SUPLEMEN PJJ GBKP TGL. 25 - 31 AGUSTUS 2024

Pdt. Larena Sinuhadji (Nd. ReyRapha Tarigan)

NGENA ATE DIBATA DINGEN IERGAKEN MANUSIA

Roma 14:13-18 [Erguna Ersaksi I Bas Budaya Karo]

Penaruh

I bas kalak Jawa lit budaya “tepa salira.” I bas google nari ikataken maka tepa salira merupakan salah satu filosofi kebudayaan Jawa yang menitikberatkan pada sikap toleransi menjaga perasaan orang lain bahkan berusaha membantu permasalahan yang dihadapi orang lain agar tertuntaskan. Tepa salira enda menam seri ras “tenggang rasa.” I bas KBBI nari tenggang rasa adalah sikap dapat menghargai dan menghormati perasaan orang lain. I bas sada sisi budaya tepa salira ras tenggang rasa enda mehuli. Tapi i bas sisi si deban budaya enda erbahanca kalak labo pang ngatakenca si benar demi menjaga perasaan kalak si deban. Piah dungna sinik saja ia ‘di kenca lit si la benar i tengah-tengah lingkungena.

I bas kesempaten enda radu ras kita erlajar kerna kai saja si harus ilakoken gelah ngena ate Dibata janah iergaken manusia erpalasken ogen.

Mpebagesi Ogen

Lit dua judul perikop i bas bindu 14, si pemena ay. 1-12 “Ula salahken temanndu si sada kiniteken. I bas terj. TB-LAI nina “Jangan menghakimi saudaramu.” Si peduaken ay. 13-23 “Ula bahan kitik ukur temanndu si sada kiniteken.” I bas terj. TB-LAI nina, “Jangan memberi batu sandungan.” Dua judup enda lit i bas konteks si seri. Konteks paksa si e, enterem kalak Yahudi Kristen si lenga banci nadingken aturen-aturen agama Yahudi, umpamana bagi mentingken wari-wari tertentu (ay. 5, rsd.), bage pe kerna mantangken pangan-pangan tertentu. Sementara kalak Kristen si labo kalak Yahudi kebalikenna, la lit pantangen i bas wari-wari bage pe pangan-pangan. Erkiteken si e terjadi perjengilen i tengah-tengah perpulungen paksa si e. Kelompok Yahudi Kristen nyalahken kelompok si labo Yahudi, sedangken kebalikenna, kalak si labo Yahudi bagi isengajakenna man ras minem kai pe i lebe-lebe kelompok Yahudi Kristen.

Adi rikutken kiniteken Kristen, memang labo lit kai pe jadi pantangen kerna pangan bage pe inemen bagi nina Rasul Paulus i bas ay. 14a, “Sue ras si iajarken Tuhan Yesus kueteh dingen tek aku maka labo lit pangan si biak man pantangenken.” Tapi persoalenna, erkiteken si e, terjadi pola relasi si la mehuli antara kalak Kristen Yahudi ras kalak Kristen si labo Yahudi i tengah-tengah Gereja Roma paksa si e. Lit komunikasi si enggo lanai mehuli erkiteken sisalah-salahen, entah pe saling menghakimi, sada ras si debanna erkiteken pangan-pangan. Kelompok si sada jadi batu antuken man kelompok si deban, bage pe sebalikna.

Emaka i bas ogenta sendah, ipersingeti Rasul Paulus perpulungen gelah saling menghargai ras saling mendukung erpalasken keleng ate Kristus. Perpulungen si enggo banci ngelakoken kiniteken Kristen erkaiten ras pangan inemen, harus nggit mendampingi ras membimbing perpulungen si merampek denga kinitekenna (ay. 1). Sebalikna, perpulungen si merampek denga kinitekenna pe harus nggit ia erlajar, erpala-pala nadingken gaya hidup si ndekah alu njadiken Yesus Kristus sebage si utamana. Secara praktis si harus ilakoken perpulungen paksa si e, untuk sementara ula lebe lit pangan inemen si ipantangken perpulungen si merampek denga kinitekenna. Lit si lebih penting asangken pangan inemen, e me kap, perbahanen si mehuli si maba kemalemen ate ras keriahen (ay. 17), perbahanen si erbahanca ngena ate Dibata ras iergaken manusia (ay. 18), bage pe perbahanen si erbahanca kalak tetap nggeluh alu dame ras mpeteguhi kiniteken (ay. 19).

Si e lah kerina siutamana si harus ilakoken i bas konteks Gereja Roma paksa si e, gelah perpulungen si merampek denga kinitekenna lit ruang i bas ia guna berproses mpeteguhi kinitekenna man Dibata i bas Yesus Kristus. Sementara perpulungen si deban pe lit kepedulian i bas ia guna mendukung pertumbuhan iman perpulungen si merampek denga kinitekenna. Sebab nina Paulus, “Sekalak pe kita enda labo nggeluh guna dirinta saja” (ay. 7a).  

Versi Audio silahkan klik : https://youtu.be/8rgvo57drLU

Pengkenaina

Ogenta jelas ngajuk kita gelah saling menghargai ras saling mendukung pertumbuhan iman sapih-sapih perpulungen, sebab labo seri pertumbuhan iman kerina perpulungen. Lit si merampek denga kinitekenna, amin pe enggo puluhen tahun jadi kalak Kristen. Lit si enggo bertumbuh dewasa kinitekenna, si banci sigejapken arah perukuren, pengerana bage pe perbahanenna. Labo lit i bas ia pencitraan, gelah teridah mehuli, tapi tuhu-tuhu tulus kerina pengkebet geluhna ncidahken kinitekenna man Yesus Kristus.

Tema i bas PJJ-ta sendah akap kami ibuat i bas ay. 17-18 nari. I bas terj. TB-LAI Ed. II ikataken nina, “Sebab, Kerajaan Allah bukanlah soal makanan dan minuman, tetapi soal kebenaran, damai sejahtera, dan sukacita oleh Roh Kudus. Sebab, siapa saja yang melayani Kristus dengan cara ini, ia menyenangkan hari Allah dan dihormati oleh manusia.” Jelas i jenda iajuk kita gelah ngelakoken si benar sue ras Kata Dibata, janah pengkebet geluhta pe maba dame ras keriahen man sekelewetta. Guna si e sipindolah gegeh i bas Kesah Si Badia nari sebab labo murah ngelakoken si ngena ate Dibata ras iergaken manusia. Bagi si enggo isingetken i bas bagin penaruh i datas, rusur kita pe sinik adi erkaiten ras si benar sue ras Kata Dibata. Labo pang kita ngingetkenca alu alasen pembenaran untuk menjaga perasaan orang lain. Perbahanen si bagenda akap kami labo payo. Sebab melala cara si banci silakoken kita dalam rangka menyatakan yang benar sue ras Kata Dibata. 

PJJ-ta sendah lit i teruh sub judul, “Erguna ersaksi i bas budaya Karo.” Kerna budaya Karo akap kami enggo radu ras sepakat kita maka kinitekenta man Dibata i bas Yesus Kristus mpelimbarui budaya Karo. Ertina jelas i jenda, kiniteken man Dibata i bas Yesus Kristus si utamana i bas kita er-budaya Karo. Emaka labo kerina budaya Karo tading-tadingen nini bulangta ndube sipakeken. Melala contoh-contoh si enggo ibahas i bas Buku PJJ-ta. I bas kesempaten enda banci sitambahi kami arah Buku Katekisasi nari kerna sikap positif, kritis, ras realistis erkaiten ras budaya Karo (hlm. 104-105).

Si pemena, bersikap positif maksudna gelah ula lit i bas kita sikap anti entah pe alergi budaya Karo sope tuhu-tuhu sipelajari alu mbages budayanta. I bas si e iajuk kita gelah nggit kita erlajar budaya Karo alu mbages. Si peduaken, bersikap kritis maksudna, pang kita nulak unsur-unsur budaya si la sue ras Kata Dibata entah pe kiniteken Kristen. I bas si e iajuk kita gelah tuhu-tuhu erlajar alu mbages kerna pokok-pokok iman Kristen i bas konteks Gerejanta GBKP. Si peteluken, bersikap realistis, maksudna nggit kita ipelimbarui gelah arah budaya Karo si ilestariken kita tetap relevan janah ilakoken guna kemulian gelar Dibata.