SUPLEMEN PA MAMRE GBKP TGL. 22 - 28 MARET 2026

Pdt. Larena Sinuhadji (Nd. ReyRapha Tarigan)

Konfesi I : Pengertin Konfesi

Ogen : 1 Korinti 15:1-8

Tema : KONFESI GBKP

Tujun : Gelah Mamre :

1) Meteh kai kin ertina konfesi si jadi rumusen keyakinen dasar ras pedoman perdalanen Gereja

2) Pang nehken kinitekenna i bas perbahanen

Penaruh

Tema PA-ta sendah ngerana kerna Konfesi GBKP. Rikutken informasi i bas AI nari, “Konfesi (bhs. Latin: confessio) adalah pengakuan iman, kepercayaan, atau doktrin resmi yang dianut oleh sebuah kelompok gereja atau penganut agama tertentu. Konfesi sering kali berbentuk dokumen tertulis yang merumuskan tafsiran iman, dasar pengajaran, dan panduan hidup bagi jemaat berdasarkan firman Tuhan.” I bas kesempaten enda radu ras kita erlajar kerna konfesi enda i bas konteks GBKP erpalasken ogenta sendah.

Mpebagesi Ogen

Kalak Korinti, si umumna kalak Yunani la tek nandangi kekeken kula (ay. 12). Padahal situhuna, tangtangna kel Berita Si Meriah ipembarken i tengah-tengah kalak Korinti enggo ilumbaken Paulus kerna keselamaten i bas Yesus Kristus, i ja Kristus enggo mate erkiteken dosa-dosanta. Banci jadi, paksa alokenna pengajaren e, la itanggapi alu sungguh-sungguh (bdk. ay. 2, “Arah Berita Si Meriah e me kam iselamatken adi tetap icikepndu isi Berita Si Meriah si enggo kuberitaken man bandu, pala asum kam tek nai la kin mbages iukurinndu”). Emaka si pemena, persoalenna, la mbages iukuri kalak Korinti pengajaren enda. Si peduaken, lit pemahamen si tetap lenga teralokenna sope jadi pengikut Kristus ras kenca enggo Kristen, secara khusus adi ngerana soal kinikeken kula.

Kalak Yunani tek nandangi keabadian jiwa, tapi la tek nandangi kekeken kula. I bas pengakap kalak enda, kekeken kula la mungkin, nginget fakta maka kula sumber kelemahen ras dosa manusia. Emaka kematen e sangat inantiken, sebab alu kematen, jiwa ibebasken i bas kula nari, sedangken kula ipan cacing. Emaka, kekeken kula la iarapken sebab dalanna jiwa mulihi ras kula. Pemahamen enda mempengaruhi kalak Kristen i Korinti si umumna berlatar belakang budaya Yunani.

Emaka i jenda Paulus sangana ngerana kerna hal si paling penting menyangkut kiniteken. 1 Korinti 15:7, “Janah adi la kin ipekeke Dibata e Kristus i bas si mate nari, sia-sia me kinitekenndu janah kam pe tetap denga i bas dosa”. Emaka i jenda Paulus sangana ngerana kerna fondasi kiniteken secara menyeluruh kerna pengajaren ras sekaligus mengoreksi kesesaten si fatal i bas perpulungen.

Ipeseh Paulus bagian enda man Perp. Korinti i bas bentuk Pengakuan Iman (konfesi), i ja ia sendiri pe enggo ngalokenca (“la mungkin kita mpeseh kekeken Kristus i bas si mate nari, adi kita sendiri pe lenga tek”). Ras sifat pengakuan enda seh kel pentingna, ay. 3, “si pentingna enggo kupeseh man bandu, sebab memang enda dasar iman kalak si tek” (V.C. Pfitzner, 2004:289). Inti i bas Pengakun Kiniteken bas Yesus Kristus i bas ogenta sendah jelas :

• Kristus enggo mate erkiteken dosa-dosanta
• IA enggo ikuburken
• I bas wari peteluken ipekeke Dibata i bas si mate nari, sue ras kesaksin Pustaka Si Badia
• Enggo icidahkenNa diriNa man Petrus ras 12 Rasul, ajar-ajar si deban si teremna lebih 500 kalak, man Jakub bage pe man kerina Rasul-rasul

Sebage cataten man banta, maka melala pemahamen yang menyatakan bahwa rumusan Pengakuan Iman tersebut adalah hasil Konsili, entah pe Persidangan Gerejawi ngenca. Tapi rikutken ogenta sendah kita bisa memahami bahwa meski Pengakuan Iman merupakan hasil Konsili tetapi sumber utamanya tetaplah Alkitab!

Kematen Kristus erkiteken dosa-dosanta, e me inti Berita Si Meriah (bdk. Roma 5:6; 2 Kor. 5:14; Gal. 1:14). KematenNa labo kegagalan i bas mempertahankan kebenaren. Tidak! “IendeskenNa Yesus ku bas kematen erkiteken kesalahen-kesalahenta” (Roma 4:25). Bahkan Yesus pe nuduhken, maka kematenNa merupaken penggenapen i bas rencana Ilahi si sue ras isi Pustaka Si Badia. Pustaka Si Badia si nimaksud i jenda, labo terjeng sada dua ayat ngenca, tapi kerina Padan Si Ndekah merujuk ku Yesus sebage tujun i bas rencana penyelamaten si ibahan Dibata (bdk. Pet. 10:43, “Kerina nabi ersaksi kerna IA. Ikataken nabi-nabi emaka kalak si tek man baNa ialemi Dibata kap dosana i bas gelar Yesus”).

Yesus ikuburken, sebage bukti maka kematenNa labo tipuan (isapan jempol). Banci siidah bukti-bukti si e i bas sumber Pustaka Si Badia, ras prajurit Romawi, si labo kalak si tek man Yesus pe enggo memastiken kerna kematen Yesus. Termasuk kekekenNa. Labo sekedar sadar kenca koma piga-piga saat dekahna. Tapi keke i bas si mate nari. Ipekeke Dibata IA i bas wari peteluken (Mat. 16:21, Mrk. 8:31). Janah icidahkenNa diriNa man enterem saksi.

Pengkenaina

GBKP i bas perdalinen pelayanenna sedekah kurang lebih 135 tahun, enggo piga-piga kali merumuskan Pengakuan Imanna. Si terakhir e me konfesi si lit i bas kita. I bas Buku Konfesi GBKP lit 16 Bab si ngajarkenca kerna pokok-pokok iman Kristen erpalasken Kata Dibata ras konteks GBKP. I jenda itulisken kami judul-judul setiap Bab. Bab 1 Alkitab. Bab 2 Allah. Bab 3 Ciptaan. Bab 4 Manusia. Bab 5 Masyarakat. Bab 6 Budaya. Bab 7 Pemerintah. Bab 8 Politik. Bab 9 Gereja. Bab 10 Ibadah. Bab 11 Perkawinan. Bab 12 Etika. Bab 13 Kematian. Bab 14 Keselamatan. Bab 15 Kebangkitan. Bab 16 Kedatangan Yesus Kristus Kembali. Kerina Bab i bas Konfesi GBKP enda ijabarken alu lebih lengkap i bas Buku Katekisasi GBKP. Ertina adi erlajar ateta kerna Konfesi GBKP, harus sioge Buku Katekisasi GBKP. Emaka penting kal akap kami ibahan kelas-kelas Katekisasi Lanjutan. Gelah amin pe mungkin kerina kita enggo pernah Erlajar Katekisasi, banci isingetken mulihi kerna Pokok-pokok Pengakuan Iman GBKP.

Meteh entah pe ngangkai Konfesi GBKP saja la cukup, harus ka teridah arah pengkebet geluhta. Emaka i bas PA-ta sendah, iajuk kita kerina, khususna kam Mamre GBKP, gelah pang nehken kinitekenna i bas kegeluhenna, baik arah perukuren, pengerana, ras perbahanen. Gelah alu bage keselamaten i bas Yesus Kristus tuhu-tuhu banci inanami kerina si lit i sekelewetta. Pindolah gegeh i bas Dibata nari gelah ipengasupNa kita ngelakoken kerina si jadi peratenNa.