda, Petrus sendiri terbuka pemahamenna maka seri kerina manusia i lebe-lebe Dibata (sedekah enda kalak Yahudi sangat eksklusif), la erdobahen iakap Dibata manusia e. Janah ibereken kesempaten man Petrus guna nehken Berita si Meriah man kerina kalak si pulung. Bahkan kedungenna, kerina kalak enda idemi Kesah si Badia ras iperidiken i bas gelar Yesus Kristus (Perb. 10:44-48).

4. Rikutken tema-nta sendah : “Tanggung jabab Mamre i bas keluarga”. Ras tujun Mamre ertanggung jabab mabai keluarga ras sangkep geluhna nandai Dibata. Rikutken pengogenta, maka Kornelius banci jadi usihen man Mamre GBKP, sebage bapa, imam i tengah-tengah keluarga. Amina meganjang berkeduduken sosialna tapi tetap ia nggeluh setia erkemalangen man Dibata. Bahkan ibabaina jabuna rikut ras kade-kadena ernalem man Tuhan. Engkai maka seisi jabuna ras kade-kadena bahkan teman meriahna, nggit ngikutken kai si ikataken Kornelius? Enggo pasti sedekah enda pe Kornelius geluhna banci iandalken, jadi teladan, mehuli man ise pe alu la erdobahen. Pendek kata, hubungenna secara vertikal man Dibata mejile bagepe hubungen horisontal ras sesama manusia pe teridah kekelengenna. Enggo pasti ia menjadi pemimpin si mpengaruhi subuk jabuna ras kalak si deban. Emaka la akapna mesera mpepulung enterem kalak i rumah asum Petrus reh. Ertina, labo hanya pangkat ras jabaten ianggarkenna, tapi kinitekenna, kekelengenna, kepedulianna erbahanca senang kalak bana. Kornelius pemimpin keluarga si jadi usihen. Rikutken catatan i bas Perb. Rasul, Kornelius merupaken kalak non-Yahudi pertama si menjadi kalak Kristen. Ras menurut tradisi, kedungenna Kornelius menjadi uskup i Kaisarea ras uskup i Scepsis, Mysi.

5. Tokoh Kornelius menjadi inspirasi man Mamre GBKP gelah tuhu-tuhu menjadi pemimpin keluarga si jadi usihen ras ngasup mabai jabu ras sangkep geluhna nandai Dibata. Bapa si lit waktuna guna mabai jabuna er-saat teduh, berdoa bersama. Bapa si ieteh ras itandai jabuna berintegritas, la nggit “ndayaken” kinitekenna, ertina prinsipna paguh adi soal beriman (la nggit nyogok, isogok, korupsi, nebu-nebu, rsd.). Mulai hal si kitik iajarina anakna untuk jujur, “Lebih baik nilai rendah karena usaha sendiri, daripada nilai tinggi tapi hasil menyontek”. Iajarkenna man anak-anakna labo saja soal prestasi secara intelektual, tapi pe arus cerdas secara emosional ras spiritual. Isingetkenna anak-anakna gelah ikut muat bagin i bas PA Remaja entah PERMATA ras nggit naruhkenca. Mehuli ras dem kekelengen man kalak si deban, secara khusus si kurang megegeh ekonomina. Rutang pusuh Mamre asum lit kade-kadena si lenga nandai Dibata entah pe ersung-sung denga i bas erkiniteken, paling lang itotokenna ras ipersingeti guna tutus er-Dibata. Mulihi bahan PA Mamre sekali enda menjadi evaluasi ras mpelimbarui tekad guna reh ulina i bas wari-wari si reh enda. Tuhan si masu-masu Mamre GBKP.