SUPLEMEN PJJ GBKP TGL. 22 - 28 MARET 2026

Pdt. Larena Sinuhadji (Nd. ReyRapha Tarigan)

LALAP REH TERANGNA - Kuan-kuanen 4:10-19

(HUT Persekutuan Kategorial)

Penaruh

Mungkin lit si tersungkun-sungkun, kai tujunna maka lit persekutuan kategorial i bas GBKP? I bas Gerejanta lit piga-piga persekutuan kategorial: KAKR, PERMATA, Moria, Mamre, ras Saitun. Rikutken informasi i bas AI nari, “Tujuan persekutuan kategorial dalam gereja (baik Katolik maupun Protestan) pada dasarnya adalah untuk melayani, membina, dan mewadahi umat berdasarkan kelompok usia, profesi, panggilan hidup, atau minat tertentu. Kelompok ini bertujuan agar anggota dapat berperan aktif dalam kehidupan gereja dan masyarakat. Kelompok kategorial ini berbeda dengan organisasi masyarakat biasa karena berorientasi pada pelayanan pastoral dan berada di bawah naungan gereja.” I bas Gerejanta, persekutuan kategorial hanya berdasarken kelompok usia. Tapi banci ikataken maka persekutuan ras pelayanen man kategori usia e seh kel pentingna.

I bas kesempaten enda radu ras kita mulihi erlajar kerna persekutuan kategorial erpalasken ogenta sendah.

Mpebagesi Ogen

Minggu si lepas enggo radu ras kita erlajar i bas Kitab Kuan-kuanen nari. I bas kesempaten enda pe mulihi kita erlajar arah Kitab Kuan-kuanen nari. Lit bentuk si khusus adi sioge kitab enda benaken bindu 1-9, e me pedah-pedah si isehken sekalak perbapan man anak-anakna kerna pentingna milih kepentaren i bas Dibata nari asangken kepentaren doni enda. I bas bagin enda kepentaren Dibata nari igambarken sebage dalin keterkelinen, sedangken kejahaten igambarken sebage dalin ku kehancuren.

Ay. 10-13 e me pengajuk man generasi muda gelah nggeluh i bas kepentaren Dibata. Nggeluh i bas kepentaren Dibata e la banci lang harus ibenaken alu tutus megiken pedah-pedah, janah nggit erlajar ngelakokenca. Alu bage ibabaina kita nggeluh i bas kegeluhen si payo. Ikataken nina, la lit alangen adi kita erdalan, janah la tertuktuk adi kita kiam. Antusenna, lit sada kepastian i bas diri kalak si pentar, itehna kai si jadi tujun geluhna. Emaka kai pe godaan entah pe perbeben si seh man bana i bas perdalanen geluhna, ngasup ia nilahkenca ras ngalakenca alu gegeh i bas Dibata nari.

Ay. 14-17 e me pengajuk man generasi muda gelah cerdas i bas bergaul. Adi enggo itehna maka teman-temanna e toxic, entah pe mabai ku erbage-bage kejahaten, maka harus nggit alu tegas nadingkenca. Ula mbiar la lit teman sebab melala denga teman si mehuli. Tadingken toxic relationship! Rasul Paulus i bas 1 Kor. 15:33 alu tegas ngatakenca, “Ula kal kam papak! Pergaulen si la mehuli, ncedaken biak si mehuli.” Ertina bergaul ras kalak si la mehuli, seri ertina ras kalak si papak. Mungkin turah penungkunen, tapi ma kita harus ersaksi man kerina jelma? Maka kalak si papak pe perlu ipertemani. Tugasta memang ersaksi kerna keleng ate Kristus, tapi sada ciri kalak si papak e me, la nggit ipersingeti. Adi enggo rusur isingetken tapi lalap ilakokenna si jahat, ula nai pedekah-dekah erteman ras ia. Mis tadingken!

Ay. 18-19 e me perbandingen kalak si benar ras kalak si jahat, si apai si ipilih kita? Kalak si jahat iandingken alu kegelapen. Ulih nggeluh i bas kegelapen e me kehancuren ras kebinasaan. Kalak si benar igambarken alu terang si reh terangna. Enda akap kami si jadi tema i bas PJJ-ta sendah. I bas ay. 18 ikataken, “Dalan si idalani kalak bujur seumpama matawari pultak erpagi-pagi, lalap reh terangna seh pantek ciger.” I bas terj. TB-LAI nina, “Tetapi jalan orang benar itu seperti cahaya fajar, yang kian bertambah terang sampai rembang tengah hari.” Kai enda antusenna? Kalak si benar si nggeluh i bas kepentaren Dibata, si pemena lebe, lit pertumbuhen rohani ku si mehuli wari lepas wari. Melala terbangun karakter si mehuli i bas kegeluhenna. Si peduaken, lit tujun si jelas i bas kegeluhenna, e me mpermuliaken gelar Dibata. Rasul Paulus i bas Kol. 3:23 ngatakenca, “Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia.”

Pengkenaina

PJJ-ta sendah ngajuk kita kerina gelah nggeluh i bas kepentaren Dibata nari. Adi sedekah enda enggo nge kita erlajar ngelakoken kerina si jadi peraten Dibata i bas kegeluhenta, puji Tuhan! Tadi sievaluasi, kai nari kira-kira si harus ipekena. Karakter Kristus kai saja si lenga banci bertumbuh i bas geluhta? Kai kira-kira kendalana? Gelah alu bage iteh kita kai saja si menghambat i bas kita nggeluh i bas kepentaren Dibata. Dua kata kunci si akap kami jadi tekanen i bas PJJ-ta sendah, e me: tujun si pasti ras lit pertumbuhen rohani. I bas tujun si pasti akap kami enggo tangkas man banta. I bas pertumbuhen rohani enda si akap kami melala kendalana. Tapi si paling penting bagi tema PJJ-ta sendah, la kita nggit ngadi, ateta min terus berproses ku si mehuli, reh terangna geluhta wari lepas wari. Memang labo murah, emaka teruslah sipindo gegeh i bas Dibata nari, gelah ipengasupNa kita nggeluh erkemalangen man baNa, nggit kita terus erlajar kerna kepentaren Dibata nari, janah nggit ka kita erlajar ngelakokenca.

PJJ-ta sendah lit i teruh sub tema “HUT Persekutuan Kategorial.” I bas si e tentu labo terjeng siinget HUT kerina Persekutuan Kategorial i bas GBKP enda. Tapi si paling penting e me, si pemena lebe, marilah simanfaatken wadah pembinaan si enggo ilitken i bas Gerejanta. Adi lit pembinaan-pembinaan, ikutlah kita. Gelah terbangun karakter Kristus i bas dirinta. Bahanlah program-program kerjasama di antara persekutuan kategorial gelah reh paguhna kiniersadanta. Si peduaken, proaktiflah kita muat bagin i bas kategorialta masing-masing. Arah keaktifenta erbahanca geluhta terkondisi ku si mehuli. Sibuk kita i bas erbage kegiaten si bermanfaat ras membangun kinitekenta. Si peteluken, marilah sidukung kategorialta masing-masing alu kinilitenta. Sitotokenlah rusur janah berekenlah dukungenta alu talenta, tenaga, kebeluhen, bage pe materi si lit i bas kita. Gelah alu bage Persekutuan Kategorial i bas GBKP enda reh majuna baik secara kuantitas ras kualitas pelayanan. Dibata si mpengasup kita kerina.