SUPLEMEN PJJ GBKP TGL. 4 - 10 AGUSTUS 2024

Pdt. Larena Sinuhadji (Nd. ReyRapha Tarigan)

NGELAKOKEN PEDAH ORANG TUA - Kejadin 50:1-14

[Budaya Karo]

Penaruh

Mehamat man orang tua akap kami iajarken i bas kerina budaya rikut kinitekenna. I bas budaya Yahudi, mehamat man orang tua masuk ku bas perentah si pe-5-ken i bas 10 Pedah Dibata (Kel. 20; Ul. 5). I bas kiniteken Kristen pe lit perentah guna mehamat man orang tua, banci sioge i bas Matius 15:4 rikut ayat-ayat paralelna i bas Kitab Injil, bage pe i bas Epesus 6:2. Salah sada perbahanen si encidahken maka kita mehamat man orang tuanta e me ngelakoken kerina si ipedahkenna man banta. Pedah-pedah i jenda tentu si mehuli ras tek kita maka kerina pedah e guna kiniulinta anak-anakna.

I bas kesempaten enda radu ras kita erlajar arah Yusuf nari kerna ngelakoken pedah orang tua ikaitken ras pelestarian budaya Karo.

Mpebagesi Ogen

Ogenta sendah lit i teruh judul perikop “Kematen ras penguburen Yakub” (Kej. 49:29 - 50:21). Perikop enda secara garis besar nuriken kerna Yakub si enggo metua ras nandangi mate. Kenca kematenna, ikuburken Yusuf Yakub sue ras pemindon terakhirna. Turi-turin kerna Yakub akap kami enggo rusur sibegi. Ia termasuk ku bas telu Bapa Leluhur kalak Israel e me: Abraham, Ishak, ras Yakub. Arah anak-anak Yakub tubuh bangsa si mbelin e me bangsa Israel si terdiri i bas 12 suku sue ras gelar 12 anak-anak Yakub. I bas masa tuana, seh kel riahna Yakub erkiteken jumpa ia mulihken ras anak si tuhu-tuhu ikelengina e me Yusuf. Iakap Yakub enggo mate Yusuf, kepeken nggeluh denga ia janah enggo jadi sekalak si penting kedudukenna i taneh Mesir. Ipesenang-senang Yusuf geluh Yakub ras senina-seninana i taneh Mesir. Turi-turin enda encidahkenca uga kelengna ras mehamatna Yusuf nandangi Yakub bapana.

I bas bindu 49:29-33, ituriken pedah-pedah terakhir Yakub man anak-anakna si dilaki nina, “Erkiteken lanai bo ndekah umurku, kuburkenlah aku pagi ras nini-niningku i bas gua si lit i juma Epron kalak Heti e, i Mahpela arah timur Mamre, i taneh Kanaan. Itukur Abraham gua ras juma e i bas si Epron kalak Heti nari man taneh kuburen. I je me Abraham ras ndeharana Sara ikuburken; i je ka pe Ishak ras ndeharana Ribka ikuburken. I je ka me pe enggo ikuburken Lea. Juma ras gua e itukur i bas kalak Heti nari, emaka i je lah aku ikuburken.” Kenca enggo dung Yakub mereken pedah-pedahna man anak-anakna, medem ia mulihken je mate ia. Memang la ituriken pedah-pedah kai saja selain pemindonna kerna ingan kuburenna, tapi tek kita maka melala pedah-pedah mehuli si isehken Yakub man kerina anak-anakna.

Ogenta sendah e me realisasi pedah Yakub si ilakoken anak-anakna, secara khusus ilakoken Yusuf, sebab memang Yusuf ngenca si megegeh guna merealisasiken pemindon Yakub kerna ingan kuburenna. I bas ogenta teridah tuhu-tuhu mehamat Yusuf man Yakub bapana. Itangisina ras iemaina mait bapana. Iperentahken Yusuf suruh-suruhenna gelah namaken rempah-rempah ku mait bapana. Si berkabung labo terjeng Yusuf ras senina-seninana, kalak Mesir pe ikut erceda ate i bas kelawesen Yakub erkiteken kiniulin si enggo ilakoken Yusuf nandangi bangsa Mesir. Lit kurang lebih seratus sepuluh wari ndekahna waktu berkabung sope ibaba Yusuf mait bapana ku taneh Kanaan.

I bas prosesi naruhken mait Yakub ku Kanaan pe tuhu-tuhu ilakoken Yusuf alu mehuli. Enterem kalak Mesir si ikut naruhkenca. Kerina pegawai raja, kalak si erpangkat, kalak mbelin i Mesir, kalak si ergereta perang ras si ngersak kuda pe ikut naruhken. Ituriken maka lanai tanggung teremna kalak Mesir si ikut naruhken Yusuf ku taneh Kanaan. Sope ikuburken ibahan Yusuf ka adat perngandungen pitu wari ndekahna. Kenca bage mait Yakub ikuburken sue ras sura-surana i gua Mahpela. I bas turi-turin enda teridah  maka tuhu-tuhu ilakoken Yusuf ras senina-seninana kai si jadi pedah-pedah Yakub sope ia mate. Janah kenca si e, Yusuf ras senina-seninana nggeluh alu dame i taneh Mesir.

Versi Audio silahkan klik : https://youtu.be/YB7DBalS4cA

Pengkenaina

Arah turi-turin Yusuf enda radu ras kita erlajar kerna mehamat man orang tua alu ngelakoken pedah-pedahna. Tentu lit erbage-bage pedah orang tua si isehkenna man banta rikutken konteks keluarganta masing-masing. Tapi umumna pedah-pedah e isina, gelah kerina kita anak-anakna ula sirubat-rubat, nggeluh alu erdame sada ras si debanna, sisampat-sampaten, saling mperdiateken kenca enggo itadingken orang tua, ras melala denga pedah-pedah si mehuli si isehken orang tuanta man banta. Penungkunenna, apakah kerina enggo silakoken? Adi enggo, puji Tuhan! Ertina, bagi Yusuf, enggo tuhu-tuhu sihamati orang tuanta alu ngelakoken kerina pedah-pedahna man banta. Adi lenga, tentu kesempaten enda jadi bahan evaluasi man banta, kai si jadi kendala makana lenga ngasup kita ngelakoken pedah orang tuanta man banta? Kenca bage, pindolah gegeh i bas Dibata nari gelah ipengasup Kesah Si Badia kita ngelakoken kerina si mehuli si enggo ipedahken orang tuanta man banta. Sebab tek kita maka la lit orang tua si mereken si la mehuli man anak-anakna.

PJJ-ta sendah ikaitken ras budaya Karo. Secara umum erti budaya e me “suatu cara hidup yang berkembang, dimiliki bersama oleh sebuah kelompok orang, dan diwariskan dari generasi ke generasi.” I bas definisi budaya si ibuat kami arah Wikipedia ndai, banci isimpulken kita maka budaya Karo e me warisen turun-temurun. Bekas pedah-pedah orang tuanta ndube. Kerina pedah-pedah e menjadi kearifan lokal si iajarken dari generasi ke generasi. Sikataken bujur man Dibata erkiteken GBKP termasuk salah sada pihak si ikut melestarikan kearifan lokal budaya Karo. Secara teologis palas si ipake nandangi budaya i bas Gerejanta e me sikap transformatif, Kristus memperbaharui kebudayaan (Christ and Culture, H. Richard Niebuhr). Secara praktis melala bentuk-bentuk budaya Karo si enggo melalui “saringan teologis” Kristus memperbaharui budaya, ertina labo kerina bentuk-bentuk budaya Karo ialoken i bas Gerejanta.

I bas si e tentuna patut kita ngataken bujur man Dibata erkiteken sedekah enda GBKP enggo berupaya menerangi budaya Karo alu terang Kristus. Janah sada prinsip si pasti i bas hubungen antara adat budaya ras kiniteken man Yesus Kristus, e me kiniteken man Yesus Kristus si jadi patoken entah pe standar i bas menerangi entah pe men-transformasi budaya. Konfesi GBKP kerna Budaya (Bab VI) ngatakenca: “Kami percaya, bahwa: Budaya adalah keseluruhan cipta, karya dan karsa manusia yang berakal budi. Oleh karena itu, dalam terang firman Allah, manusia harus menggali, mengembangkan dan melestarikan budaya secara positif, kreatif, kritis dan realistis untuk kesejahteraan manusia (1 Kor. 9:20-21; Yoh. 13:1-20).”

I bas PJJ-ta sendah iajuk kita gelah melestarikan budaya Karo, khususna budaya Karo si enggo iterangi alu Kata Dibata. Emaka mari radu ras silestariken budayanta janah sipakeken budayanta jadi media er-Berita Si Meriah. I bas konfesi-nta ndai jelas maka i bas kita melestarikan budayanta lit i je unsur-unsur terus menggali, mengembangkan budaya secara positif, kreatif, kritis dan realistis guna kiniulin kalak si enterem. Enda akap kami salah sada bentuk penghormatenta man orang tuanta, e me ngelakoken pedah-pedahna. Dibata si mpengasup kita.