Khotbah GBKP Minggu Tgl. 19 Februari 2017

KHOTBAH GBKP MINGGU TGL. 19 FEBRUARI 2017

Nrs. Pdt. Larena br. Sinuhadji (Bp. Rey Tarigan)

SEPTUAGESIMA

(Warna Stola : Mbentar)

Invocatio : “Adi idahndu lembu ntah kelede imbangndu pulah, tangkap janah bereken man bana” (Keluaren 23:4)

Ogen : Imamat 19:1,2; 9-18 (Responsoria)

Khotbah : Matius 5:38-48 (Tunggal)

Tema : LEBIH ASA SI ARAPKEN KALAK (PELAYANEN PRIMA)

Penjelasen Bahan Pustaka Si Badia

Invocationta lit i teruh judul “Keadilen ras kinibujuren”, i bas Alkitab TB-LAI nina, “Peraturan tentang hak-hak manusia”. Intina, kalak Israel arus ngelakoken kebujuren ras keadilen nandangi kalak si deban, entah pe mediate ras mperdiateken hak-hak nggeluh kalak si deban. Lembu entah kelede paksa si e merupaken hak nggeluh kalak si deban erkiteken merupaken pangan pokokna entah pe mata pencaharianna. Adi iidah lembu entah kelede kalak si deban pulah maka arus sitangkap ras sibereken man si mpunana, amin pe si mpunana e imbang entah pe ersoal secara pribadi ras kita. Kinibujuren, keadilen, entah pe hak-hak nggeluh kalak si deban, amin pe ia imbangta, arus siutamaken asangken urusennta secara pribadi. Palasna perentah enda e me, erkiteken Dibata si enggo mulahi bangsa e i bas taneh perbudaken Mesir nari (bdk. Kel. 20:2). Dibata ngenca si arus isembah, iikutken kerina perentah-perentahNa, sebab Dibata pe enggo ngkelengi, mediate, ngelakoken si adil ras si bujur man bangsa Israel, tanpa memandang apakah bujur perbahanen bangsa e entah lang. Padahal radu ras siteh usur ipersoken bangsa e gelar Dibata, tapi Dibata tetap nehken si mehuli man bangsa e.

Ogenta sendah pe ngerana kerna aturen-aturen i bas Dibata nari si arus ilakoken bangsa Israel. Lit i teruh judul “Undang-undang kerna kebadian ras keadilen”, i bas bhs. Ind. nina, “Kudusnya hidup”. Isina kurang lebih seri ras invocationta, bangsa Israel arus ngelakoken keadilen ras kerina hal si sifatna badia, erkiteken Dibata pe adil ras badia (ay. 2). Sebage umat Dibata tentuna bangsa Israel e arus ncidahken keadilen ras kebadian i bas hal-hal si sifatna etis praktis i bas kegeluhen si tep-tep wari (i bas kalimat si positif aktif) : mediatelah man kalak si musil alu nadingken hasil jumana (ay. 9-10); ergailah si jadi sikerajangen kalak (ay. 11-13); tepatilah padan (ay. 12); mediatelah man kalak difabel (ay. 14); bujur ras adillah i bas mutusken perkara (ay. 15); katakenlah si tuhu kerna ise pe (ay. 16); tangkas ukur tangkas kata, adi lit persoalen mis dungilah seh dung (ay. 17); kelengilah temanndu manusia, bali ras kam ngkelengi dirindu jine (ay. 18).

I bas bahan khotbahta, Yesus nehken pengajarenNa alu khotbahNa i das uruk nari man ajar-ajarNa ras kerina kalak si ngikut-ikut IA. I bas khotbahNa e, Yesus ngajarken kerna Taurat entah pe Undang-undang Dibata nari si isehken man Musa ndube, bagi si enggo ioge kita i bas invocationta ras ogen si pemena, alu sudut pandang si maru. Si pemena lebe, Undang-undang Dibata e arus sialoken sebage bagin si la terpisahken i bas identitasta sebage anak-anak Dibata. I bas sudut pandang enda tentuna kerina undang-undang e labo ilakoken secara terpaksa entah pe iikutken bage-bage saja sebage tradisi si turun-temurun, tapi tuhu-tuhu silakoken secara proaktif sebage identitas anak-anak Dibata si nandai kerina si jadi peraten Dibata. Si peduaken, Dibata si isembah kita e me Dibata si serta. Serta i jenda labo siertiken sebage kualitas perbahanen si la mungkin ilakoken manusia erkiteken Dibata si jadi perbandingenna, bagi erbahan batu jadi roti. Tapi i bas ngelakoken kai pe, si sue ras peraten Dibata, arus ipalasi alu : ketutusen, ketulusen, mediate ras kekelengen. Palas enda penting sebab nentuken niat. Adi palasna entah pe niatna enggo jelas maka kerina si ilakoken kita e sifatna proaktif, labo ekiteken iiah-iahken entah pe isuruh-suruh, tapi tuhu-tuhu inisiatifta tanpa lit keterpaksaan. Janah kerina si ilakoken kita e tuhu-tuhu erkedungen, erkesehen (tepat sasaran), labo setengah-setengah, entah pe asal-asalan.

Secara etis praktis pengajaren Yesus i bas bahan khotbahta e me : tetaplah erbahan si mehuli man kalak si jahat man banta (ay. 38-41). (Cataten : menampar pipi e me penghinaan si paling berat paksa si e. Maba barangna sada kilometer dauhna, maksudna, paksa si e enggo menjadi hak sekalak prajurit Romawi maksa kalak si deban maba barangna sada setengah kilometer ndauhna). Berelah si ngasup iberekenndu man kalak si butuh penampatndu (ay. 42). Kelengilah ras totokenlah imbang-imbangndu. Bahanlah si mehuli, si bujur, ras perkuankenlah (berikan salam) man kalak si jahat ras si la bujur man bandu (ay. 43-47). Kualitas kerina perbahanen-perbahanen e labo saja ncidahken maka kita lebihen asangken kalak si lenga nandai Dibata tapi memang bage nge kualitas perbahanen anak-anak Dibata si serta : ipalasi ketutusen, ketulusen, mediate, kekelengen, proaktif, tepat sasaran ras erkedungen.   

Aplikasi

Tema si seh man banta i bas wari Minggu sendah e me : “Lebih asa si arapken kalak (Pelayanen Prima)”. Lit kutipen i bas Bunda Teresa nari si enggo ngelakoken pelayanen prima i Kalkuta India, nina “If you are kind, people may accuse you of selfish, ulterior motives. Be kind anyway. If you are honest and sincere people may deceive you. Be honest and sincere anyway. If you find serenity and happiness, some may be jealous. Be happy anyway. The good you do today, will often be forgotten. Do good anyway. Give the best you have, and it will never be enough. Give your best anyway. In the final analysis, it is between you and God. It was never between you and them anyway”. Ertina secara garis besar, melala tantangen i bas kita ngelakoken si mehuli si erbahanca kita surut, setengah-setengah, bahkan ngadi i bas ngelakoken si mehuli. Tapi kita tetap arus ngelakoken si mehuli, lebih asa si ilakoken kalak si deban si la itandaina Dibata, sebab si jadi ukuren labo ulih kalak man banta tapi Dibata si enggo mereken si prima, si terbaik, si mehulina man banta.

Kualitas perbahanen si bagenda rupana enggo isehken Dibata man kalak Israel i bas invocationta, pengogen si pemena, bage pe mulihi isingetken Yesus i bas bahan khotbahta. Si pentingna kel i je e me palasna si jadi niat i bas kita ngelakoken kerina si jadi peraten Dibata e me : Dibata si perkeleng, mediate, proaktif mulahi bangsana i bas kiniseran, Dibata si adil, bujur, badia, dem alu ketutusen ras ketulusen, tuhu-tuhu erkedungen, erkesehen (tepat sasaran), labo setengah-setengah, entah pe asal-asalan. Emaka searusna kualitas perbahanenta pe seri ras kualitas perbahanen Dibata erkiteken identitasta enggo jelas, e me anak-anak Dibata si enggo ngaloken anugerah keselamaten si prima, si terbaik, si mehulina arah Dibata nari i bas Yesus Kristus, amin pe kita kalak perdosa.

Contoh-contoh pelayanen prima umpamana, i bas pendahinta, adi sekalak dokter kita, jadilah dokter si bujur, katakenlah si tuhu man pasien-pasienta. Adi sekalak guru kita, jadilah guru si tepat waktu, rajin nikapken bahan pelajaren sope ngajar, kreatif i bas ngajar, rsd. Adi sekalak perbinaga kita, bahanlah timbangen si bujur ras erga si wajar, ramah kita man pelanggan, rsd. I bas pergaulenta i tengah-tengah masyarakat, jadilah warga yang bersahabat, murah hati, peduli kepada yang membutuhkan bantuan, bergaul dengan siapa saja tanpa membedakan, rsd. I bas keluarganta i rumah, adi perbapan kita, jadilah perbapan si bertanggung jawab, ngkelengi ndeharana, mesayang man anak-anak, nggit nampati ndehara i bas pebelin-belin anak, rsd., umpamana.

I bas pelayanenta i Gereja, adi Serayan kita entah pe Pengurus, jadilah Serayan ras Pengurus si profesional. Profesional i jenda ula siertiken secara material saja si seri bagi dunia pendahin sekuler, gaji 50 juta dengan beban kualitas pekerjaan sue ras kompetensinta, adi la sue gaji ras kompetensinta, mis ngadi entah pe ikurangi kualitas dahinta, umpamana. Profesional i jenda ertina, melakukan segala suatu dengan kualitas terbaik. Tuhu-tuhu ersikap kita sope jadi Liturgos, entah pe erkhotbah, gelah ula salah-salah, umpamana. Tepat waktu (lebih baik menunggu daripada ditunggu), disiplin, teratur i bas nehken persepuluhen, umpamana. Adi sekalak Pemusik entah Song Leader kita, tuhu-tuhu berlatih ndauh-ndauh wari sope pelaksanaan, ula je kebaktin je ka kita berlatih, umpamana. Adi profesional kita i bas pelayanenta i Gereja, e me hal si sangat wajar nge, bahkan searusna lebih profesional pe asangken pendahinta i bas doni enda, erkiteken Dibata enggo mereken si terbaik i bas geluhta : nafas kegeluhen, kesehaten, si ergana lebihen asangken gaji si idatken kita i bas pendahinta. Terakhir, la lit pelayanen prima si tanpa pengorbanan. Tapi e pe situhuna ula jadi kebiaren, sabab Yesus enggo leben erkorban guna keselamatenta. Ertina, Dibata si mpegegehi kita i bas kita ngelakoken kerina si mehuli lebihen asangken si iarapken, entah pe i bas kita nehken pelayanen si prima. Gelar Dibata termulia i bas kerina pengkebet geluhta.