SUPLEMEN PJJ GBKP TGL. 29 MARET - 4 APRIL 2026

Pdt. Larena Sinuhadji (Nd. ReyRapha Tarigan)

MUAT BAGIN I BAS BERITA SI MERIAH - 2 Timotius 1:3-8

(PJJ Intergenerasional) - Ilakoken Alu Sistem Jetro

Penaruh

Adi sidarami informasi i bas AI nari alu kata-kata “regenerasi keturunan,” emaka sidat bagenda nina, “Regenerasi keturunan adalah proses berlanjutnya misi, nilai-nilai, dan keberadaan keluarga atau umat melalui kehadiran anak-anak sebagai generasi penerus. Dalam konteks yang lebih luas, ini adalah mekanisme alami manusia untuk melanjutkan garis keturunan, memastikan nilai-nilai kebaikan diwariskan, dan menjaga eksistensi umat.” Rikutken informasi enda, maka banci ikataken, warisen si itadingken kita labo terjeng warisen si sifatna materi, tapi si pentingna e me warisen kiniteken. I bas warisen kiniteken pe labo terjeng pemeteh kerna kiniteken, tapi si pentingna akap kami uga carana nggeluhken kiniteken e i bas kegeluhen si tep-tep wari.

I bas kesempaten enda radu ras kita erlajar kerna warisen kiniteken erpalasken ogenta sendah.

Mpebagesi Ogen

Lit piga-piga hal si jadi latar belakang surat si peduaken Rasul Paulus man Timotius. Si pemena lebe, Rasul Paulus lit i bas keadaan penderitaan si mberat i bas Penjaran Kota Roma. Lit piga-piga kali Paulus ipenjara. Kurang lebih 2 tahun Paulus pernah ipenjara i Kaisarea rikutken informasi i bas Perb. Rasul 24:27. Berikutna, Paulus pernah jadi tahanan rumah i Kota Roma kurang lebih 2 tahun dekahna, enda banci sioge i bas Perb. Rasul 28:30. Janah si terakhir Paulus ipenjara i Penjara Kota Roma, kurang lebih 1 tahun dekahna. I bas penjara si terakhir enda, Paulus ngenanami penderitaan si mberatna, bahkan i bas 2 Tim. 4:6 ikataken Paulus nina, “Tapi aku, enggo seh paksana ipersembahken. Enggo seh paksana aku nadingken kegeluhen enda.” Si peduaken, Timotius pe lit i bas keadaan si kote i bas pelayanenna. Enda teridah i bas ay. 4 ras 6 ogenta sendah. Si peteluken, kondisi Perp. Efesus, i ja Timotius melayani pe lit i bas keadaan tidak baik-baik saja. Lit ajaren-ajaren si papak, penganiayaan, janah pemimpin-pemimpin Gereja pe sanga lit i bas keadaan si kote kinitekenna.  

Tapi si luar biasa arah telu latar belakang enda, ipengasup Dibata denga Paulus nulisken suratna, gelah tetap megegeh Timotius i bas pelayanenna, janah kiniteken Perp. Epesus pe tetap terjaga.

I bas ogenta sendah teridah proses regenerasi nggeluh erkiniteken. Si pemena lebe erlajar kita arah keluarga Timotius, i ja nggeluh erkiniteken enggo iwarisken arah Lois nari ku Enike, seterusna arah Enike nari ku Timotius. Kerna kualitas kiniteken keluarga enda pe enggo iakuken Paulus i bas ay. 5. Si peduaken, erlajar kita arah proses regenerasi nggeluh erkiniteken si ilakoken Paulus man Timotius anak rohanina.

Adi sioge ay. 7-8 teridah pengajaren Paulus kerna nggeluh erkiniteken man Timotius. I bas ay. 7 isingetken mulihi Timotius maka lit Kesah Si Badia i bas dirina si ngasup mereken kuasa (dynameos - kuasa untuk bertahan dan bersaksi), kekelengen (agapes - kasih yang memberi diri), bage pe kengasupen guna engkuasai diri (sophronismou - disiplin diri, kejernihan pikiran, kebijaksanaan praktis). I bas ay. 8 imotivasi Paulus Timotius gelah ula mela ersaksi kerna Tuhan Yesus, bage pe kerna Paulus si ipenjaraken erkiteken Kristus. Mela i jenda lit kaitenna ras beban sosial si inanami Timotius erkiteken Paulus lit i bas penjara. Tempa-tempa bagi la lit kuasa Dibata seh makana pimpinen tertinggina lit i bas penjara. Nggeluh erkiniteken labo soal kai si teridah rikutken kepentaren doni enda, tapi kai si iperjuangken erpalaken si ngena ate Dibata. Emaka i bas si e enggo pasti melala tantangen, perbeben, ras kiniseran. Selain si e, imotivasi Paulus Timotius gelah nggit muat bagin i bas kiniseran guna Berita Si Mehuli. Lit solidaritas i bas nggeluh erkiniteken, empati, berbela rasa, menderita bersama.

Lit dua kali Paulus nehken suratna man Timotius, ertina pengajaren kerna nggeluh erkiniteken enda ilakoken Paulus secara intensif (dilakukan secara sungguh-sungguh, terus-menerus, mendalam, dan terstruktur untuk mencapai hasil optimal). Regenerasi nggeluh erkiniteken enda alu tutus ilakoken Paulus, baik sanga ras-ras Timotius denga, bage pe sanga Paulus lit i bas penjara. Janah kai si ilakoken Paulus enda ngajarkenca man banta maka nggeluh erkiniteken harus terus-menerus iajarken i bas kerina keadaan.

Pengkenaina

Tema i bas PJJ-ta sendah ngajuk kita gelah ikut muat bagin i bas Berita Si Meriah, salah sadana alu regenerasi nggeluh erkiniteken. Lit kuan-kuan si ngatakenca “Long life education” entah pe erlajar segedang geluh. Kuan-kuan enda ngajuk kita gelah ula sempat ngadi erlajar, sebab melala hal i bas kegeluhen enda si banci sipelajari. Adi ngadi kita erlajar maka ngadi ka pemeteh si lit i bas kita. Adi sikaitken ras nggeluh erkiniteken, adi ngadi kita erlajar enggo pasti regenerasi nggeluh erkiniteken ndai terganggu. Ertina syarat mutlak si harus lit adi ateta ngelakoken regenerasi nggeluh erkiniteken, e me si pemena, harus lit i bas kita kininggiten erlajar kai pe si mehuli, khususna Kata Dibata. Si peduaken, mereken teladan nandangi generasi muda. Tek kita maka bentuk-bentuk pengajaren si ilakoken Lois, Enike, ras Paulus, labo terjeng teori semata, tapi tuhu-tuhu kiniteken e nggeluh i bas kegeluhenna si tep-tep wari. Alu bage koneksinta ras Dibata erkelangken Kesah Si Badia ula sempat putus. Arah ogenta sendah melala kengasupen si banci ibereken Kesah Si Badia guna ngalaken erbage-bage perbeben kegeluhen. Emaka marilah kita ertekad guna mpeteguhi relasinta ras Dibata erkelangken Kesah Si Badia.

PJJ-ta sendah lit kaitenna ras PJJ Intergenerasional. Kerna PJJ Intergenerasional enda enggo lit penjelasenna i bas BUKU PJJ-nta. Si perlu radu ras siukurken e me uga carana gelah Serayan (Pdt./Pt./Dk./Em.) si mabai PJJ enda semakin iperlengkapi gelah reh beluhna ia mengajar alu metode-metode si tepat. Memang payo bagi si ikataken i bas Buku PJJ-nta, Kata Dibata harus banci ialoken kerina usia si reh i bas PJJ, khususna anak-anak ras remaja, tapi i bas praktekna labo semudah membalikkan telapak tangan. Emaka i bas si e pembinaan-pembinaan man Serayan Tuhan i bas GBKP enda harus terus-menerus ilakoken. Dibata si mpengasup kita kerina.