SUPLEMEN PA MAMRE GBKP TGL. 15 - 21 MARET 2026

Pdt. Larena Sinuhadji (Nd. ReyRapha Tarigan)

Teologia Bapa I : Bapa Si Jadi Usihen

Ogen : Matius 7:9-12

Tema : BAPA SI MEREKEN KINIULIN

Tujun : Gelah Mamre :

1) Meteh mereken kiniulin man anak-anakna

2) Jadi bapa si man usihen

Penaruh

Pustaka Si Badia-nta dem alu gambaren bapa si mehuli. Dibata i bas Yesus Kristus pe ikataken Bapa-nta si dem alu keleng ate, mediate nandangi kita anak-anakna. Tapi i bas kinata kegeluhenta, melala perbapan si labo perkeleng ras mediate nandangi isi jabuna. I bas si e tentu gambaren bapa i bas Pustaka Si Badia rusur la sue ras kinata kegeluhen. Kinata si bagenda tentu lit dampakna nandangi anak-anakta. I bas Pustaka rusur iogena gambaren bapa si perkeleng, mediate, bertanggung jawab, ndeher ras anak-anak, mehuli man kalak si deban, rsd.-na. Tapi i bas kinatana, rusur iidahna bapa si rusur merawa, kasar, la peduli nandangi anak jabuna, la bertanggung jawab, rubat ras kalak si deban, rst., umpamana. Kinata si bagenda rupana tentu erbahanca kiniteken anak-anakta terganggu.

I bas kesempaten enda radu ras mulihi kita erlajar kerna Mamre selaku perbapan si mereken kiniulin ras jadi usihen nandangi jabuna.

Mpebagesi Ogen

Ogenta sendah lit i teruh judul perikop “Mindo, ndarami dingen nuktuk.” I bas terj. TB-LAI nina, “Hal pengabulan doa.” Perikop enda masuk ku bas kumpulen Khotbah di Bukit (Matius 5-7), e me kumpulen ajaren Yesus kerna etika nggeluh i bas Kinirajan Dibata. Ogenta sendah secara khusus lit i bas konteks pengajaren kerna ertoto (ay. 7-11) ras prinsip etis i bas hubungen ras sesama manusia (ay. 12). Janah si pentingna, lit hubungen antara kiniteken man Dibata ras perilaku etis nandangi sesama manusia.

Inti pengajaren Yesus i bas ay. 7-11 e me ertotolah alu tutus, si secara konkrit ilakoken alu: mindo, ndarami, dingen nuktuk. Ketutusen i bas ertoto erbahanca kai si ipindoken kita arah pertotonta ialoken ras ibereken Dibata man banta. Tapi Dibata pe labo bage-bage saja mereken si ipindoken kita arah pertotonta. Sebab iteh Dibata kai si mehuli man banta anak-anakna. Ertina kai si ipindoken kita adi erbahanca kita cilaka, enggo pasti la ibereken Dibata. Tentu Dibata pe la nggit anak-anakNa dat cilaka arah kai pe si ipindokenna man baNa. Kiniulin Dibata enda igambarken alu andingen sekalak bapa si mehuli nandangi anak-anakna. Kai si igambarken i bas ay. 9-10 e me aktivitas si biasa ilakoken sekalak perbapan kalak Yahudi nandangi anak-anakna i bas kegeluhenna si tep-tep wari. Labo lit perbapan kalak Yahudi si mabai anak-anakna ku hal-hal si la mehuli, amin pe jahat profesi perbapan e. Enda mereken penekanen maka keleng ate Bapa si ni surga lebihen asangken gambaren perbapan ndai.

Ay. 12 e me pengajaren kerna prinsip etis kristiani kerna hubungen ras sesama manusia. Biasa isebut “Golden Rule” (aturan emas). Engkai maka igelari bage? Sebab ajaren e tuhu-tuhu meherga bagi emas, si pentingna kel, ras bersifat universal entah pe murah guna iangkai ise pe. “Bahanlah man kalak si deban bagi ngena atendu ibahanna man bandu.” I bas bahasa Indonesia ikataken, “Itulah isi seluruh hukum Taurat dan kitab para nabi.” Kai palasna? Palasna e me keleng ate Dibata si enggo ialoken kita anak-anakNa.

Pengkenaina

PA-ta sendah lit i teruh sub tema, “Teologia Bapa I: Bapa si jadi usihen.” Asa pengidah kami la lit penjelasen kerna si e i bas Buku PA Mamre. Mungkin maksudna i bas rangka membangun karakteristik perbapan GBKP sue ras Kata Dibata. Sekali enda iarapken arah PA-ta sendah, terbentuk karakter perbapan si ngasup jadi usihen nandangi sekelewetna, khususna leben i bas jabuna masing-masing.

Ogenta sendah jelas ngajuk kita kerina, khususna kam kerina Mamre kami, gelah jadi perbapan si dem alu keleng ate, mediate nandangi isi jabuna, ngasup mereken labo terjeng materi nandangi anak-anakna, tapi si pentingna e me teladan i bas kai pe, khusus i bas hal nggeluh erkiniteken. Adi perbapan kalak Yahudi tentu si jadi palasna e me aturen-aturen si lit i bas Taurat. I bas jaman Yesus, palasna irobah jadi keleng ate Dibata, la nari aturen-aturen Taurat. E maka i jenda si pemena si harus ilakoken e me tuhu-tuhu sigejapken keleng ate Dibata i bas kegeluhen kam kerina Mamre. Menjalin relasi si ndeher ras Dibata alu tutus ertoto, tutus erlajar kerna Kata Dibata, tutus berlatih ngelakoken Kata Dibata si enggo ipelajari ndai. Gelah alu bage, gambaren bapa si dem alu keleng ate, mediate, bertanggung jawab, sabar, megegeh, layak jadi usihen, rsd.-na, nggeluh i bas dirindu.

Kai enda ulihna? Tentu saja pasu-pasu i bas Dibata nari. Pasu-pasu i jenda labo terjeng erkaiten ras hal-hal si sifatna materi: sen, erta kebayaken, jabaten, rsd.-na. Tapi si pentingna kel, e me hal-hal si la tertukur alu materi: dame sejahtera, ketenengen, dem alu pengataken bujur, ternikmati kita ulih latihta, anak-anak sikap ras tutus i bas geluhna, mehuli hubungenta ras ise pe, rsd.-na. Selain si e lit hal si lebih penting, e me, kita kerina, khususna kam Mamre kami, ngasup kam menghidupkan gambaran seorang bapa sebagaimana yang disaksikan oleh Alkitab. Gelah alu bage anak-anakta pe labo kemamangen, sue antara Kata Dibata ras kinata kegeluhen. Rusur idahna perbapan si nggeluhna sue ras Kata Dibata. Teklah kita maka kiniteken si terbangun generasi penerus GBKP e me kiniteken si paguh erkiteken perbapan ngasup jadi usihen i bas kai pe. Memang labo gampang, tapi tek kita adi sipindo gegeh i bas Dibata nari, ipengasup Dibata kam kerina Mamre kami, perbapan GBKP jadi usihen nandangi sekelewetna.