Khotbah GBKP Minggu Tgl. 5 Maret 2017

KHOTBAH GBKP MINGGU TGL. 5 MARET 2017

Nrs. Pdt. Larena br. Sinuhadji (Bp. Rey Tarigan)

MINGGU PASSION 2

(Invocavit : Erlebuh IA Ku Aku)

(Warna Stola : Ungu)

Invocatio : “IA kap Dibata si dem perkuah ate. Labo kam itadingkenNa, labo kam ikernepkenNa. La IA lupa perpadanen si ipadankenNa jine ras nini-ninindu” (Ulangen 4:31)

Ogen : Masmur 32:1-11 (Tunggal)

Khotbah : Roma 5:12-19 (Anthiponal)

Tema : NGGELUH I BAS PERKUAH ATE DIBATA

Penjelasen Bahan Pustaka Si Badia

Ivocationta ncidahkenca sifat-sifat Dibata si rusur la terlogikaken kita i bas perukurenta si terbatas. Amin pe bangsa Israel rusur ngelawan Dibata, megombang man Dibata, nadingken Dibata ras nembah dibata-dibata si deban, tapi tetap denga Dibata dem alu perkuah ate, la itadingkenNa bahkan la ikernepkenNa bangsa e, janah la pernah sekali pe IA lupa perpadanenNa man bangsa e amin pe enggo berganti-ganti generasi seh ku paksa gundari enda, tetap denga ipasu-pasuNa bangsa Israel. Emaka isingetken Musa man bangsa Israel sope bengket ku taneh perpadanen Kanaan, maka Dibata ngenca si patut isembah seh rasa lalap.

Ogenta e me ende-enden i bas Daud nari si isina pengajaren kerna pengakun dosa, pengalemi dosa i bas Dibata nari, ras nggeluh i bas kegeluhen si mbaru alu ngikutken perentah-perentahNa. I jenda pe teridah sifat Dibata si dem alu pengalemi dosa. Tapi i bas ay. 9 teridah maka sifat Dibata si dem alu perkuah ate e labo merupaken kesempaten guna nggeluh i bas dosa. I bas kalimat si deban, erkiteken Dibata dem alu perkuah ate, maka simanfaatkenlah guna erbahan dosa ras kejahaten, kenca kari nandangi mate maka mindo pengalemi dosa i bas Dibata nari. Cara rukur si bagenda e me cara rukur kalak jahat, emaka i bas ay. 10 ikataken Daud, “Mbue kiniseran si man tahanenken kalak jahat”, i bas bahasa Ind., nina, “Orang berdosa ditimpa banyak sengsara”. Sebalikna, kalak si ernalem man TUHAN, ikelewetiNa alu keleng ateNa si tetap. Bage pe i bas ay. 11 ikataken, kalak si bujur si ngikutken Dibata ngenca si layak ersurak alu meriah. Ertina, kalak si sedar kerna kelemahenna, ngakuken alu tutus dosa-dosana, mindo pengalemi dosa alu meteruk ukur i lebe-lebe Dibata, nggit erlajar i bas kelepakenna nari ras nggit iajari Dibata, e me kalak si datken perkuah ate i bas Dibata nari.

Bahan khotbahta e me ajaren kerna manusia perdosa si-“ibenarken” (Yun. dikaiosune) Dibata alu “perbahanen si benar” si ilakoken Yesus Kristus si erbahanca manusia perdosa ibebasken i bas ukumen nari, ngaloken lias ate Dibata si la erkeri-kerin, ras iperembakken ras Dibata. Kai si enggo idalanken Yesus Kristus ncidahkenca maka beliden kuasa perkuah ate Dibata asangken kuasa dosa si enggo ngerajai kerina jelma. Kai si iajarken Paulus enda iterusken Bapa-bapa Reformasi Gereja, si enggo siteh kita istilah Sola Gratia ras Sola Fide. Erkiteken perkuah ate Dibata si mbelin maka ianugerahkenNa keselamaten man banta manusia perdosa alu kiniseran, kematen ras kekeken Yesus Kristus i bas kematen nari. Keselamaten e iberekenNa alu la lit imbalen kai pe, janah memang la lit kai pe si banci ilakoken manusia perdosa guna ndatken keselamaten e selain erkiniteken man Dibata i bas Yesus Kristus. Tapi labo ngadi seh je saja. I bas Roma 6:1-2 ikataken Paulus nina, “Kuga dage ninta genduari? Siusur-usur dage erbahan dosa gelah erbelinna lias ate Dibata? Tentu lang! Kita enggo mate nandangi dosa; kuga banci kita terus nggeluh i bas dosa?” Roma 6:22 nina, “Tapi genduari kam enggo ibebasken i bas dosa nari, janah kam enggo jadi "budak" Dibata. Asilna man bandu e me kap, kam nggeluh khusus guna Dibata. Si enda mabai kam ku kegeluhen si tuhu-tuhu si rasa lalap”. Ertina lit konsekuensina i bas kita enggo ngaloken anugerah keselamaten i bas Dibata nari. Geluhta khusus guna Dibata, labo guna ate-ateta. Geluh ersada ras Kristus e me kegeluhenta si mbaru.       

Aplikasi

Mungkin enggo usur iendeken kita KEE 212 “Perkuah Ate Si Mbelin”, e me terjemahen i bas ende-enden bahasa Inggris nari “Amazing Grace” ciptaan John Newton si merupaken kesaksin geluhna. John Newton sekalak pelaut ras pedagang manusia, amin pe tubuh i bas keluarga Kristen nari, tapi 23 tahun geluhna igeluhkenna sebage kalak si murtad, la iakukenna Dibata i bas Yesus Kristus. Melala kejahaten si enggo ilakokenna ras i bas melala peristiwa enggo menam mate ia erkiteken perbahanenna sendiri. Tapi i bas sada peristiwa i ja selamat ia i bas badai lawit si mbelin nari, ertobat ia. Igejapkenna maka memang tuhu lit kuasa Dibata i tengah-tengah doni enda, janah igejapkenna maka nggeluh denga ia amin pe i bas melala peristiwa enggo menam mate ia, si e kerina erkiteken perkuah ate Dibata si mbelin, ibereken Dibata denga ia kesempaten guna ertobat, ngakuken dosa, ras tuhu-tuhu tek man Yesus Kristus sebage Juruselamatna. I bas usiana si pe-39-ken itahbisken ia jadi Pendeta i bas salah sada gereja i negara Inggris. Sisa geluhna ipake Dibata guna maba Berita si Meriah.

Mungkin kita menam seri bagi John Newton, tubuh mbelin i bas lingkungen Kristen tapi lenga nggeluh i bas keselamaten i bas Yesus Kristus. Bagi ogenta sendah, arus lebe isingetken Dibata alu erbage-bage peristiwa nggeluh maka sedar kita kerna statusta sebage anak-anak Dibata si enggo iselamatken alu dareh Yesus i kayu persilang. Bahkan mungkin melala kita si mpermain-mainken lias ate Dibata alu tetap nggeluh i bas dosa. Kenca enggo mekelek sakitta maka je lit sura-suranta rajin ertoto, rajin ngoge Pustaka ras rajin ku gereja, padahal enggo lanai lit gegeh erkiteken kelekna pinakitta. Kenca malem i bas pinakitta nari erkiteken itotoken perpulungen, enggo ka mulihken kita ku habitatta, bagi kalak Israel, ngelawan Dibata, megombang man Dibata, ras nadingken Dibata. Tapi, mudah-mudahan karakter si bage ndauh i bas kita nari.

Tema si seh man banta i bas wari Minggu sendah e me “Nggeluh i bas perkuah ate Dibata”, ngingetken kita mulihi maka perkuah ate e tuhu-tuhu sifat Dibata si isembah kita. Janah perkuah ateNa si mbelin enggo ibuktikenNa alu pengorbanen Yesus Kristus i kayu persilang guna njadiken kita kalak si benar i lebe-lebe Dibata. Bagi pengajaren rasul Paulus, keselamaten si enggo ialoken kita alu kinitekenta e lit konsekuensina, e me geluh i bas kegeluhen si mbaru i bas Kristus, nggeluh guna Dibata. E me gelarna geluh i bas perkuah ate Dibata. Enda merupaken sada persinget sekaligus pergegeh man banta guna tuhu-tuhu nggeluh i bas perkuah ate Dibata. Emaka sipindolah rusur i bas pertotonta si la erngadi-ngadi man Dibata, gelah ipegegehiNa kita nggeluh i bas perkuah ateNa. Sipelimbarui tekadta, reh tutusna kita mengkondisiken geluhta alu ergiah-giah ikut muat bagin i bas pelayanen i Gerejanta bage pe ngelakoken kerina si jadi peratenNa i bas kegeluhenta si tep-tep wari, gelah reh melalana kalak si lenga itandaina Dibata i bas Yesus Kristus nandai Yesus Kristus arah pengkebet geluhta. Gelar Dibata termulia arah kegeluhenta si tep-tep wari.