PA Kategorial GBKP Tgl. 26 Maret - 1 April 2017

PA MORIA GBKP TGL. 26 MARET - 1 APRIL 2017

Pdt. Larena br. Sinuhadji (Nd. Rey Tarigan)

Terpenalem : Tanda Kepentaren

Ogen : 1 Samuel 25:18-31

Tema : MERGERMETLAH GELAH PENTAR

Tujun : Gelah Moria :

1) Ngidah ras ngusih kinigermeten ras kepentaren Abigail

2) Megermet ras pang muat keputusen i bas kerina situasi

Metode : Studi Kasus

Penjelasen Bahan Ogen & Relevansi

1. Judul perikop enda “Daud ras Abigail” sedangken i bas Alkitab TB-LAI “Daud, Nabal dan Abigail”. Situhuna, lebih pas judul e, telu tokoh e icidaken sabab labo hanya i je karakter Daud ras Abigail si menonjol, tapi pe perbulangen Abigail, Nabal.

2. Kisah enda ibenai alu sada keterangen maka lit sada keluarga kalak bayak namura : biri-birina lit 3.000, kambingna lit 1.000. Nabal gelarna, mediker ras macik lagu langkahna, ia keturunen Kaleb. Sedangken ndeharana Abigail gelarna, mejile rupana ras cerdik (bijaksana). Paksa si e sangana igunting Nabal bulu biri-birina i Karmel (10 Km sebelah selatan Hebron). Sedangken Daud ras anak buahna sangana i taneh mesawang Paran. Isuruhna anak buahna nehken kata mejuah-juah man Nabal, maka usaha pe lancar la lit si mengganggusa. Termasuk i je lit campur tan Daud ras anak buahna. Janah keterangen enda terbukti asum anak buah Nabal nurikenca man Abigail (ay. 15, “Situhuna mehuli kel ia man kami. La pernah kami igangguna, la lit sada barang kami si bene. Ikawalina kami suari ras berngi kidekah kami mpermakani biri-biri”). Emaka alu meteruk ukur mindo Daud gelah ibereken Nabal kai si banci terberekenna. Ras memang rikutken tradisi i Timur Dekat kuno biasa nge enda ilakoken. Enterem pengembara i bas sada ingan ku ingan si deban. Janah Daud enggo mbuktikenca maka ia ras anak buahna labo ancamen man Nabal alu persinget maka ia enggo ngkawali permakan Nabal (ay. 7). Tapi alu meganjang ukur itulak Nabal kata suruh-suruhen Daud ndai ras alu kasar ikatakenna maka la itandaina Daud ras anak buahna, bahkan ianggapna Daud budak si lompat i bas tuanna nari. La ia nggit merekenca roti ras asuh-asuhen si enggo igelehna man sigunting biri-birina guna merekenca man kalak si la itandaina ja nari rehna.

3. Mulih teman-teman Daud ndai ras nuriken kai si enggo ikataken Nabal. Merawa Daud ras iperentahkenna 400 anak buahna guna berkat ras menumpas habis keluarga Nabal. Janah lit sekalak i bas suruh-suruhen Nabal ngatakenca man Abigail kerna kai si bakal terjadi. Kata kunci ikatakenna man Abigail, “Ngarap aku gelah iukurkenndu kerna si enda janah putuskenlah kai si man bahanen. Enda banci maba cilaka si mbelin man tuan kami ras kerina keluargana. Tuan kami jahat perukurenna maka la ia nggit megiken cakap ise pe!”

4. Enda me si ilakoken Abigail : a) Ipepulungna erbage-bage pangan guna iserahkenna man Daud ras anak buahna : 200 kibul roti, dua guci kuling-kuling dem isin lau anggur, 5 biri-biri si ipanggang, 17 kg buah gandum si isauk, 100 tandan buah anggur, ras 200 kue buah ara si enggo ikerahkenna. b) Isuruhna leben anak buahna berkat janah ia ngikut-ngikut arah pudi. c) Kai si bakal ilakokenna la ikatakenna man perbulangenna. Sabab enggo ijiwaina karakter perbulangenna.

5. I bas perjumpanna ras Daud tuhu-tuhu ia nggit erkorban guna keselamaten jabuna ras peterukna dirina (pedas ia nusur bas keldena nari ras minter ia erjimpuh ku taneh). Nggit ia mersan kesalahen si enggo ilakokeken perbulangenna. Ilumbaken Abigail kata-kata nubuaten. Tuhanlah si ngolangi Daud maka la ibunuhna imbang-imbangna, sabab Tuhan sendiri si bakal erpekara. Janah mindo Abigail alu dem kiniterukken ukur gelah ialoken Daud luah si enggo ibabana erkelangken suruh-suruhenna. Janah Tuhan erbahanca seh kerina sura-sura Daud, jadi raja Israel. Abigail la panik, tapi alu teneng ras sigap ilakokenna kerina e dalam rangka menyelamatken jabuna.

6. Kata “megermet” menurut Kamus Karo - Indonesia (Darwin Prinst) e me : memperhatikan, menaruh minat kepada, melihat dengan sungguh-sungguh. Ras rikutken tema i bas bahanta sekali enda, iajukna kita megermet gelah pentar janah i bas si e siidah ras siusih Abigail.

7. Piga-piga hal si banci siusih i bas Abigail nari : a) Aminna pe keadaan genting, ia la panik, maka tindaken si ibahanna ras kata-kata si ibelaskenna man Daud tetap teratur ras mehuli. Terkadang kita erkiteken enggo genting, persoalen e gawat, la nari sieteh kai nari man bahanen. b) Nggit ia ngkorbanken dirina guna kesalamaten perbulangenna ras jabuna. c) Melumbar ia mere. d) Kata-katana menyejukken, maka Tuhan nge si ngolangi Daud maka la ibunuhna imbang-imbangna.

8. Erbage-bage persoalen si man hadapenta, selaku nande ras ndehara : a) Peningkataken ekonomi tetap alu dalan si bujur. Sabab lit deba ndehara si la pentar (bijaksana) terlalu menuntut suami piah dungna perbulangen ngelakoken korupsi. b) Pengaruh kenakalan anak-anak melalui lingkungen ras ketergantungen nandangi gadget. Sempat lit viral, melala gundari pernanden lupa erdakan erkiteken sibuk ber-HP ria. c) Berita terhangat, predator si menculik anak-anak ras penjualan organ tubuhna. Ertoto kita gelah persoalen-persoalen e ndauh i bas kita nari. Tapi i bas si e perlu kita mergermet gelah banci sijaga dirinta bage pe keluarganta gelah ula terpengaruh i bas persoalen-persoalen e.

9. Ertoto kita gelah kehadirenta sebage nande i tengah jabu tuhu-tuhu : menyejukkan, menenteramkan, memotivasi, sidampingi anak-anak ras perbulangenta guna tetap nggeluh bagi si ngena ate Tuhan. Dibata si mpegegehi kita kerina.

PA MAMRE GBKP TGL. 26 MARET - 1 APRIL 2017

Nrs. Pdt. L. br. Sinuhadji (Bp. Rey Tarigan)

Arah Perbahanen Erbahanca Mamre Erdolat

Ogen : Kejadin 41:37-43

Tema : NGGELUH I BAS TUHAN ERBAHANCA MAMRE ERDOLAT

Tujun : Gelah Mamre ngasup nggeluh medolat

Metode : Diskusi

Penjelasen Bahan Ogen & Relevansi

Turi-turin kerna Yusuf si iangkat jadi wakil raja Mesir akap kami mungkin enggo iteh kita janah mungkin enggo rusur sibegi entah sioge kita i bas Pustaka si Badia. Yusuf e me anak Yakub. Lit 12 anak dilaki Yakub, e me : Ruben, Simeon, Lewi, Yehuda, Isakhar, ras Zebulon (i bas ndeharana Lea nari), Yusuf ras Benyamin (i bas ndeharana Rahel nari), Dan ras Naftali (i bas gundikna Bilha nari), Gad ras Asyer (i bas gundikna Zilpa nari), janah lit isebutken sada anak diberuna arah Lea nari si tergelar Dina (bdk. Kej. 30 & 35). Rikutken urutenna, Yusuf e me anak Yakub si pe-11-ken. Sanga umurna 17 tahun, Yusuf idayaken senina-seninana man rombongen kalak Ismael erkiteken nembeh ras cian ate senina-senina man Yusuf si datken ngena ate bapana lebihen asangken man senina-seninana (Kej. 37). Ibaba rombongen kalak Ismael Yusuf ku Mesir. Amin pe nguda denga Yusuf tapi dewasa ia i bas ngalaken kerina kiniseran si nialamina i Mesir bekas pengarak-ngarak Tuhan. I bas Kej. 39:2 ikataken, “TUHAN si ngarak-ngarak Yusuf, seh maka sangap ia i bas kerina pendahinna”. Sanga i bas penjara pe tetap ia iarak-arak ras ipasu-pasu Tuhan seh makana penjaga penjara pe ngena ate man bana (Kej. 39:21). I bas Kej. 39:23 ikataken nina, “erkiteken TUHAN si ngarak-ngarak Yusuf, kasa kai si idahikenna jore kerina”. Labo terjeng je saja, ibereken Dibata kepentaren man Yusuf guna ngertiken nipi (Kej. 40). Ertina, i bas kiningudan Yusuf, tutus ia i bas kinitekenna man Dibata seh makana ibereken Dibata kesangapen ras kejoren i bas geluhna.

Bahan ogenta sendah nuriken kerna puncak kesangapen ras kejoren Yusuf i Mesir. I bas paksa si tepat si enggo itentuken Dibata, iangkat raja Mesir Yusuf jadi wakilna. Kepentaren Yusuf i bas ngertiken nipi erbahanca raja Mesir takjub erkiteken enggo terjabab kai si jadi penungkunen raja e kerna antusen nipina. Tapi Yusuf la meganjang ukur, i bas ay. 16 ikataken Yusuf man raja, “Labo terantusi aku, o Raja, tapi Dibata banci mereken antusen si mehuli”. Labo terjeng je saja, Yusuf pe ibereken Dibata kepentaren guna erbahan rencana si brilian guna mengantisipasi ancamen kelehen si bakal terjadi i belang-belang doni bagi si enggo iidah raja Mesir i bas nipina (ay. 33-36). Rencana si brilian enda ialoken raja ras pegawai-pegawaina. Erkiteken reh takjubna raja Mesir man Yusuf, turah pengakun kerna Dibata si erdolat si isembah Yusuf i bas raja Mesir nari nina, “Labo lit dat kita jelma tersikapen asang Yusuf enda, sekalak si lit kesah Dibata i bas dirina jine. Enggo icidahken Dibata man bandu kerina kejadin enda. Erkiteken si e teridah maka ganjangen pemetehndu ras kebeluhendu asang ise pe” (ay. 38-39). Emaka itangkuhken raja Mesir Yusuf jadi wakilna. Kerina kalak i belang-belang taneh Mesir mehamat man Yusuf, e me tanda si tersirat maka iakuken kalak Mesir Dibata si erdolat i bas kegeluhen Yusuf.

I bas puncak kejayanna tetap denga Yusuf meteruk ukur, idhikenna kerina tugas tanggung jawabna sebage wakil raja alu mehuli seh makana la lit terjadi kelehen i taneh Mesir. Alu meteruk ukur ialemina senina-seninana si enggo erbahan si jahat man bana, i bas Kej. 50:20 ikataken Yusuf nina, “Jahat sura-surandu man bangku, tapi enggo isalihken Dibata e jadi si mehuli, gelah arah e banci iselamatken Dibata kesah nterem kalak si nggeluh denga genduari”. Iingetna denga keluargana si sangana i bas kiniseran erkiteken kelehen si terjadi i belang-belang doni, memahat ia  man orangtuana, ibabana bapana ras kerina keluargana Israel nari ku Mesir, isikapkenna ingan si mehulina man bapana ras keluargana gelah banci tersikapen geluhna. Yusuf jadi pasu-pasu man kalak Mesir bage pe man keluargana. Luar biasa kai si ilakoken Yusuf enda, erkiteken melala kalak i bas puncak kejayanna meganjang ukurna, la mediate nandangi kalak si deban, ras lanai ingetna kai pe asangken kesangapen ras kejoren dirina jine.

Tema si seh man banta “Nggeluh i bas Tuhan erbahanca Mamre erdolat” i teruh judul “Arah perbahanen erbahanca Mamre erdolat”, alu tujun gelah Mamre ngasup nggeluh erdolat. Erti kata “erdolat” e me berwibawa, mempunyai sifat atau sikap yang menimbulkan rasa hormat (kagum) orang lain. “Medolat” ertina, menimbulkan rasa hormat atau rasa kagum karena pribadinya. Turi-turin kerna Yusuf i bas ogenta tentuna jadi teladan man banta senina Mamre. I bas usiana si nguda denga paguh kinitekenna man Dibata. Enda tentuna lit peran orangtua si pebelin-belin Yusuf seh makana paguh ia i bas erkiniteken. Erkiteken kinitekenna si paguh : 1) Iarak-arak ras ipasu-pasu Dibata Yusuf seh makana sangap ras jore ia i bas kerina si idahikenna. 2) Ipengasup Dibata Yusuf ngalaken kerina kiniseran si nialamina. 3) Turah pengakun i bas kalak si deban nari maka Dibata erdolat i bas geluh Yusuf. 4) Ipengasup Dibata Yusuf tetap meteruk ukur ras ertanggung jawab i bas tugasna sebage wakil raja. 5) Ipengasup Dibata Yusuf ngalemi senina-seninana ras mediate nandangi keluargana.

Adi isungkun kita sekalak-sekalak, ise kita la nggit bagi Yusuf? Adi kerna pasu-pasu, kesangapen, kejoren i bas Dibata nari la lit sada pe kita si nulaksa. Tapi mungkin adi i bas bagin kiniseranna, bagi si nialami Yusuf, mungkin lit kita si nulaksa. Ate min ula lit kiniseran tapi lalap lit pasu-pasu, kesangapen ras kejoren, janah erdolat kita i lebe-lebe kalak si deban. Ertina kedolaten si nialoken Yusuf labo tanpa perjuangan. Kedolaten e me hasil i bas perjuangen Yusuf. Kedolaten Yusuf e me otentik (asli), labo pencitraan bagi piga-piga peminpin negaranta. Arah lebe teridah bagi si mehuli kel, tapi arah pudi la mehuli. Yusuf sendiri labo idaram-daramina entah pe iayakina pengakun i bas kalak si deban nari kerna kedolaten dirina. Tapi arah pengkebet geluhna si otentik, turah pengakun i bas kalak si deban nari maka Yusuf enda sekalak si erdolat, bahkan iakuken raja Mesir maka lit kedolaten Dibata i bas Yusuf.

Emaka i bas PA-nta sekali enda, iajuk kita gelah ngusih Yusuf si paguh kinitekenna man Dibata. I bas kerina keadaan si nialamina, tetap denga ia erkiniteken man Dibata. Dibata si mada kesangapen, kejoren, kedolaten ras pasu-pasu. Emaka pindolah i bas pertotonta man Dibata gelah iberekenNa kesangapen, kejoren, kedolaten ras pasu-pasu. Tapi si paling penting pindolah gegeh i bas Dibata nari gelah ipengasupNa kita erkiniteken alu paguh bagi Yusuf, benaken i bas jabunta, pendahinta, pergaulenta i tengah-tengah masyarakat bage pe i bas pelayanenta i tengah-tengah Gerejanta. Yusuf tercatat i bas Padan si Mbaru sebage salah sada kalak si paguh kinitekenna man Dibata (bdk. Heber 11:22), ate min gelah kita pe tercatat i bas pusuh perukuren kalak si deban si lit i sekelewetta sebage Mamre si paguh kinitekenta, Mamre si arah pengkebet geluhta erdolat Dibata i bas kegeluhenta. Dibata si mpegegehi kita.