PJJ GBKP Tgl. 12 - 18 Maret 2017

PJJ GBKP TGL. 12 - 18 MARET 2017

Nrs. Pdt. L. br. Sinuhadji (Bp. Rey Tarigan)

Tema : ENGGO KUANGKA PERBAHANEN DIBATA (2 Korinti 12:7-10)

Penjelasen Bahan Ogen & Renungen

Bahan ogenta sendah e me sada bagin i bas surat rasul Paulus man perpulungen i Korinti si pe-2-ken. Adi sioge benaken bindu 10 teridah maka lit persoalen antara rasul Paulus ras perpulungen i Korinti. Si jadi penyebabna lit kelompok penghasut si reh ku tengah-tengah perpulungen Korinti ngataken erbage hal si la tuhu kerna rasul Paulus. Kelompok penghasut enda ngakuken dirina “persuruhen Kristus”, “rasul-rasul si mbelin la teralang” (2 Kor. 11:5,23). Ikataken kelompok e maka : 1) Paulus labo rasul (1 Kor. 9:1-3); 2) Paulus melemuk adi ngerana petala-tala ras perpulungen Korinti tapi pang merawa adi sangana pedauh-dauh (2 Kor. 10:1); 3) Paulus e dahinna ngerampasi sen i bas perpulungen si deban nari (2 Kor. 11:7-8). Ras melala fitnah-fitnah si deban si la mungkin ituriken secara lengkap i bas kesempaten enda.

Kelompok penghasut e er-Berita si Meriah ka bagi rasul Paulus, tapi bedana kelompok penghasut enda er-Berita si Meriah alu tujun guna datken puji-pujin ras keuntungen material arah tanda-tanda sengget ras pengenehenen si ngasup ilakokenna. I bas si e tentuna enggo banci sidat kai alasenna makana icedakenna gelar rasul Paulus i lebe-lebe perpulungen Korinti. Alasenna gelah kelompok penghasut e datken pengaruh i tengah-tengah perpulungen Korinti, alu bage banci idatkenna keuntungen materi i bas perpulungen Korinti nari. Adi la terpengaruh perpulungen Korinti i bas informasi-informasi fitnah e situhuna la lit persoalen antara rasul Paulus ras perpulungen Korinti. Tapi erkiteken enggo melala perpulungen si terpengaruh, turah persoalen erkiteken la ialoken perpulungen e status kerasulen Paulus.

Arah latar belakang singkat i datas, banci siantusi kita maksud rasul Paulus ngatakenca kerna “pengenehenen” i bas ogenta ay. 7. Rasul Paulus ngeyakinken perpulungen Korinti adi soal pengenehenen e labo hal si mbaru man Paulus erkiteken ndauh-ndauh wari sope perpulungen Korinti pajek, enggo leben rasul Paulus datken pengenehenen i bas Dibata nari (ay. 1-6). Tapi pengenehenen e labo erbahanca rasul Paulus meganjang ngerana bagi kelompok penghasut ndai. “Duri i bas daging” memang melala tafsiren kerna si e, banci sioge piga-piga tafsiren kerna si e si enggo lit i bas buku PJJ-nta. Mungkin adi sinen pengalamen rasul Paulus kidekah ia er-Berita si Meriah, melala kiniseran fisik ras psikis si ialokenna. Pengalamen kiniseranna e iturikenna secara singkat i bas bindu 11:23-33. Banci ikataken persoalenna ras perpulungen Korinti e nambahi beban mentalna erkiteken la ialoken perpulungen status kerasulenna. Ertina “duri i bas daging” banci siertiken akumulasi kerina kiniseran fisik ras psikis si mberat si nialoken rasul Paulus erkiteken er-Berita si Meriah. I bas kondisi si bagenda tentuna godaan Iblis si paling manjur e me ngadi i bas er-Berita si Meriah gelah ula sakit ras ngenanami kiniseran erkiteken Kristus. Em maksudna “persuruhen Iblis”. “Gelah ula meganjang ukur” i jenda ertina sedar Paulus adi la ia erpenalem man Dibata tentuna enggo ndabuh ia ku bas godaan-godaan Iblis ndai.

I bas ay. 8 ikataken enggo 3 kali rasul Paulus mindo i bas pertotona man Dibata gelah ipedauh “duri i bas daging” e, tapi ngaloi Dibata, “Cukup kap lias ateKu man bandu; sabap gegehKu serta kap i bas gegeh si kurang”. Ertina, kerina kiniseran fisik ras psikis si mberat e labo persoalen man Paulus, erkiteken memang sedekah ia jadi per-Berita si Meriah enggo igejapkenna maka Dibata tuhu-tuhu erkuasa nampati rasul Paulus mereken pergegeh ngalaken kerina kiniseran si mberat e. Janah justru i bas gegehna si kurang e rasul Paulus ngataken bujur man Dibata erkiteken reh rembakna ia ras Dibata. Ay. 9-10 negaskenca kerna si e, senangen akapna i bas gegehna si kurang e. I bas kalimat si deban, senangen akapna geluh i bas kiniseran si mberat e erkiteken Kristus. Jadi i jenda labo nari penting man Paulus sakit entah pe kiniseran si mberat e, si pentingna e me rembak ras Kristus.

Adi sisungkun i bas kegeluhenta gundari, lit kin kita si mesangat kel meserana bagi rasul Paulus, baik i bas sakit secara fisik bage pe sakit secara psikis erkiteken er-Berita si Meriah? Adi lit pe mungkin la seh ku 10% i bas kerina kita anggota GBKP. Mungkin pembanding kerna sakit ras kiniseran si nialami kita tentuna labo seimbang ras sakit ras kiniseran si nialami rasul Paulus. Mungkin adi nggeluh kita i negara Suriah entah Timur Tengah, banci sibandingken ancamen si man hadapen bagi si nihadapi rasul Paulus. I bas si e, ngataken bujur kita man Dibata erkiteken bebas denga kita erkiniteken man Yesus Kristus i negaranta Indonesia, emaka simanfaatkenlah waktu si lit guna tutus erkiniteken man baNa.

Tema si seh man banta “Enggo kuangka perbahanen Dibata”. Perbahanen Dibata si uga ras man ise? Perbahanen Dibata man anak-anakNa tentuna perbahanen si terbaik guna kiniulin kerina kalak si tek man baNa. Tapi si terbaik menurut Dibata lenga bo tentu terbaik menurut perukurenta manusia. Melala pengalamen nuduhkenca maka dalan Tuhan memang dalan si terbaik si usur la terukurken perukurenta si terbatas. Maun iijinkenNa kita ngenanami kiniseran gelah kita erlajar tutus erkiniteken man baNa. Sebab biasana megegeh kita ertoto entah rajin kita ku Gereja sangana lit kiniseran nderpa kita. Maun iijinkenNa pinakit nderpa kita gelah erlajar kita tutus ngergaken kesehaten si enggo iberekenNa man banta. Maun iijinkenNa ka lit persoalen i bas geluhta gelah erlajar kita problem solving si pentar rikutken Kata Dibata.

I bas PJJ-nta sendah iarahkenna kita ku penungkunen, uga sikapta ‘di kune sakit-pinakit ras kiniseran entah pe perbeben si mberat nderpa kita? Si pemena lebe tentuna perlu kita kritis menganalisis keadanta. Adi sakit kita entah pe ngenanami kiniseran kita erkiteken salah dosanta sendiri, alokenlah sebage akibat salah dosanta. Ertoto kita mindo pengalemi dosa i bas Dibata nari. Kenca bage robahlah kita, ula nai erbahan dosa entah kesalahen si erbahanca kita sakit entah pe ndatken kiniseran. Si peduaken, adi sakit entah ndatken kiniseran kita erkiteken perbahanen kalak si jahat man banta, alemilah ras totoken. Pindo pergegeh i bas Dibata nari gelah ipengasupNa kita ngaloken perbahanen kalak si jahat man banta, tek kita maka isalihken Dibata si jahat e jadi mehuli (bdk. Kej. 50:20). Si peteluken, adi sakit ras ngenanami kiniseran kita erkiteken erkiniteken man Yesus Kristus, apaika erkiteken er-Berita si Meriah bagi rasul Paulus, ngataken bujurlah kita erkiteken i bas si e gegeh Dibata serta i bas kita. I bas si e, adi enggo iangka kita perbahanen Dibata i bas geluhta tentuna sakit-pinakit, kiniseran entah pe perbeben si mberat erkiteken Kristus enggo lanai jadi fokus si utama. Si utamana e me kerembakenta ras Dibata i bas Yesus Kristus. Kai pe si terjadi i bas geluhta adi mabai kita reh rembakna kita ras Dibata, ngataken bujurlah kita man baNa.