Pdt. Larena Sinuhadji (Nd. ReyRapha Tarigan)
Konfesi IV: Kesah Si Badia
Ogen : Johanes 14:16-17
Tema : KESAH SI BADIA
Tujun : Gelah Mamre :
1) Meteh kerna Kesah Si Badia
2) Encidahken ulih litna Kesah Si Badia i bas dirina arah dampar geluhna
Metode : Diskusi
Penaruh
Kesah Si Badia e me pribadi peteluken i bas pengajaren kiniteken Trinitas entah pe Dibata si telu sada. Kenca Dibata nepa doni enda, berkarya i bas Padan Si Ndekah, iterusken alu karya Yesus Kristus i tengah-tengah bangsa Israel. Kenca Yesus nangkih ku surga, Kesah Si Badia si berkarya seh asa gundari. I bas kesempaten enda radu ras mulihi kita erlajar kerna Kesah Si Badia si enggo ialoken kita asum ngakuken maka Yesus Kristus e me Tuhan ras Juruselamatta.
Mpebagesi Ogen
Bahan ogenta sendah dua ayat ngenca, lit i teruh judul perikop “Ipadanken Yesus kerehen Kesah Si Badia.” Sope Yesus nangkih ku surga, ipindoken Yesus man Bapa, gelah isuruhNa reh Penampat si deban e me Kesah si naksiken kebenaren kerna Dibata, gelah itemaniNa ajar-ajarNa rasa lalap. Kesah Si Badia i jenda e me Si Nampati, Penolong yang lain (TB-LAI & BIMK) si ibereken man kalak si tek man baNa (bdk. Yoh. 16:7). Kesah Kebenaren enda fungsina e me nampati ajar-ajarNa guna mereken kesaksin kerna kebenaren ras nemani ajar-ajar e seh rasa lalap. Kesah Si Badia e enggo ibereken sepuluh wari kenca Yesus nangkih ku surga asum ajar-ajar Yesus pulung i Yerusalem i bas perayaan Pentakosta.
Ay. 16, “Penampat si deban” (Penolong yang lain) i bas bhs. Yun., e me “allos Parakletos.” Menarik i jenda Yesus labo ngataken “Parakletos” ngenca tapi lit kata “si deban.” Antusenna, adi sedekah enda Yesus enggo ras-ras ajar-ajarNa, kenca enggo nangkih pe pagi ku surga, Yesus tetap hadir alu cara si deban. Ertina Dibata labo pernah nadingken ajar-ajarNa bage pe kerina kalak si tek man baNa.
“Kesah kebenaren” i jenda labo terjeng nampati ajar-ajarNa guna mereken kesaksin kerna kebenaren ras nemani saja, tapi Kesah kebenaren enda pe: 1) Mabai kalak si tek ku relasi si benar ras Kristus. 2) Erbahanca kalak si tek meteh karya-karya Dibata. 3) Mpengasup kalak si tek nggeluh i bas kesetiaan.
Ay. 17, “Tapi kam itandaindu IA sebab IA ras kam, janah kam ringan i bas IA.” Kata “ringan” i bas bhs. Yun., e me “meno” enda penting i bas Injil Yohanes, sebab Dibata labo terjeng reh, tapi ringan i bas kerina kalak si tek man baNa. Enda encidahkenca relasi si tuhu-tuhu ndeher antara Dibata ras kalak si tek man baNa. Tading uga nge responta nandangi Kesah si enggo ringan i bas kita?
Pengkenaina
PA-ta sendah i bas rangka radu ras kita erlajar kerna kinitekenta man Kesah Si Badia. Adi sinen Konfesi GBKP, pengakun kerna Kesah Si Badia enda lit i bas poin ke-5 Bab II si ngakuken kerna “Allah” bagenda nina: “Kami percaya bahwa Allah Roh Kudus adalah pribadi Allah; Roh Allah dan Roh Kristus (Roma 8:15-17). Dialah Penolong dan Penghibur yang dikaruniakan untuk mengajar, mengingatkan orang percaya akan kehendak Allah dan ajaran Yesus Kristus, dan menanamkan serta memelihara iman sampai kedatangan Yesus Kristus kembali (Yoh. 14:26; 2 Kor. 3:17).”
I bas Konfesi enda ndai teridah maka tuhu mbelin peran Kesah Si Badia i bas nampati, mereken pengapul, ngajar, nehken persinget, nuanken ras memelihara kiniteken seh ku kerehen Yesus si peduakaliken. Kesah Si Badia enggo ialoken kita kerina kalak si ngakuken Yesus sebage Tuhan ras Juruselamat, penungkunenna uga nge responta? Sue ras tujun PA-ta si peduaken, iarapken gelah Mamre encidahken ulih litna Kesah Si Badia i bas dirina arah dampar geluhna. Secara konkrit Gal. 5:22-23 ngatakenca bagenda nina, “Ulih Kesah Si Badia e me: lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia, meteruk ukurna dingen ngasup engkuasai diri.” Ulih Kesah si apai si seh asa gundari lenga tercidahken kita, khususna kam kerina Mamre kami? Babalah rusur ku bas pertotondu man Dibata, gelah ipengasupNa kam kerina ngelakokenca.
Tidak ada komentar:
Posting Komentar