SUPLEMEN PA MORIA GBKP TGL. 18 - 24 AGUSTUS 2024

Pdt. Larena br. Sinuhadji (Nd. ReyRapha Tarigan)

HUT Mamre GBKP 26 Agustus

Si Man Ogen : Roma 12:9-12

Tema : KELENG ATE SI TUHU-TUHU

Tujun : Gelah Moria :

- Nuriken lagu langkah si encidahken keleng ate

- Nambahi kekelengen man perbulangen ras Mamre secara organisasi

Metode : Diskusi & Aksi

Penaruh

Momen ulang tahun biasana sipake guna ngataken bujur man Tuhan sebab Tuhan tetap masu-masu kegeluhenta. Momen ulang tahun pe banci sipakeken guna berefleksi, kai si sedekah enda enggo silakoken ras kai nari si bakal silakoken ku wari-wari seterusna gelah geluh si enggo ibereken Tuhan banta tetap erguna.

PA-ta sendah i bas rangka menyambut HUT Mamre GBKP i bas tgl. 26 Agustus si reh enda. Lit piga-piga hal si banci radu ras sirenungken rikutken si man ogenta sendah, janah renungen enda banci sipakeken guna mendukung entah pe memotivasi Mamre-mamre si lit i rumahta masing-masing, bage pe Mamre secara kelembagaan.

Mpebagesi Si Man Ogen

Surat Roma lit si ngatakenca surat Rasul Paulus si gedangna, si paling teologis, ras paling berpengaruh. Emaka i bas kerina surat-surat si itulisken Rasul Paulus, Surat Roma enda si pemenana itamaken i bas Padan Si Mbaru kenca Perbahanen Rasul-rasul. I bas bindu 1:13-15 teridah tujun Rasul Paulus nehken suratna man perpulungen kalak si tek i kota Roma. Si pemena guna pebetehken perpulungen maka lit rencana Paulus guna reh ndahi perpulungen. Si peduaken guna meritaken Berita Si Mehuli. Adi sioge bindu 1-11 teridah maka Paulus berusaha merangkum ajaren-ajaren keselamaten i bas Yesus Kristus si enggo iberitakenna sedekah masa pelayanenna.

Si jadi ogenta sendah lit i teruh judul perikop “Lagu langkah kalak Kristen” (terj. BIMK, “Hidup untuk Allah”). Adi i bas Alkitab terj. TB-LAI lit dua judul perikop i bas bindu 12 enda, judul si pemena “Persembahan yang benar” benaken ay. 1-8, judul si peduaken “Nasihat untuk hidup dalam kasih” benaken ay. 9-21. Rikutken TB-LAI ndai, secara garis besar bindu 12 enda banci sibagi ku bas 3 bagin. Si pemena ay. 1-2 eme peralihen i bas ajaren-ajaren si sifatna dogmatis nari ku bas penerapan si sifatna praksis. Emaka i bas ay. 1-2 enda Paulus ngajuk perpulungen gelah ngelakoken kai si ngena ate Dibata selaku mahluk si rukur janah ola sempat ikuasai doni enda. Si peduaken ay. 3-8 Rasul Paulus ngerana kerna pemere-pemere Kesah (karunia-karunia Roh Kudus) si enggo ibereken Dibata ku tengah-tengah perpulungen, gelah sipergunaken alu mehuli guna kiniulin kula ni Kristus. Si peteluken ay. 9-21 Rasul Paulus ngerana kerna nggeluh sikeleng-kelengen bage pe perbahanen-perbahanen si mehuli si harus ilakoken erpalasken keleng ate Kristus.

Geluh sikeleng-kelengen enda harus teridah nyata arah perbahanen si banci sigejapken sada ras si debanna. E maka i bas ay. 9-10 Rasul Paulus ngajuk perpulungen gelah tutus (tulus) i bas ngkelengi sapih-sapih perpulungen ula sempat lit maksud-maksud si jahat i bas ngkelengi kalak si deban. Keleng ate Kristus harus jadi palas i bas sikeleng-kelengen sapih-sapih perpulungen sebab i bas keleng ate Kristus enggo lanai lit pembedaan-pembedaan, kerinana sederajat i lebe-lebe Dibata. Temasuk i bas saling menghormati sada ras si debanna, enggo lanai lit batasen antara tuan dan hamba.

I bas ay. 11 ngajuk Rasul Paulus man perpulungen gelah ndahiken kerina dahin-dahin si enggo ipercayaken Dibata alu tutus (rajin) ras ergiah-giah (semangat yang menyala-nyala). Kerina dahin i jenda labo terjeng dahin-dahin formal i bas perusahaan entah pe lembaga, tapi termasuk i je dahin-dahin non-formal bagi dahin-dahin i bas rumah tangga, i tengah-tengah lingkungen masyarakat, bage pe pelayanen i gereja. Ula sempat lit pembedaan antara dahin-dahin Tuhan, entah pe pelayanen i gereja, ras dahin-dahin si sifatna formal bage pe non-formal ndai, kerinana harus ilakoken alu tutus ras ergiah-giah.

I bas ay. 12 ngajuk Rasul Paulus man perpulungen gelah i bas kondisi si kugana pe, tetap meriah ukur, tetap optimis erpangarapen si mehuli, tetap megenggeng i bas kiniseran kai pe si ialami. Janah si paling penting e me ula sempat ngadi ertoto man Dibata. Sebab Dibata ulu kerinana, khususna: keriahen ukur, pengarapen, ras kinigenggengen.

Versi Audio silahkan klik : https://youtu.be/ddQs8VLsJYc

Pengkenaina

Ngataken bujur kita maka i bas tgl. 26 Agustus 2024 si reh enda, Mamre GBKP enggo berusia 29 tahun (adi la kami silap). 29 tahun banci ikataken usia si dewasa, enggo matang secara fisik, psikis, mental, bage pe rohani. Nguda denga, masing segar, masih menarik, sangat enerjik, sangat megegeh, sangat produktif, rsd.-na. Ertina momen 29 tahun enda iarapken gelah Mamre GBKP reh mehulina i bas kai pe. Piga-piga hal si banci radu ras sirenungen i bas momen enda rikutken si man ogenta sendah e me:

Si pemena, iajuk kita kerina gelah sikeleng-kelengen bage pe sihamat-hamaten sada ras si debanna alu tutus (tulus) erpalasken keleng ate Kristus. I bas si e tentuna sifat sidalih-dalihen harus sibeneken. Memang serayan entah pe pengurus harus jadi teladan i bas sikeleng-kelengen ras sihamat-hamaten, tapi perpulungen pe banci berinisiatif, pro-aktif, la nimai ikelengi entah pe ihamati makana ngekelengi ras ngehamati, sebab palas keleng ate i bas kita eme keleng ate Kristus si enggo leben engkelengi kita.

Si peduaken, iajuk kita kerina gelah ergiah-giah ukur (semangat yang menyala-nyala) ras tutus (rajin) i bas ndahiken kerina dahin si enggo ipercayaken Dibata man banta. I bas kinitekenta, erdahin seri ras beribadah. Ertina ketutusen i bas beribadah harus teridah i bas kita ndahiken dahin kai pe si enggo ipercayaken Dibata man banta. Paulus ngatakenca i bas Kol. 3:23, “Apa pun juga yang kamu perbuat, perbuatlah dengan segenap hatimu seperti untuk Tuhan dan bukan untuk manusia.” Kai si ikataken Rasul Paulus enda tuhu-tuhu jadi etos kerja Kristen si erbahanca negara-negara i Eropa ras Amerika jadi negara-negara si maju i bas bidang kai pe.

Si peteluken, iajuk kita kerina gelah tetap meriah ukur (bersukacita), tetap optimis erpangarapen si mehuli, tetap megenggeng i bas kiniseran kai pe si ialami. Janah si paling penting ula sempat ngadi ertoto man Dibata. Sebab Dibata ulu kerinana, khususna: keriahen ukur, pengarapen, ras kinigenggengen.

Telu hal si enggo radu ras sidatken i bas PA-ta sendah mari radu ras sipeseh man Mamre-mamrenta i rumah masing-masing alu bentuk support, dukungen, i bas kai pe si mehuli si sangana ilakoken Mamre-mamrenta, baik sebage imam i tengah-tengah jabu, i bas pendahinna, i bas pergaulenna, khususna i bas pelayanenna i Gereja. Sebab lit ka kita Moria si kurang bahkan la mendukung dahin pelayanen Mamrena i Gereja. Mari radu ras sibahan aksi nyata secara kelembagaan, gelah Mamre pe semakin semangat i bas pelayanenna. Selamat ulang tahun ninta man Mamre GBKP. Dibata si masu-masu Mamre GBKP, semakin dewasa di dalam Kristus, dipakai Tuhan menjadi saluran berkat untuk siapa saja.