SUPLEMEN PJJ GBKP TGL. 6 - 12 AGUSTUS 2023

Pdt. Larena Sinuhadji & Pdt. Jenny Eva Karosekali

TUTUS DINGEN SIIAH-IAHEN (Heber 10:19-25)

[Kehadiren Jemaat Meningkat]

Penaruh

Kenca enggo mulai iberitaken firman Tuhan seh ku Eropa, maka kekristenan menjadi agama mayoritas, terlebih alu istilah “gereja negara” i ja kekaisaran Romawi i teruh kepemimpinen Kaisar Theodosius I njadiken kekristenan menjadi agama resmi (bertahan sampai dua milenial). Tapi genduari gedung-gedung gereja si megah beralih fungsi menjadi bar, café, hotel, diskotik, masjid, rsd. Fenomena enda teridah i sebagian besar negara si merupaken jantung kekristenan benaken Inggris, Jerman, Belanda, Belgia bage pe Italia. Hal enda erkiteken kiniteken perpulungen ras kehadiren perpulungen ku gereja menyusut selama setengah abad terakhir. Ikutip i bas CNN Indonesia, iberitaken, jumlah jemaat si nadingken Gereja Katolik i Jerman melonjak seh 522.821 kalak i bas tahun 2022. Ras angka enda meningkat, i ja sebelumna i bas tahun 2021, 359.338 (Tribunnews.com, 11 Juli 2023). 

Contoh: Gereja St. Mary, Dublin, Irlandia & Gereja Nottingham, Inggris beralih fungsi jadi bar ras restoran pada tahun 2005. Bahkan i Inggris, 500 gereja enggo itutup ras beralih fungsi menjadi masjid, lit 423 masjid. Si deban, Gereja Bukit Sion i kota Clittheroe, Lancashire Inggris, enggo jadi masjid benaken thn. 2006. Gereja  Didsbury i kota Manchester Inggris si ibangun thn. 1883 (Gereja Metodist thn. 1962) itutup erkiteken la nari enterem perpulungen si hadir. Tahun 1967 itukur komunitas Arab Syria ras genduari enggo jadi masjid si megah.

Uga kerna gerejanta? Fakta, salah sada pergumulan gerejanta GBKP secara Sinodal, tingkat kehadiren warga gereja ku Kebaktin Minggu, PJJ ras PA rikutken data Litbang GBKP 2018 pe miris kal, hanya 37,05%, ertina lebih setengah anggota perpulungenta la aktif dingen la hadir ku bas kegiatan-kegiatan gerejanta. 

Terlebih i bas pasca pandemi, kenca lit ibadah online enterem perpulungenta si enggo lebih nyaman ras “nagih” beribadah secara online, cukup i rumah nari, alu alasen: “Guna jumpa ras Dibata, dingen megiken Kata Dibata, labo mesti ku gereja sebab enggo melala tawaran arah media online si menyajikan ibadah, khotbah ras puji-pujin si banci iikuti i rumah nari.” Ertina, alasen enda banci sidalanken erkiteken lit persoalen genting (pandemi), la banci iberlakuken i bas kondisi aman. Sabab arus siinget maka Tri-Tugas Gereja (Bersekutu, Ngelai ras Ersaksi), i ja makna persekutuan labo hanya secara vertikal (manusia ras Dibata) tapi pe secara horisontal, sesama manusia. Bersekutu ertina i jenda labo cukup hanya kita saja secara pribadi ras Tuhan, tapi pe radu ras perpulungen.

Uga si arus siisikapi ras sidalanken, gelah pengalamen Eropa la terulang man banta, khususna GBKP? Mari erlajar kita arah firman Tuhan i bas bahan PJJ-nta minggu enda. 

Pembagesi Pengangkan Kerna Ogen

Surat Heber itujuken secara khusus man kalak Kristen Yahudi entah pe perpulungen-perpulungen kalak Kristen si enterem je kalak Yahudi-na. Melala nasehat-nasehat praktis i bas surat enda si tujunna gelah kerina kalak si ngogesa entah si megikenca isi surat enda tetap megegeh ras paguh erkiniteken man Dibata i bas Yesus Kristus aminna pe arus ngenanami erbage-bage kiniseran erkiteken kinitekenna termasuk ngalaken kalangen Yahudi si la tek nandangi Yesus Kristus. I bas dampar si deban, penulis surat Heber ngajuk perpulungen gelah reh dewasa i bas erkiteken man Dibata i bas Yesus Kristus.

Penulis surat Heber i jenda ngajuk kerina si ngoge suratna enda ras kita kerina kalak si tek gelah tetap ngerembakken diri ku Dibata alu tutus ate dingen kiniteken si tetap, bersih pusuh peraten bagepe alu kula si enggo ibersihken. Piga-piga point penting si isehken penulis Heber i jenda eme:

1. Yesus enggo mbuka dalan si mbaru man banta seh maka kita enggo banci bengket ku bas Ingan Si Badiana arah kematenNa (ay. 19-21). Enda me si jadi alasen dingen palasna engkai maka kita arus ngerembakken diri ku Dibata. I bas paksa si nai, bangsa Israel la banci secara langsung ngadap jumpa ras ersembah ku Dibata, tapi arus erkelangken imam, tapi Yesus enggo jadi Imam si mbelinta si mabai kita kalak si tek iperembakkenNa ras Dibata janah banci nembah, ertoto dingen ndahi Dibata secara langsung.
2. Uga arusna sikapta i bas kita ngadap ras ngerembakken diri ku Dibata (ay. 22)? Eme alu tutus ate, kiniteken si tetap, alu pusuh si bersih dingen penggejapen ersalah nari, ras alu kula si enggo ibersihken. Ertina i bas kita ersembah man Dibata arus tuhu-tuhu sijaga pusuh, ukur ras kulanta bersih i adep-adepen Dibata, bersih rohani ras jasmani, tuhu-tuhu alu motivasi ras ketedehen ate man Tuhan, labo pekulah-kulah (munafik), labo “asal hadir” tapi arus tutus ersembah dingen alu kiniteken si tetap. Sabab mbue genduari, ibadah nge ku gereja, tapi mbuen main HP asangken tutus beribadah. Bage me maka banci sinanami perjumpanta ras Dibata dingen penembahenta ku Dibata la sia-sia si kedungenna maba perbahan si mehuli ku bas kegeluhenta.
3. Tetap erpengarapen man Dibata amin kai pe si terjadi sabab janji Tuhan ya dan amin. Isehken Dibata nge padanNa.
4. Persinget guna saling mperdiateken ras siiah-iahen (ay. 24-25). Kalak si tek, si ngerembakken dirina ku Dibata arus ka mediate man temanna manusia, sebab labo mungkin kita banci rembak ras ngkelengi Dibata si labo siidah, adi temanta manusia siidah kita pe labo kita nggit rembak dingen ngkelengisa (bdk. 1 Yoh. 4:20b-21). Kerembakennta ras Tuhan erbahanca relasinta ras temanta manusia pe arusna mehuli dingen ngasup kita mediate, nggeluh sisampat-sampaten dingen sikeleng-kelengen. Mediate kita nandangi temanta si la reh ku perpulungen, si nirangken dirina ras perpulungen, jadi tanggung jawabta guna ngiahkenca. Nina penulis Heber i bas ay. 25, “Ola kita la reh ku perpulungen, bagi si ibahan piga-piga seninanta..”, ertina i bas paksa si e pe nai lit ka nge piga-piga anggota perpulungen si lanai aktif dingen nadingken persadaanna ras Tuhan begepe sapih-sapih perpulungen.

Versi Audio Silahkan Klik https://youtu.be/nGW2dtpl3og

Pengkenaina

Arah bahan PJJ-nta sendah mabai kita gelah semakin reh meningkatna kehadiren perpulungen ku kerina kegiaten gereja. Labo hanya secara kuantitas termasuk pe kualitas kinitekenna ras menjadi pelaku (subyek) i bas pelayanen. Ula min sempat pengalamen gereja-gereja i Eropa si melala tutup erkiteken lanai lit jemaat si reh dingen surut i bas kiniteken man Tuhan terjadi ka i bas gerejanta.

Guna meningkatken partisipasi kerehen perpulungen ras reh paguhna kinitekenna,  tentuna enda jadi tanggung jawabta radu ras, labo dahin Pendeta, Pt./Dk. saja ngenca, bagi nina temata, “Tutus dingen siiah-iahen” kita guna mperdiateken ras mpersingeti kerina kecibal geluh perpulungenta. Piga-piga hal si perlu silakoken guna peningkaten partisipasi ras kehadiren perpulungenta, eme:

1. Membentuk Tim Pelayanan PRT subuk i bas runggun bagepe sektor.
2. Mengaktifkan & mengefektifkan pelayanan Tim PRT alu erbahan jadwal rutin guna perkunjungan rumah tangga.
3. Nehken pelayanan si melibatkan sebanyak-banyaknya anggota perpulungennta i bas erbage pelayanan sue ras potensina sebab i bas budayanta kalak Karo, adi lit ibereken man bana tanggung jawab (lit tegunna) man bana nggit ia muat bagin, la sekedar jadi penonton.
4. Menjadikan gerejanta jadi gereja si mediate dingen si tetap hadir i bas kerina kecibal geluh perpulungen, arah perkunjungan: mere pergegeh tupung ceda ate entah pe sakit-pinakit. Mpersingeti: tupung la reh ku perpulungen, notokenca dingen nehken penampat i bas paksa si iperlukenna. Adi ergiah-giah kita kerina i bas sektor guna tutus ngiah-ngiahi, mejingkat ndahisa, dingen ncidahken keleng ate man teman-temanta si la aktif, pengarapenta reh meningkatna kehadiren perpulungennta, sebab tek kita kai pe si idahiken kita alu tutus i bas gelar Tuhan labo pernah sia-sia (bdk. 1 Kor. 15:58b).
5. Lit si icidahken bas gerejanta, subuk melalui motto, slogan maka intina gerejanta berarti man banta bage si enterem: Firman Tuhan isehken alu jelas, damai, kekerabatan, penampat, kiniersadan arih, rsd.