SUPLEMEN PA MAMRE GBKP TGL. 1 - 7 SEP. 2024

Pdt. Larena Sinuhadji (Nd. ReyRapha Tarigan)

Ogen : Masmur 148:6-10

Tema : PATUH MPEKENA-KENA TINEPA DIBATA

Tujun : Gelah Mamre :

1) Meteh uga ulina tinepa Dibata erpalasken teks

2) Ertanggung jawab mpekena-kena tinepa Dibata

Penaruh

Salah sada keuniken kiniteken kalak Yahudi man Dibata e me, gelah kegeluhen e dem alu dame si serta, harus lit hubungen si mehuli labo saja ras Dibata bage pe sesama manusia, tapi man alam semesta pe harus lit hubungen si mehuli. E maka i bas kiniteken kalak Yahudi, alam semesta iergaken sebage subjek labo objek. Adi alam semesta rikutken ras kerina isina iperlakuken sebage subjek, enggo pasti turah rasa hormat ras meherga iakap alam semesta enda rikut ras kerina isina.

I bas kesempaten enda radu ras kita erlajar arah Pemasmur nari i bas ngergaken kerina tinepa Dibata.

Mpebagesi Teks

Ogenta sendah lit i teruh judul perikop “Langit ras doni muji TUHAN.” I bas terj. TB-LAI nina, “Langit dan bumi, pujilah TUHAN!” Lit je tanda seru (!) sebage penegasen pengajuk si harus ilakoken. Masmur 148 enda termasuk ku bas kelompok Masmur Pujian si iendeken i bas kebaktin-kebaktin kalak Israel i Rumah Pertoton. Si istimewa i bas Masmur 148 enda iajuk kerina makhluk i surga ras i doni guna rende muji Tuhan: malekat-malekat, kerina tentera surga, matawari, bulan, bintang-bintang si ersinalsal, langit si meganjangna, naga lawit, lawit si mbagesna, kilap ras baho, salju ras embun, angin si erpiu, uruk-uruk ras deleng-deleng, kerina kayu si erbuah, kerangen, rubia-rubia si melemuk ras meliar, rubia-rubia si njoler, perik-perik, raja-raja, bangsa-bangsa, si biak raja bage pe penguasa si deban, anak perana, si nguda-nguda, kerina orang tua ras anak-anak. 

Arah pengajuk Pemasmur enda teridah maka Pemasmur memperlakuken kerina tinepa Dibata sebage subjek si seri i lebe-lebe Dibata. Emaka i bas si e kerina tinepa Dibata harus ihamati ras iergai. Tek Pemasmur maka alu carana masing-masing si la iangkai manusia, kerina tinepa Dibata banci rende muji Tuhan.

Pujin si meganjangna harus sipenangkih man Dibata erkiteken, si pemena ay. 5 ras 6, “Sabab IA si merentahkenca maka kerina e jadi. Kerina tinepa e itetapkenNa inganna seh rasa lalap, janah la banci la ipatuhiNa” I bas terj. TB-LAI nina, “Sebab Dia memberi perintah, maka semuanya tercipta. Dia mendirikan semuanya untuk seterusnya dan selamanya, dan memberi ketetapan yang tidak dapat dilanggar.” Enda sada pengakun maka Dibata ngenca si erkuasa njadiken kerinana, janah kerina si ijadiken Dibata e mehuli ras ratur seh rasa lalap. Si peduaken, i bas ay. 13 ikataken, “Sebab gelarNa ganjangen kap asangken kerina gelar. KemulianNa ganjangen asa doni ras langit.” Enda sada pengakun maka la lit si termulia asangken Dibata si njadiken kerinana. Si peteluken, i bas ay. 14 ikataken, sebab “IA si mere gegeh man bangsaNa.” Enda sada pengakun maka Dibata ngenca si mereken gegeh man kerina kalak si nembah man baNa, la lit gegeh si deban i doni enda si ngasup naluken gegeh Dibata.

Versi Audio silahkan klik : https://youtu.be/HaJM43FU36I

Pengkenaina

PA-ta sendah ngajuk kam kerina Mamre gelah muji Tuhan rasa lalap. Engkai maka harus muji Tuhan? Erkiteken si pemena, Dibata ngenca si erkuasa i bas kegeluhenta. Si peduaken, Dibata ngenca si termulia i bas kegeluhenta. Janah si peteluken, gegeh si tuhu-tuhu rehna i bas Dibata nari. Sigejapkenlah maka Dibata tetap ngarak-ngarak mentasi erbage-bage pengalamen geluhta. Emaka teruslah muji Dibata alu rende entah pe alu belas-belasta setiap wari, cidahkenlah arah pengkebet geluhta maka Dibata ngenca si isembah kita.

Janah PA-ta sendah pe ngajuk kam kerina Mamre gelah tetap peduli nandangi alam sekelewetta. Tema GBKP tahun 2022 “Kreatif Merawat Lingkungan” harus tetap ilakoken amin pe enggo lanai jadi tema pelayanen i bas tahun 2024 enda. Tanggung jawab i bas kita mpekena-kena tinepa Dibata harus tetap silaksanaken. Mari siusih Pemasmur si memperlakuken kerina tinepa sebage subjek si seri nilaina ras manusia i lebe-lebe Dibata. Alu bage turah i bas diri Mamre rasa hormat ras penghargaan nandangi kerina tinepa Dibata. Mari siinget mulihi kai saja si enggo ilakoken i bas tahun 2022 i bas kita kreatif merawat lingkungan, janah siteruken i bas rangka tugas tanggung jawabta matuhi perentah Dibata mpekena-kena tinepaNa. Dibata si mpengasup kam kerina Mamre GBKP.