SUPLEMEN PJJ GBKP TGL. 20 - 26 AGUSTUS 2023

Pdt. Larena Sinuhadji (Nd. ReyRapha Tarigan)

NERANGKEN KATA DIBATA (Perb. Rasul 8:26-40)

Penaruh

Lit salah sada motto gerakan reformasi Martin Luther nina, “Verbum Domini (Dei) manet in aeternum” ertina Firman Tuhan tetap untuk selama-lamanya, ibuat i bas 1 Pet. 1:25 nari. Semboyan enda si mpegegehi kaum awam pendukung Martin Luther paksa si e guna tetap bertahan mendukung Reformasi Gereja. Semboyan e akap kami tetap relevan seh paksa genduari sebab Kata Dibata memang harus tetap nggeluh i tengah perkembangen jaman. I bas PJJ-ta sendah erlajar kita arah Pilipus ras menteri Etiopia nari kerna pengajaren kiniteken erpalasken Kata Dibata.

Mpebagesi Kata Dibata

Ogenta sendah lit i teruh judul “Pilipus ras menteri Etiopia” (terj. BIMK, “Filipus dengan seorang pegawai tinggi dari Etiopia”; terj. TB-LAI, “Sida-sida dari tanah Etiopia”). Rikutken judul perikop, jelas maka lit dua kalak sebage tokoh utama i bas turi-turin enda eme menteri Etiopia nari ras Pilipus. Guna mbedakenca ras Pilipus si deban i bas Pustaka Si Badia, Pilipus i jenda eme sekalak i bas 7 kalak diaken si ipilih guna nampati rasul-rasul (Perb. Rasul 6:1-7). Selain sebage diaken, Pilipus pe sekalak per-Berita Si Meriah si ipengasup Dibata erbahan tanda-tanda sengget (Perb. Rasul 8:5-8).

Ituriken maka kenca enggo ngelakoken tugas pelayanen guna meritaken Berita Si Meriah i Samaria, isuruh Dibata Pilipus erkelangken MalekatNa gelah lawes Pilipus ku Selatan, ku dalan si i Jerusalem nari ku Gasa, eme dalan si melungen. Amin pe lenga jelas kai kari si man dahinken, Pilipus tetap taat, berkat ia ku ingan si ikataken Malekat ndai. Lit sekalak pejabat kerajaan Etiopia (kepala bendahara Ratu Etiopia) mulih atena Jerusalem nari ku Etiopia. I bas perdalanen iogeken pejabat enda ndai kitab Nabi Jesaya alu sora megang. Emaka isuruh Kesah Si Badia Pilipus guna ndeheri pejabat enda ndai, kenca bage isungkun Pilipus, “Iangkandu nge kai si iogendu e?” Ialoi pejabat ndai nina, “I ja ka nge banci kuangka, adi la lit kalak si nerangkenca man bangku?” Kenca si e, iterangken Pilipus bagin kitab si iogeken pejabat ndai (Jesaya 53:7-8). Iterangken Pilipus maka mesias si ipadanken Dibata eme Yesus Kristus. Kenca enggo ibegiken pejabat ndai Berita Si Mehuli kerna Yesus Kristus, mindo ia gelah iperidiken Pilipus. Bagem garis besar turi-turin i bas ogenta sendah.

Adi sikaitken ras tema PJJ-ta sendah, lit piga-piga hal si iakap kami banci jadi bahan renungenta.

1. Arah pejabat entah pe menteri Etiopia nari, erlajar kita maka nggit pejabat ndai menginvestasiken kinibayakenna guna erlajar Kata Dibata. Paksa si e Pustaka Si Badia labo bagi kita gundari, masih i bas bentuk gulungan-gulungan kitab. Sekalak penafsir Dr. Bob Utley ngatakenca maka kitab Jesaya si itukur pejabat Etiopia ndai gedangna kurang lebih 29 meter, seri ras gulungan-gulungan naskah kitab si idatken i Laut Mati.
2. Arah meteri Etiopia erlajar kita maka amin pe lenga iangkana, nggit ia ngoge kitab Jesaya si enggo iturkurna ndai, janah nggit ia iajari. Enda ncidahkenca minat belajar yang tinggi.
3. Arah Pilipus erlajar kita sada penungkunen si penting, “Iangkandu nge kai si iogenndu e?” Penungkunen enda penting sebab i bas proses erlajar, ngangkai entah pe memahami kai si ipelajari, e nge si harus icapai.
4. Arah Pilipus erlajar kita maka sebage sekalak pengajar, nggit ia ngajari alu tutus seh makana menteri Etiopia ndai ngangkai janah tergerak guna jadi pengikut Kristus. Terjadi perobahen si mehuli i bas kegeluhen arah pengajaren si ibereken Pilipus.

Versi Audio silahkan kunjungi : https://youtu.be/CTT7YZhZI5g

Pengkenaina

Tema i bas PJJ-ta sendah “Nerangken Kata Dibata” akap kami ertujun guna ngingetken kita kerna tugas tanggung jawab Gereja i bas pengajaren kiniteken erpalasken Kata Dibata. Adi rikutken Buku PJJ-ta, salah sada tugas tanggung jawab pengajaren si ilakoken GBKP eme katekisasi. Ngataken bujur kita sebab GBKP enggo ngelaksanaken tugas tanggung jawab pengajaren kiniteken arah katekisasi erpalasken perentah Yesus i bas Mat. 28:20. Enggo iterbitken telu edisi buku katekisasi (adi la kami silap) i bas GBKP. Si pemena e me “Pengajaren Agama Kristen (Katekisasi) I Bas GBKP” si iterbitken tahun 1994. Si peduaken, “Buku Katekisasi Gereja Batak Karo Prostestan” si iterbitken tahun 2007. Ras si peteluken, “Katekisasi Gereja Batak Karo Protestan” si iterbitken sekitar tahun 2015. Sope iterbitken telu buku katekisasi i datas, bahan pengajaren si igunaken i GBKP eme “104 Turi-turin” ras “Katekismus Heidelberg.”

Rikutken Kata Sambutan i bas Buku Katekisasi GBKP terbitan terbaru ikataken, “Katekisasi adalah merupakan sebuah rangkaian proses pertumbuhan iman dalam gereja. Semenjak kecil seorang anak dalam GBKP telah dibawa ke dalam Baptisan Kudus. Ini adalah pintu anugerah Allah mengalir dalam kehidupan seorang anak dalam keluarga Kristen. Pada waktu pembaptisan anak, orang tua berjanji kepada Tuhan di tengah-tengah jemaat bahwa mereka akan membawa anak tersebut ke dalam pengajaran agama Kristen. Katekisasi salah satu wujud dari janji orang tua tersebut. Melalui pembelajaran dalam katekisasi ini, harapan gereja adalah agar seluruh anak kita dapat bertumbuh dalam iman yang benar. Pertumbuhan yang baik akan menghasilkan buah yang baik. Itu yang diharapkan di dalam proses belajar ini.” I bas hal enda lit piga-piga hal si penting akap kami. Si pemena, i bas proses pertumbuhan iman anak harus lit kerja sama si mehuli antara orang tua ras gereja. Si peduaken, proses pertumbuhan iman e akap kami labo terjeng seh anak-anakta KAKR nari bengket ku PERMATA, tapi proses seumur hidup. I bas si e akap kami mehuli adi lit pelajaren katekisasi lanjutan man jemaat dewasa si enggo ingawanken gelah semakin mbages pemahamenna kerna erkiniteken i bas konteks GBKP. Enda akap kami sue ras teladan menteri Etiopia nari si semangat erlajarna kerna Kata Dibata sangat tinggi.

Berikutna i bas alenia selanjutna ikataken nina, “Keaktifan anggota GBKP dalam Tritugas Gereja hingga saat ini hanya sekitar 40%. Di samping penyebab yang lain maka salah satunya adalah kurang seriusnya selama ini gereja kita untuk memberi perhatian kepada proses katekisasi ini. Oleh sebab itu untuk masa yang akan datang diharapkan seluruh pelayan dalam gereja kita Pendeta, Penatua, Diaken, memberi perhatian serius kepada proses pembelajaran ini. Perhatian itu dalam wujud: pemilihan guru yang mengajar sesuai dengan talenta dan kemampuannya; mengadakan pelatihan secara terus-menerus kepada tim pengajar tersebut; materi pelajaran teologi, dogma, dan etika sebaiknya dibawakan oleh Pendeta. Oleh sebab itu bagi BPMR dan Pendeta hendaknya senantiasa memperhatikan waktu dan proses pembelajaran yang berlangsung agar hasil dari pembelajaran anak-anak bisa maksimal.” I bas hal enda akap kami si pemena, erpengarapen kita maka proses belajar mengajar katekisasi i bas GBKP semakin wari reh mejilena. Enda sue ras teladan si enggo icidahken Pilipus i ja ngasup Pilipus nerangken Kata Dibata si maba perobahen si mehuli i bas kegeluhen menteri Etiopia. Si peduaken, erlajar ka kita arah menteri Etiopia nari i ja nggit ia menginvestasikan kinibayakenna guna erlajar Kata Dibata. Ertina dukungan dana guna semakin meningkatken kualitas pengajaren i bas katekisasi harus tuhu-tuhu iperdiateken.

Mari radu ras terus sitotoken ras sidukung gerejanta i bas nehken tanggung jawab pengajarenna gelah tambah warina reh tambahna kualitas pengajarenna kerna Kata Dibata si jadi sumber kinitekenta man Tuhanta Yesus Kristus.