PA MORIA GBKP
TGL. 26 FEBRUARI - 4 MARET 2017
Pdt. Larena br. Sinuhadji (Nd. Rey Tarigan)
PA HDS II
Ogen : Bilangen 27:1-11
Tema : LIT KIN AKU LA BUJUR BANDU?
Tujun : Gelah Moria :
1) Ngeteh kiniadilen si ni tuntut anak-anak Selapehat
2) Tetap ngelakoken keadilen i bas kegeluhenna
Metode : Diskusi
Penjelasen Bahan Ogen & Relevansi
1. Mahlah, Nuah, Hogelah, Milkah ras Tirsah e me
anak-anak si diberu Selapehat si merupaken kesusuren Jusuf. Bapana mate i gurun
pasir alu la nadingken sekalak anak dilaki. E maka berjuang anak-anak e guna
ndatken keadilen gelah tetap gelar bapana la masap dingen tinading bapana ndube
pe ndabuh man anak-anakna aminna pe diberu.
2. Bapana mate labo ikut i bas pemberontaken bani
Korah si kedungenna mate itelen bumi (Ps. 16), tapi erkiteken termasuk i bas
bagian bangsa Israel si rusur jungut-jungut man Tuhan seh makana mate i taneh
mesawang dingen la banci bengket ku taneh perpadanen (Ps. 14:26-).
3. Alu la mbiar-mbiaren reh anak-anak Selapehat enda
ngaduken persoalenna man Musa, Imam Eleasar, pemimpin-pemimpin Israel ras
kerina perpulungen i bas dalan bengket ku bas Kemah Perjumpaan. Ertina, i jenda
anak-anak Selepehat labo hanya sinik, ngaloken keadaanna, tapi berjuang guna
banci ngubah situasi ras keadaanna guna masa depanna.
4. Musa nehken persoalen enda man Tuhan. Enda me salah
sada ciri kepemimpinen Musa, tetap ia ersukuten man Tuhan i bas kai pe
persoalen si ihadapina. Ras ibereken Tuhan solusi, maka ibenarken Tuhan
pemindon anak-anak si diberu Selapehat. Firman Tuhan, melampaui aturen, tradisi
ras budaya si terbatas buaten tan manusia. Anak-anak Selapehat ngaloken
erta-erta tading-tadingen bapana ndube. Bahkan persoalen si iangkatken anak-anak
si diberu Selapehat banci nampati persoalen-persoalen si lit sedekah enda ras
hanya isiniken. Termasuk adi la lit anak-anak tinadingna, subuk dilaki ras
diberu, janah orang tuana enda pe anak tunggal ka la lit senina bapana, maka
kade-kadena si ndeherna si ngaloken tading-tadingen e, janah njemaksa bagi
ertana jine.
5. Tema HDS-ta : “Lit kin aku la bujur bandu?” Enggo
pasti Tuhan IA me ulu kebujuren ras keadilen, kai si ibahanNa man manusia bujur
ras adil, walaupe terkadang i bas kacamatanta rusur kita ngatakenca, “la kap
adil Dibata e bangku!”
Dibata nepa kita seri dilaki ras diberu ras lit tempas
Dibata i bas dirinta. Kita ngaloken kekelengen ras keselamaten i bas Dibata
nari, la ibedakenNa. Gundari tergantung respon i bas kita manusia, apakah sialoken
entah lang kekelengen Tuhan e. Dibata mereken matawari ras udan man kalak si mehuli
ras kalak si jahat, la ibeda-bedaken Dibata. Dibatanta Maha Adil, emaka man
baNa kita ersukuten.
Melala pergeraken entah perjuangen ilakoken dalam
rangka memperjuangenken keadilen khususna man diberu, sabab sedekah enda mbue
denga kekerasan, ketidakadilen man diberu.
• Guru TK, perawat, pekerja konveksi, buruh pabrik,
PRT si umumna diberu si ndahikenca, inilai sebage pekerja rendah, emaka
mpengaruhi penghargaan ras tingkat gaji/upah sialokenna.
• Mbue denga si erdahin diberu i pabrik si rentan
ndatken PHK erkiteken la lit ikaten formal i bas perusahaan inganna erdahin alu
alasen “gender”, pencari nafkah tambahen, pekerja sambilan, faktor reproduksi
(menstruasi, hamil, melahirkan ras menyusui).
• I bas pengupahen, diberu si enggo erjabu ianggap
sebage lajang, sebab enggo inafkahi perbulangenna ras terkadang terkena
potongen pajak.
• Lenga bo melala keterwakilen diberu i bas dunia
politik (legislatif ras eksekutif).
• Beban ganda ibereken tetap man diberu, aminna pe
enggo ia erdahin i luar rumah tetap denga arus bertanggung jawab ngurus jabuna,
si situhuna banci iras-rasken ras bapa i tengah jabu (berbagi peran - kerja
sama).
• I Gereja, melala denga Gereja si lenga ngaloken
diberu jadi Pendeta/Imam. Bahkan enggo pe ialoken diberu jadi Pendeta, melala
denga Runggun i bas konteks GBKP menolak diberu alu erbage alasen (man
teman-temanen, diberu lemah, mbue kari liburna erkiteken persoalen reproduksi,
rsd.). (Cataten pribadi : I bas sisi si deban, enda pe jadi evaluasi man bangku
sebage Pendeta diberu, payo kin alasen-alasen e lit bas aku? Sebab kadang si
terjadi, situntut keadilen tapi la lit introspeksi ras perbaiken i bas diri
sendiri. Menggeneralisir kerina Pendeta diberu tentuna labo keputusen si bijak.
Si mehulina masing-masing pihak mengintrospeksi diri ras nggit robah si man
perobahenken sue ras kebenaren Kata Dibata).
• ‘Di kenca lit persoalen masalah reproduksi si rusur
isalahken diberu, bahkan adi kin payo si kurang sehat diberu, maka ia
iceraiken. Janah si lebih memprihatinken usul enda rehna i bas diberu ka, e me kap
semetuana.
Kerina kita manusia bekas Dibata nepasa, radu ateta
ikelengi, iergai, iperhatiken, datken perlakuan si seri, tanpa ibeda-bedaken
(dilaki - diberu, kaya - miskin, terpelajar - bodoh, rsd.), sabab kerina kita
seri i lebe-lebe Dibata. Alu bage, berjuang kita, labo hanya diberu, tapi pe
ras dilaki, bekerja sama, bergandengan tangan berjuang guna ngelakoken keadilen
man kalak si deban i bas kegeluhenta, adi kin siidah lit ketidakadilen. Banci
jadi i bas jamanta lenga terjadi perobahen, tapi generasi kenca kita enggo
idahna ras gejapina hasil kerja kerasta. Ula ka kita sesama perempuan
ngelakoken kekerasan, ketidakadilen man diberu. Sabab la mungkin kita berjuang
ngelakoken keadilen adi kita sendiri pe pelaku ketidakadilen. Tuhan si masu-masu
kita.
PA MAMRE GBKP
TGL. 26 FEBRUARI - 4 MARET2017
Nrs. Pdt. L. br. Sinuhadji (Bp. Rey Tarigan)
Keselamaten Erpalasken Kiniteken Si Erbuah
Ogen : Roma 1:16-17
Tema : NGGELUH I BAS KINITEKEN
Tujun : Gelah Mamre megenggeng erkiniteken man Dibata i bas kerina
dampar geluhna
Metode : Diskusi
Penjelasen Bahan Ogen & Relevansi
I bas teruh enda bahan ogenta i bas telu terjemahen
guna saling melengkapi pengangkanta kerna ogenta sendah :
Alkitab TB-LAI : (16) “Sebab aku mempunyai keyakinan
yang kokoh dalam Injil, karena Injil adalah kekuatan Allah yang menyelamatkan
setiap orang yang percaya, pertama-tama orang Yahudi, tetapi juga orang Yunani.
(17) Sebab di dalamnya nyata kebenaran Allah, yang bertolak dari iman dan
memimpin kepada iman, seperti ada tertulis: “Orang benar akan hidup oleh iman”.
Alkitab BIMK (Bhs. Indonesia Sehari-hari) : (16) “Saya
percaya sekali akan Kabar Baik itu, karena kabar itu adalah kekuatan Allah
untuk menyelamatkan semua orang yang percaya; pertama-tama orang Yahudi, dan
bangsa lain juga. (17) Sebab dengan Kabar Baik itu Allah menunjukkan bagaimana
caranya hubungan manusia dengan Allah menjadi baik kembali; caranya ialah
dengan percaya kepada Allah, dari mula sampai akhir. Itu sama seperti yang
tertulis dalam Alkitab, “Orang yang percaya kepada Allah sehingga hubungannya
dengan Allah menjadi baik kembali, orang itu akan hidup!” (Orang yang percaya
... orang itu akan hidup: atau Orang yang hubungannya dengan Allah menjadi baik
kembali; akan hidup karena kepercayaannya).
Pustaka si Badia : (16) “La aku mela kerna Berita si Mehuli
e; sabap Berita si Mehuli e kap Kuasa Dibata guna nelamatken kerina kalak si
tek man Jesus Kristus, perlebe man kalak Jahudi, jenari man kalak si deban si
labo kalak Jahudi. (17) Sabap arah Berita si Meriah tangkas uga Dibata ngerembakken
manusia kempak diriNa. Si enda ibenaken i bas kiniteken janah erkedungen i bas
kiniteken. Bagi lit tersurat i bas Pustaka si Badia, “Kalak si enggo
iperembakken Dibata kempak diriNa erdandanken kinitekenna nggeluh me ia”. (“La
aku mela” seri ras terjemahen Alkitab King James Version, “For I am not ashamed”).
Dua ayat si jadi bahan ogenta sendah merupaken palas
Martin Luther i bas ia mereformasi dirina sendiri bage pe dampak lanjutenna
mereformasi Gereja i bas jamanna. I bas si e muncul istilah Sola Gratia ras
Sola Fide. Keselamaten si ialoken kita e me inisiatif ras anugerah i bas Dibata
nari (Sola Gratia), janah keselamaten e ialoken kita alu kinitekenta man Dibata
(Sola Fide). Adi i bas bahasa Indonesia ikataken rasul Paulus maka ia tuhu-tuhu
tek kel (i bas Alkitab Contemporary English Version ikataken “I am proud” -
saya bangga) nandangi daya luar biasa si terkandung i bas berita Injil e si
nelamatken kerina kalak si tek man Yesus Kristus. Kinitekenta erbahanca kita
ndatken kegeluhen si tuhu-tuhu i bas Kristus janah kegeluhen si rasa lalap
kenca kita nadingken doni enda.
Kegeluhen si tuhu-tuhu e maksudna, kenca enggo kita
tek man Dibata i bas Yesus Kristus, bengket kita ku bas kegeluhen si mbaru.
Kegeluhenta si ndekah i bas dosa enggo isalihken jadi kegeluhen si mbaru, e me
ersada ras Kristus. I bas si e, kinitekenta labo terjeng tek saja, tapi
mengandung konsekuensi geluh si mbaru, geluh si ncidahken perobahen si nyata
(bdk. Roma 6:13-15; 12:2; Gal. 5; rsd.). Em tandana kita enggo tuhu-tuhu
erkiniteken man Dibata ras nggeluh ersada ras Yesus Kristus.
PA-nta sendah lit i teruh judul “Keselamaten
erpalasken kiniteken si erbuah”. Janah tema si seh man banta e me “Nggeluh i
bas kiniteken” alu tujun gelah Mamre megenggeng erkiniteken man Dibata i bas
kerina dampar geluhna. Kiniteken memang labo terjeng tek saja, kenca bage dung
kerinana. Kiniteken arus teridah i bas pengkebet geluhta ras ternanami dampak
perobahenna man kalak si deban si lit i sekelewetta. Perobahen e tentuna labo
terjadi secara otomatis kenca enggo kita tek man Dibata i bas Yesus Kristus. Perobahen
e lit i bas proses segedang geluhta. Si penting nggit kita er-proses ras
iproses menuju kualitas nggeluh si sue ras peraten Dibata. I bas kita er-proses
ras iproses e lit je pembelajaren, erlajar kita terus-menerus merobah
sifat-sifat si la mehuli arah pengalamen geluhta i bas kerembakenta ras Dibata.
Adi la kita rembak ras Dibata maka proses e ngadi. Emaka isingetken kita i bas
PA-nta sendah gelah megenggeng kita i bas erkiniteken man Dibata. Ertina, i bas
nggeluh erkiniteken man Dibata proses perobahen e arus tetap erdalan seh kita
nadingken doni enda. Dibata si mpegegehi kita.
Tidak ada komentar:
Posting Komentar