PJJ GBKP Tgl. 29 Januari - 4 Februari 2017

PJJ GBKP TGL. 29 JANUARI - 4 FEBRUARI 2017

Pdt. Larena br. Sinuhadji (Nd. Rey Tarigan)

Tema : ERSAKSI E ME KOMITMENKU (Yeremia 20:7-9)

Penjelasen Bahan Ogen & Renungen

Bahan ogenta lit i bas judul “Yeremia ngadu man TUHAN”, i bas Alkitab TB-LAI nina, “Keluh kesah Yeremia akibat tekanan jabatannya”. Nabi Yeremia ertugas sebage nabi kira-kira tahun 627 SM i bas umurna si nguda denga (kira-kira 20 tahun). Kerna pendilo Dibata man Yeremia banci ioge i bas bindu 1 kitab enda. Tugas si mberat isehken Tuhan man Yeremia, erkiteken paksa si e situasi Israel sanga bergejolak. Kerajan Juda si kitik terjebak i tengah tekanen kerajan-kerajan si mbelin i sekelewetna. Janah nabi Yeremia arus meritaken berita maraklesa, kehancuren si nandangi reh, nderpa rayat Juda. Ibarat pepatah, “sudah jatuh tertimpa tangga pula”, banci ka kerina rayat eranggapen nabi enda nambah-nambahi kiniseran saja dahinna, labo mabai ketenengen ras kemalemen ate i tengah-tengah situasi si mesera paksa si e.

Sebage manusia biasa bagi kita, tentuna banci sigejapken uga mberatna baban si lit i bas pusuh perukuren nabi Yeremia. Ia me hanya utusen saja si jadi corong Dibata guna meritaken kai si ate Dibata ipeseh man bangsaNa. Tapi ise si mediate kerna tugas tanggung jawabna enda? Banci ikataken la lit ise pe si mediate kerna tugas kenabianna. Bahkan i bas Yer. 20:2 ituriken, “isuruhna (imam Pashur) kalak ngeligasi (i bas terjemahen si deban : “memukul habis-habisan”) aku, jenari ipasungkenna aku i deher Pintu Gerbang Benyamin si arah datas i bas Rumah Pertoton”. E me salah sada contoh kiniseran si nialami nabi Yeremia erkiteken tugas kenabianna. Labo hanya secara psikis nabi Yeremia ngalami kiniseran tapi idatkenna ka perlakukan kekerasen fisik. Tapi amin bage gia tetap denga iberitakenna kai si jadi peraten Dibata.

Banci ikataken ogenta sendah e me “curhat” nabi Yeremia man Dibata kerna baban si mberat si nialamina, erkiteken mungkin la ise pe si banci jadi ingan “curhat”, mungkin la ise pe si banci mereken pergegeh, rsd. Tapi enda salah sada kelebihen nabi Yeremia, i bas kiniseranna reh ia ku Dibata, labo ku ingan si deban, si banci saja idatkenna solusi si instan. I bas ay. 7 teridah uga penggejapen nabi Yeremia kerna pendilo Dibata man bana, akap kami terjemahen i bas bahasa Indonesia lebih payo nina, “Engkau telah membujuk aku, ya TUHAN, dan aku telah membiarkan diriku dibujuk; Engkau terlalu kuat bagiku dan Engkau menundukkan aku”. Ertina pendilo Dibata man Yeremia labo ialokenna i bas keadaan la sadar, labo erkiteken itipu Dibata maka ialoken nabi Yeremia pendilo Dibata e. Sadar ia kerna keputusenna, saja ngenca lit perasaan si berkecamuk i bas dirina, antara nerusken pendilo Dibata e entah lang, erkiteken enggo inanamina resiko jadi suruh-suruhenNa. Tapi tetap iputuskenna iteruskenna pendilo Dibata, labo saja erkiteken kuasa Dibata si gegehen asangken ia, tapi erkiteken memang panggilen geluhna (niat) ngikutken kai si jadi peraten Dibata, la banci ia berbohong pada diri sendiri maka ngelakoken peraten Dibata nge si jadi kerinduan i bas geluhna.

Resiko si nihadapina sebage sekalak nabi iturikenna i bas ay. 7 ras 8, “Kerina kalak nokoh-nokohi aku, gedang-gedang wari iuru-uruna aku. Tep-tep ngerana, terpaksa aku serko ... , erkiteken nehken kataNdu, gedang-gedang wari aku iuru-uru ras igombangi kalak”. I bas ay. 9, teridah gejolak i bas pusuh perukurenna. Apai si ipilihna, peraten dagingna sebage manusia biasa si cenderung mencari kenyamanan, entah pendilo Dibata ras niat entah pe panggilen geluhna si atena ngikutken kai si jadi peraten Dibata? Tapi tetap ipilihna ngikutken pendilo Dibata seh ku kedungenna meritaken kai si jadi peraten Dibata man bangsaNa. Teridah komitmen si tuhu-tuhu i bas diri nabi Yeremia, amin pe secara manusia biasa, la ia ngasup ndalanken tugas tanggung jawab kenabianna. Dibata tuhu-tuhu mereken pergegeh man bana seh ku kedungenna.

Adi kita lit i bas posisi nabi Yeremia, kai kira-kira si bakal ilakoken kita? Secara jujur mungkin mis enggo kita ngadi. Ula lebe kiniseran fisik, ibegi kita lit berita kalak la senang nandangi kita saja umpamana, mungkin enggo mis kisat, emosi, jungut-jungut, ras ngadi. Apai ka menderita secara fisik, e enggo lanai lit cerita, mungkin enggo mis itadingken kita Dibata. Tema si seh man banta sendah e me : “Ersaksi e me komitmenku”. Adi ersaksi e me salah sada tugasta selain bersekutu ras melayani, idealna enggo secara otomatis ilakoken kita. Si jadi persoalen mungkin konsistensi ras ketutusen i bas ngelakoken tri-tugas ndai, khususna ersaksi. Maka si jadi stressing point e me “komitmen”. I bas salah sada sumber ikataken nina, “Komitmen adalah perkataan yang menyatakan sebuah kesanggupan untuk berbuat sesuatu. Bersedia untuk melaksanakan janji secara terus-menerus. Didasari oleh kasih yang tulus dan tanpa kepura-puraan”. Komitmen e labo hanya sekedar janji, lit je keputusenta secara sadar, konsisten (kontinyuitas) i bas ngelakoken kai si jadi komitmenta, ras ngasup ngaloken kai pe si jadi konsekuensina. Si jadi palasna e me keleng ate man Dibata si tuhu-tuhu, labo pencitraan, jaga image, rsd.

Nabi Yeremia mereken teladan man banta, maka i bas kita ersaksi, labo hal si murah. Melala tantangen si bakal ihadapi kita. Adi sinen pe kerina tokoh i bas Pustaka si Badia, la lit suruh-suruhen Dibata si geluhna mulus-mulus saja, la lit kiniseran ras la lit tantangen. Ertina kiniseran ras tantangen i bas kita ngelakoken kerina si jadi peraten Dibata e me konsekuensi logis si arus ialoken kita secara positif. Tapi uga konsistensinta i bas kita ngelakoken kerina si jadi peraten Dibata? Nabi Yeremia mereken teladan maka memang lit paksana kita ngadi kentisik guna merenung ras mpelimbarui komitmenta. Sada hal si manusiawi adi lit kekoten, jenuh, bosan, mesui pusuh perukurenta, rsd. Nabi Yeremia mereken teladan man banta, sanga kekoten ras kiniseran nderpa, la ia ngadi, mis reh ia ku Dibata, iturikenna kai si jadi keluhenna, maka ipegegehiNa ia. Mari radu ras sievaluasi uga komitmenta i bas kita ersaksi ras ngelakoken kerina si jadi peraten Dibata. Adi tutus ateta i bas komitmenta maka rumusna : komitmen = keleng ate man Dibata + konsistensi + konsekuensi. Dibata si mpegegehi kita.