PA Kategorial GBKP Tgl. 5 - 11 Februari 2017

PA MORIA GBKP TGL. 5 - 11 FEBRUARI 2017

Pdt. Larena br. Sinuhadji (Nd. Rey Tarigan)

Ogen : Galati 6:1-10

Tema : TETAP ERBAHAN MEHULI

Tujun : Gelah Moria :

1) Nggargari perbahanen si mehuli i bas perpulungen Galati

2) Nuriken tantangena ras cara naluken tantangen i bas erbahan si mehuli

Metode : Drama

Penjelasen Bahan Ogen

Judul i bas perikop enda “Sisampat-sampatenlah i bas maba baban nggeluh enda” (Alkitab TB-LAI, “Saling membantulah kamu”). Ay. 1, ula pedas menghakimi, adi lit siidah temanta ngelakoken kesalahen, tapi kita si nggeluh rikutken Kesah si Badia (yang rohani), negu ia alu manjar-anjar gelah banci ia sedar kerna kai si ilakokenna ras kedungenna bertobat. Sura-suranta sada ngenca gelah banci ia mulihken ku dalan si mehuli. I bas dampar si deban, kita pe arus tetap sijaga dirinta, sabab banci ka kita kote ras erbahanca ndabuh ku bas percuban.

Ay 2, geluh enda arus sisampat-sampaten. Lit sada judul buku “Give and take” si itulis Adam Grant ngatakenca, maka “giver” gaya hidup memberi (materi, tenaga, pemikiran) i bas risetna mabai kita geluh reh suksesna. Labo hanya ateta ngalo (“take”) tapi ibenai alu mere si lit bas kita. Lit ka kari paksana kita butuh isampati kalak si deban. I bas kita banci sisampat-sampaten, baban si mberat pe banci siakap menahang i bas kita mabasa.

Ay. 3-5, setiap kalak arus mempertanggungjawabken kai si enggo ibahanna. Memang perlu kita mengevaluasi setiap kai si enggo sibahan kita gelah setiap saat banci kita mpekena dirinta. La perlu kita memuji dirinta sendiri, sabab banci jadi kai si nipujiken kita la lit hasilna tapi pujian e rehen asum alu mehuli silakoken kai si menjadi tanggung jawabta.

Ay. 6-10, ula kita erleja-leja erbahan si mehuli, sabab kai si isuan manusia e ka nge si iperanina. Adi merdang kita i bas juma perukuren secara manusia (si nggesuh, rubati, mecimberu, perampus, dll., nehen ps. 5:19), maka asilna pe si la mehuli sialoken kita. Tapi adi nuan kita i bas juma Kesah si Badia maka asilna pe si mehuli, e me kegeluhen si rasa lalap i bas Kesah si Badia e nari. I bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken. Ertina, kerina kalak alu la erpilihen, sikelengi terutama teman-temanta si sada kiniteken. Adi temanta si sada kiniteken saja la ngasup kita ngkelengisa, enggo pasti sulit kita ngkelengi kalak si la sada kiniteken ras kita.

Aplikasi

Tema-nta : “Tetap erbahan mehuli”. Perbahanenta mehuli labo itentuken kalak si deban, sabab erbahan si mehuli enggo menjadi gaya hidupta selaku kalak si tek. Ertina, mehuli kalak man banta, kita pe mehuli man bana. La ia mehuli man banta, kita tetap erbahan mehuli man bana. E me salah sada tantangen i bas kita ndalanken si mehuli, i ja i bas kita erbahan si mehuli la tama ngaruh man bana, la lit ia ngataken bujur banta. Labo dalih, sabab tujunta erbahan si mehuli e me kap tulus, ikhlas labo ndarami pujian manusia. Tantangen berikut, perbahenta mehuli ibalas alu si la mehuli, emaka lit peribahasa ngatakenca, “air susu dibalas dengan air tuba”. Walaupe situhuna sakit kel ukurta, tapi kita arus berbesar hati sabab palasta erbahan si mehuli e me kap keleng ate Kristus, i ja enggo leben Kristus erbahan si mehuli man banta. Emaka i bas tep-tep kesempaten tetaplah kita erbahan si mehuli, sabab adi tutus ateta ndalanken si e, seh me paksana siperani ulihna.

PA MAMRE GBKP TGL. 5 - 11 FEBRUARI 2017

Nrs. Pdt. L. br. Sinuhadji (Bp. Rey Tarigan)

Kiniersadan Mamre Selaku Aron Dibata

Ogen : 1 Korinti 3:6-9

Tema : MAMRE ARON DIBATA

Tujun : Mamre banci kerja sama selaku “aron” Dibata

Metode : Studi Kasus

Penjelasen Bahan Ogen

Ogenta nuriken kerna kerja sama saling mendukung i bas pelayanen antara Paulus ras Apolos rikutken pemere (karunia) si ibereken Dibata. Apolos (Apolonius) e me sekalak Yahudi i Aleksandria nari, ia sekalak guru si beluh ras mehuli ngajarken kerna Yesus Kristus i teruh bimbingen Priskila ras Akwila (Perb. Rasul 18:24-28). Pelayanenna i Korinti cukup berhasil erkiteken kebeluhenna ngajar ras erkhotbah. Tapi erkiteken lit piga-piga perpulungen i Korinti si menganggap Apolos lebihen asangken Paulus, maka turah kelompok-kelompok Paulus, Apolos, Kefas, ras golongen Kristus (1 Kor. 1:12). Padahal situhuna Paulus ras Apolos, termasuk Kefas (Simon Petrus), saling bekerja sama alu mehuli i bas dahih-dahin pelayanen (1 Kor. 3:4-6) i tengah-tengah perpulungen Korinti.

Kelompok-kelompok si lit i bas perpulungen Korinti tentuna mengganggu efektifitas pelayanen erkiteken dekahen rubati sada ras si debanna asangken ningkatken kualitas ras kuantitas pelayanen. Emaka arah suratna, Rasul Paulus ngingetkenca maka Dibata i bas Yesus Kristus arus jadi palas i bas pelayanen, sebab Dibata ngenca i bas Yesus Kristus si erbahanca turah kerina si mehuli guna pembangunen kula ni Kristus. Janah Dibata si arus termulia arah kerina pelayanen si idahiken i bas perpulungen Korinti, labo Paulus entah pe Apolos. Pengarapen rasul Paulus tentuna gelah reh dewasana geluh kiniteken perpulungen Korinti ras banci iusihna kerja sama si mehuli antara Paulus, Apolos, ras si debanna i bas pelayanen i teruh kiniersadan i bas Yesus Kristus.

Aplikasi

Kerja sama memang hal si penting i bas kita er-relasi ras ndahiken dahin i bas sada kelompok. Bahanlah contoh i bas jabu. Adi la lit kerja sama si mehuli antara perbapan ras pernanden tentu banci ikataken la lit relasi si mehuli antara bapa ras nande. I bas pendahinta, adi la lit relasi si mehuli antara staf i bas sada dahin tentu saja banci ipastiken la lit kerja sama si mehuli i bas pendahin. I bas dahin-dahin pelayanen i gereja, tentuna adi suasanana bagi suasana gereja i Korinti, banci ipastiken dahin-dahin pelayanen si ilakoken labo maksimal erkiteken la lit kerja sama si mehuli, baik antara serayan, pengurus, ras anggota-anggotana. Janah la lit kemulian Dibata i bas kai pe dahin pelayanen si idahiken kita.

Emaka i bas PA sekali enda, rasul Paulus ngajuk man banta Senina Mamre erbahan suasana si mehuli i bas pelayanen gelah terjalin kerja sama si mehuli sada ras si debanna. Suasana si mehuli enda si pemena lebe banci tercipta erkiteken lit relasi si mehuli ras Dibata. Relasi si mehuli ras Dibata erbahanca lit kiniteruken ukur i bas dirinta. Rasul Paulus ras Apolos tentuna memiliki relasi si mehuli ras Dibata seh makana la terpancing isu-isu si negatif si lit i bas perpulungen i Korinti. Si peduaken, menjalin relasi si mehuli ras teman-temanta sada kiniteken. Kiniteruken ukur i bas Dibata nari mpengasup kita ngergai teman-temanta sada kiniteken. Kiniteruken ukur Yesus Kristus ncidahken mana banta maka la lit ise pe kita si terganjangen asangken Dibata. Emaka saling ngergai ertina mengakui kelebihan sekaligus melengkapi kelemahen sada ras si debanna.

Rembak ras Dibata, erlajar arah Kata Dibata, mpeturah kiniteruken ukur. Kiniteruken ukur mpeturah saling menghargai ras sikelengen. Adi enggo lit saling menghargai ras saling sikelengen maka secara otomatis tercipta suasana saling bekerja sama sada ras si debanna guna mpermuliaken gelar Dibata i bas kerina dahin-dahin pelayanenta. Dibata si mpengasup kita.