SUPLEMEN PJJ GBKP TGL. 31 MEI - 6 JUNI 2026

Pdt. Larena Sinuhadji (Nd. ReyRapha Tarigan)

BEREKEN RIKUTKEN PATUTNA (Matius 22:15-22)

(Konfesi GBKP BAB VII: Pemerintah)

Penaruh

Hak ras kewajiben, entah petanggung jawab, selaku warga negara harus radu ras sidalanken. Kai si jadi tanggung jawabta, kewajibenta, sidalanken alu patuh, janah kai si jadi hakta harus ka sialoken. Enggo pasti terjadi persoalen ‘di kenca salah sada hal la seimbang sidalanken. Umpamana, kewajibenta enggo sipenuhi, tapi hakta la sialoken. Entah pe sebalikna, enggo pasti terjadi persoalen: ketidakadilen, semena-mena, kekerasan, rsd.-na. Nggalar pajak e me salah sada kewajibenta selaku warga negara. Pajak i jenda labo terjeng pajak penghasilan, tapi pajak-pajak si deban si secara tanpa kita sadari sigalari i bas kegeluhenta si tep-tep wari.  

I bas kesempaten enda radu ras kita erlajar kerna tugas tanggung jawabta selaku warga negara si mehuli erpalasken ogenta bage pe Konfesi GBKP.

Mpebagesi Ogen

Ogenta sendah lit i teruh judul perikop “Penungkunen kerna nggalar pajak.” I bas terj. Bhs. Ind., nina, “Tentang membayar pajak kepada Kaisar.” I bas terj. Bhs. Ind., jelas ikataken man ise sigalari pajakna. Kai si ituriken i bas ogenta sendah lit i bas Mrk. 12:13-17 ras Luk. 20:20-26. Ituriken maka lit kerjasama si la mehuli antara kalak Parisi ras piga-piga i bas Partai Herodes (Herodian) nari guna ncubai Yesus alu penungkunen soal nggalar pajak man Kaisar. Padahal sedekah enda kalak Farisi ras Herodian ermusuhen (beda pendapat). Kalak Herodian setuju pajak sedangken kalak Parisi lang. Tapi erkiteken seri kepentingenna guna menyingkirken Yesus, dua kelompok enda akhirna berkoalisi.

Lebe alu sada pernyataan si sangat menyanjung. Reh alu kalimat si hebat si situhuna enda perangkap. Pernyataan si kin payo tapi situhuna la teraloken kalak enda pengajaren ras perbahanen Yesus si enggo isanjung kalak enda ndai. Maka payo nge situhuna Yesus kalak bujur, ngajar alu terus-terang kerna sura-sura Dibata nandangi manusia, alu la biar-biaren man ise pe. Sebab la erpilihen manusia i lebe-lebe Yesus. Payo memang isi pernyataan kalak enda ndai, tapi adi kita enggo tersanjung, terperdaya, akhirna la nari pang kita ngataken si benar, mbiar la nari ipujiken. Emaka i bas si enda, harus kita tetap metenget gelah ula iperdaya. Penungkunenna, la kin ngelanggar Undang-undang Agama Yahudi adi sigalari pajak man pemerentah Roma? Padahal kalak Yahudi sedekah enda pe enggo nggalar pajak man pemerentah Roma, amina pe situhuna mejungut ia ndalankenca sebab kalak Yahudi paksa si e ijajah Roma. Penungkunen enda situhuna penungkunen si menjebak. Adi jawab Yesus, “la banci,” kalak Herodian enggo pasti merawa ras ngelaporken Yesus man pemerentah Roma gelah Yesus banci itangkap. Adi sebalikna, Yesus ngatakenca “banci,” kalak Yahudi menganggap Yesus sebage pengkhianat si pro-Roma.

Tapi ieteh Yesus sura-sura si jahat i bas 2 kelompok si nungkun alu pekulah-kulah enda. Emaka ipindo Yesus gelah icidahken kalak enda ndai sada lembar duit. “Gambar ras gelar ise kin enda?” nina Yesus nungkun. “Gelar ras gambar pemerentah Roma.” Emaka nina Yesus, “bereken man pemerentah Roma kai si patut iberekn man bana, janah berekenlah man Dibata kai si patut ibereken man Dibata.” Intina, maka kita selaku warga negara doni ras warga negara surga, duana tanggung jawab enda arus sisehken alu mehuli.

Versi Audio silahkan klik : https://youtu.be/c7PrSMCc4qQ

Pengkenaina

Konfesi GBKP Bab VII si ngakuken kerna Pemerintah ngatakenca bagenda nina, “Kami percaya, bahwa: Pemerintah adalah hamba Allah untuk menyejahterakan bangsa dan negara (Roma 13:4-5). Dalam pemahaman itu, orang Kristen bermitra, mendoakan dan taat pada pemerintah (Yer. 29:7; Mat. 22 : 21; 1 Tim. 2:1-2). Di samping itu, orang Kristen harus berdialog dan menyuarakan suara kenabian terhadap pemerintah dalam melaksanakan kewajibannya untuk menegakkan kebenaran dan keadilan (Maz. 72:1-4).

Pengakun ras ketaatan man pemerentah e me kap wujud kinitekenta man Dibata, maka bangsa ras negara i ja kita jadi rayaktna e me kap alat Tuhan guna nehken keselamatenNa. Sitaati pemerentah sebab ia perpanjangen tan Dibata guna nehken si ngena ateNa. Tanggung jawabta sebage rakyat sidalanken secara khusus i bas nggalari pajak ras tanggung jawab si deban. Bage pe man Tuhan tanggung jawabta selaku kalak si enggo iselamatkenNa harus tetap sidalanken. Perbahanenta man Tuhan la ibatasi kewajiben ras tanggung jawab saja. Sebab kegeluhenta ras kerina si enggo sialoken kita i bas geluh enda rehna i bas Dibata nari, terlebih enggo iberekenNa keselamaten man banta. Enggo sepatutna si terbaik sibereken man Tuhan (bdk. Roma 12:1,2 - ngendesken geluhta jadi persembahen si nggeluh man Tuhan: waktu, pemikiran, tenaga, talenta, harta, keluarga, rsd.).

Tema i bas PJJ ngajuk kita kerina gelah jadi warga negara si mehuli ras bertanggung jawab. Salah sadana alu nggalar pajak sue ras aturen si lit i bas negaranta. Roma 13:1 ngatakenca, “Kerina kam harus patuh man pemerentah si erkuasa, sebab labo lit pemerentah si la i bas Dibata nari, janah pemerentah si lit genduari e pe Dibata nge netapkenca. Kalak si ngelawan pemerentah si lit e, ilawanna kap kai si enggo itetapken Dibata.” Maka harus siakui maka pemerentah e me kap alat Dibata dingen si itetapken Dibata. Alu bage tetap kita mendukung pemerentah la pe ia sada kiniteken ras kita. Janah Konfesi GBKP ngajuk kita gelah notokenca, berdialog ras menyuarakan suara kenabian terhadap pemerintah dalam melaksanakan kewajibannya untuk menegakkan kebenaran dan keadilan. Uga carana? Melala hal si banci silakoken kita. Umpamana, bersuara kritis alu cara si sopan i bas medsos-ta adi lit umpamana hal-hal si melanggar aturan. Ikut muat bagin i bas komunitas-komunitas si tugasna mengawasi program-program pemerintah. Kita kalak Kristen amin pe la enterem tapi tetap terlibat i bas kegiaten siaturken bas lingkungenta, rsd.-na.