SUPLEMEN PJJ GBKP TGL. 8 - 14 MARET 2026

Pdt. Larena Sinuhadji (Nd. ReyRapha Tarigan)

INGANTA RUNGGU - Kejadian 23:10-20

(Musyawarah Warga Sidi Runggun)

Penaruh

Musyawarah mufakat e me salah sada budayanta.” Rikutken informasi i bas AI nari nina, “Musyawarah mufakat adalah proses pembahasan bersama untuk memecahkan masalah atau mengambil keputusan kolektif berdasarkan semangat kekeluargaan dan gotong royong, guna mencapai kesepakatan (mufakat) yang disetujui bersama tanpa paksaan.” Musyawarah mufakat enda pe enggo semal i bas kita kalak Karo alu budaya runggu, arih-arih guna muat si mehuli. Budaya runggu i bas kalak Karo labo bertentangen ras Kata Dibata, e maka budaya runggu enda terus ilestariken GBKP, janah ipakeken guna er-Berita Si Meriah man masyarakat Karo. I bas PJJ-ta sendah, erlajar kita mulihi kerna budaya runggu i bas rangka menyambut Musyawarah Warga Sidi Runggun i bas tahun enda.

Mpebagesi Ogen

Ogenta sendah lit i teruh judul perikop “Sara mate. Itukur Abraham taneh ingan kuburen” i bas terj. TB-LAI nina, “Sara mati dan dikuburkan.” Sue ras judul perikop enda, ogenta sendah nuriken kerna kematen ras prosesi penguburen Sara, ndehara Abraham. Sue ras tema PJJ-ta sendah, fokus kita ku cara si ipake Abraham guna ngelitken ingan kuburen si mehulina man Sara ndeharana. Sara mate i Hebron i taneh Kanaan. Ertina Abraham ras keluargana paksa si e enggo seh ku taneh si ijanjiken Dibata, janah enggo tading i je piga-piga ndekah. Megogo kel Abraham erkiteken kematen Sara. Sura-sura Abraham gelah banci ikuburkenna Sara i bas ingan si mehulina. Kenca enggo idaramina ingan si mehulina, ipilihna juma Efron anak Zohar si lit i je guana. Uga cara Abraham ndatkenca?

Rikutken ay. 6, teridah maka Abraham enda amin pe sekalak si tandang i tengah-tengah bangsa Het (Heti), tapi enggo lit i bas ia kuasa. Ituriken maka Abraham enda sekalak si mbelin. I bas terj. TB-LAI nina “seorang raja agung di tengah-tengah kami.” Ertina selain bayak namura, lit kuasa i bas diri Abraham guna ngelakoken kai pe sue ras sura-surana. Tapi si e kerina la ianggarken Abraham. Alu meteruk ukur reh ia ku tengah-tengah bangsa Heti. Kiniteruken ukur Abraham teridah i bas ay. 7 & 12, i ja ituriken maka erjimpuh Abraham i lebe-lebe kalak Heti. Labo terjeng je saja, ipindona pendapat kerna sura-surana ndai. Situhuna bangsa Heti bage pe Efron anak Zohar ndai, enggo meriah kel ukurna mereken kuburen man Abraham secara cuma-cuma entah pe gratis. Tapi la nggit Abraham ngalokenca. I jenda teridah sura-sura Abraham guna ndatken hak taneh e secara legal formal rikutken kesemalen i tengah-tengah bangsa Heti paksa si e, janah i jenda pe teridah maka ihamati Abraham kearifan lokal bangsa Heti.

Lit ingan runggu si khusus ipake bangsa Heti ras umumna bangsa-bangsa i daerah Timur Tengah paksa si e, e me i gerbang kota. Proses runggu ilakoken secara terbuka, ise pe banci megikenca ras naksikenca, kai-kai saja si jadi kesepakatan bersama. I gerbang kota enda, Abraham ras Efron arih-arih isaksiken enterem kalak Heti. Akhirna ialoken Efron kai si jadi sura-sura Abraham, ibelaskenna erga juma e, 400 duit pirak. Lit si ngatakenca maka 400 duit pirak enda i datas rata-rata erga juma rikut ras kerina isina paksa si e. Tapi si menarik i jenda, la lit proses tawar-menawar, mis igalari Abraham Epron isaksiken enterem kalak Heti. I jenda teridah ketutusen Abraham i bas sura-surana (konsisten), janah teridah maka lit transparansi publik i bas proses runggu e.

Alu bage taneh Epron si Mahpela, arah matawari pultak Mamre, si lit i je juma, guana, rikut ras batang kayuna, enggo sah secara hukum ras permanen jadi sikerajangen Abraham. La lit ise pe si banci menuntut Abraham erkiteken kai si idatken Abraham e idatkenna alu proses si benar sue ras kearifan lokal bangsa Heti. Alu meteruk ukur, nggit Abraham reh ku tengah-tengah kalak Heti, iturikenna alu mehuli kai si jadi sura-surana, nggit Abraham runggu guna muat si mehuli, janah ihamatina kesemalen si lit i tengah-tengah kalak Heti alu itukurna taneh juma ndai. Adi sioge terdauhen maka i bas ingan enda pe ikuburken Abraham, Ishak, Ribka, Jakub ras Lea.

Pengkenaina

Rikutken tema PJJ-ta sendah, lit piga-piga hal si akap kami banci jadi renungenta. Si pemena, musyawarah mufakat, entah pe runggu i bas budayanta, harus terus ilakoken. I bas konteks Gerejanta pe, runggu harus terus ilakoken, erkiteken melala contoh i bas Pustaka Si Badia si nuriken kerna runggu, arih-arih guna muat si mehuli, khususna si lit i bas ogenta sendah. Si peduaken, i bas proses runggu e harus lit kiniteruken ukur, niat baik, sihamaten sada ras si debanna. Alu bage banci kita saling ngaloken pendapat masing-masing secara objektif. Arah kerina perbedaan pendapat e, nggit kita muat si mehuli amin pe e si jadi keputusen e la bagi ukurta. Si peteluken, amin pe la ituriken i bas ogenta sendah, tapi enggo radu ras siteh maka Abraham enda sekalak si erkiniteken man Dibata. Tek kita maka kinitekenna e mabai ia pentar i bas muat keputusen. Alu bage enda pe jadi usihenta, maka i bas kita runggu arih-arih guna muat si mehuli, harus ipalasi kinitekenta man Dibata. Gelah alu bage, sura-sura Dibata si dominan i bas kita ngelakoken runggu, labo kepentingen pribadinta. Si peempatken, marilah sipakeken kerina sarana si lit i bas Gerejanta guna ngelakoken runggu. Gereja e me inganta runggu, arih-arih guna muat si mehuli janah ngelakoken kerina si jadi peraten Dibata.

I bas PJJ-ta sendah pe isingetken mulihi kita kerna Musyawarah Warga Sidi Runggun. Secara khusus i bas bulan Maret setiap tahun maka i je silakoken Musyawarah Warga Sidi Runggun. I bas Tata Laksana Bab XXXIX Ps. 164 Ay. 1-5 enggo iaturken kerna Musyawarah Warga Sidi Runggun:

1. Musyawarah Warga Sidi Runggun adalah sarana bagi warga dan Majelis Runggun untuk saling memberi masukan mengenai perkembangan kehidupan bergereja di Runggun dalam bersekutu, bersaksi, dan melayani.
2. Musyawarah Warga Sidi Runggun bukan merupakan sarana pengambilan keputusan.
3. Musyawarah Warga Sidi Runggun dilaksanakan satu (1) kali dalam setiap tahun selambatlam-batnya pada bulan Maret dan dipimpin oleh Majelis Runggun.
4. Musyawarah Warga Sidi Runggun dilaksanakan untuk mendengar laporan perkembangan jemaat dari Badan Pekerja Majelis Runggun beserta seksi-seksinya, pengurus unit-unit pelayanan, dan pengurus PJJ serta pengajuan usul-usul tentang kehidupan bersekutu, bersaksi, dan melayani serta pembinaan guna pertumbuhan jemaat.
5. Usul/masukan tentang kehidupan bersekutu, bersaksi, melayani, dan pembinaan harus ditam-pung dan ditanggapi oleh Majelis Runggun dalam bentuk keputusan pada Sidang Majelis Runggun yang terdekat.

Emaka mari radu ras sitotoken gelah proses Musyawarah Warga Sidi Runggun i bas tahun enda banci erdalan alu mehuli, janah reh mehulina kualitas ras kuantitas pelayanen i bas GBKP, gelar Dibata termulia.