SUPLEMEN PA MORIA GBKP TGL. 1 - 7 SEP. 2024

Pdt. Larena Sinuhadji (Nd. ReyRapha Tarigan)

HUT PERMATA GBKP

Si Man Ogen : 1 Samuel 16:1-13

Tema : NGUDA TAPI MEHERGA

Tujun : Gelah Moria :

- Niksiki perdalanen pemilihen Daud jadi raja i bas kiningudanna

- Mbiasaken perbahanen ras pengidah si seri nandangi anak-anak

Metode PA : Curah Pendapat & Aksi

Penaruh

I bas sada artikel ituriken lit gelar-gelar generasi (gen) erpalasken tahun ketubuhenna. Si tubuh tahun 1946 - 1964 isebut Generasi Baby Boomers. Si tubuh tahun 1965 - 1976 isebut Generasi X. Si tubuh i bas tahun 1977 - 1994 isebut Generasi Y. Si tubuh i bas tahun 1995 - 2010 isebut Generasi Z. Si tubuh i bas tahun 2011 - 2025 isebut Generasi Alpha. Tep-tep generasi lit karakteristikna masing-masing. Adi rikutken tahun ketubuhen enda ndai, generasi muda GBKP khususna si enggo PERMATA, termasuk ku bas kategori Gen Z. Kai saja si jadi karakteristik Gen Z? Kari sibahas terdauhen.

I bas PA-ta sendah radu ras kita erlajar kerna pendampingan man generasi muda erpalasken si man ogenta. Janah i bas PA-ta sendah radu ras kita menyambut HUT PERMATA generasi penerus GBKP.

Mpebagesi Si Man Ogen

Si man ogenta sendah akap kami enggo semal sioge entah pe sibegiken turi-turinna, e me kerna proses pilihen Dibata man Daud anak Isai si bakal gantiken Saul jadi raja Israel. Lit 10 anak Isai rikutken 1 Kron. 2:13-16, si dilaki e me Eliap, Abinadap, Sammah, Natanael, Radai, Osem, teruhen Osem si la isingetken gelarna, ras Daud. Si diberu e me Seruya ras Abigail. Sue ras si enggo iperentahken Dibata man bana, berkat Samuel ku Betlehem guna ndahi Isai sebab enggo ipilih Dibata sekalak anak Isai guna jadi raja Israel. Isai ras anak-anakna si dilaki (kecuali Daud) itenahken ku bas lakon persembahen. Mungkin tersungkun-sungkun Samuel i bas pusuhna, anak si apai si ipilih Dibata e? Erkiteken melala kepeken anak Isai si dilaki. I bas pengakap ras pengidah Samuel anak Isai sintua si bakal ipilih Dibata. Mungkin erkiteken Eliap (ras dua teruhenna) termasuk i bas anggota pasuken raja Saul (bdk. 1 Sam. 17:13). Janah adi sioge ay. 7 banci sibayangken uga tampilen fisik Eliap enda, gedang ras mejile rupana. Tapi seh ku anak Isai si pepituken, “Labo ia si Kupilih”, nina Dibata. Emaka nungkun Samuel man Isai, “Lit denga tole anakndu?” Lit denga kepeken anakna si nguda si tergelar Daud sangana ermakan biri-biri. E maka isuruh Isai kalak ngelegisa. Daud sekalak anak perana si mejile, sehat, janah matana pe mejile. Nina TUHAN man Samuel, “Enda me kalakna, tangkuhkenlah ia!” Ibuat Samuel minak saitun je nari iminakina Daud. Rempet Daud ikuasai Kesah TUHAN janah mulai i bas wari e nari Kesah e tetap ras ia.

Adi sisungkun engkai maka Daud si ipilih Dibata? Tentu hanya Dibata si metehsa. Tapi i bas ogenta sendah pe banci siidah kai saja kira-kira si jadi alasen maka ipilih Dibata Daud jadi raja nggantiken Saul. Si pemena lebe ay. 7, ikataken je nina, “Adi manusia inehenna si teridah arah darat, tapi Aku Kupernehen pusuhna.” I bas terj. TB-LAI nina, “manusia melihat apa yang di depan mata, tetapi TUHAN melihat hati.” Engkai maka pusuh? Pusuh entah pe hati terjemahen i bas bhs. Ibrani nari “lev” entah pe “levav” (bhs. Yunani “kardia”) e me metafora (kiasan) si mengacu ku pusat kehendak, niat entah pe maksud di balik semua perkataan dan perbuatan seseorang. Banci ka mengacu ku kepribadian, kehidupan batin, nurani, watak, atau keadaan emosional seseorang. Jadi “Kupernehen pusuhna” ertina pusuh peraten si bersih si ngena ate Dibata (bdk. Masmur 24:4; Masmur 73:1; Heber 10:22; 1 Petrus 3:21; rsd.).

Si peduaken i bas ay. 12 ituriken Daud e me sekalak anak perana si mejile, sehat, janah matana pe mejile. I bas terj. BIMK nina, “ia seorang pemuda yang tampan dan sehat, dan matanya indah.” Ayat enda nurikenca maka kepeken Daud enda labo terjeng pusuhna si mejile, tapi fisikna pe mejile. I bas si e banci siantusi maka Daud enda mediate nandangi kesehaten fisikna. Irawatna alu mehuli fisikna seh makana terjaga kesehatenna. Kondisi fisik si sehat erbahanca pengidah pe mejile. Lit visi ke depan si mehuli, dem alu semangat positif ras optimistis.

Si peteluken i bas ay. 13 ituriken maka kenca enggo iminaki Samuel, rempet Daud ikuasai Kesah TUHAN, janah mulai i bas wari e nari Kesah e tetap ras ia. Antusenna, lit i bas diri Daud kiniteruken ukur i lebe-lebe Dibata, i ja nggit Daud geluhna tuhu-tuhu ikuasai Kesah Dibata. I bas si e tentuna geluh Daud tuhu-tuhu ndeher ras Dibata. I bas syair-syair puji-pujin si ituliskenna i bas Kitab Masmur, teridah kel relasi Daud si ndeher ras Dibata. Kalak si ndeher ras Dibata tentu geluhna pe dem alu dame ras keriahen ukur sebab ikawali ras itegu-tegu Dibata ku dalan si mehuli.

Versi Audio silahkan klik : https://youtu.be/OxJkTVpSJxI

Pengkenaina

Tema ras tujun i bas PA-ta sendah ngajuk kita kerina gelah ngergaken generasi muda si lit i sekelewetta, khususna i bas Gerejanta. Generasi muda e membutuhken bimbingen, teladan, bage pe perhatian, gelah ula sempat ndabuh ku bas hal-hal si la mehuli, khususna i bas jamanta gundari enda. Ogenta sekali enda ncidahkenca sekalak tokoh Alkitab si nguda denga tapi melala hal si lit i bas ia tuhu-tuhu meherga. Lit i bas Daud pusuh peraten si bersih, fisik si sehat, ras erkemalangen man Dibata. Si e kerina tentu labo terjadi secara instan. Enggo pasti lit lingkungen si mehuli si mengkondisiken ras membentuk Daud menjadi seorang pemuda yang berkualitas unggul, baik secara fisik, psikis, mental, bage pe rohanina.

Emaka i bas kesempaten enda iajuk kerina kita Moria gelah menciptakan kondisi entah pe lingkungen si mehuli man anak-anakta gelah banci bertumbuh alu mehuli bagi Daud. I bas si e tentu labo terjeng kebutuhen-kebutuhen fisik saja si ibereken man anak-anakta, harus lit je perhatian, kasih sayang, disiplin, perlindungan, teladan hidup beriman, rsd.-na. Secara kelembagaan, Gereja pe bertanggung jawab i bas mereken pendidiken iman Kristen, e maka lit lembaga kategorial KAKR ras PERMATA i bas GBKP. Kerinana harus bersinergi alu mehuli, pendidikan i bas orang tua i rumah, pendidikan i bas sekolah formal, bage pe pendidikan i bas Gereja, gelah tercipta generasi muda si tangguh, beriman teguh, ras bermoral baik. 

Ngataken bujur kita man Dibata erkiteken i bas Tgl. 12 September si reh enda PERMATA GBKP, adi la kami silap, enggo berusia 76 tahun. Usia si enggo lanai nguda, tapi encidahkenca peran generasi muda GBKP kidekah 76 tahun. Enggo enterem diberu-diberu si bertumbuh kinitekenna i bas lembaga kategorial PERMATA janah iterusken ku Moria. Emaka mari sidukung terus lembaga kategorial PERMATA gelah menjadi wadah pertumbuhan iman si mehuli man generasi muda i GBKP. Rikutken konteks PERMATA si sendah bagi si enggo isingetken i bas bagin penaruh i datas, masuk ku bas Generasi Z. Karakteristik Gen Z enda nina, si pemena, cenderung lebih mudah untuk berbaur dan bersosialisasi dengan sekitarnya. Si peduaken, melek teknologi sehingga mudah untuk mengakses informasi yang diinginkan. Si peteluken, karena melek teknologi, Gen Z lebih cepat dalam mempelajari hal baru. Si peempatken, menyukai lingkungan yang memberi mereka ruang untuk tumbuh dan lebih kreatif.

Melala denga si banci sipelajari kerna karakteristik Gen Z enda, tujunna tentu gelah banci sidarami metode-metode pendidikan iman si banci iterapken rikutken konteks karakterisitik setiap generasi. Emaka man banta kerina Moria ula sempat kita ngadi erlajar gelah banci terus mendampingi anak-anakta erkemalangen man Dibata rikutken konteks perkembangen jaman. Dibata si mpengasup kita kerina.