PJJ GBKP Tgl. 26 Februari - 4 Maret 2017

PJJ GBKP TGL. 26 FEBRUARI - 4 MARET 2017

Nrs. Pdt. Larena br. Sinuhadji (Bp. Rey Tarigan)

Tema : KATA-NDU KAP TENDANG MAN NAHENGKU (Masmur 1:1-6; 119:105)

Penjelasen Bahan Ogen & Renungen

Pemasmur menaken kitab Masmur alu kata-kata “Malem ate”, i bas bhs. Indonesia “Berbahagialah” seri ertina ras “diberkati”. Sekalak si datken kemalemen ate seri ertina ras : 1) ngaloken pasu-pasu i bas Dibata nari (erkiteken perkuah ateNa); 2) ngelakoken kerina si jadi peraten Dibata. Erpalasken dua hal enda maka i bas kesaksin geluh Pemasmur, kemalemen ate memang lit kaitenna ras hal-hal si sifatna materi guna kelangsungen kegeluhen i doni enda bagi pangan, rumah, keluarga, rsd. (bdk. Mas 127:3; 128:4-5; 144:12-15). Tapi kemalemen ate si tuhu-tuhu i bas kiniteken Pemasmur lit je unsur-unsur : 1) Ersada/rembak ras Dibata [lit komunikasi/relasi si la erngadi-ngadi]; 2) Terbuka i bas pengajaren-pengajaren Dibata [nggit erjalar ras iajari]; 3) Nggeluh sue ras peraten Dibata [ngelakoken perentah-perentahNa] (bdk. Mas. 119:1-2, 14, 174). Telu unsur si lit i bas kemalemen ate enda sue ras bentuk jamak kata “diberkatilah” si ertina melala pasu-pasu si idatken kalak si geluhna erkemalangen man Dibata. I bas kiniteken Pemasmur si bagenda, maka kemalemen ate labo bergantung i bas hal-hal si sifatna material [erta kebayaken] ras labo bergantung i bas keadaan tertentu [kiniseran, ceda ate, rsd.], tapi bergantung i bas relasina si mehuli ras Dibata.

I bas ogenta si pemena (Mas. 1:1-6) teridah telu unsur si enggo ijelasken i datas. Ay. 1-2, “Malem me ate kalak si ... keriahenna e me matuhi Undang-undang TUHAN dingen ngukurisa suari ras berngi”. “Keriahen” (Ind. “Kesukaannya”, “Suka melakukan”) ertina, i bas matuhi ras ngukurisa Undang-undang Tuhan e la lit je keterpaksaan. Lit niat si tutus i bas diri sendiri guna la erngadi-ngadi erkomunikasi ras Dibata, nggit erjalar ras iajari, bagepe ngelakoken perentah-perentahNa. Si telu unsur e ipertajam Pemasmur alu gambaren i bas ay. 3, “batang kayu si turah i tepi lau anak erbuah i bas paksana, dingen bulungna pe la melus. Sangap ia i bas kerina pendahinna”. “Erbuah”, “La melus”, ras “Sangap” (Ind. “Berhasil") e me ulih si idatken kalak si erkemalangen man Dibata. “Erbuah” ras “La melus” ertina lit ulih si signifikan i bas kerembakenna ras Dibata (perobahen cara rukur, pengerana, ras perbahanen si sue ras peraten Dibata). “Sangap” (Ind. “Berhasil”) lit kaitenna ras ngelakoken perentah-perentah Dibata. Adi sikaitken ras pendahin, ertina adi sidahiken kerina dahin si sue ras peraten Dibata maka ulihna kesangapen. Sebage penutup, i bas ay. 6 ikataken “Kalak benar itegu-tegu dingen ikawali TUHAN”. “Kalak benar” (Ind. “Jalan orang benar”, “Orang taat”). Ertina, ulih si deban si idatken kalak si benar, si erdalan i bas dalan Tuhan, taat (patuh) man Dibata, e me penegu-negu ras pengkawali Dibata.

Ogenta si peduaken (Mas. 119:105), “KataNdu kap tendang man nahengku, nerangi dalan si kudalani”, tentuna lit keterkaitenna ras penjelasen i bas ogenta si pemena ndai. Kalak si lit bas ia kemalemen ate si tuhu-tuhu enggo pasti ibahanna Kata Dibata jadi pendoman si utamana i bas kegeluhenna.

Tema si seh man banta e me “Kata-Ndu kap tendang man nahengku”, mungkin enda merupaken kesaksin geluhta bagi kesaksin geluh Pemasmur, ertina Kata Dibata enggo tuhu-tuhu jadi pedoman si utamana i bas geluhta. Banci ka tema-nta sendah merupaken sada tekad man banta perpulungen gelah reh tutusna kita i bas : 1) Ersada/rembak ras Dibata [lit komunikasi/relasi si la erngadi-ngadi]; 2) Terbuka i bas pengajaren-pengajaren Dibata [nggit erjalar ras iajari]; 3) Nggeluh sue ras peraten Dibata [ngelakoken perentah-perentahNa]. Adi si telu unsur e enggo silakoken, em tandana kita kalak Kristen si enggo ndatken kemalemen ate si tuhu-tuhu i bas Dibata nari.

Hal enda penting erkiteken i bas jamanta gundari, mungkin seri bagi jaman Pemasmur nggeluh, melala kemalemen ate si sifatna semu (sementara) ras menipu, si banci mabai kita ku bas ukumen bagi kalak si jahat, perdosa, ras megombang i bas ogenta. Mungkin bedana i bas jamanta gundari kemalemen ate si sifatna semu ras menipu ndai semakin gencar ipromosiken i bas media-media sosial. Kemalemen ate si semu ras menipu e biasana si jadi ukurenna e me doni enda. Umpamana, sekalak jelma banci ikataken sukses entah pe berhasil i bas geluhna adi : melala erta kebayakenna, meganjang jabatenna i bas pendahinna, meganjang gelar pendidikenna, rsd. Tapi erlajar kita arah Pemasmur nari, maka kemalemen ate si tuhu-tuhu labo bergantung i bas hal-hal si sifatna material doni enda ras labo bergantung i bas keadaan tertentu, tapi bergantung i bas relasinta si mehuli ras Dibata. Emaka adi erpengendes kita man Dibata, i bas keadaan si kugana pe tetap lit kemalemen ate i bas dirinta. Adi lit kita i bas golongen kalak musil i bas doni enda, umpamana, tetap kita bersukacita ras ngasup kita ngataken bujur man Dibata. Megenggeng kita i bas kiniseran. Bicara sukses pe kita secara doni enda, umpamana, ngasup denga kita ngataken bujur man Dibata arah penampatta man kalak si membutuhken bagepe ikut secara aktif muat bagin i bas kemajun Gerejanta.

Emaka mari radu ras sijadiken Kata Dibata sebage pedoman si utamana i bas geluhta, Kata Dibata si mabai kita ku kemalemen ate si tuhu-tuhu i bas Dibata nari, Kata Dibata si mpengasup kita mperobahi geluhta ku bas perobahen geluh si signifikan sue ras peraten Dibata. Kata Dibata si labo terjeng sioge saja tep-tep pulung i Gereja entah pe secara pribadi, tapi tuhu-tuhu lit pengaruhna si positif ras membangun i bas kegeluhenta. Dibata si mpegegehi kita.