SUPLEMEN PA MAMRE GBKP TGL. 11 - 17 AGUSTUS 2024

Pdt. Larena br. Sinuhadji (Nd. ReyRapha Tarigan)

HUT KEMERDEKAAN RI Ke-79

Teks : 1 Petrus 2:11-17

Tema : NGGELUH BAGI KALAK BEBAS

Tujun : Gelah Mamre :

1) Ngantusi erti uga kin nggeluh bagi kalak bebas erpalasken ogen

2) Ngasup nggeluh bagi kalak bebas bagi si ngena ate Tuhan

Penaruh

Lit telu kemungkinen si ilakoken kalak si bebas, si pemena bebas ngelakoken kai pe sue ras sura-surana. La peduli uga kalak si deban si penting seh sura-surana. Si peduaken, la peduli nandangi kebebasen si lit i bas ia, makana geluhna pasif, kem saja, la ngelakoken kai pe. Si peteluken, kalak si mpergunaken kebebasen si lit i bas ia guna kiniulin dirina bage pe kiniulin kalak si deban. I bas si e tentu isedarina maka kebebasen si lit i bas ia lit batasna. Adi sikaitken ras kiniteken Kristen, kebebasen e me kesempaten guna erbahan si mehuli sue ras peraten Dibata guna kemulian gelar Dibata.

I bas kesempaten enda radu ras kita erlajar kerna nggeluh bagi kalak bebas i bas konteks mengisi kemerdekaan.

Mpebagesi Teks

Tujun surat Rasul Petrus si pemena enda e me mpegegehi ukur perpulungen si merap i belang-belang bagi utara Asia Kitik, si ngenanami erbage-bage kiniseran, erkiteken kinitekenna man Kristus. E maka guna si e, Rasul Petrus ngingetkenca maka ula sempat bene pengarapenna, sebab pengarapen si lit i bas Yesus Kristus labo pengarapen si palsu, tapi pengarapen si tuhu-tuhu, sebab Yesus Kristus enggo keke i bas si mate nari, nangkih ku surga, janah pasti reh me IA si peduakaliken i bas paksaNa pagi ku tengah-tengah doni enda. Erkiteken si e la banci lang iajuk perpulungen gelah megenggeng i bas ngalaken kiniseran si mberat si nialamina, sebab kiniseran e sada pengujin nandangi kinitekenna si sejati. Man ise pe si megenggeng pasti ngaloken pemere asum warina Yesus Kristus ipetangkas. Janah iajuk Petrus perpulungen gelah i bas paksa kesusahen pe tetap nggeluh sue ras kalak si enggo jadi sikerajangen Kristus.

Judul perikop i bas ogenta sendah e me “Suruh-suruhen.” I bas terj. TB-LAI nina, “Peringatan untuk hidup sebagai hamba Allah.” Judul perikop i bas terj. TB-LAI nari akap kami lebih tangkas menggambarken kai si jadi isi perikop ogenta sendah. Konteks kegeluhen kalak si tek paksa si e tuhu-tuhu mberat, sebab i bas sada sisi harus ngalaken kiniseran si mberat arah darat nari. I bas si e perpulungen iajuk gelah megenggeng, tetap paguh erkiniteken. I bas sisi si deban, perpulungen pe harus bergumul i bas dirina sendiri. Sebab kualitas kiniteken perpulungen paksa si e labo seri. Lit si enggo tuhu-tuhu bertumbuh kinitekenna, erbuah meramis. Lit denga ka si lenga bertumbuh, sura-sura kedagingen si masih mendominasi i bas kegeluhenna.

E maka i bas perikop enda, iajuk Rasul Petrus perpulungen gelah ula ngikutken kininggiten daging si rusur erperang ras tendi tapi ikutkenlah sura-sura Dibata. Kai saja si jadi sura-sura Dibata? Rikutken ogenga sendah: 1) Mehuli lagu langkahna i tengah-tengah kalak si lenga nandai Dibata. 2) Patuh ras mehamat nandangi kerina pemerentah si lit sue ras tingkatenna. 3) Nggeluh bagi kalak bebas, tapi ula bahan kebebasen si lit guna ngelakoken kejahaten. 4) Mehamat man kerina manusia. Engkelengi teman si sada kiniteken. 5) Erkemalangen man Dibata. Secara khusus si jadi fokusta i bas PA-ta sendah e me ay. 16, “Nggeluhlah bagi kalak bebas; tapi ula bahan kebebasenndu nutupi si jahat, tapi nggeluhlah bagi budak Dibata.” I bas terj. TB-LAI Ed. II nina, “Hiduplah sebagai orang merdeka dan jangan menyalahgunakan kemerdekaan itu untuk menyelubungi kejahatan-kejahatan, melainkan hiduplah sebagai hamba Allah.”

Antusen ay. 16 enda, si pemena, merdeka i jenda lit kaitenna ras kuasa dosa, jadi kemerdekaan i jenda maksudna bebas i bas kuasa dosa nari (bdk. Roma 6:22). Kontras ras kalak si lenga itandaina kebenaren Dibata i bas Yesus Kristus ras si masih denga nggeluh i bas belenggu kuasa dosa (bdk. Yoh. 8:32). Si peduaken, merdeka identik ras bebas ngelakoken kai pe. Bebas si bage rupana e seri ras konteks geluh ratana masyarakat paksa si e, si memang geluhna ikuasai dosa. Emaka kai pe ilakokenna sue ras hasratna, bagi penganut filsafat hedonis. Janah lit ka si menganut ajaren gnostik si membedaken antara kula ras kesah. Kai pe si ilakoken kula entah pe fisik la lit kaitenna ras kesah entah pe roh. Adi mate pe pagi, kesah tetap ku surga, sedangken kula tading bas taneh. Emaka ilakokenna kerina si jadi kerincuhen kula. I bas si e Rasul Petrus mpersingeti “Ula kebebasenndu nutupi si jahat” (bdk. Gal. 5:13).

Versi Audio silahkan klik : https://youtu.be/h6dR5D26JrI

Pengkenaina

PA-ta sendah i bas rangka mperingeti HUT Kemerdekaan RI si pe-79-ken. Ngataken bujur kita man Dibata erkiteken perkuah ateNa, enggo imerdekaken bangsa Indonesia i bas penjajahen nari 79 tahun si lepas. Janah enggo iarak-arak Dibata bangsa Indonesia mentasi erbage-bage pergumulen kidekah 79 tahun. Si jadi penungkunen i bas si e, enggo kin sipergunaken kemerdekaan e alu mehuli? Jawabenna lenga, adi sikaitken ras kebijaken-kebijaken si lit. Sebab melala denga masyarakat Indonesia si lenga bebas i bas belenggu kemiskinan. Melala denga masyarakat Indonesia si lenga ngaloken hak-hakna selaku warga negara, khususna man banta si minoritas si lenga banci beribadah alu sikap. Melala denga kekurangen si deban si lit i sekelewetta. I bas si e marilah kita radu ras ertoto, mindo gelah ipengasup Dibata kerina pemimpinta mewujudkan keadilan ras kesejahteraan man kerina masyarakat Indonesia. I bas dampar si deban, marilah sipergunaken kesempaten si lit guna ngelakoken si mehuli sue ras peraten Dibata, jadi pasu-pasu man kalak si deban. Enda akap kami si harus ilakoken guna mengisi kemerdekaan.

I bas PA-ta sendah, iajuk kam kerina Mamre kami gelah nggeluh bagi kalak si bebas merdeka. Bebas merdeka i jenda rikutken ogenta sendah e me bebas i bas kuasa dosa nari. Enda akap kami sada hal si harus terus siperjuangken seh kita kerina nadingken doni enda. Amin pe kerina kita enggo ngaloken keselamaten i bas Yesus Kristus, tapi dosa erkuasa denga i tengah-tengah doni enda. Bagi ikatakan Rasul Petrus, kuasa dosa e bagi singa si gawah-gawah ku jah ku je, erngaung ndarami si man jergemenna (1 Pet. 5:8). E maka i bas si e kerina kita harus metenget nandangi kuasa dosa si lalap menggoda kita 24 jam sada wari. Rasul Petrus ngatakenca sue ras ogenta sendah, “Nggeluhlah bagi budak Dibata.” Ertina pindolah gegeh setiap saat man Dibata gelah ipengasupNa kam kerina Mamre nggeluh sue ras peraten Dibata.