PJJ GBKP Tgl. 5 - 11 Februari 2017

PJJ GBKP TGL. 5 - 11 FEBRUARI 2017

Pdt. Larena br. Sinuhadji (Nd. Rey Tarigan)

Tema : KOMITMENKU REH KU PERPULUNGEN (Heber 10:22-25)

Penjelasen Bahan Ogen & Renungen

Adi bahan minggu si nderbih berkomitmen kita untuk bersaksi (maturia), i bas minggu enda erkomitmen ka guna reh ku perpulungen (bersekutu entah pe koinonia). Rikutken perikopta, maka icidahken palasta ersembah man Tuhan e me :

1. Pengorbanen Yesus Kristus, si erbahanca enggo bebas kita bengket ku bas ingan si badiana kel. Ope si e kalak Jahudi i bas ersembah i bas Rumah Pertoton, inganna ibelat-belat lit ingan si badia kel, guna imam besar nehken persembahen man Tuhan, je nari ingan guna kalak Israel, ingan man diberu, ingan man si labo kalak Jahudi. Kematen Yesus Kristus erbahanca la lit nari pemisahen sada ras si debanna, enggo banci ersada i bas ersembah man Dibata.

2. Yesus enggo mbuka dalan guna banci kita rembak ras Ia, emaka arus sirespon alu kita pe ngerembakken dirinta man baNa, alu tutus ate dingen kiniteken si tetap. Ertina, ula alu formalitas, rutinitas, gelah menggo. Tapi reh alu ukur si meciho, mindo tetap pengalemi dosa i bas Ia nari erkiteken mekatep la ngasup kita nimbak peraten daging.

3. I bas perjumpaanta ras Tuhan, labo saja i je lit aspek vertikal, tapi lit aspek horizontal, i ja kita jumpa ras teman-teman sada kiniteken. Arah perjumpanta ras teman-temanta erbahanca turah kedekaten sada ras si debanna si erbahanca banci kita saling mperdiateken. Hubungen emosionalta reh deherna, terlebih Kristus si mpersadaken kita, si erbahanca kita nggeluh sikeleng-kelengen, sisampat-sampaten si memotivasi kita guna nehken si mehuli.

4. Wari Tuhan reh me. Kerehen Tuhan si peduaken bagi pinangko emaka arus kita ersikap katawari paksa pe. Uga pe beratna perbebenta, arah perjumpaan ras Tuhan bage pe teman sada kiniteken erbahanca megegeh kita ngalakenca, si ngena ate Tuhan sidalanken. Emaka guna si e, tetap kita siiah-iahenken (saling mengingatkan dan saling menjaga).

Rikutken penelitian Litbang GBKP 2010-2014 maka kehadiren perpulungenta ku bas kerina kegiaten ibadah lenga memuasken, bahkan ibadah silakoken kita (Kebaktin Minggu, PJJ, PA) lenga lit korelasi si positif ras pengkebet geluhta si tep-tep wari. Emaka i bas tahun 2017 enda tahun programta mengambil tema belajar-mengajar untuk melakukan. Gelah kinitekenta teridah i bas pengkebet geluhta si tep-tep wari.

Emaka rikutken tema-nta i bas PJJ wari enda, mabai kita gelah erkomitmen guna reh ku perpulungen ersembah ras Tuhan bage pe jumpa ras teman-teman sada kiniteken. Sigejapken maka Dibata enggo ngalemi salah ras dosanta, emaka perjumpaanta ras Tuhan merupaken pengataken bujurta man baNa sekaligus mindo gegeh tole arah Firman Tuhan, nde-nden si penangkih kita, kesaksin teman maka ngasup kita ndalani kegeluhen si dem perbeben. Adi enggo erkomitmen berarti enggo turah kesadaren sendiri, la nari man iahenken, konsisten kita ndalankenca (la wari-warin) ras uga pe konsekuensina tetap alu sukacita reh kita ku perpulungen, kecuali lit alangen si la banci sisilahken. Guna seh ku bas komitmen, ibenai alu proses si cukup gedang, seh makana jumpa ras Tuhan bage pe teman-teman sada kiniteken enggo menjadi sada ketedehen. Emaka erbage-bage metode ngajuk perpulungen tetap banci sidalanken, subuk arah SMS, ijemput langsung ku rumahna, iiah-iahken, babai terlibat i bas kerina kegiaten sektor (Koor, Vocal Group, jadi panitia-pantia, rsd.).