SUPLEMEN PJJ GBKP TGL. 18 - 24 AGUSTUS 2024

Pdt. Larena br. Sinuhadji (Nd. ReyRapha Tarigan)

PADAN DIBATA GUNA KINIULIN TINEPA-NA (Kejadin 9:8-17)

[Krisis Ekologi & Pangan]

Penaruh

Syalom labo terjeng salam si rusur sibelasken kita. I bas kiniteken kalak Israel, syalom e erkaiten ras damai sejahtera si terwujud arah mehulina relasi antara manusia ras Dibata, manusia ras manusia, bage pe manusia ras alam sekelewetna. Adi mehuli saja relasinta ras Dibata, damai sejahtera e lenga terwujud. Adi mehuli saja hubungenta ras Dibata bage pe ras sesama manusia, damai sejahtera pe lenga terwujud. Harus teluna relasi si mehuli e ilakoken, ras Dibata, ras sesama manusia bage pe ras alam sekelewetta. Cuma si rusur isingetken i bas geluhta si tep-tep wari e me relasi si mehuli ras Dibata bage pe ras sesama manusia ngenca. Mehuli ras alam biasana jarang isingetken. Padahal situhuna adi merawa alam sekelewetta la kita banci nggeluh alu dame.

I bas kesempaten enda radu ras kita mulihi erlajar kerna krisis ekologi ras pangan erpalasken kinitekenta selaku kalak Kristen rikutken ogenta sendah.

Mpebagesi Ogen

Turi-turin kerna Nuah, bahtera, ras banjir si mbelin akap kami enggo rusur sibegiken entah pe sioge kitik-kitik nari. I bas jamanna Nuah ngenca ras keluargana si mehuli, la lit kesalahenna, ras erdalan i bas dalan Tuhan. Sementara kerina kalak si deban tuhu-tuhu jahat i lebe-lebe Dibata, janah i japa pe terjadi kejahaten. Erkiteken si e isasapken ras ikernepken Dibata kerina manusia paksa si e alu banjir si mbelin. Nuah ras keluargana si selamat i bas banjir si mbelin ndai ras piga-piga rubia-rubia si bengket ku bas kapal sue ras perentah Dibata. Kenca enggo keri banjir si mbelin ndai, Dibata erbahan perpadanen ras Nuah. Ogenta sendah nuriken kerna perpadanen si ibahan Dibata man manusia ras isi doni enda.

Judul perikop i bas ogenta sendah e me “Dibata erbahan perpadanen ras Nuah.” Adi sioge benaken ay. 1 nari, lit pembaharuan perpadanen antara Dibata ras manusia bagi si enggo ilakoken i bas Kejadian bindu 1. Si pemena lebe padan pasu-pasu man Nuah gelah ia ras kesusurenna ertambah-tambah ndemi doni enda (ay. 1,7). Si peduaken lit tugas man Nuah ras kesusurenna guna mengelola kerina rubia-rubia ras sinuan-sinuan alu mehuli (ay. 2-3). Si peteluken, isingetken ka mulihi man Nuah maka manusia ijadiken seri ras Dibata, si jadi tekanen i jenda e me kerna ngergaken kesah kegeluhen si enggo ibereken Dibata (ay. 4-6).

Si jadi ogenta sendah e me padan si mbaru man Nuah ras kesusurenna, bage pe man kerina si nggeluh kenca banjir si mbelin ngadi. Inti perpadanen e, asa ndigan pe lanai icedaken Dibata kerina si nggeluh alu banjir. Tandana maka tuhu-tuhu tetap padan si ibahan Dibata e me itamaken Dibata bentehaNa i bas embun. Adi teridah benteha e, iinget Dibata perpadanenNa man kerina isi doni enda maka banjir si mbelin lanai ndigan pe encedaken kerina si nggeluh i doni enda.

Benteha entah pelangi, piga-piga kali isebutken i bas Pustaka Si Badia: Kejadin 9:13; Esekiel 1:28; Ketangkasen 4:3; 10:1, e me lambang kesetian Dibata nandangi padanNa, janah sebage jaminen maka kerina janji Dibata e pasti igenepi. I bas Kamus Alkitab si lit i bas situs Alkitab SABDA nari, ikataken maka, “Tidak ada kata Ibrani yang khusus untuk pelangi. Yang dipakai ialah kata yang lazim untuk busur (Ibr. qesyet - Yun. iris). Kej. 9:13,15 mengatakan bahwa busur Allah ditaruh di awan sebagai tanda perjanjianNya dengan Nuh, bahwa Allah tidak akan lagi membinasakan dengan air bah. Makna pelangi ini adalah, apa yang biasanya merupakan alat perang dan lambang balas dendam, menjadi lambang perdamaian dan kemurahan hati. Pelangi ditaruh di awan-awan melawan badai dan awan hitam. Busur Allah diubah menjadi pelangi oleh sinar matahari kemurahan hati dan berkat Allah. Allah berada dalam perdamaian dengan umat perjanjianNya.”

Padan Dibata enda seh asa gundari relevan denga, amin pe melala bencana banjir mbelin si terjadi secara geologis, tapi lenga lit si dampakna engkernepken kerina isi doni enda. Tek kita maka Dibata masih erdahin guna kiniulin doni enda (Mat. 6:30; Yoh. 5:17; rsd.). Si jadi penungkunen, apakah kita manusia turut mendukung padan Dibata nandangi doni enda ras kerina isina? Entah sebalikna, kita manusia si erbahanca doni enda reh cedana.

Versi Audio silahkan klik : https://youtu.be/Pp-qjqs38F4

Pengkenaina

PJJ-ta sendah i bas rangka mpersingeti kita mulihi kerna tugas tanggung jawabta guna njagai doni enda ras kerina isina bagi si enggo itugasken Dibata man banta. Tema kerna lingkungan hidup akap kami enggo rusur sibahas setiap tahun i bas PJJ bage pe PA-PA Kategorial. Janah tema i bas tahun pelayanan GBKP 2022 e me “Kreatif merawat lingkungan.” Tentu jadi penungkunen evaluatif man banta kerina, enggo seh i ja kepedulianta nandangi kerusakan lingkungan, baik secara pribadi bage pe secara kelembagaan, sektor-sektor nari, rikutken kategorial, terus seh ku moderamen? Tema tahun pelayanen 2022 memang enggo lewat, tapi 

Kerusakan ekologis enda enggo rusur sisingetken lembaga-lembaga dunia si peduli nandangi kerusakan lingkungan. Umpamana, i bas sada literatur ituriken maka iprediksiken i bas tahun 2050 jumlah penduduk i doni enda enggo mencapai 9,5 miliar, i ja terjadi krisis ekologi si parah si iistilahken alu “point of no return” e me alam enda enggo lanai banci erproduksi menghasilken kerina kebutuhen geluh manusia erkiteken enggo melala mata rantai ekosistem si enggo ceda, bene, ras enggo lanai banci erfungsi alu mehuli. Janah doni enda pe enggo lanai ngasup healing mpelimbarui dirina sendiri (Graham Turner, A Comparison of the Limits to Growth with Thirty Years of Reality, 2008). Kinata si bagenda terjadi erkiteken jumlah populasi manusia si semakin meningkat alu pola konsumtifna si la mperdiateken kelestarian lingkungen alam, bage pe eksploitasi besar-besaran nandangi alam semesta enda guna keuntungen materi pihak-pihak tertentu. Hal enda tentuna arus jadi keprihatinenta sekaligus mendorong kita guna ngelakoken tindaken-tindaken si nyata guna mengantisipasi bencana ekologis enda alu palas kinitekenta si mbages man Dibata.

Kekristenan secara umum pe enggo er-ekoteologi. Ekoteologi e me refleksi entah pe perenungen si mbages kerna Dibata si mada kerina tinepa si jadi palas kinitekenta i bas kita menatakelola kiniulin entah pe kelestarian lingkungen alam tinepa Dibata si akhir-akhir enda nandangi ceda total (krisis ekologi). I bas GBKP pe enggo lit Konfesi GBKP si ngerana kerna Ciptaan bagi si enggo ijelasken i bas Buku PJJ-ta. Tapi memang harus siakui maka lenga lit geraken si berdampak signifikan i bas kita nari guna menanggulangi krisis ekologi ras pangan si terjadi. Memang adi bencana geologis, hanya kuasa Dibata si banci mpengadisa. Tapi adi bencana ekologis, tanggung jawabta guna menanggulangisa. Emaka mari radu ras kita ertoto gelah ipengasup Dibata kita guna ikut muat bagin i bas menanggulangi bencana ekologis ras krisis pangan si terjadi i sekelewetta.