Khotbah GBKP Minggu Tgl. 5 Februari 2017

KHOTBAH GBKP MINGGU TGL. 5 FEBRUARI 2017

Nrs. Pdt. L. br. Sinuhadji (Bp. Rey Tarigan)

MINGGU EPIFANIAS V

(Warna Stola : Mbentar)

Invocatio : “Perukurenndu bali min ras perukuren Kristus Yesus” (Pilipi 2:5)

Ogen : Masmur 112:1-10 (Tunggal)

Khotbah : 1 Korinti 2:6-16 (Responsoria)

Tema : NGGELUH I BAS PERUKUREN KRISTUS

Penjelasen Bahan Pustaka Si Badia

Ivocationta e me salah sada pedah rasul Paulus man perpulungen i Pilipi. I bas Alkitab TB-LAI iterjemahken, “Hendaklah kamu dalam hidupmu bersama, menaruh pikiran dan perasaan yang terdapat juga dalam Kristus Yesus”, terjemahen Bahasa Indonesia Sehari-hari (BIS - BIMK), “Hendaklah kalian berjiwa seperti Yesus Kristus”. Antusenna, rasul Paulus ngajuk gelah perpulungen i Pilipi ersada ras Tuhan Yesus (bdk. Pil. 1:27) i bas kerina pengkebet geluhna, ngusih Tuhan Yesus baik i bas cara rukur, berperasaan, pengerana, perbahanen, rsd. Gelah i bas si e malem kel ate rasul Paulus (ay. 2) bage pe ate Dibata.

Bahan ogenta nuriken kerna kemalemen ate si ialoken kalak si erkemalangen man Tuhan, si ermeriah ukur ngikutken perentah-perentahNa. Bentuk-bentuk konkrit kemalemen ate enda i bas ay. 2-3 nina : anak-anakna jadi kalak si erkuasa, kesusurenna ipasu-pasu, isi jabuna jadi kalak bayak namura. Bentuk-bentuk konkrit kemalemen ate enda kepeken labo hanya i bas bentuk pasu-pasu secara materi saja, tapi i bas ay. 4-9 nina : bujur, adil, perkuah dingen perkeleng, melumbar pepinjamken, bujur i bas kerina urusen, asa ndigan pe la guling, tetap iinget rasa lalap, la mbiar ngaloken berita si la mehuli, kinitekenna paguh dingen ernalem ia man TUHAN, la ia mbiar dingen la aru atena, tek ia maka talu kap imbang-imbangna, melumbar pemerena man kalak si kekurangen, kinibujurenna lit rasa lalap, ermulia dingen ihamati. Kerina si isaksiken Pemasmur enda labo hanya sekedar hayalan, tapi memang lit, nyata terjadi i bas pengalamen geluh kalak si erkemalangen man Dibata si ermeriah ukur ngikutken perentah-perentahNa. Emaka i bas ay. 1 nina Pemasmur, “haleluya”, ertina “pujilah Tuhan”, e me ekspresi meriah ukur (sukacita), pengataken bujur si tutus (tulus, spontan), si isehken alu rende muji guna kemulian gelar Tuhan.

Bahan khotbahta ngerana kerna “Kepentaren Dibata”, i bas Alkitab TB-LAI nina “Hikmat yang benar”. Rasul Paulus meritaken kerna kepentaren Dibata si erbahanca kalak Yahudi megelut ras kebodohen iakap kalak Yunani (1 Kor. 1:23). Kepentaren Dibata e me Yesus Kristus. Kepentaren Dibata si serta i bas Yesus Kristus enda enggo ialoken kalak si tek man baNa alu Kesah Dibata. Kesah Dibata si ngajarken man kalak si tek : ay. 10 biak Dibata (rencana-rencana Allah); ay. 11-12 pemeteh kerna Dibata (isi hati Allah) ras pemere-pemereNa (semua yang telah dianugerahkanNya); ay. 13-14 kebenaren pertendin (hal-hal rohani); ay. 15 kengasupen ertimbang kerna kai pe; ay. 16 perukuren Kristus. Nina rasul Paulus i bas ay. 6, “iberitaken kami nge berita kerna kepentaren man kalak si enggo dewasa kinitekenna”, i bas ay. 13 nina, “dewasa kegeluhen pertendinna”. Antusenna, i bas sada sisi rasul Paulus ngatakenca secara tersirat maka kepentaren Dibata mabai kalak si tek ku kedewasaan erkiniteken, i bas sisi si deban, melala denga kalak si tek si lenga dewasa geluh kinitekenna bagi piga-piga kalak i bas perpulungen i Korinti. Kalak si dewasa kinitekenna tentuna lit perobahen si nyata i bas geluhna erkiteken terbuka pusuh perukurenna guna iajari Kesah Dibata.

Aplikasi

Lit kutipen si ngatakenca bagenda, “Be careful of your thoughts, for your thoughts become your words. Be careful of your words, for your words become your actions. Be careful of your actions, for your actions become your habits. Be careful of your habits, for your habits become your character. Be careful of your character, for your character becomes your destiny”. Kutipen enda ngatakenca maka caranta rukur mempengaruhi kai si bakal idatken kita, si mehuli entah si la mehuli (destiny : nasib). Kitab Kuankuanen 4:23 pe negasken kerna si e, “Manjar-anjar kam rukur, sabap perukurenndu kap si mabai dalan kegeluhenndu”. Adi rusur kita rukur si negatif maka output-na hal-hal si sifatna negatif. I bas bahasa jaman gundari nina “baper” (bawa perasaan), ertina terlalu berprasangka negatif, kai-kai sitik mis ibaba ku bas prasangka negatif nandangi sekelewetta. Adi bage geluhta tentuna latih kel, mungkin banci ka mis kita kena pinakit jantung entah pe stroke, janah sekelewetta pe stress ngenehen kita. Kebalikenna, adi rusur rukur si positif, maka output-na hal-hal si mehuli i bas kegeluhenta.

I bas invocationta rasul Paulus negasken kerna perukuren Yesus Kristus (bhs. Ind., “pikiran dan perasaan”, “jiwa”), ertina penting kel man kalak si tek man Yesus ngikutken (meneladani) cara Yesus rukur. Bage pe i bas bahan khotbahta, penting kel kepentaren Dibata jadi perukurenta. Janah secara ideal memang adi enggo lit Kesah Dibata i bas kita, tentuna Kesah e mabai kita rukur kerna kerina si jadi peraten Dibata i bas Yesus Kristus. Rasul Paulus ngajarken kerna identitas Kristen si otentik. Identitas si ncidahken Kristus si nyata i bas kegeluhen. Adi ngaku kita sebage kalak Kristen tentuna sue kata ras perbahanen. Kai si iukurken Kristus e nge si jadi perukurenta, kerina si ilakoken Kristus e nge si ilakoken kita. Ogenta sendah, ncidahken uga malemna ate kalak si erkemalangen man Dibata ras si meriah ukur ngikutken perentah-perentahNa. Ertina, adi cara rukur Dibata sipakeken i bas kegeluhenta maka melala pasu-pasu Dibata si secara konkrit banci idatken kita, baik secara materil bage pe secara moril (hal-hal mehuli si deban bagi si enggo iuraiken i datas).

Tema si seh man banta i bas wari Minggu sendah e me : “Nggeluh i bas perukuren Kristus”. Akap kami tentuna enggo radu ras siteh kai-kai saja si jadi perukuren Kristus i bas kerina si enggo ilakokenNa i tengah-tengah doni enda arah berita Pustaka si Badia nari. Minimal enggo siteh kita-lah umpamana kerna “hukum kasih” (Mat. 22:37-40). Penungkunenna, enggo kin keleng ate man Dibata ras man manusia e rusur sitamaken i bas perukurenta? Adi enggo, seh i ja keleng ate man Dibata ras man manusia e ngerobah kegeluhenta ras kegeluhen kalak si deban i sekelewetta? Em gelarna proses erlajar si mehuli, erlajar sambil ngelakoken, bage pe mengajar alu ngelakoken. Mungkin enda si jadi penekanen i bas tema-nta sendah. Ertina menjadi evaluasi pribadi man banta sekalak-sekalak maka sebage kalak si enggo ndatken anugerah keselamaten i bas Dibata nari, caranta rukur, caranta ngerana, ras perbahanenta sue ras keselamaten si enggo idatken kita. Dibata si mpegegehi kita.