SUPLEMEN PA MORIA GBKP TGL. 31 MEI - 6 JUNI 2026

Pdt. Larena Sinuhadji (Nd. ReyRapha Tarigan)

Alasan Mengasihi Allah

Si Man Ogen : Ulangen 8:1-10

Tema : TUHAN DIBATA SI MABAI PERDALANEN GELUH

Tujun : Gelah Moria :

- Ngidah perbahanen Tuhan man bangsaNa

- Erbahan gambar 20 tahun pengalamen geluh

Metode PA : Life story

Penaruh

Adi sisungkun AI, “Apa yang menyebabkan manusia sering lupa menurut Alkitab?” Bagenda nina jawabenna, “Menurut Alkitab, manusia sering lupa, terutama melupakan Tuhan dan perintahNya, karena sifat dasar manusia yang dikuasai kedagingan, hati yang keras (Mat. 13:15), dan kecenderungan untuk lebih fokus pada hal duniawi atau kenyamanan hidup.” I bas kesempaten enda radu ras mulihi kita erlajar gelah nginget perbahanen Dibata si luar biasa i bas kegeluhenta.

Mpebagesi Si Man Ogen

Si man ogenta sendah lit i bas konteks bindu 5-11, e me bagin si menekankan pentingna nginget (remembering) perbahanen Dibata si mbelin. Ras nggeluh i bas kepatuhen erpalasken perjanjin ras Dibata. Bindu 8 secara khusus ngajuk bangsa Israel gelah nggejapken maka pengalamen nggeluh i bas gurun pasir sebage proses pendidiken kiniteken i bas Dibata nari. Proses pendidiken kiniteken tentu labo instan, tapi proses si gedang, i ja melala hal i bas karakterta si harus iperobahi. 

Si man ogenta sendah lit i teruh judul perikop “Bersyukur kepada Allah karena kebaikanNya.” Lit telu bagin si banci siantusi, si pemena e me ay. 1, i jenda Musa ngajuk bangsa Israel gelah ngikutken undang-undang alu tutus. Kepatuhen nandangi undang-undang Dibata erbahanca bangsa e: nggeluh, ertambah-tambah beliganna, ras banci ngiani negeri si ipadanken Tuhan. Kepatuhen i jenda labo kepatuhen legalis, tapi kepatuhen si ipalasi alu kesadaren i bas merespon keselamaten si enggo ibereken Dibata.

Si peduaken, ay. 2-6, e me pengajuk Musa man bangsa Israel gelah nginget perbahanen Dibata si luar biasa i bas mentasi gurun pasir, si ndekahna 40 tahun. Lit dua kali kata “inget,” i bas ay. 2 ras 5. Ertina kesadaren guna nginget perbahanen Dibata i jenda penting kel, sebab bangsa e rusur lupa man Dibata erkiteken hal-hal si sifatna materi. Emaka i bas ay. 3 mulihi isingetken Musa maka si pentingna kel e me hubungen si mehuli ras Dibata. Kerina si nialami bangsa e i bas mentasi gurun pasir 40 e me pendidiken kiniteken i bas Dibata nari gelah reh ndeherna ras Dibata. Emaka i bas ay. 6 mulihi iajuk bangsa e gelah nggeluh rikutken peraten Dibata.

Si peteluken, ay. 7-10 e me kinata kegeluhen si nialami bangsa e kenca enggo seh ku Taneh Kanaan. Kinata kegeluhen enda bertolak belakang ras kegeluhen i gurun pasir. Taneh si mehumur, melala ulu lau, sumbul si erburak launa i bas baluren ras uruk-uruk, taneh si mereken ulih gandum, jelai, buah anggur, buah ara, andaliman, saitun, tengguli, ras melala dengan si debanna si erbahanca bangsa e lanai kelihen, bage pe la kurang kai pe. I bas situasi si bagenda rupana bangsa e isingetken gelah ngataken bujur man Dibata janah tetap setia erbakti man Dibata. Sebab biasana adi situasi kegeluhen dem alu kesenangen, bangsa e rusur lupa guna ngataken bujur man Dibata. Kelimpahan harus menghasilkan doxology entah pe pujian man Dibata. Pengataken bujur e harus ipalasi kesadaren maka kerinana si inikmati bangsa e labo erkiteken gegeh kebeluhenna, tapi erkiteken anugerah i bas Dibata nari.

Pengkenaina

Tema bage pe tujun i bas PA-ta sendah ngajuk kita kerina Senina Moria, gelah ngidah perbahanen Dibata i bas kegeluhenta. Adi situlihken ku pudi kegeluhenta, apai nge si buena, apakah lebih banyak berkat yang kita rasakan atau kutuk? I bas si e tentu kita harus kritis. Sebab melala perbeben geluh, kiniseran, terjadi erkiteken kesalahenta sendiri. Janah pasu-pasu i bas Dibata nari e labo terjeng hal-hal si sifatna materi: erta kinibayaken doni enda. Melala hal i bas kegeluhen enda si la tertukur alu erta kinibayaken. I bas si e harus nggit kita ngakukenca ras ngalokenca maka erta kinibayaken doni enda sifatna sementara. Kalak si erkiniteken tentu la ibahanna materi, erta, kinibayaken, kepentaren doni, jadi ukuren i bas kegeluhenna. Tek ia maka Dibata mereken kerina si jadi kebutuhenna, labo kerina si jadi sura-surana. Erkiteken Dibata meteh si terbaik, si maba kiniulin i bas kegeluhenna. Penungkunen reflektif man banta, uga kita, apakah kita termasuk Moria si erkiniteken man Dibata? 

Ogenta sendah ngajuk kita kerina Moria gelah, si pemena, rukurlah alu positif ras optimis erpalasken Kata Dibata bage pe kinitekenta man Dibata. Alu bage kai pe si terjadi i bas kegeluhenta, tek kita maka si e kerina terjadi guna mendidik kita menjadi lebih dewasa ras lebih mbages kualitas kinitekenta man Dibata. Rukurlah erpalasken keleng ate Dibata, ula erpalasken kepentaren doni enda si orientasina hanya: erta, kinibayaken, materialistis, keduduken, jabaten, hedonis, haus pengakuan, validasi, rsd.-na. Alu bage banci fokus kita ku relasi si mehuli ras Dibata.

Si peduaken, ingetlah rusur keleng ate Dibata i bas kegeluhenta. Ula sempat kesenangen doni enda erbahanca kita lupa keleng ate Dibata. Kelimpahan harus menghasilkan doxology entah pe pujian man Dibata. Bage pe sebalikna, ula sempat perbeben entah pe kiniseran erbahanca kita sirang ras Dibata. Adi rukur kita, mengevaluasi diri, enggo pasti buen pasu-pasu Dibata nari asangken perbeben entah pe kiniseran si nialami kita. Kerina si ialoken kita seh asa gundari: kinibayaken, prestasi, jabatan, pendahin, keluarga besar, umur si gedang, keriahen ukur, dame sejahtera, rsd.-na., si e kerina labo erkiteken gegeh beluhta, tapi anugerah Tuhan semata i bas kegeluhenta. Emaka kataken bujurlah man Dibata i bas kerina si enggo ipercayakenNa man banta.

Si peteluken, patuhlah man Dibata labo erkiteken gelah dat pasu-pasu, tapi erkiteken kesadarenta i bas merespon keleng ate Dibata i bas kegeluhenta. Alu bage banci terbentuk spiritualitas ketergantungan man Dibata. Bahanlah relasi si mehuli ras Dibata arah pertotonta, erlajar Kata Dibata, ikut muat bagin i bas pelayanen, rsd.-na. Dibata si mpengasup kita kerina Moria GBKP.