SUPLEMEN PA MORIA GBKP TGL. 15 - 21 MARET 2026

Pdt. Larena Sinuhadji (Nd. ReyRapha Tarigan)

Pernyataan Khusus: Yesus Kristus

Si Man Ogen : Heber 1:1-3

Tema : TUHU-TUHU GAMBAR DIBATA

Tujun : Gelah Moria :

- Meteh maka Dibata mpetandaken diriNa arah AnakNa

- Nuratken pendahin Tuhan Yesus si enggo igejapkenna i bas geluhna

Penaruh

Kekelengen ni Tuhan, i bas kegeluhenta tiap wari mekatep kita sibuk ndalanken tanggung jawabta, subuk sebage nande, ndehara, lenga ka si erdahin i bas luar domestik, i tengah Lembaga Moria, ras si debanna. Terkadang rukur kita, apakah ngerana denga Tuhan man banta i bas erbage-bage kesibukenta? Emaka arah renungenta i bas PA-ta sekali enda, ipersingetina kita, maka Dibata e tetap setia ngerana man banta.

I bas PA-nta sekali enda, ngerana kita kerna Penyataan Khusus, i ja Dibata ncidahken diriNa arah Yesus Kristus. I bas sejarah Alkitab lit piga-piga tokoh si iduga sebage penulis kitab enda, e me Rasul Paulus, Barnabas ras Apolos. Tapi Alkitab sendiri la nulisken secara pasti. Surat enda itujuken man kalak Kristen berlatar belakang Yahudi. I ja kalak enda nggeluh i bas Taurat, ndatken penganiayaan erkiteken Kristus ras mulihken atena ku Yudaisme. Ras tujuan  surat enda e me, Yesus Kristus me si mbelinna, si megajangna, i bas kerina hal, termasuk i bas agama Yahudi. Ganjangen Yesus asangken nabi-nabi, asangken malekat, asangken Musa ras asangken Imam Besar. Alu bage, kalak si tek man Yesus la banci mundur i bas kinitekenna man Yesus Kristus.

Mpebagesi Si Man Ogen

Judul perikop si jadi ogenta sendah, “Kata Dibata arah AnakNa.” I bas 3 ayat si tersurat i bas Kitab Heber enda, lit piga-piga poin penting. Si pemena, nai Dibata ngerana man nini-nininta arah nabi-nabi. Arah penyataan enda, maka Wahyu Dibata lit i bas serayan. Si peduaken, i bas paksa gundari, Dibata ngerana man banta arah Yesus Kristus, AnakNa e.

Arah AnakNa :

• Dibata njadiken kerina sinasa lit
• Itetapken jadi si mada kerina si nasa lit
• Arah IA ersinalsal terang kemulian Dibata
• IA tuhu-tuhu gambar Dibata
• IA si natang kerina si nasa lit, alu KataNa si erkuasa
• IA si nebusi manusia perdosa
• Kundul IA i surga arah kemuhen Dibata si Mada Kuasa si meganjangna.

Banci siidah arah 3 ayat enda, maka Dibata la pernah ngadi ngerana. Dibata tetap rembak ateNa ras manusia. Bahkan i bas kegeluhenta tep-tep wari, Tuhan pe tetap denga ngerana: arah Kata Dibata, arah pertotonta, ras arah kerina kecibal kegeluhenta.

Pengkenaina

Kuasa ras keleng ate Dibata tetap seri, nai-nai nari, genduari, seh rasa lalap. Bahkan IA tetap ngerana man banta alu erbage-bage cara. Ras harus kita tek, maka Dibata i bas Yesus Kristus mbelin kuasa bas IA. IA tuhu-tuhu gambar Dibata. La nari perlu iraguken kuasaNa, sebab kerina sinasa lit IA si njadikenca ras IA si natang kerina si nasa lit, alu KataNa si erkuasa. Alu bage, tetaplah kita nggeluh setia ernalem man baNa. Kai pe si terjadi i bas geluhta, ula raguken kuasaNa, tetap andalkan kuasaNa.