PJJ GBKP Tgl. 19 - 25 Februari 2017

PJJ GBKP TGL. 19 - 25 FEBRUARI 2017

Pdt. Larena br. Sinuhadji (Nd. Rey Tarigan)

Tema : DIBATA SI KUTANDAI (Yohanes 4:21-26, 34)

Penjelasen Bahan Ogen & Renungen

1. Berteologi si sehat e me dinamis (la bage-bage saja), lit pertemuan unsur dogmatis (ajaren Gereja), unsur reflektif (penggejapen secara pribadi), ras unsur etis (ngelakoken kerina si iajarken ras igejapken i bas kegeluhen si tep-tep wari). Jadi berteologi labo seri ras nerusken tradisi (unsur dogmatis).

2. Perjumpaan Yesus ras sekalak diberu Samaria nampati diberu e maka kedungenna banci itandaina Dibata e secara pribadi. Ibabaina anak kutana nandai Yesus bahkan kedungenna anak kuta kalak Samaria sendiri pe enggo tek man Yesus secara pribadi labo arah kalak si deban, ay. 42, “Kami enggo tek genduari, labo erkiteken kai si ikatakenndu, tapi erkiteken kami jine enggo megi pengajarenNa, janah ieteh kami maka tuhu-tuhu me Ia si ngkelini doni enda”.

3. Ope perjumpaan diberu e ras Yesus maka, penandaina kerna Dibata rikutken tradisi, ajaren turun-temurun, si ia sendiri kurang bahkan la ipahamina. Ras e jelas ikataken Yesus man diberu e, “Kam kalak Samaria situhuna la ietehndu ise si isembahndu, tapi kami kalak Yahudi ieteh kami ise sisembah kami. Tapi reh me paksana, janah situhuna enggo seh pe, i ja arah Kesah si Badia manusia ersembah man Dibata alu payo. Dibata Kesah kap, emaka arah Kesah e ngenca maka manusia banci nembah Dibata alu payo”. Tuhan sendiri kedungenna si mpetangkasa kerna diriNa man diberu e alu caraNa si luar biasa.

4. Banci jadi seri kita ras diberu kalak Samaria enda, sisembah Dibata si la itandai kita. Perban kai? Eragama erkiteken orang tua, bahkan kenca enggo galang pe terjeng mengikuti tradisi. Pengakun Kinitekenta ras Pertoton Tuhan terjeng sihapal tapi la sieteh maknana. Ku Gereja sebatas formalitas, rutinitas, nyetor muka gelah iidah kalak kita anggota Gereja. Piah dungna, enggo pe dewasa umurta, tapi lenga dewasa kiniteken e.

5. Penandaita kerna Dibata lit i bas proses si cukup gendang, tapi si pasti penandaita kerna Dibata mabai kita reh ngasupna ncibalken geluhta alu payo sentudu bagi si ngena ateNa. Mulai kin kita danak-danak nari sitandai Dibata arah orang tua, arah Pustaka si Badia si iajarken bas KAKR, bengket ku bas Pengajaren Agama (Katekisasi), Konfesi GBKP ras erbage ibadah siikuti kita. Janah pengenalenta e iperhadapken ras pengalamen kegeluhenta sehari-hari. Si erbahanca penandaita kerna Dibata la terjeng teori tapi enggo seh ku bas pengakun secara pribadi, sabab enggo jumpa kita ras Tuhan arah pengalamen kegeluhenta. Je nari, Kesah si Badia si mpetangkasa kerna kuasa, kekelengen, pemeliharaan Tuhan e setiap saat asum kita tetap ernalem man baNa i bas kerina dampar geluhta.

6. Emaka tema-nta sendah banci jadi penungkunen evaluatif man banta pribadi lepas pribadi, enggo seh i ja penandaiku kerna Dibata si kusembah? Enggo kin tuhu-tuhu tergejap keterlibaten Dibata e i bas kegeluhenku? Enggo kin penandaiku ras penggejapenku kerna Dibata si kusembah e tuhu-tuhu mabai perobahen si nyata i bas kegeluhenku, baik i tengah keluarga, Gereja, ras masyarakat? Pindolah gegeh i bas Dibata nari gelah ipengasupNa kita tuhu-tuhu nandai ras nggejapken Dibata si isembah kita, ras si pentingna kel, ipengasupNa kita ngelakoken kerina si jadi peratenNa.