SUPLEMEN PA MAMRE GBKP TGL. 25 - 31 AGUSTUS 2024

Pdt. Larena Sinuhadji (Nd. ReyRapha Tarigan)

Teks : Heber 12:9-17

Tema : BAPA SI NDIDIK JABUNA

Tujun : Gelah Mamre :

1) Meteh uga kin bapa si ndidik erpalasken teks

2) Ngasup ndidik alu mehuli man jabuna

Penaruh

Sada artikel si lit i bas situs eBahana alu judul “Lost Fathers, Lost Sons” nuliskenca bagenda, “Belakangan ini banyak penelitian yang membuktikan bahwa kehadiran ayah dalam kehidupan anak, khususnya anak laki-laki, sangat mempengaruhi pembentukan harga diri dan identitasnya. Anak laki-laki tanpa figur ayah cenderung tumbuh menjadi anak yang sulit. Dia bisa kehilangan pegangan, memberontak, melawan hukum dan berbagai perilaku negatif lainnya. Mereka juga cenderung sulit mengenal Allah sebagai Bapa yang mengasihi mereka. Josh McDowell memaparkan hasil penelitian mengenai pentingnya hubungan yang berarti antara ayah dan putra-putrinya dalam bukunya, “The Father Connection.” Penelitian itu memberi indikasi kuat bahwa hubungan dengan ayah merupakan faktor penting dalam kesehatan, perkembangan dan kebahagiaan seorang anak. Ini tidak berarti bahwa para ibu tidak penting.”

I bas Pustaka Si Badia pe rusur ituriken kerna peran penting perbapan, bahkan Dibata rusur igambarken sebage sekalak Bapa si perkeleng. I bas kesempaten enda radu ras kita erlajar kerna peran penting perbapan i bas mendidik anak-anakna.

Mpebagesi Teks

Surat man kalak Heber isuratken man terpuk kalak Kristen si sangana ngenanami kiniseran si mesangat kel. Si nuratken surat enda ncubaken mpegegehi kiniteken kalak enda alu encidahken maka Yesus Kristus e me ketangkasen Dibata si tuhu-tuhu. Secara khusus i bas bindu 12, ipindoken man kerina kalak si tek si ngogesa gelah tetap megenggeng i bas kiniseran si mesangat janah tetap setia seh ku kedungenna alu natap man Yesus.

Lit dua judul perikop i bas bindu 12 si jadi ogenta sendah. Ay. 9-11 lit iteruh judul “Dibata Bapanta.” Ay. 12-17 lit i teruh judul “Pedah dingen kata pertenget.” Lit perbedaan i bas Alkitab TB-LAI, ay. 1-17 lit i teruh judul “Nasihat supaya bertekun dalam iman.” Ay. 18-29 lit i teruh judul “Tanggung jawab yang berat.” Dua versi enda akap kami banci saling melengkapi i bas kita memahami Kata Dibata. Judul-judul perikop i bas TB-LAI nari encidahkenca konteks kegeluhen perpulungen kalak si tek paksa si e si sangana ngenanami kiniseran si mberat. Sedangken judul i bas terj. Bahasa Karo bage pe BIMK encidahken gambaren Dibata sebage sekalak bapa si ndidik alu erbage-bage perbeben guna kiniulin anak-anak si ikelengina.

I bas ay. 9-10 icidahken penulis Surat Heber maka tanggung jawab sekalak perbapan i bas konteks tradisi kalak Heber (Ibrani - Yahudi) e me ndidik, ngajarken si mehuli man anak-anakna. Bahkan i bas ay. 7-8 ikataken, “Lit kin sekalak anak si la ididik bapana?” Adi sekalak anak la idatkenna didiken arah bapana nari isebut “anak haram.” Ertina i bas ay. 7-10 nari teridah maka peran sekalak bapa i bas mendidik anak-anakna seh kel pentingna. Labo semal i bas tradisi kalak Yahudi perbapan si la ndidik anak-anakna. E maka gambaren Dibata sebage sekalak bapa si bertanggung jawab ndidik anak-anakna e tuhu-tuhu banci iangkai kalak si tek paksa si e. Penulis surat Heber ngajuk perpulungen gelah ngidah kiniseran si ialami secara positif bagi idatkenna didiken arah bapana nari, bage ka si ilakoken Bapa si ni surga nandangi anak-anak si ikelengiNa. La lit didiken si ntabeh. Ceda ate erkiteken didiken Dibata Bapa erbahanca kalak si tek nggeluh rikutken si ngena ate Dibata janah mabai ku kemalemen ate.

I bas ay. 11-17 imotivasi penulis surat Heber perpulungen gelah tuhu ngergai ras ngelakoken kerina pengajaren i bas Dibata Bapa nari alu: tetap semangat, tetap erdalan i bas dalan si pinter gelah malem, tetap ermeriah ukur, tetap nggeluh bagi si ngena ate Dibata, saling mengingatkan gelah ula sempat sekalak pe si surut i bas lias ate Dibata nari, janah saling menjaga sada ras si debanna gelah ula sempat sekalak pe erlagu la mehuli alu la ngergai pengajaren arah Dibata nari. Man ise pe perpulungen si menyerah, bahkan murtad i bas kinitekenna nari man Yesus Kristus, la ialokenna pasu-pasu i bas Dibata nari bage pe kegeluhen si rasa lalap.

Versi Audio silahkan kllik : https://youtu.be/tqKcs2KZKtE

Pengkenaina

PA-ta sendah ngajuk kam kerina Mamre gelah jadi perbapan si mediate nandangi masa depan anak-anakna alu nehken pengajaren-pengajaren si mehuli erpalasken kiniteken man Dibata i bas Yesus Kristus. Ogenta sendah mulihi ngingetken kam kerina Mamre maka Dibata si perkeleng e igambarken alu sekalak bapa i bas tradisi kalak Yahudi si mediate nandangi masa depan anak-anakna. Gambaren enda harus tetap ipertahanken alu mereken teladan si mehuli. Adi lang, tentu gambaren Dibata si perkeleng e labo iangkai anak-anakta sebab la lit gambaren si mehuli kerna sekalak bapa si perkeleng i bas kegeluhenna.

Ogenta sendah mereken teladan man bandu kerina Mamre kerna bentuk-bentuk pengajaren si banci isehkenndu man anak-anak bage pe man kerina isi jabu. Erdahin alu tutus guna memenuhi kebutuhen jabu e me salah sada bentuk pengajaren si mehuli man anak-anak. Tapi tentu iarapken labo ngadi seh je saja. Menjalin komunikasi si mehuli man anak-anak ras isi jabu pe perlu sipelajari gelah pedah-pedah si mehuli pe banci isehken alu mehuli. Mereken pujian, mereken motivasi, mereken semangat, ngingetken erbage-bage hal si mehuli, rsd.-na. Mereken teladan si mehuli i bas pengerana, i bas perbahanen, i bas kam kerina mengelola masalah, i bas erbakti, melayani i Gereja, i bas ngoge Pustaka, i bas ertoto, rsd. I bas si e tentu harus nggit kam kerina Mamre kami erlajar kai pe si mehuli i bas metode mendidik anak bage pe isi jabu, khususna erlajar kerna nggeluh erkiniteken man Dibata i bas Yesus Kristus.

I bas si e kerina pindolah gegeh i bas Dibata nari gelah ipengasup Dibata kam kerina alu KesahNa Si Badia, jadi perbapan si beluh mendidik anak-anak bage pe kerina isi jabu sue ras peraten Dibata. Gelah terbentuk pagi generasi si tangguh guna memuliaken gelar Dibata.