SUPLEMEN PA MAMRE GBKP TGL. 27 AGT. - 2 SEP. 2023

Pdt. Larena Sinuhadji (Nd. ReyRapha Tarigan)

Teks : Kejadin 41:37-57

Tema : BAPA JADI PENGGURUN

Tujun : Gelah Mamre :

- Meteh uga visi ras misi Yusuf i bas mengatasi masalah i Mesir dingen kunci keberhasilen Yusuf i bas ndahiken dahinna

- Ngasup ras nggit jadi penggurun nandangi isi jabu alu erpalasken Kata Dibata

Metode : Baca Gali Alkitab

Penaruh

Mejuah-juah man bandu kekelengen kami Mamre i japa pe kam ringan. Asa penginget kami, enda enggo si peduakaliken metode Baca Gali Alkitab (BGA) enda silakoken guna semakin mpebagesi pengangkanta kerna Kata Dibata i bas PA Mamreta. Emaka mehuli adi metode BGA enda silaksanaken i bas runggunta masing-masing. Sidaramilah fasilitator si banci mendampingi i bas metode BGA enda.

Kerna teks ogenta sendah, menam seri akap kami ras PA Mamre Tgl. 13 - 19 Agt. 2023, alu tema “Rekam Jejak Jadi Pemimpin” (Kej. 41:25-41).  Ertina, amin bage gia, enda sada kesempaten si mehuli guna semakin memperdalam pengangkanta kerna Kata Dibata alu metode BGA.

Versi Audio Silahkan Klik : https://youtu.be/7cemSJIhhXk

Pesan Fasilitator

Melala hal si banci sipelajari arah tokoh-tokoh i bas ogenta sendah. Si pemena lebe arah Firaun. Ia sekalak pemimpin si demokratis ras objektif. Secara konkrit, la ibedakenna kalak erpalasken suku, status sosial, entah pe agamana. Ialoken Firaun Yusuf, amin pe ia sekalak budak sekaligus tawanan i bas penjara nari. Secara objektif Firaun banci menilai niat mehuli Yusuf guna nampati bangsa Mesir keluar dari krisis. Janah nggit ia milih Yusuf jadi wakilna. Sementara jaman gudari enda melala pemimpin si pilih-pilih, la objektif ras la demokratis. Selain si e, nggit Firaun ngaloken kritik ras saran arah sekalak budak sekali pe. Sementara melala pemimpin si la nggit megiken kritik ras saran.

Penungkunenna, model perbapan si apai kam kekelengen kami Mamre? Apakah perbapan si otoriter, la nggit megiken kritik saran arah anak jabuta? Apakah perbapan si subjektif ras pilih kasih? Anak si mejile ngenca akapndu si ikelengindu, sementara si bodoh akapndu la ikelengindu? Enda akap kami banci jadi renungenta sebage orang tua, ingan penggurun nandangi anak jabuta.

Si peduaken, erlajar kita arah Yusuf. Yusuf sekalak si erkemalangen man Dibata, janah tutus ia erkiniteken man Dibata. Emaka jore Yusuf i bas kai pe si idahikenna, janah ipake Dibata Yusuf guna jadi pasu-pasu man kalak si deban, bahkan man kalak si la sada kiniteken ras ia. Arah kepentaren si ibereken Dibata man bana, lit i bas ia kiniteruken ukur, nggit ia nampati alu tulus, la mengharapken balasen kai pe. Lit i bas Yusuf visi jauh ke depan seh makana ngasup ia rukur antisipatif. Lit i bas Yusuf kebeluhen sebage konseptor sekaligus eksekutor, ertina labo terjeng ngasup er-teori saja tapi ngasup ka ia ngelakokenca. Alu kepentaren i bas Dibata nari, ngasup Yusuf ngertiken nipi raja janah ngasup ia ngelakoken kai si isarankenna man Firaun, seh makana bangsa Mesir ras bangsa-bangsa si deban i sekelewet Mesir, banci pulah i bas bencana kelehen nari. Arah erti gelar-gelar si iberekenna man anak-anakna, siteh maka Yusuf enda sekalak si tekun, megenggeng, tangguh, amin pe lit i bas kiniseran tetap ia taat man Dibata, kerinana idalanina alu lapang dada, la pernah sekali pe isalahkenna Dibata i bas kiniseran si mberat si ialamina. 

Penungkunenna man kam kerina kekelengen kami Mamre, apakah kam sekalak perbapan si erkemalangen janah tutus erkiniteken man Dibata? Enda akap kami palasna i bas tujun si peduaken PA Mamreta sendah. Adi ateta jadi ingan penggurn si tuhu-tuhu, emaka harus lit leba kepentaren Dibata nari i bas dirinta. Kepentaren i bas Dibata nari rehna arah kita erkemalangen ras tutus erkiniteken man Dibata. Apakah lit i bas kam visi si jauh ke depan guna kiniulin anak jabu? Adi secara materi mungkin melala kam kekelengen kami Mamre si enggo rukur ndauh guna kiniulin anak jabundu. Apakah kam sekalak perbapan si sue kata ras perbahanen? Apakah kam sekalak perbapan si tekun, megenggeng, entah pe tangguh? Enda akap kami erkaiten ras problem solving. Uga caranta mengatasi masalah entah pe pergumulen geluh, sebab anak jabuta pe ngenen caranta mengatasi masalah. Enda akap kami si jadi bahan renungen i bas PA-ta wari si sendah.

Pindolah gegeh i bas Dibata nari gelah ipengasupNa kam jadi sekalak perbapan si jadi usihen, ingan penggurun, idola man ndehara, anak-anak, bage pe kerina kalak si lit isekelewetndu.