PA Kategorial GBKP Tgl. 12 - 18 Februari 2017

PA MORIA GBKP TGL. 12 - 18 FEBRUARI 2017

Pdt. Larena br. Sinuhadji (Nd. Rey Tarigan)

Ogen : Jeremia 17:7-8

Tema : PAGUH I BAS KERINA PAKSA

Tujun : Gelah Moria :

1) Ngasup nuriken kinipaguhen kalak si ernalem man Tuhan

2) Ngasup nuriken pendalanen geluh i bas ngalaken kerina situasi

Metode : Diskusi

Penjelasen Bahan Ogen & Aplikasi

1. Bahan PA-nta sekali enda ngerana kerna sebab - akibat. Situhuna sangat berkaiten ras ayat sebelumnya (5-6). I ja kalak si nundalken Tuhan, si erpengarapen man jelma, si ernalem man gegehna jine iukum Tuhan. Desken kayu si kitik-kitik i gurun pasir, turah i taneh mesawang si kerah ise pe la lit tading i je ras kai pe la turah. La lit kai pe si mehuli jadi man bana.

2. Tapi kebalikenna, kalak si ernalem man Tuhan, “Ku pasu-pasu kap ia”. Maksudna ernalem i je, mengandalkan Tuhan, la ernalem man gegehna jine entah pe jelma si mbisa. Tapi Tuhan ngenca pengarapenna. Banci sibandingken i bas ps. 6:16 Israel la nggit ngikutken Tuhan, ps. 17 bangsa Israel nembah man gana-gana Dewi Asera si ipajeken deherken tep-tep batang kayu si merabun i datas uruk-uruk.

3. Kalak si tetap ernalem man Tuhan, ertina mengakui kemahakuasaan Tuhan sabab manusia tinepa ngenca, rikut ngakui maka Dibata nge si ngaturken kegeluhen manusia emaka la aru atena. Kalak si bage  geluhna tetap ipasu-pasu Tuhan. Desken batang kayu si turah deher lau maler, uratna njoler seh kempak lau. Uratna e enteguh paguh terhubung tetap ku bas lau. Emaka sekali pe musim perlego la pernah melus bulungna tapi tetap meratah ras i bas waktuna erbuah, meramis ka buahna.

4. Bage me kalak si tetap mengandalkan Tuhan i bas geluhna tep-tep wari. Amin kai pe si terjadi, termasuk kegagalen, kiniseran, tetap megenggeng bahkan banci iatasina perbeben e lebih asa si e banci ka ia jadi pasu-pasu (berkat) man sekelewetna. La kote, stress, bene kinitekenna erkiteken Dibata si iandalkenna tetap nampati ia.

5. Jadi adi ateta tetap geluhta ipasu-pasu si arus silakoken kita e me kap tetap mengandalkan Tuhan. Sabab mekatep si terjadi geluhta ngenca ateta ipasu-pasu Tuhan tapi la kita nggit ernalem man Tuhan, entah pe song-song. Mengandalkan Tuhan i bas kegeluhenta silakoken alu tetap kita ertoto i bas kai pe si bakal silakoken kita, membangun kerembakenta ras Tuhan arah saat teduhta, ikut muat bagin i bas kerina kegiaten Gereja. Janah labo berarti adi enggo kita ernalem mulus-mulus saja perdalinen geluhta, tetap nge lit pasang-surutna i bas kegeluhen enda. Tapi bedana kalak si ernalem man Tuhan, asum reh pe perbeben ngasup ia ngalakenca, la ia kote. Lit pe godaan si reh, la kita ndabuh ku bas godaan e. Ula kita mengandalken gegehta, entah pe kalak si deban apai ka kuasa-kuasa si deban. Teklah kita beliden gegeh Tuhan nampati kita asangken kuasa-kuasa kai pe bas doni enda. Sebab mekatep asum kita lit i bas perbeben usur lit godaan si erbahanca la nari kita mengandalken gegeh Tuhan. Emaka rikut tema “Paguh i bas kerina keadaan”, tetaplah paguh kinitekenta ras tetaplah erbuah, sabab geluh enda erpaksa-paksa, labo hanya si bagi ukurta si terjadi, tapi si la pagi ukurta pe rusur terjadi i bas geluhta.

PA MAMRE GBKP TGL. 12 - 18 FEBRUARI 2017

Nrs. Pdt. L. br. Sinuhadji (Bp. Rey Tarigan)

Mamre Itandai Arah Cara Geluhna

Ogen : Filipi 3:15-17

Tema : AKU MAMRE SI MAN USIHEN

Tujun : Mamre nggeluh jadi usihen

Metode : Aksi nyata Mamre

Penjelasen Bahan Ogen

Surat man perpulungen Filipi itulisken rasul Paulus i bas penjara nari. Isina secara garis besar e me : 1) Pengataken bujur rasul Paulus man perpulungen Filipi i bas penampat-penampat si enggo iberekenna man bana (1:5; 4:10-19). 2) Kesaksin rasul Paulus kerna pengalamenna i bas penjara (1:12-25). 3) Nehken motivasi ras pergegeh man perpulungen Filipi gelah tetap paguh erkiniteken man Yesus Kristus amin pe lit i bas kiniseran (4:13, rsd.).

Bahan PA-nta sendah termasuk i bas kata-kata pergegeh, motivasi, ras pedah-pedah man perpulungen Filipi. Adi sioge sada perikop benaken ay. 1-17, leben enggo ituriken rasul Paulus kerna kesaksin geluhna kidekah enggo itandaina Yesus Kristus. I bas ay. 7-8 ikatakenna maka ndauh ergan penandaina kerna Yesus Kristus asangken kerina si enggo idatkenna sope itandaina Yesus Kristus. I bas ay. 9-14, isaksiken rasul Paulus maka kenca enggo itandaina Kristus sada ngenca tujun geluhna e me ersada ras Kristus. Ersada i bas kiniseranNa, ersada i bas kematenNa ras kekekenNa. I bas kiniersadanna ras Kristus enda melala denga proses si arus idalanina, janah proses e labo proses si murah erkiteken melala kiniseran si arus man hadapen. Tapi amin bage gia, enggo itehna tujun geluhna, janah tek ia maka Dibata si negu-negu ras mereken pergegeh. Emaka tekad rasul Paulus nina, “ngelupaken kai si arah pudingku janah erpala-pala ndatken si arah lebe ... pinter aku kiam ku tujun guna ndatken pendilo Dibata guna kegeluhen i Surga, si ipesehNa man bangku arah Kristus Yesus”.

I bas ay. 15 rasul Paulus ngajuk gelah perpulungen Filipi ngelakoken kai si enggo ilakokenna alu kata-kata “bage min perukurenta”. Si iukurken e me : nandai Kristus alu mbages, nggeluh ersada ras Kristus, ras erpala-pala nggeluh erkiniteken alu sada tujun e me pendilo Dibata i bas Yesus Kristus. Ay. 16 e me pengajuk man perpulungen Filipi gelah ngusih kerina si enggo iajarken rasul-rasul kerna kiniteken man Yesus Kristus. Ay. 17 e me pengajuk gelah ngusih pengalamen geluh erkiniteken si payo si enggo ilakoken rasul Paulus ras rasul-rasul si deban.

Aplikasi

PA-nta sendah lit i teruh judul “Mamre itandai arah cara geluhna”. Cara geluh i jenda maksudna labo terjeng gelah teridah arah lebe saja tapi arah pudina berbeda 180°, entah pe mejile arah darat tapi arah bas nari labo mejile. Cara geluh i jenda tentuna cara geluh si payo sue ras Kata Dibata si ilakoken alu tutus ras tulus, tidak dibuat-buat dan memancar apa adanya, arah caranta rukur, pengerananta, ras perbahanenta. Emaka sidalanen ras judul datas, tema-nta sendah e me “Aku Mamre si man usihen”, alu tujun Mamre nggeluh jadi usihen, ras metode berupa aksi nyata Mamre. Penungkunenna, kai kin si man usihenken i bas Mamre nari, entah pe kai palasna maka Mamre layak jadi usihen?

Indikatorna enggo tangkas arah kesaksin nggeluh erkiniteken bagi si enggo isaksiken rasul Paulus man perpulungen Filipi e me : 1) Penandai Mamre kerna Yesus Kristus enggo ilakoken alu mbages, baik arah erlajar secara mandiri bage pe i bas ketutusen ndahiken dahin-dahin pelayanen i Gereja. Rasul Paulus nambahkenca alu ngusih pengalamen geluh erkiniteken si payo si enggo ilakoken rasul Paulus ras rasul-rasul si deban. 2) Mamre enggo nggeluh ersada ras Kristus. Ersada i bas kiniseranNa, ersada i bas kematenNa ras kekekenNa. Ertina Mamre enggo tuhu-tuhu ngangkai ras nggejapken kai-kai saja si jadi peraten Dibata i bas Yesus Kristus. 3) Mamre lit i bas proses erpala-pala nggeluh erkiniteken alu sada tujun e me pendilo Dibata i bas Yesus Kristus. Ertina, Mamre enggo berusaha semaksimal mungkin ngelakoken kerina si jadi peraten Dibata i bas Yesus Kristus arah kerina pengkebet geluhna.

Penungkunen evaluatif man banta, enggo kin Mamre tuhu-tuhu jadi usihen? Tentu enda menjadi perenungen pribadi man banta senina Mamre. Nina rasul Paulus, “Tapi adi lit i bas kam si la bage perukurenna, Dibata me pagi mpetangkassa man bandu” (ay. 15). Ertina, kita iajuk gelah la erngadi-ngadi erlajar nggeluh erkiniteken si payo i bas Yesus Kristus. Pengakun rasul Paulus maka ia pe lenga serta i bas geluh kinitekenna, tapi enggo itehna tujun geluhna ras erpala-pala ia nggeluh sue ras peraten Dibata. Emaka telu hal i datas banci jadi aksi nyata Mamre. Si pemena lebe tentu saja mperobahi hal-hal si perlu siperobahi. Enda sifatna ke dalam. Kenca bage maka secara otomatis kalak si deban si lit i sekelewetta pe banci ngidah perobahen e ras ngusih kita sebage Mamre si ernalem ras erkiniteken man Yesus Kristus. Dibata si mpengasup kita.