Khotbah GBKP Minggu Tgl. 26 Februari 2017

KHOTBAH GBKP MINGGU TGL. 26 FEBRUARI 2017

Nrs. Pdt. Larena br. Sinuhadji (Bp. Rey Tarigan)

MINGGU PASSION 1

(Estomihi : Jadi Man Lingling Kecion)

(Warna Stola : Ungu)

Invocatio : “Erkiteken pasu-pasu Dibata nge maka kalak jadi bayak, erdahin erbintuas labo nambahi kebayaken” (Kuan-kuanen 10:22)

Ogen : 2 Petrus 1:16-21 (Antiphonal)

Khotbah : Masmur 2:1-12 (Tunggal)

Tema : IDILO GUNA PEHULIKEN

Penjelasen Bahan Pustaka Si Badia

Bahan khotbahta e me nubuaten kerna kerehen Mesias, Raja Penyelamat si ipilih Dibata guna naluken dosa ras kejahaten i doni enda. Judul perikop i bas Alkitab TB-LAI nina “Raja yang diurapi TUHAN”. Masmur bindu 2 enda jadi rujuken i bas Padan si Mbaru guna ncidahken maka Mesias e igenepi i bas diri Yesus Kristus : Perb. Rasul 13:33; Heb. 1:5, 5:5; Ket. 2:26-27. Ay. 1-5, nggambarkenca situasi doni si dem alu kejahaten si atena ngelawan ras meneken kuasa Dibata i tengah-tengah doni enda. I bas situasi doni si bagenda rupana, kuasa Dibata labo talu, i bas ay. 6, inubuatken maka lit paksana Dibata ngutus Mesias alu simbolisasi penangkuhken sekalak raja i deleng Sion. Deleng Sion e me simbol Rumah Pertoton, Jerusalem, ingan si badia. Ay. 7-9, e me karakteristik Mesias si ernalem man Dibata ras erberita kerna perentah-perentahNa, bagepe kuasa si ibereken Dibata man bana guna naluken kuasa dosa ras kejahaten. Erkiteken kuasa Dibata si mbelin, la lit ise pe si ngasup naluken kuasa Dibata e, maka i bas ay. 10-12 isingetken man kerina penguasa si lit i doni enda gelah erjimpuh nembah man Dibata, sekaligus pergegeh man kalak si ernalem man Dibata erkiteken datken kemalemen ate.

Ogenta e me kesaksin i bas rasul Petrus nari si secara langsung naksiken penangkuhen Yesus jadi Mesias (Kristus) alu peridin Yohanes Peridiken. Kesaksin e ituriken Petrus i bas ay. 16-18. Ay. 19 e me penegasen maka reh tekna Petrus nandangi berita nabi-nabi si ernubuat kerna kerehen sekalak Mesias si maba keselamaten man doni enda e me Yesus Kristus. Kai si enggo inubuatken nabi-nabi bagepe si inubuatken i bas bahan khotbahta, enggo igenepi i bas Yesus Kristus. Ay. 20-21 pengajuk man perpulungen gelah ngikutken petunjuk Kesah si Badia nari i bas ngangkai nubuaten-nubuaten si lit i bas Pustaka si Badia. Kesaksin ras pengajuk enda tujunna guna mpegegehi kiniteken perpulungen si paksa si e lit i bas kiniseran bage pe si lit i bas bahaya pengaruh guru-guru perguak si atena mabai perpulungen ku pengajaren si papak.

Ivocationta e me sada pengakun kiniteken si luar biasa i bas penulis kitab Kuankuanen nari, maka perkuah ate ras pasu-pasu Dibata ngenca si erbahanca ia bayak. I bas terjemahen Bahasa Indonesia Sehari-hari (BIS - BIMK) nina, “Karena berkat TUHAN sajalah orang menjadi kaya; kerja keras tak dapat menambah harta”. Pengakun kiniteken enda merupaken sada kritik man manusia si cenderung meganjang ukur, ngandalken gegeh ras kepentarenna i bas kai pe. Pengakun kiniteken enda persinget man manusia gelah ngataken bujur, meteruk ukur, ngakuken kuasa Dibata i bas kegeluhenna, ras ngandalken kuasa Dibata i bas kegeluhenna.

Aplikasi

Tema si seh man banta i bas wari Minggu sendah e me “Idilo guna pehuliken”. Pehuliken adi siterjemahken ku bas bhs. Indonesia rikutken Kamus Bahasa Karo - Indonesia e me “membawa kebaikan” entah pe “menyebabkan kebaikan”, mungkin banci ka siertiken “memperbaiki”. Rikutken bahan khotbah ras pengogenta si pemena, Mesias, e me Yesus Kristus, reh ku tengah-tengah doni enda guna pehuliken relasi antara Dibata ras manusia, manusia ras manusia, bage pe antara manusia ras alam sekelewetna si enggo ceda erkiteken dosa ras kejahaten. Karya pelayanen Yesus Kristus paksa IA nggeluh denga i tengah-tengah doni enda ncidahkenca maka Dibata tuhu-tuhu mewujudnyataken misiNa pehuliken kerina relasi si lit, mpelimbarui pola rukur ras cara nggeluh, mpelimbarui budaya, maba kedamen, negakken kebenaran ras keadilen, nebarken pengaruh-pengaruh si membangun ras positif guna kesejahteran doni enda, rsd. Puncakna e me pengorbanen, kematen ras kekeken Yesus Kristus guna ngelawan ras naluken kuasa-kuasa dosa ras kejahaten. Janah Kesah si Badia tetap denga erdahin guna nerusken misi Dibata i tengah-tengah doni enda seh maranatha.

Selaku kalak si enggo ngaloken anugerah keselamaten i bas Yesus Kristus, secara otomatis kita pe idilo guna pehuliken si man pehuliken sue ras peraten Dibata. Kerna si e akap kami enggo nge isedari kita maka kita enda anak-anak Dibata si iutus ku tengah-tengah doni enda guna ersaksi, ngelakoken kerina si jadi peraten Dibata i bas kegeluhenta. Melala contoh i bas Pustaka si Badia maka Dibata ndilo utusen-utusenNa guna pehuliken kerina si man pehuliken sue ras peraten Dibata. Melala utusen Dibata si tutus ngelakoken tugas pendilona alu kepentaren ras pergegeh i bas Dibata nari guna pehuliken si man pehuliken sue ras peraten Dibata, amin lalan kiniseran si jadi ulihna. Tapi lit ka utusen-utusenNa si la tutus, la ilaksanakenna tugas pendilona guna pehuliken si man pehuliken sue ras peraten Dibata. Kepentingen dirina jine si iperjuangkenna labo kepentingen Dibata, egois, meganjang ukur, iandalkenna kepentaren ras gegehna, rsd.

Termasuk i bas utusen si apai kita? Enda penungkunen evaluatif man banta kerina. I tengah-tengah keluarganta, enggo kin pehuliken kita si man pehuliken sue ras peraten Dibata? Entah kita termasuk i bas anggota keluarga si dahinta bagi kompor, manas-manasi lalap labo ikut pehuliken keadaan ‘di kune lit persoalen i tengah-tengah keluarganta, umpamana. I bas pendahinta enggo kin pehuliken kita si man pehuliken sue ras peraten Dibata? Entah kita ikut muat bagin i bas korupsi, umpamana. I tengah-tengah masyarakatta, enggo kin kita pehuliken si man pehuliken sue ras peraten Dibata? Entah kita enda termasuk kalak si la mediate nandangi lingkungen sekitarta, umpamana. I bas pelayanenta i tengah-tengah Gerejanta, enggo kin pehuliken kita si man pehuliken sue ras peraten Dibata? Adi enggo, tentuna bicara melala pe persoalen i tengah-tengah Gerejanta pasti labo mesera guna pehulikenca. Sebab enggo lanai lit biak-biak : egois, mau menang sendiri, merasa diri paling benar, merasa diri paling berjasa, merasa diri paling senior, keras kepala, meganjang ukur, tidak mau mengakui kesalahan erpalasken kebenaren Kata Dibata, rsd.

Invocationta ngingetken kita maka “masih ada langit di atas langit”. Geluhta ras kerina si idatken kita i bas kegeluhenta, kerinana bekas pasu-pasu Dibata labo erkiteken gegeh ras pentarta. Sikataken bujur ras meteruk ukurlah i lebe-lebe Dibata. Termasuk tugas pendilonta i bas Dibata nari guna pehuliken si man pehuliken sue ras peraten Dibata, e pe pasu-pasu i bas Dibata nari. Ngataken bujurlah kita man Dibata maka ipercaya denga kita jadi utusenNa guna erbahan si mehuli i bas kegeluhenta. Janah ertekad kita guna erlajar la erngadi-ngadi erpalasken kebenaren Kata Dibata. Dibata si mpegegehi kita.