SUPLEMEN PA MAMRE GBKP TGL. 4 - 10 AGUSTUS 2024

Pdt. Larena Sinuhadji (Nd. ReyRapha Tarigan)

Bahan : Imamat 18:22-30

Tema : NGAJARKEN KEBADIAN NGGELUH

Tujun : Gelah Mamre :

1) Meteh kerna penyimpangen perilaku erpalasken ogen

2) Ngasup ngajarken kebadian nggeluh man jabuna

Penaruh

Pendidiken seks man generasi muda akap kami seh kel pentingna i bas jaman genduari enda. Pendidiken seks labo terjeng meteh kerna jenis kelamin ras alat-alat reproduksi saja. Pendidiken seks mencakup konsekuensi pola-pola relasi si bakal terjadi adi la sipergunaken alu mehuli. Umpamana MBA, married by accident, erjabu erkiteken terpaksa perban enggo mehuli kula si diberu. Tentu lit pola relasi si ceda baik antara orang tua ras anak, bage pe man si bersangkuten. Melala arapen orang tua man anak banci jadi la tersehi erkiteken MBA ndai. Bage pe man si bersangkuten, mungkin enggo lit cita-citana, tapi erkiteken MBA ndai, enggo terhambat bahkan enggo la nai banci siwujudken cita-citana. Piah dungna perjabunna pe la sikap perban memang lenga siap guna erjabu.

I bas kesempaten enda radu ras kita erlajar kerna kiniraturen i bas seksualitas si mencakup erbage-bage dimensi: biologis, sosial, psikologis, ras kultural. Secara khusus erpalasken kinitekenta.

Mpebagesi Teks

Ogenta sendah lit i teruh judul perikop “Persadan kula si ilarang,” i bas terj. TB-LAI Ed. II nina, “Kudusnya perkawinan.” Isina secara garis besar e me perentah Dibata kerna kiniraturen i bas seksualitas. Kiniraturen i bas hal seksualitas enda isehken ku tengah-tengah bangsa Israel alu latar belakang si lit i bas ay. 3, i ja lit pengaruh budaya-budaya Mesir ras Kanaan si mbelin kerna perilaku seksual. Perilaku seksual si lit i bas budaya entah pe kiniteken bangsa Mesir ras Kanaan la sue ras kiniteken bangsa Israel. Banci ikataken perilaku seksual si menyimpang. Kai saja perilaku seksual si menyimpang si ilakoken bangsa Mesir ras Kanaan ndai? Banci sioge i bas ay. 6-23 nari. Piga-piga si itulisken i jenda e me: ersada kula ras nande. Ersada kula ras turang kandung. Ersada kula ras kempu. Ersada kula ras bibi, turang bapa. Ersada kula ras ndehara senina bapa. Ersada kula ras ndehara anak. Ersada kula ras diberu kalak. Ersada kula sesama jenis. Bage pe ersada kula ras asuh-asuhen. Si e kerina ilakoken bangsa Mesir ras Kanaan.

Adi perilaku seks si menyimpang ndai ilakoken i tengah-tengah bangsa Israel, maka si ceda si pemena lebe e me relasi ras Dibata. Sebab Dibata si isembah Israel e me Dibata si badia. La ngena ate Dibata nandangi kerina perilaku seks si ilakoken bangsa Mesir ras Kanaan. Kerina perbahanen si menyimpang ndai la maba keselamaten ku tengah-tengah bangsa Israel, sementara misi Dibata e me maba keselamaten ku tengah-tengah bangsa Israel. Si peduaken, perilaku seks si menyimpang ndai banci encedaken relasi antar keluarga i tengah-tengah bangsa Israel. Dibata si isembah Israel e me Dibata si ratur. Enggo ibahan Dibata pola-pola relasi si mehuli i tengah-tengah bangsa e. Kerina pola relasi si mehuli si enggo ibahan Dibata e banci hancur adi silakoken perilaku seks si menyimpang. Orang tua banci ate-atena man anak-anakna. Anak-anak pe pasti la ihamatina orang tuana, banci ate-atena man orang tuana. Kerina kalak banci ate-atena man kalak si deban nandangi hasrat seksualna. Adi pola relasi si mehuli i tengah masyarakat enggo la nai lit enggo pasti terjadi kekacauan. Si peteluken, perilaku seks si menyimpang banci mpeturah pinakit menular si tentuna encedai kesehaten masyarakat.

Emaka alu tegas Musa nehken Kata Dibata ku tengah-tengah bangsa Israel gelah patuh man Dibata alu ngelakoken kerina perentah-perentahNa, secara khusus i bas hal perilaku seks si sue ras peraten Dibata. Ise pe si la patuh tentu datken akibatna, kena pinakit, ceda relasina ras kalak si deban, entah pe dat ukumen i bas Dibata nari.

Versi Audio silahkan klik : https://youtu.be/_lMyBrvDbRg

Pengkenaina

Tema ras tujun PA sendah ngajuk kam kerina Mamre gelah ngajarken kebadian geluh ku tengah-tengah jabu masing-masing, khususna i bas hal perilaku seks si sue ras peraten Dibata. Perilaku seks si menyimpang i bas ogenta akap kami enggo jelas. Adi sioge benaken i bas ay. 1 nari melala perilaku seks si menyimpang labo terjeng hubungan seks sesama jenis entah pe hubungan seks dengan binatang. Tugasta sebage orang tua mendidik anak-anakta kerna perilaku seks si sue ras peraten Dibata. Tugasta e mberat sebab i bas budayanta labo semal ngerana kerna seksualitas. Tapi pendidiken seks si benar akap kami harus sibereken man anak-anakta gelah itehna kai saja dampak negatif i bas perilaku seks si menyimpang. Mari siajarken man anak-anakta maka geluh enda labo terjeng soal seks ngenca, melala hal si deban si penting si perlu siukurken ras silakoken. Bahanlah pembinaan-pembinaan si berkaiten ras perilaku seks si benar si sue ras peraten Dibata. Dibata si mpengasup kam kerina Mamre GBKP.