PJJ GBKP Tgl. 12 - 18 Februari 2017

PJJ GBKP TGL. 12 - 18 FEBRUARI 2017

Nrs. Pdt. Larena br. Sinuhadji (Bp. Rey Tarigan)

Tema : NGELAI E ME KOMITMENKU (Markus 10:35-45)

Penjelasen Bahan Ogen & Renungen

Adi bahan-bahan i bas minggu-minggu si nderbih erkomitmen kita guna ersaksi (maturia) ras erkomitmen kita guna reh ku perpulungen entah pe ersekutu (koinonia), i bas minggu sendah erkomitmen ka kita guna ngelai, entah pe melayani (diakonia). Rikutken bahan ogenta sendah, maka icidahken palasta ngelai entah pe melayani e me :

1. Si perlu iusih i bas Jakup ras Johanes e me inisiatifna guna ngelai. Amin pe i bas bahan ogenta sendah ipekena-kena Yesus motivasi kalak enda duana i bas pemindonna ndai, tapi lit sifat pro-aktif i bas diri anak-anak Sebedeus alu mindo man Yesus. Maka i bas kita ngelai arus lit biak-biak erinisiatif ras pro-aktif.

2. I bas ay. 38-39, ikataken Yesus kerna palas ngelai e me ersada ras Kristus, “Minem me tare calung kiniseranKu janah kam iperidiken alu peridin si arus Kualoken”. Banci sibandingken ras bahan PA Mamre-nta i teruh postingen enda, nina rasul Paulus “ersada ras Kristus”, ersada i bas kiniseranNa, ersada ras kematenNa bage pe kekekenNa. Ertina i bas kita ngelai arus ngusih Yesus Kristus i bas kiniteruken ukurNa, ketutusenNa, kerembakenNa ras Dibata, mediateNa man kalak si lit i bas kiniseran, rsd.

3. I bas ay. 42-45, Yesus mereken perbandingen kerna palas ngelai si ilakoken kalak doni enda ras palas ngelai si arus ilakoken ajar-ajarNa. Adi kiniganjangen ukur si jadi palasta ngelai maka si terjadi merhat kita ielai ras rate-rate kita man kalak si deban. Tapi sebalikna adi palasta pengorbanen Yesus Kristus i kayu persilang maka nggit kita jadi suruh-suruhen si ngelai alu kiniteruken ukur i lebe-lebe Dibata ras manusia. Ertina i bas kita ngelai arus lit je jiwa pengorbanan, rela menderita, rela berjerih payah untuk kebaikan orang-orang yang dilayani, tulus la ngarapken imbalan entah pe balasen i bas ngelai.

4. Kerina si ilakoken kita i bas kita ngelai tujunna guna kemulian gelar Dibata. Erlajar arah motivasi si salah i bas anak-anak Sebedeus nari, maka palasta ngelai labo guna kemulian gelarta, man puji-pujin entah pe gelah teridah kalak uga hebatna kita. Tapi kerinana guna kemulian gelar Dibata.

Tema-nta i bas wari sendah mabai kita guna semakin ningkatken kualitas ras kuantitas komitmenta i bas ngelai. Mari radu ras sievaluasi rikutken bahan ogenta sendah. Si pemena, lit kin i bas kita biak-biak erinisiatif ras pro-aktif i bas ngelai? Adi lenga, tentuna perlu ilitken bas dirinta, ertina erlajar kita la nari man suruh-suruhen. Adi enggo lit, perlu sipertahanken entah pe perlu denga sitingkatken. Si peduaken, i bas kita ngelai enggo kin kita ersada ras Kristus? Adi lenga, mari radu ras kita erlajar ngusih Tuhan Yesus i bas kiniteruken ukurNa, ketutusenNa, kerembakenNa ras Dibata, mediateNa, rsd. Si peteluken, enggo kin lit jiwa pengorbanan, rela menderita, rela berjerih payah untuk kebaikan orang-orang yang dilayani, tulus la ngarapken imbalan entah pe balasen i bas ngelai? Adi lenga, mari radu ras siusih pengorbanen Yesus Kristus i kayu persilang guna nelamatken kita. Si peempatken, lit denga kin bas kita biak-biak man puji-pujin, gelah teridah kalak uga hebatna kita i bas kita ngelai? Adi lit denga tentuna perlu siperobahi, ertina pelayanen si isehken kita tujunna guna kemulian gelar Dibata, labo guna kemulian gelarta.

Gereja perlu membuka seluas-luasna partisipasi kerina anggota perpulungen si pelain-lain talentana guna melayani. Ertina komitmen guna melayani arus berbanding lurus ras sarana si isikapken Gereja. Melayani labo terjeng si lit i bas cakupen bidang diakonia saja. Tapi melala jenis-jenis entah pe bentuk-bentuk pelayanen si deban. Umpamana, lit sekalak Moria si atena ngelai i bas bentuk ngajari Koor, tentuna perlu sifasilitasi. Lit ka Mamre si atena rende muji Tuhan, e pe perlu sifasilitasi. Lit PERMATA-nta si nggit ia erbahan bimbingan belajar man anak-anak KAKR-ta, perlu ka nge sifasilitasi. Lit sekalak dokter si atena mbuka klinik pengobaten gratis, e pe perlu sifasilitasi. Ras contoh-contoh si deban. Ertina Gereja arus menciptaken suasana ras kondisi si erbahanca perpulungen ergiah-giah guna ngelai. Mari radu ras kita ergiah-giah guna ngelai. Dibata si mpegegehi kita.