PA MORIA GBKP
TGL. 19 - 25 FEBRUARI 2017
Pdt. Larena br. Sinuhadji (Nd. Rey Tarigan)
Ogen : Matius 20:1-16
Tema : LIT KIN AKU LA BUJUR BANDU?
Tujun : Gelah Moria :
1) Meteh ras ngangkai perbahanen si mada peken anggur
2) Ikut ertoto kerna kegeluhen “Si erdahin”
Metode : Drama ras Diskusi
Penjelasen Bahan Ogen & Aplikasi
1. Perumpaman enda ncidahken kerna kekelengen Tuhan,
anugerah Tuhan si luar biasa man kerina manusia alu la erdobahen.
2. Hal si pemena si banci siidah maka Dibata ndarami
manusia si perdosa gelah banci bengket ku bas kinirajanNa. Biasana, si erdahin
nge ndarami dahinna arah erbage-bage lamaren si ibahanna bahkan usaha si deban.
Enda, si mada kebun anggur ndarami kalak upahen guna erdahin i kebun anggurna.
Erpagi-pagi si lampas, jam siwah, jam sepuluh dua, jam telu karaben ras jam
lima karaben terus ia ndarami kalak guna banci erdahin bas jumaNa.
3. Hal si peduaken, maka keleng ate Dibata seri
iberekenNa man kerina manusia asal ia tek baNa. Ibereken Tuhan keselamaten si
seri, subuk si enggo ndekah jadi Kristen ras si mbaru denga bertobat ras tek
man Tuhan. Dibata la beligaiNa masa bakti entah pe prestasi silakoken kita,
tapi pelin-pelin anugerah Tuhan (sola
gratia, kekelengenNa). Ibereken Tuhan peringaten, maka banci kalak si arah
lebe kedungenna jadi si arah pudi, bage pe sebalikna, asum dirina merasa
berhak, berjasa asangken kalak si deban, dingen turah sician-cianen (Mat.
19:30, 20:16).
4. Si mada kebun anggur banci kataken la ia melanggar
ketentuan si enggo isepakati, maka upahna sada duit pirak sada wari rikutken
gaji biasa. Antara si erdahin si pemena kel ras si mada kerja enggo sepakat.
Emaka asum idilo si mada kebun anggur si terakhirna (si sitikna) waktu erdahin
ras iberekenna sada duit pirak, maka pengakap si tangtangna kel erdahin lebih
asa si e ia ngalokenca, padahal seri ialokenna. Dalanna, jungut-jungut merasa la
bujur si mada kebun anggur. Maka angkat bicara si mada kebun anggur, maka kai
si ibahanna sue rikutken kesepakaten, “Enggo sue arihta sada duit pirak sada
wari”. Adi iberekenna seri upahna man kalak si pudin asa ia erdahin, e
merupaken enggo otoritas si mada kebun anggur (ma ate-ateku adi duitku, si paling
penting tanggung jawabna man si lampasna erdahin tetap iberekenna sue ras si enggo
isepakati).
5. Rikutken bahan PA HDS sekali enda, maka kita sebage
anak-anak Tuhan si enggo tek man baNa, radu ngaloken kekelengen si seri i bas
Dibata nari. Ula kita merasa paling berjasa, paling benar, maka turah
kiniganjangen ukur, cian ateta asum lit kalak si deban (mbelin kel dosana,
penjahat besar, umpamana - Sakeus si ertobat) ngaloken kekelengen si seri i bas
Dibata nari. Si e kerina otoritas i bas Dibata nari. Tugasta kalak si enggo
terkelin nggeluhlah i bas keselamaten si enggo ibereken Tuhan, dingen nggeluh
sikeleng-kelengen sada ras si debanna.
6. Janah tujun si peduaken, iajukna kita gelah ikut
ertoto man kegeluhen “si erdahin”. Siidah maka Dibata si ndarami kalak guna
banci erdahin bas peken anggurNa. Ertina, ngena ateNa kalak si erdahin, sabab
seh ngayak genduari pe Dibata erdahin. Erbage-bage dahin banci silakoken kita
si banci menghasilken karya (labo hanya materi) si ncidahken aktualisasi
dirinta, maka geluhta enda erguna man kalak si deban. Emaka Gereja secara
pribadi ras organisasi mereken dalan, solusi ndarami pendahin man anggotana.
Bahkan Gereja ikut mediate, ertoto, i ja melala denga tenaga buruh (ngemo), TKI
si mengalami kekerasan, ketidakadilan asum erdahin guna kelangsungen
kegeluhenna, gelah banci erdahin alu nyaman ras aman, ras ngaloken upah si bujur.
PA MAMRE GBKP
TGL. 19 - 25 FEBRUARI 2017
Nrs. Pdt. L. br. Sinuhadji (Bp. Rey Tarigan)
Nggeluh I Bas Tuhan Ngenca Banci Erbuah Mehuli
Ogen : Yohanes 15:5-10
Tema : KUGELUHKEN GELUHKU I BAS TUHAN
Tujun : Mamre Ngasup :
1) Nuriken kai-kai saja ulihna (buah) adi nggeluh i bas Tuhan
2) Nuriken kai-kai saja ulihna (buah) adi nggeluh i bas Dibata-dibata si
deban
3) Melasken komitmenna “kugeluhken geluhku i bas Tuhan”
Metode : Diskusi
Penjelasen Bahan Ogen
Tuhan Yesus usur mereken perumpaman i bas pengajarenNa
man ajar-ajarNa si tujunna tentuna gelah si megiken ajaren-ajarenNa la mesera
guna ngakai kai si nimaksudkan Yesus i bas pengajaren-pengajarenNa sue ras
keadaan entah pe situasi (konteks) masyarakat Yahudi paksa si e. I bas
pengajarenNa sue ras ogenta sendah, ibahan Yesus perumpaman kerna batang anggur.
Batang anggur e me sinuan-sinuan si biasa man masyarakat Yahudi paksa si e.
Batang anggur enda banci turah i japa pe i taneh Israel, banci ia turah i
halamen rumah, menjalar ia ku tembok-tembok rumah, banci ka ibudidayaken jadi
sinuan-sinuan guna ikonsumsi kerina kalangen i bas masyarakat Israel ras guna
menopang ekonomi rumah tangga. Selain jadi inemen harian, anggur biasa
sihidangken i bas pesta-pesta perjabun kalak Yahudi (bdk. Yoh. 2:1-11), banci
ka jadi tambar (bdk. 1 Tim. 5:23), ras penghilang rasa sakit (Mat. 27:48).
Ertina gambaren batang anggur enda labo hal si asing i bas pemahamen kalak
Yahudi.
I bas ogenta sendah, adi sioge i bas ay. 1 nari, lit
telu gambaren si berkaiten ras batang anggur enda. Si pemena, batang anggur si tuhu-tuhu
e me Yesus Kristus. Si peduaken, perkebun anggur e me Dibata. Si peteluken,
dahan ras buahna e me ajar-ajarNa ras kerina kalak si tek man Yesus Kristus. I
bas ay. 2 ikataken, Dibata si jadi perkebun anggur nekteki dahan-dahan si la
erbuah, janah dahan-dahan si erbuah ibersihkenNa alu mutiki tunas-tunas si la
erguna gelah reh buena buahna. Ertina, i bas Dibata lit hak si la terbatas guna
nentuken ise saja si masuk i bas kriteria dahan si erbuah ras si la erbuah,
ibersihken entah itektek. I bas ay. 3 itegasken Yesus maka kerina kalak si tek
man baNa enggo ibersihken alu KataNa. PengarapenNa tentuna kalak si enggo
ibersihken e tetap ersada ras Kristus sebage batang anggur si tuhu-tuhu,
erkiteken kiniersadaan ras Kristus mpengasup kalak si tek ngangkai, ngikutken
ras ngelakoken kerina si jadi peraten Dibata i bas Yesus Kristus (ay. 4-5). I
bas ay. 6 ikataken Yesus maka lit kepeken kalak si tek tapi la ngikutken ras
ngelakoken si jadi peraten Dibata, akibatna e me datken ukumen i bas Dibata
nari. Sebalikna, ay. 7-10 e me penegasen maka kalak si tek si tetap ersada ras
Kristus e me kalak si lit i bas kriteria datken perkeleng arah Dibata nari,
kerina si jadi kebutuhenna icukupken Dibata, janah Dibata termulia erkiteken
melala hal-hal si mehuli si ihasilkenna sue ras peraten Dibata.
Jadi banci isimpulken perumpaman Yesus Kerna pokok
anggur enda ngajarken kerna : 1) Persinget maka kalak si tek man Dibata i bas
Yesus Kristus enggo ibersihken alu KataNa. 2) Kalak si enggo ibersihken e
seharusna nggeluh ersada ras Dibata i bas Yesus Kristus. 3) Kiniersadan si
tetap ras Kristus erbahanca Kata Dibata nggeluh i bas pusuh perukuren kalak si
tek. 4) Kalak si tetap ersada ras Kristus ipengasupNa guna ngangkai, ngikutken,
ras ngelakoken si jadi peraten Dibata. I bas kerina si mehuli sue ras Kata
Dibata si enggo ihasilkenna e erbahanca gelar Dibata termulia janah datken
perkeleng i bas Dibata nari.
Aplikasi
PA-nta sendah lit i teruh judul “Nggeluh i bas Tuhan
ngenca banci erbuah mehuli”. Janah tema si seh man banta e me “Kugeluhken geluhku
i bas Tuhan” alu tujun gelah Mamre : nuriken kai-kai saja ulihna (buah) adi
nggeluh i bas Tuhan, nuriken kai-kai saja ulihna (buah) adi nggeluh i bas
Dibata-dibata si deban, ras melasken komitmenna “kugeluhken geluhku i bas
Tuhan”. Sekalak perbapan kalak Karo adi enggo tergelar Mamre tentuna enggo
itehna Yesus Kristus. Apai ka sekalak Mamre si kitik-kitik nari enggo ikut muat
bagin i bas KAKR ras PERMATA. Tentuna labo hal si sulit nuriken kai-kai saja
ulihna nggeluh i bas Tuhan ras sebalikna. Secara teori akap kami murah kel
ituriken Mamre. Tapi maun pemeteh kerna Kristus la menjamin lit perobahen si
nyata i bas Mamre. Tetap denga ia bagi perbapan kalak Karo si la itandaina
Yesus Kristus. Lit ka si ngatakenca, jumlah kinipulungen Mamre i bas kerina
kegiaten-kegiaten Gereja i bas sada Minggu e la berbanding lurus ras perobahen
geluhna. Banci i bas sada minggu e dua seh telu kali pulung tapi karakterna
seri saja bagi si nai. Kai enda penyebabna?
Mungkin erkiteken pulung-pulung bas Gereja e
iraduseriken ras pulung-pulung i bas ingan si deban bagi i kede kopi lah
umpamana. Lalan prosentasina guna ncakapken entah pe ngelakoken
kegiaten-kegiaten si secara prinsip labo penting kel asangken hal-hal si membangun
kiniteken bagi ngorati alu payo Kata Dibata, mengevaluasi diri sendiri, ras
ertekad guna ngelakoken kai si jadi peraten Dibata. Mungkin lit penyebab si
deban si erbahanca sekalak Mamre la ngasup ncidahken orat nggeluh sebage kalak
si tek man Yesus Kristus. Kinata si bagenda tentuna perlu jadi bahan evaluasi
man banta Senina Mamre. Memang labo kerina Mamre si bage, tapi paling tidak
bahanta sekali enda mabai kita guna mengevaluasi diri sendiri alu nungkun,
“enggo kin aku nggeluh tetap ersada ras Kristus?”, i bas pengertin, ngangkai,
ngikutken ras ngelakoken kerina si jadi peraten Dibata i bas Yesus Kristus. Adi
enggo, tentuna perlu lebih sitingkatken kualitas ras kuantitasna. Adi lenga,
tentuna perlu robah kita, sipindo pergegeh i bas Dibata nari gelah kita
ipengasupNa guna robah. Kata Dibata e “ya dan amin” ertina, perkeleng i bas
Dibata nari tuhu-tuhu ialoken kita janah kerina si jadi kebutuhenta icukupiNa
adi tetap kita nggeluh ersada ras IA, erbuah kerina si mehuli sue peraten
Dibata.
Mungkin perlu ka sidiskusiken kai-kai saja si ngambati
Mamre i bas nggeluh ernalem man Dibata, radu ras sipegegehi Mamre si melala kel
ambatenna guna nggeluh ernalem man Dibata, janah radu ras sitotoken gelah
datken pergegeh i bas Dibata nari.
Tidak ada komentar:
Posting Komentar