SUPLEMEN PJJ GBKP TGL. 11 - 17 AGUSTUS 2024

Pdt. Larena br. Sinuhadji (Nd. ReyRapha Tarigan)

TUHAN SI PERKUAH NGAJARI KITA - Jesaya 30:19-26

[HUT RI si pe-79-ken]

Penaruh

Mereken pengajaren man kalak si deban labo hal si murah, e maka lit kuan-kuan si ngatakenca “Guru adalah pahlawan tanpa tanda jasa.” Engkai makana guru iperseri ras pahlawan? Erkiteken tugas mengajar e me tugas si mulia tapi labo murah, sebab melala tantangen si harus ihadapi sekalak guru. I bas geluhta si tep-tep wari pe maun-maun kisat kita ngajari anak-anakta i rumah erkiteken rusur la ibegikenna pengajarenta. Bahkan lit ka anak-anakta si rawan asangken kita adi ipersingeti. E maka melala orang tua si mengandalken sekolah ras gereja guna ngajari anak-anakna, padahal situhuna sekolah pertama dan utama adalah rumah, guru pertama dan utama adalah orang tua.

I bas kesempaten enda erlajar kita kerna perkuah ate Dibata si jadi palas i bas Dibata ngajari kita anak-anakNa.

Mpebagesi Ogen

Ogenta sendah masuk ku bas bagin si pemena kitab Jesaya, bindu 1 seh 39. Secara ringkas bagenda turi-turin i bas bagin enda. Paksa si e kerajan Juda lit i bas ancamen kerajan Assur si megegeh. Ieteh Jesaya maka ancamen si tuhu-tuhu nandangi kegeluhen kerajan Juda labo kerajan Assur ngenca, tapi dosa bangsa e jine, sebab bangsa e la erkemalangen nandangi Dibata, janah kurang kinitekenna man Dibata. Arah kata ras perbahanenna, Nabi Jesaya ngajuk bangsa e ras pemimpin-pemimpinna, gelah nggeluh bagi si ngena ate Dibata janah ndalanken kebujuren. Ipersingetinna bangsa e maka adi la ia nggit megiken Kata Dibata ugapa pe bangsa e dat cilaka janah kernep. Tole inubuatken Jesaya maka lit me pagi paksana doni enda jadi dame, tupung kerehen sekalak kesusuren Daud si jadi raja si lanai kel lang-lang ulina.

Sope perikop si jadi ogenta sendah (ay. 1-7), ituriken maka lebih iandalken pemimpin-pemimpin Juda kerajan Mesir asangken kuasa Dibata i bas menghadapi ancamen kerajan Assur. Pemimpin-pemimpin bangsa e lawes ku Mesir alu la nungkun lebe man Dibata, janah ijadikenna kerajan Mesir jadi sekawalna. Labo terjeng je saja, i bas ay. 8-18 ituriken maka bangsa e tuhu-tuhu la patuh nandangi Dibata. Rusur ngelawan Dibata, rusur erguak, janah la nggit megiken pengajaren Dibata. Isuruhna nabi-nabi gelah ula ngerana kerna kebenaren. Tapi keleng ate Dibata la erkeri-kerina nandangi bangsa Israel. I bas ay. 18 ikataken, “Amin bage gia, TUHAN ertima-tima lako nehken perkuah ateNa man bandu. Katawari pe IA sikap nehken perkuah ateNa man banndu sebab katawari pe IA ngelakoken si bujur. Malem me ate kalak si ernalem man TUHAN.”

Perikop si jadi ogenta sendah lit i teruh judul “Ipasu-pasu Dibata me bangsaNa.” I bas terj. TB-LAI “Janji keselamatan bagi Sion.” I bas perikop enda ituriken maka lit paksana maka Dibata nehken pasu-pasuNa nandangi bangsa si ikelengiNa. Tapi harus lit je peran bangsa Israel, i bas ay. 19 ikataken, “TUHAN perkuah kap, e maka adi tangis kam man baNa mindo penampat, ialoiNa nge kam.” Harus lit kesadaren maka bangsa e butuh penampat i bas Dibata nari, janah pindolah penampat e man Dibata alu meteruk ukur. I bas ay. 20-22 ituriken maka harus lit i bas diri bangsa e kininggiten guna iajari janah lit kepatuhen guna ngelakoken Kata Dibata. Adi mindo bangsa e man Dibata alu meteruk ukur penampat i bas Dibata nari, nggit bangsa e iajari, janah patuh bangsa e man pengajaren Dibata, maler pasu-pasu Dibata ku tengah-tengah bangsa e. I bas ay. 23-26 ituriken uga belinna pasu-pasu Dibata nandangi bangsa si ikelengiNa. 

Adi sikaitken ras tema PJJ-ta sendah, banci ikataken kemerdekaan seutuhnya tuhu-tuhu inanami masyarakat Juda adi lit kiniteruken ukur, kininggiten erlajar Kata Dibata, ras kepatuhen guna ngelakokenca. I bas dampar si deban, tentu iarapken Dibata gelah bangsa e tuhu-tuhu mpergunaken kemerdekaan si enggo ialokenna alu ngelakoken kerina si jadi peraten Dibata.

Versi Audio silahkan klik : https://youtu.be/-SGAynHmAL0

Pengkenaina

PJJ-ta sendah i bas rangka menyambut HUT Kemerdekaan RI si pe-79-ken. Ngataken bujur kita man Dibata erkiteken enggo iarak-arakNa bangsa Indonesia mentasi erbage-bage keadaan kidekah 79 tahun kemerdekaan. Tek kita maka kemerdekaan si tep-tep tanggal 17 Agustus iperingeti e me erkiteken perkuah ate Dibata nandangi bangsa Indonesia. Melala denga si man pekenan i bas bangsa ras negaranta enda, erkiteken lenga kerina masyarakat Indonesia ngenanami kemerdekaan seutuhnya. Melala denga masyarakat si berjuang keluar dari kemiskinan. Melala denga masyarakt si lenga idatkenna hak-hakna selaku warga negara, khususna kaum minoritas si lenga merdeka i bas beribadah sue ras kinitekenna. I bas si e terus kita ertoto gelah i bas paksana pagi la lit nari masyarakat Indonesia si lenga merdeka i bas kemiskinan ras diskriminasi nari. Janah i bas dampar si deban tetap kita berjuang mengisi kemerdekaan alu hal-hal si mehuli, positif, ras membangun, gelah tetap kita jadi saluren pasu-pasu man sekelewetta.

I bas ogenta sendah, kemerdekaan lit kaitenna ras responta nandangi perkuah ate Dibata man banta. Tek kita maka kemerdekaan e me pasu-pasu (berkat) i bas Dibata nari. Tapi pasu-pasu e labo bage-bage saja ialoken kita, lit respon si harus ilakoken kita. I bas kesempaten enda erlajar kita arah pengalamen bangsa Israel i bas jaman Nabi Jesaya. Iajuk kita gelah, si pemena, menyadari keterbatasenta, e maka alu meteruk ukur pindolah gegeh ras kengasupen i bas Dibata nari gelah tuhu-tuhu ngergai perkuah ate Dibata si enggo ialoken kita. Si peduaken, nggit kita erlajar Kata Dibata, gelah semakin mbages kerina si jadi peraten Dibata i bas kegeluhenta. Jadilah kita kalak si murah guna iajari Kata Dibata. Si peteluken, patuhlah kita nandangi kerina pengajaren Dibata alu ngelakoken kerina si jadi peraten Dibata i bas kegeluhenta si tep-tep wari. I bas si e tentu labo kita ngasup adi siandalken gegeh beluhta. E maka pindolah rusur gegeh, kengasupen i bas Dibata nari gelah ipegegehiNa ras ipengasupNa kita mengisi kemerdekaan alu mehuli. Dibata si mpengasup kita.